Kitaenyo! Maysa a Kingdom Hall Idiay Niue

TI Niue ket maysa a bassit nga isla ti korales iti Abagatan a Pacifico, 2,160 kilometro iti amianan a daya ti New Zealand. Sigun iti maysa a brosyur iti panagbiahe, nagtaud ti nagan a Niue iti dua a sao a, Niu, kayatna a sawen “niog,” ken e, kayatna a sawen “matmatan,” wenno “kitaen.” Kuna ti broshur: “Sigun iti sarsarita, dagitoy a sasao ket inyebkas dagiti immuna a nagindeg a Polynesian apaman a simmangpetda idi makitada dagiti niog nga adda iti daga.”

Itatta, maragsakan dagiti Saksi ni Jehova idiay Niue a mangibaga kadagiti bisita, “E! Fale he Kautu ha mautolu!” kayatna a sawen, “Kitaenyo! Ti Kingdom Hall-mi!” Apay a kasta la unayen ti ragsakda maipapan iti daytoy a pasdek? Maipagpannakkel dagiti Saksi ni Jehova iti sadinoman dagiti Kingdom Hall-da, nangruna no isuda a mismo ti nangibangon. Ngem naiduma unay a banag ti mangibangon iti Kingdom Hall iti nasulinek nga isla iti tengnga ti nalawa nga Abagatan a Pacifico. Iti laksid dayta, 260 a kilometro kuadrado laeng ti kadakkel ti Niue, ken 2,300 laeng a tattao ti agnanaed iti intero nga isla.

Parikut idi sadiay no asino ti mangibangon iti Kingdom Hall. Addaan laeng iti 32 a Saksi ti maysa a kongregasion idiay Niue. Kukua ti gobierno dagiti amin a kangrunaan nga alikamen a kasapulan, kas kadagiti trak, bulldozer, ken crane. Maysa pay, gistay amin a kasapulan a materiales a pagibangon​—landok, bloke a semento, pagatep, materiales iti elektrisidad ken tubo, alikamen iti sound, ken tugtugaw​—ket kasapulan a maibiahe manipud New Zealand iti serbisio nga agandar laeng iti maminsan iti tunggal lima a lawas. Kamaudiananna, ti nakabatbato nga isla isut’ mamagbalin a narigat ti panagibangon, ken kasapulan a maibangon ti pasdek a makaandur kadagiti tropikal a bagyo. Pudno a narigat a trabaho para iti asinoman!

Nupay kasta, adda nangnangruna a naiduma ditoy. Para kadagiti Saksi ni Jehova, ti Kingdom Hall isu ti lokal a sentro ti pudno a panagdaydayaw, ken agpannurayda iti panangiwanwan ken tulong ni Jehova a Dios. (Salmo 56:11; 127:1) Dagiti Kristiano a kakabsat idiay New Zealand, a pakairamanan dagiti kameng ti maysa a kongregasion dagiti taga-Niue idiay Auckland, tinulonganda ti bassit a bunggoy dagiti Saksi idiay Niue, nga impaayda ti naimpusuan a suporta iti proyekto a panagibangon.

Ti Pangngeddeng a Mangirugi

Idi Hunio 1994, iti maysa a pakaibangbangonan ti Kingdom Hall idiay Rotorua, New Zealand, naipakaammo ti awis kadagidiay interesado a makiraman iti proyekto idiay Niue. Makapasiddaaw, 200 a Kristiano a kakabsat a lallaki ken babbai ti nagboluntario. Manipud kadagitoy, 80 a tattao ti napili, a pakairamanan dagiti allawagi, steel worker, tubero, managatep, pumapalitada, pintor, electrician, sound technician, mason, kantero, ken trabahador.

Nagplano dagiti kakabsat sada napan, a sipapannuray ken Jehova. Maysa kadagiti dua a panglakayen ti kongregasion ti Niue, a lokal a negosiante, rinugianna dagiti urnos ti pannakaibiahe ti amin a kasapulan a materiales. Naitulag ti naisangsangayan nga air-travel/accommodation fare para kadagiti trabahador nga aggapu iti ballasiw ti taaw, a nagboluntario a mangbayad kadagiti bukodda a gastos, sa nayurnos dagiti petsa ti panagibangon. Masapul a makompleto ti proyekto iti 20 nga aldaw, manipud Marso 4 agingga iti Marso 23, 1995, ti aldaw a pannakaidedikar ti Kingdom Hall.

“Idi man pay laeng a napasarak ti damo a nakaro a danag idi nakitak ti lugar a pagibangonan,” kinuna ti direktor ti proyekto, a naggapu idiay New Zealand makalawas sakbayna tapno urnosenna dagiti bambanag. “Bin-ig a kabatbatuan ti daga. Ti laengen panagkali kadagiti pakaipundasionanna ket abutenna ti dua a lawas.” Ngem tinagibassitna dagiti lokal a Saksi, a binigbigna kalpasanna. “Pagaammo unay dagiti kakabsat a taga-Niue ti pakabuklan dagiti dadakkel a bato,” kinunana. “Ammoda no sadino ti pangtiraan iti bato tapno maburak dagiti dadakkel a pasetna.” Nalpas dagiti pundasionna iti dua nga aldaw!

Idi Marso 4, simmangpet ti immuna nga eroplano a nagluganan dagiti Saksi a taga-New Zealand, ket naileppas ti panagsemento. Bayat a nagsasaruno a simmangpet ti bunggoy dagiti trabahador, naileppas ti nagduduma a paset ti proyekto. Nairugi dagiti aldaw a panagtrabaho iti alas 7:00 t.b. buyogen ti ababa a panangusig iti inaldaw a teksto ti Biblia. Nagtrabaho ti dadduma a kakabsat a lallaki iti 12 nga oras iti inaldaw iti temperatura a 36 degrees Celsius. Kamaudiananna, idi Marso 23, namulaanen ti aglawlaw. Ti makaallukoy a karatula a naaramid manipud iti kayo ti mangga ipabigbigna ti pasdek kas ti “Kingdom Hall of Jehovah’s Witnesses.”

Espiritu ti Panagtitinnulong ken Kinamanagpadagus

Ti napateg a makagapu iti panagballigi ti proyekto isut’ panagtitinnulong dagiti umili ti Niue. Dagiti lokal a pumurok a nagutugot gapu iti espiritu dagiti kakabsat, nagidonarda iti taraon ken kuarta. Adu ti nangmatmat iti pannakaibangon ti pasdek kas proyektoda. Nagserbi dagiti opisial ti gobierno ken negosiante iti nalablabes pay ngem ti ninamnama. Naipaay dagiti kasapulan nga alikamen, kasta met dagiti tarikayo. Binaliwan pay ti shipping company ti panagibiahena tapno masigurado a sumangpet dagiti kasapulan a materiales iti umiso a tiempo.

Pudno nga inapresiar dagiti sangaili ti kinagaget ken kinamanagpadagus dagiti Saksi a taga-Niue, a nangiburay kadagiti pagtaengan ken sanikuada. “Nakasaysayaat unay dagiti kakabsat a babbai,” kinuna ti maysa a managibangon. Malaksid pay iti inaldaw a napudot a pangngaldaw, nagidasar dagiti kakabsat a babbai iti naluto a taraon iti kada bigat iti alas 6:30. Dadduma ti bumangon iti alas 4:30 t.b. a mangisagana iti taraon. Kinuna ti maysa a managibangon: “Panagkunak nasaysayaat ti panagbiagmi ditoy Niue ngem kadagiti bukodmi a pagtaengan.”

Idi Marso 10, impadamag ti Niue Star ti pasamak iti makinsango a panid iti babaen ti paulo a “Ti Immuna a Kingdom Hall iti Niue” ken ti ladawan dagiti taga-New Zealand ken taga-Niue nga agtartrabaho iti pagibangonan. Insalaysayna a 280 metro kuadrado ti kadakkel ti pasdek ken 70 agingga iti 100 a tattao ti malaonna. Kinuna pay ti artikulo: “Kinapudnona, maileppas koma ti trabaho iti dua [a lawas], ngem iti daytoy a kaso, mayat-atiddogto. Agingga itatta, dua nga aldaw laeng kalpasan ti pannakairugi ti trabaho, naibangonen dagiti pundasion, adigi, awanan ken atep, a nasaksakbay ngem iti eskediul.”

Tinarigagayan ti maysa a lokal a negosiante a kitaen koma dagiti amin nga adda iti Isla ti Niue ti proyekto ken makasursuro iti dayta. Kinunana a namnamaenna a daytoy ti mangipakita kadagiti isuamin no aniat’ maaramidan buyogen ti ayat ken panagtitinnulong.

Adda 204 nga immay [timmabuno] iti dedikasion. Ti makagutugot unay a kapadasan dagiti amin a timmabuno isu ti naisangsangayan a presentasion dagiti taga-Niue a kakabsat a lallaki, babbai, ken ub-ubbing nga inladawanda iti kanta ken sala ti pannakaibangon ti Kingdom Hall. Nayebkas dagiti panagyaman iti bunggoy dagiti managibangon agraman ken Jehova, a ti espirituna ti nangtignay kadagiti panunot, puso, ken im-ima tapno mairingpas ti trabaho.​—Isaias 40:28-31.