Ti Maadal Kadagiti Tumatayab ken Sabsabong

ANIAT’ masansan a kangrunaan a pakaseknan dagiti tattao itatta? Para iti kaaduan, isut’ kaadda ti umdas a kuarta a pagbiag ti pamiliada wenno ti irarang-ay ti panagbiagda.

Ti panagsapul iti pagbiag isu met ti kangrunaan a pakaseknan idi adda ni Jesu-Kristo ditoy daga. Ngem imballaagna a daytoy nainkalintegan a pannakaseknan ket posible nga agbalin a nalabes unay a pakaringgoran a manglapped kadagiti naespirituan a banag. Tapno mayilustrarna ti kayatna a sawen, kinuna ni Jesus kadagiti adalanna nga imutektekanda a naimbag dagiti tumatayab ken sabsabong.

Kasapulan a mangan dagiti tumatayab iti inaldaw​—a no ibagay iti kinabassitda ket ad-adut’ makanda ngem kadatayo gapu iti napartak a metabolismoda. Maysa pay, saanda a makapagmula iti bukel, agani, wenno agipempen iti taraon para iti masanguanan. Kaskasdi, kas kinuna ni Jesus, ‘ti nailangitan nga Amatayo taraonanna ida.’ (Mateo 6:26) Kasta met, kinawesan ti Dios iti kasasayaatan a kawes dagiti nagpipintas a “lirio iti talon.”​—Mateo 6:28-30.

Ipanamnama ni Jesus kadatayo a no umiso ti panangmatmattayo kadagiti material a pakasapulan ket iyun-unatay dagiti naespirituan a banag, ipasigurado ti Dios a maaddaantayo met kadagiti kasapulan a taraon ken pagkawes. No maseknan ni Jehova a Dios kadagiti tumatayab ken sabsabong, sigurado nga aywananna dagidiay agayat kenkuana ken ‘agtultuloy a mangsapsapul nga umuna iti pagarian ken ti kinalintegna.’ (Mateo 6:33) Ipakpakitayo kadi nga iyun-unayo dagiti interes ti Pagarian iti biagyo?