Pappapardasen Dagiti Matalek a Sangakabbalayan ti Irarang-ay Idiay Sri Lanka

PAGAAMMO kas Ceylon agingga idi 1972, ti Sri Lanka ket maysa a nakaay-ayat a puro nga addaan kadagiti playa a napaintaran kadagiti kayo a palma, kabambantayan, ken babassit a disierto. Iti kabambantayan, ti Adam’s Peak, a 2,243 a metro ti kangatona, ket maysa a disso a nasantuan kadagiti uppat a kangrunaan a relihion.a Asideg sadiay ti World’s End, maysa a derraas nga addaan iti nabato a rangkis a nasurok a 1,500 a metro ti kangatona. Daytoy a disso ti maysa kadagiti kapintasan a buya idiay Sri Lanka.

Ti 18 a milion nga agindeg iti Sri Lanka ket addaanda iti makapainteres a nalikudan. Sipud pay idi maikalima a siglo K.K.P., nagnaeden iti puro dagiti tattao nga Indo-European a naggapu idiay makin-amianan nga India. Isuda dagiti Sinhalese, a buklenda itan ti agarup mamitlo a kakapat ti populasion. Kalpasanna, manipud kadagiti immun-una a siglo agingga iti maika-12 a siglo, immay dagiti Tamil manipud iti makin-abagatan nga India; kaaduan kadagitoy ti agnanaeden iti amianan ken makindaya a paset ti puro. Nangibati met dagiti Portuges, Olandes, ken Britano kadagiti manayon nga impluensia kadagidi kaaldawan ti kolonia. Nakipagnaed met sadiay dagiti marino a negosiante manipud kadagiti puro ti Arabia ken Malaya. Adda met babassit a bunggoy dagiti Europeo, Parsis, Insik, ken dadduma pay.

Malaksid iti panaglalaok dagiti pulí, ti pagsasao ken relihion idiay Sri Lanka iyanninawna ti nagduduma a nagtaudan daytoy. Sinhalese, Tamil, ken Ingles ti kangrunaan a pagsasao iti puro. Makapagsao ti adu a taga-Sri Lanka iti uray dua kadagitoy a tallo [a pagsasao]. Dakkel met ti impluensia dagiti etniko a nalikudan iti relihion dagiti tattao. Kaaduan a Sinhalese ket Budista, idinto ta kaaduan a Tamil ket Hindu. Islam ti gagangay a kaykayat dagidiay Arabo wenno Malayan, ket kaaduan kadagiti Europeo ti kameng dagiti iglesia ti Kakristianuan, Katoliko ken Protestante.

Panangsango iti Karit

Mangipasango amin dagitoy iti dakkel a karit kadagiti Saksi ni Jehova idiay Sri Lanka. Sipipinget a tungtungpalenda ti bilin ni Jesus a: “Daytoy naimbag a damag ti pagarian maikaskasabanto iti isuamin a mapagnaedan a daga a maipaay a pangsaksi kadagiti isuamin a nasnasion.” (Mateo 24:14) Malaksid iti pannakaipasango iti adu a pagsasao, dagiti agibumbunannag iti naimbag a damag mabalin a makasaritada dagiti Budista, Hindu, miembro dagiti iglesia ti Kakristianuan, kasta met dagiti ateista​—iti las-ud ti sumagmamano nga oras a panangasabada.

Tapno epektibo iti ministerioda, masapul nga itugot dagiti agibumbunannag dagiti magasin a Pagwanawanan ken Agriingkayo! ken dadduma pay a literatura ti Biblia iti Tamil, Sinhalese, ken Ingles. Dagidiay agibumbunannag a makabael nga agawit iti nadagsen itugotda pay dagiti Biblia kadagidiay a pagsasao. Naragsakan unay dagiti agibumbunannag itay nabiit idi nairuar dagiti broshur a Pudno Aya a Maseknan ti Dios Kadatayo? ken Our Problems​—Who Will Help Us Solve Them? ken ti tract a Daytoy Kadi a Lubong Makalasatto? a naggigiddan a nairuar iti tallo a pagsasao. Kaipapanan daytoy ti ad-adu pay nga alikamen iti ministerio.

Agtartrabahon a sipipinget dagiti Saksi sipud pay idi 1912, idi simmarungkar iti apagbiit idiay Ceylon ni Charles Taze Russel, ti agdama idi a presidente ti International Bible Students Association. Nupay kasta, sa la naaramid ti naiduma nga irarang-ay idi dimteng dagiti nagturpos iti Watchtower Bible School of Gilead idi 1947. Manipud idin, tinagiragsak dagiti agibumbunannag idiay Sri Lanka dagiti nasayaat a resulta ti trabahoda a panangasaba. Idi 1994, nangidaulo dagiti 1,866 nga agibumbunannag iti Pagarian iti promedio a 2,551 a panangyadal iti Biblia iti pagtaengan kada bulan. Ken ti timmabuno iti Memorial a 6,930 ket gistay mamimpat a daras nga ad-adu ngem iti bilang dagiti agibumbunannag iti amin a kongregasion idiay Sri Lanka. Anian a nakaskasdaaw a bendision!

No maidilig iti dadduma pay a pagilian, kasla nabannayat ti irarang-ay idiay Sri Lanka. Agparang a ti maysa a makagapu isut’ natibker a relasion ti pamilia. Nupay kasta, adda met pagimbaganna daytoy. Idi dimmasig iti kinapudno ti Romano nga opisial ti buyot a ni Cornelio, simmurot met kenkuana ti sangakabbalayanna. (Aramid 10:1, 2, 24, 44) Dakamaten met ti libro dagiti Aramid ti dadduma pay a natibker a Kristiano a sangakabbalayan, a pakairamanan da Lidia, Crispo, ken ti nangibalud kada Pablo ken Silas.​—Aramid 16:14, 15, 32-34; 18:8.

Kinapudnona, ti natibker a singgalut ti pamilia mabalin a mangyeg iti pagimbagan no adda nasayaat nga urnos ken matalek a kinapinget. Silalagip iti sasao ti Isaias 60:22, kuna ti nabayagen a misionero a ni Ray Matthews: “Kasla pappapartaken itan ni Jehova ti bambanag iti umiso a tiempo, saan laeng a babaen kadagiti indibidual no di pay ket babaen kadagiti sangakabbalayan.”

Ti Naurnos a Pamilia Mangyeg iti Dayaw

Pudno nga adda dagiti kasta a matalek a sangakabbalayan idiay Sri Lanka itatta. Kas pagarigan, adda sadiay ti nakaur-urnos a pamilia Sinnappa nga agnanaed idiay Kotahena, maysa a lugar iti Colombo, ti kangrunaan a siudad ti Sri Lanka. Nupay natayen ti ulo ti pamilia a ni Marian iti di pay nabayag, intultuloy ni baketna nga Annamma, ken ti 12 kadagiti 15 nga annakda, nga agedad iti 13 agingga iti 33, ti agserbi ken Jehova kas maysa a sangakabbalayan. Iti agdama, walo kadagiti annak ti nabautisaranen, ket tallo kadakuada ti adda iti amin-tiempo a ministerio, nga agserserbi kas regular pioneer. Masansan nga ag-auxiliary pioneer dagiti tallo a sabsabali pay. Kadagiti agtutubo iti sangakabbalayan, uppat ti di pay bautisado nga agibumbunannag. Mainayon pay, uppat nga appoko, nupay nakaub-ubingda pay, ti makipagad-adal iti Biblia ken tumabtabuno kadagiti Nakristianuan a gimong dagiti Saksi ni Jehova idiay Colombo North Congregation.

Damo a nangngegan ni Annamma ti naimbag a damag ti Pagarian idi 1978, idi inawatna ti maysa a kopia Ti Pagwanawanan. Nairugi ti panagadal iti Biblia, ket idi naturposnan ti katulongan iti panagadal iti Biblia a Ti Kinapudno a Mangiturong iti Biag nga Awan Inggana, indedikar ni Annamma ti biagna ken Jehova a Dios ket nabautisaran, gapuna a nangituyang iti immuna a pagtuladan kadagiti adu iti sangakabbalayanna.

Kas iti soldado a ni Cornelio, adda nasayaat nga urnos iti sangakabbalayan ni Annamma. “Kasapulan nga agplanokami maipaay kadagiti Nakristianuan a gimong ken asamblea​—malaksid pay iti eskuelaan,” malaglagip ni Annamma. “Parikut idi ti pagkawes, ngem babaen ti pammendision ni Jehova naaddaankami iti sumagmamano a baro a kawes iti tunggal asamblea. Sumangpet ti intero a pamilia a nasayaat ti pannakakawes ken pannakataraonda​—ken nakaragragsakda met.”

Sipapanunot dagiti annak iti urnos ti sangakabbalayanda a buyogen iti ayat. Tapno matulongan ti intero a pamilia a tumabuno kadagiti Nakristianuan a gimong, naikkan dagiti natataengan kadagiti naisangsangayan a responsabilidad. Kas pagarigan, ni Mangala ti aglaba, ket ni Winnifreda ti agplansa. Kuna ni Winnifreda, a tumultulong met a mangpelles kadagiti addina: “Talaga a mayat ti postura ti tunggal maysa bayat a pumanawda iti pagtaengan.”

Nasayaat met ti pannakaurnos dagiti naespirituan a probision. Malaglagip ti anak a babai a ni Pushpam, a maysa itan a regular pioneer: “Inaldaw a tinagiragsak ti pamiliami ti panangbasa iti Biblia ken panangrepaso iti inaldaw a teksto ti Biblia a sangsangkamaysa.” Innayon ni Annamma: “Addaan ti tunggal ubing iti bukodna a Biblia, Ti Pagwanawanan, ken dadduma pay a publikasion. Agimdengak a naimbag iti amin a komentoda kadagiti gimong. No makitak a nasken, pasarunuak ti pammaregta ken panangilinteg idiay pagtaengan. Agtitiponkami iti rabii tapno turposenmi ti agmalmalem babaen ti panagkararagmi a sangapamiliaan.”

Nakapatpateg dagiti natataengan nga annak iti panangtulong ken ni Annamma a mangipaay iti nasayaat a Nakristianuan nga edukasion iti amin iti pamilia. Nupay kasta, ti okupado nga iskediul saanna a lapdan ti tarigagayda a mangiranud iti naimbag a damag iti ruar ti pagtaengan. No gupgopen, mangidadaulo ti nadumaduma a kameng ti pamilia iti 57 a panangyadal iti Biblia iti pagtaengan kadagiti tattao iti lugarda. Kuna ti manugang a ni Rajan: “Mangidadaulo ti pamilia kadagiti narang-ay a panangyadal iti Biblia. Naaddaanen ni Pushpam a baketko iti pribilehio a makakita iti maysa kadagiti iyad-adalanna a nangidedikar iti biagna ken Jehova.”

Nasdaaw dagiti tattao idiay Kotahena idi pimmanaw iti Iglesia Katolika Romana ti kasta a nagdakkelan a pamilia. Nupay saan a pulos a simmarungkar ti mismo a padi iti pamilia tapno ammuenna no apay a pimmanawda iti iglesia, kiniddawna kadagiti miembro ti iglesia nga agimtuodda. Nangibunga daytoy iti sumagmamano a diskusion, a kaaduanna ket maipapan iti doktrina a Trinidad. Kanayon a nagpannuray ni Annamma ken Jehova ken iti Biblia a mangikalintegan iti pammatina. Ti Juan 17:3 ti kasuratan a pagay-ayatna kadagitoy a diskusion.

Nabatad nga ipakpakita ti sangakabbalayan ti Sinnappa a ti nasayaat nga urnos ken ti di agbalbaliw a panagregget mabalin a mangyeg kadagiti makapnek a resulta. Babaen ti napinget a panagreggetda, dumakdakkel ti maysa a baro a kaputotan dagiti agibumbunannag iti Pagarian, a pakaidayawan amin ni Jehova.

Ti Ibubusor Pagkaykaysaenna ti Pamilia iti Pudno a Panagdaydayaw

Ti sangakabbalayan a Ratnam ket saan unay nga adayo manipud kadagiti Sinnappa, idiay Narhenpitya, sabali pay a lugar iti Colombo. Datida met a Romano Katoliko. Idi 1982, nasarakan dagiti Saksi a namalaybalay iti ministerio ni Balendran, asawa ti inauna nga anak a babai, ni Fatima. Nairugi ti panangyadal iti Biblia iti intero a pamilia. Di nagbayag, salsaludsodanen dagiti tallo nga annakda ni Lola Ignasiamal maipapan iti nagan ti Dios. Idi inted dagiti ubbing ti sungbat a “Jehova,” tinukayda ti interes ni Lola, ket nairugi ti panangyadal iti Biblia kenkuana. Idi agangay, nakipagadal ti dua kadagiti babbalasangna, da Jeevakala ken Stella, ket nabautisaranda a tallo idi 1988.

Kabayatanna, inranud da Balendran ken Fatima ti kinapudno iti sabsabali pay a babbai nga adingen ni Fatima, da Mallika ken ni lakayna a Yoganathan. Nabautisaran dagitoy nga agassawa idi 1987, ket intukitda kadagiti dua nga annakda ti dumakdakkel a panagayat ken Jehova. Simmaruno met a dimteng iti kinapudno ti sabali pay nga adingen ni Fatima, ni Pushpa. Isut’ nagdedikar ket nabautisaran idi 1990. Bayat ti kaaddana idiay Tokyo, nagserbi ni lakayna nga Eka iti Ingles a kongregasion, ken tinulongan ni Pushpa ti agtutubo nga anakda a ni Alfred, tapno mapadakkel iti dalan ni Jehova.

Uppat kadagiti sangapulo nga annak ti pamilia Ratnam ti dimmasigen iti pudno a panagdaydayaw. Makaparagsak ta nasayaat ti irarang-ay ti tallo pay kadakuada iti personal a panagadalda iti Biblia. Kadagiti 11 nga appoko, nabautisaranen ti maysa a balasitang a ni Pradeepa. Dagiti pito a sabsabali pay nga ubbing ket regular a maisursuroda babaen kadagiti panagadal ti pamilia iti Biblia. Mainayon pay, agdagup iti 24 a panangyadal iti Biblia ti maidadaulo kadagiti interesado a tattao iti lugarda.

Amin daytoy ket saan a nagbalin a nalaka. Adda ibubusor ti pamilia idi damo. Nakaro unay idi ti ibubusor ti ama, ni Muthupillai, ken dagiti natataengan a kakabsat a lallaki iti asinoman iti pamiliada a tumabuno kadagiti gimong iti Kingdom Hall wenno makiraman iti trabaho a panangasaba iti publiko. Nupay dadduma kadagitoy nga ibubusor ket gapu iti pannakaseknan iti personal a kinatalged, innayon ni Muthupillai: “Naan-anay a naitulagak kadagiti ‘sasanto’ ket saanda nga anamongan ti pamiliak a tumalaw iti Iglesia Katolika.” Nupay kasta, patienna itan nga agdaydayawda iti pudno a Dios gapu ta makitana dagiti gunggona nga inyeg kadakuada ti pammatida.

Kas pagarigan, ginandat naminsan ti Budista nga akinkukua iti pagnanaedanda a pagtalawenna ida iti lotena babaen ti panangaramatna kadagiti anting-anting. Isut’ dimteng iti maysa a rabii ket nangikabil kadagiti “anting-anting” a bunga ti kalamansi iti aglikmut ti balay. Napabutngan dagiti managan-anito a kaarruba, a manginanamada amin iti naladingit a pagteng nga umapay iti sangakabbalayan ti Ratnam. Nupay kasta, idi natakuatan daytoy ni Ignasiamal, kaduana dagiti annakna a basta nangikkat laeng kadagiti bunga a dida man la nagbuteng wenno nagdanag​—ket awan dakes a napasamak kadakuada. Ti kinaturedda ket maysa a dakkel a pammaneknek iti lugarda, a nangtignay kadagiti tattao a mangraem unay kadakuada. Nakairugi ni Stella iti dua a panangyadal iti Biblia iti pagtaengan iti kaarrubada. Naparegta iti daytoy, nakipagadal met iti Biblia ti manugang a ni Nazeera a babai.

Iti pananglagipna kadagiti adu a bendision a dimteng iti pamiliana, kuna ni Ignasiamal: “Maragsakanak unay a makakita iti naespirituan nga irarang-ay ti pamiliami. Binendisionannakami ni Jehova gapu ta saan unayen a nakaro ti ibubusor, ken simmayaat ti panagkaykaysa ti pamiliami.”

Anian a bendision dagitoy a dadakkel a sangakabbalayan. Timmiponda kadagidiay pamilia a babbabassit, pamilia nga addaan iti agmaymaysa a nagannak, ken agwaywayas a Kristiano a mangikagkagumaan a mangpapartak iti pannakaiwaragawag ti naimbag a damag ti Pagarian iti “rumimrimat a daga,” kas kayulogan ti nagan a Sri Lanka. Kaduada dagiti padada a Kristiano iti sangalubongan, dagiti taga-Sri Lanka a Saksi padpadaananda ti pannakaisubli ti Paraiso, a mailadawantay uray itan bayat a makitatayo dagiti playa ken kabambantayan ti nagpintas a Sri Lanka.

[Footnotes]

[Dagiti Ladawan iti panid 24, 25]

Adu idiay Sri Lanka ti mangipang- pangag iti Nakristianuan a panangasaba ken panangisuro