Report Dagiti Manangiwaragawag ti Pagarian
Panangdanon Kadagiti Nasulinek a Purpurok ti Greenland
ITI las-ud ti adun a dekada, ar-aramaten dagiti Saksi ni Jehova dagiti magasin a Pagwanawanan ken Agriingkayo! iti panangikasaba iti naimbag a damag. Itan-ok dagitoy a pagiwarnak ti sirib ni Jehova kas nayebkas iti Saona, ti Biblia. Sipsiputanda dagiti pasamak iti lubong a nainaig iti padto ti Biblia, ken iyaplikarda dagiti nainkalintegan a pammagbaga ti Biblia kadagiti agdama a parikut.—Santiago 3:17.
Idi 1994, nangaramid dagiti Saksi idiay Greenland iti naisangsangayan a panagregget nga itukon Ti Pagwanawanan ken Agriingkayo! iti adu a tattao aginggat’ mabalin. Kabayatan ti kalgaw, sinarungkaranda dagiti kasusulinekan a purpurok idiay Greenland. Nagdaliasat ti maysa a bunggoy dagiti manangiwaragawag ti Pagarian babaen ti bangka iti nasurok nga 4,000 a kilometro iti makinlaud a kosta nga agturong idiay Qaanaaq (Thule), a dinanonda ti dadduma kadagiti komunidad nga adda iti kaamiananan a paset ti globo. Nagbiaheda iti pito a lawas. Iti makindaya a kosta, maysa a pagassawaan a Saksi ti nakadanon iti purok ti Ittoqqortoormiit ket iti kaunaan a gundaway, sistematiko a sinaknapanda daytoy iti naimbag a damag.
Iti nasapsapa a paset dayta a tawen, iti bulan ti Abril, 7,513 a kopia Ti Pagwanawanan ken Agriingkayo! ti naipaima kadagiti tattao ti Greenland. Kaipapanan dayta nga, iti promedio, tunggal maysa kadagiti 127 nga agibumbunannag iti Pagarian ket nakaipaima iti 59 a magasin—1 a magasin iti kada 7 nga agindeg. Iti dayta a bulan, intampok ti Agriingkayo! ti maysa a serie dagiti artikulo iti sidong ti paulo iti akkub a “Kanser ti Suso—Pagam-amkan ti Isuamin a Babbai.” Maysa a Saksi, a nakaipaima iti 140 a magasin, ti nangibati kadagiti kopia dayta nga Agriingkayo! iti maysa a reporter ti telebision. Kalpasan ti dua nga aldaw, intampok ti maysa a programa ti damdamag iti telebision dagiti artikulo iti kanser ti suso. Ti reporter imparangna ti magasin iti telebision, nga impakitana ti sumagmamano a panid bayat a pinadayawanna ti kalidad ti pannakaipatarusna iti Greenlandic. Intampokna met dagiti praktikal a singasing nga impaay ti Agriingkayo! kas pangsaluad iti salun-at.
Nainterbiu ti Saksi nga immuna a nakaipaima kadagiti magasin iti reporter iti isu met laeng a programa iti TV. Sinungbatanna ti adu a saludsod maipapan kadagiti Saksi ni Jehova ken dinakamatna ti nasaknap a panagiwaras kadagiti magasin iti dayta a bulan. Isut’ nagkomento met maipapan iti praktikal a sirib a masarakan iti Biblia ket impakitana a ti kasta a nainkalintegan a balakad matulongannatay a mangsaranget kadagiti agdama a parikut.
Nagngudo ti programa babaen ti maysa nga interbiu iti presidente ti Greenlandic Cancer Society. Kinunana nga ita laeng a nakakita iti kasta a nagsayaat ken makaisuro a material maipapan itoy a tema iti pagsasaona. Kalpasanna, inawisna amin dagidiay interesado maipapan iti kanser ti suso a basaenda dagiti artikulo ti Agriingkayo! Kinunana nga adda naimbag a rason tapno agyaman kadagiti Saksi ni Jehova gapu iti panangyussuatda.
Kas idiay Greenland, agtultuloy dagiti Saksi ni Jehova iti aglikmut ti lubong a mangikaskasaba iti naimbag a damag “kadagiti isuamin a parsua nga adda iti baba ti langit.” (Colosas 1:23; Aramid 1:8) Babaen ti literatura ti Biblia, a pakairamanan Ti Pagwanawanan ken Agriingkayo!, tulonganda ti isuamin a kita dagiti tattao a mangsaranget kadagiti agdama a parikut ken kasta met nga ipaayanda ida iti namnama iti nasaysayaat a masanguanan.
[Mapa iti panid 8]
(Para iti aktual a pannakaurnosna, kitaem ti publikasion)
Qaanaaq (Thule)
Ittoqqortoormiit
Nuuk (Godthåb)