Ubbaw a Ritual?
ADUN a siglo nga al-alagaden dagiti Katoliko ti sakramento ti panagkompesar. Ngem para iti adu, maysa dayta nga awan mamaayna a rutina. Iti pananglaglagipna iti kinaagtutubona, kuna ni Bob, maysa a prinsipal iti high school: “Uray pay idi tin-edyerak, diak ibilbilang dayta a serioso a banag.” Apay a saan? Para kenkuana, ti panagkompesar ket maysa nga ubbaw a ritual. Ilawlawagna: “Ti panagkompesar ket umasping iti panangipanmo iti amin a bagahem a napno kadagiti basol iti maysa a lalaki iti aduana idiay eropuerto. Pagsaludsodannaka maipapan kadagiti basolmo sanaka palubosan kalpasan ti panangbayadmo iti buis kadagiti ginatangmo bayat ti kaaddam iti sabali a pagilian.”
Umasping iti dayta, iti panagsurat ni Frank Wessling iti U.S. Catholic, deskribirenna ti panagkompesar kas “maysa a napabassit unay a natukantukad a giya, manipud pannakaikkat dagiti gagangay a basol babaen ti inkabesa a kararag ti panagbabawi agingga iti ritual nga aramid ti pammarang a panagpenitensia.” Ti konklusion ni Wessling? “Kumbinsidoak a ti Panagkompesar ket makagunggona iti kararua,” kunana. “Ngem ti parikut isut’ pamay-an a panangaramid dagiti Katoliko iti dayta.”
Idatag ti Biblia ti panagkompesar iti naan-anay a naiduma a pamay-an. Ti kapatgan amin isut’ panagkompesar iti Dios. (Salmo 32:1-5) Ket insurat ti Kristiano nga adalan a ni Santiago: “Adda aya asinoman a masaksakit kadakayo? Ayabanna koma dagiti lallakay iti kongregasion, ket ikararaganda koma, nga isu sapsapuanda iti lana iti nagan ni Jehova. Gapuna sipapanayag nga ipudnoyo iti maysa ken maysa dagiti basolyo ket ikararaganyo ti maysa ken maysa, tapno maimbagankayo.”—Santiago 5:14, 16.
Ti maysa a Kristiano a madagdagsenan iti basol mabalinna nga awagan dagiti manangaywan iti kongregasion, a makaipaay iti personal ken praktikal a balakad manipud iti Biblia a tumulong iti nagbasol a mangiwaksi iti dakes a kursona. Makaipaay dagiti manangaywan iti maitutop a pammaregta bayat a kitkitaenda ti irarang-ay ti maysa a masakit iti naespirituan. Anian a naiduma iti seremonial a ritual ti panagkompesar nga al-alagaden dagiti iglesia itatta! Gapu iti pannakapabilegda iti personal a tulong dagiti panglakayen iti kongregasion, dagiti sibababawi a managbasol mabalinda a gun-oden ti bang-ar a narikna ni David, kas nayebkas iti salmona: “Binigbigko ti basolko kenka, ket ti kinadakesko diak inlinged. Kinunak: ‘Ipudnokto dagiti salungasingko ken Jehova.’ Ket sika pinakawanmo ti kinakas-ang ti basolko.”—Salmo 32:5.