Report Dagiti Manangiwaragawag ti Pagarian
Maidadanesto Dagiti Pudno a Kristiano
NANIPUD idi kaaldawan ni Abel, adu kadagiti adipen ni Jehova ti nagibtur iti narelihiosuan a panangidadanes. (Lucas 11:49-51) Ket saan a pakasdaawan dayta, ta mamakdaar ti Biblia nga “amin dagidiay agtartarigagay nga agbiag buyogen ti nadiosan a debosion a mainaig ken Kristo Jesus maidadanesdanto met”! (2 Timoteo 3:12) Maitunos iti dayta, itatta iti nasurok a 25 a pagilian, napawilan ken agib-ibtur iti pannakaidadanes dagiti Saksi ni Jehova.
Iti maysa a pagilian a sadiay dagiti Saksi ni Jehova ket saan laeng a napawilan no di pay ket idaddadanes dagiti relihionista, nasurok a 12,000 nga agibumbunannag ti naimbag a damag ti nagtultuloy nga agtrabaho a sireregta, a nasurok a 15,000 a tattao ti iyad-adalanda iti Biblia. Siempre, siaannad a maar-aramid ti trabahoda a panangasaba. Kaaduanna, angayenda dagiti Nakristianuan a gimongda kadagiti pribado a pagtaengan, ken naannadda no mangawisda kadagiti interesado a tattao iti kakasta a gimong.
Iti nabiit pay limmukay bassit ti panangtrato ti gobierno kadagiti Saksi, nga itan adu ti maaramidanda iti trabahoda nga awan naranggas a panangsinga. Nupay kasta, inaramat ti nadumaduma a narelihiosuan a grupo ti impluensiada a mangriribuk.
Iti maysa a siudad nagturong ti maysa a makapungtot a grupo ti managderraaw a buklen ti 200 a relihioso a panatiko iti maysa a balay a sadiay agarup 50 a Saksi ni Jehova ti aggigimong iti kongregasion. Adda bato nga iggem ti dadduma kadagiti managderraaw ken ipukpukkawda dagiti narelihiosuan nga slogan. Ti nabatad a panggepda isut’ panangraut kadagiti Saksi ken panangdadaelda iti balay. Agparang a nabayag bassit a panawenen a pinalpaliiw dagiti narelihiosuan a pangulo ti panaggigimong ket intiempoda laeng ti mangraut. Dandanin makastrek iti balay dagiti managderraaw idi simmangpet ti 15 a polis ket pinagsisinada ti bunggoy. Daytoy ti namagsiddaaw kadagiti Saksi, tangay awan a pulos kadakuada ti naaddaan gundaway nga umawag iti polis.
Kadagiti sabali a gundaway, nupay kasta, nabalballigi dagiti bumusbusor. Sumagmamano a Saksi ti naisaklang iti korte ken nasentensiaan a maibalud. Maysa a kaso iti korte ti naitantan iti sumagmamano a tawen, ket agparang a saanen nga interesado dagiti parausig iti dayta. Nupay kasta, iti panangsugsog dagiti klero iti dayta a lugar, nausig manen daytoy iti korte, ket nasentensiaan ti Saksi iti pannakaibalud.
Iti maysa pay a lugar, nagtataripnong ti grupo dagiti Saksi iti pribado a pagtaengan tapno lagipenda ti Pangrabii ti Apo. Di nagbayag iti dayta a rabii, inaresto ti sumagmamano a polis ti bumalay ken ti panglakayen a nangidaulo iti gimong. Idiay estasion ti polisia, nakaro ti pannakakabkabilda. Nagpaut iti sumagmamano nga oras ti naulpit a panagusisa. Inibturan met ti maysa kadagiti Saksi ti tuok iti pannakaipisok iti maysa a bubon a nakalamlamiis.
Apay a maaramidan dagiti polis ti kasta nga iraraut? Manen, maysa a grupo dagiti relihioso a panatiko, babaen ti tulong ti lokal a klero, ti adda iti likudan ti panagtignay ti polisia. Idi ud-udina impalgak ti hepe ti polisia a naaramid dagiti panangaresto nga awan ti pammalubosna. Naaramid ti panagpadispensar, ket nadisiplinaan dagiti tao a responsable kadagiti panangkabil.
Iti intero a lubong itultuloy dagiti Saksi ni Jehova nga ikaskasaba ti naimbag a damag ti Pagarian ti Dios, uray iti sango ti naranggas nga ibubusor. Ipangagda ti balakad ni Jesus: “Adtoy! Ibaonkayo a kas karnero iti nagtetengngaan dagiti lobo; ngarud paneknekanyo ti bagbagiyo a naannad a kas kadagiti serpiente ket kaskasdi a nasingpet a kas kadagiti kalapati.”—Mateo 10:16.
[Ladawan iti panid 31]
Ni Abel ti immuna a naidadanes