‘O, no Tunggal Maysa Koma ket kas Kadakuada!’
Daytoy ti kinuna ti maysa a kolumnista iti warnakan ti Luxembourg a Letzebuerger Journal. Siasino dagiti dakdakamatenna?
Isut’ naggapu idiay Poland tapno tumabuno iti selebrasion ti maika-50 nga anibersario ti wayawaya ti Auschwitz ket nadlawna a saan a pulos a nadakamat ti maysa a grupo a nagsagaba iti nakaro sadiay. Iti column-na iti Pebrero 2, 1995, impabigbigna a daytoy a grupo ket Saksi ni Jehova, ket insuratna: “Uray pay ti karirigatan a pannakaibalud wenno kampo konsentrasion, wenno ti pangta iti nakaay-ay-ay nga ipapatay gapu iti bisin iti pagbaludan wenno ipapatay iti wasay wenno guillotine ket saanna a pulos a mapagtallikud ida iti pammatida.” Intuloyna: “Uray dagiti nadangkok a guardia nga SS ket nagsiddaawda iti tured dagiti Saksi ni Jehova agingga iti ipapatayda.”
Di tinarigagayan dagiti Saksi ni Jehova ti agbalin a martir. Ngem kas kadagiti Kristiano idi umuna a siglo, rinibu kadakuada ti nangpili iti ipapatay imbes nga ikompromisoda dagiti Nakristianuan a prinsipio. Ti kasta a pammati isut’ nangilasin kadakuada kas naiduma unay kadagidi a nalidem nga al-aldaw ti Nazi a turay.
Inngudo ti kolumnista: “O, no amin a tattao koma ket kas kadagiti Saksi ni Jehova!” No koma ta kasta, pulos a di koma napasamak ti maikadua a gubat sangalubongan.