Malagipyo Pay Aya?

Inusigyo kadi a naimbag dagiti nabiit pay a ruar Ti Pagwanawanan? Makitayo a makapainteres ti pananglagip kadagiti sumaganad:

◻ Kasano a ‘makaumay [ti maysa] ken Jesus’ maitunos iti awisna iti Mateo 11:28?

Kinuna ni Jesus: “No ti asinoman kayatna ti sumurot kaniak, paglikudanna koma ti bagina ket ibaklayna ti kayona a pagtutuokan ket agtultuloy a surotennak.” (Mateo 16:24) No kasta, ti iyaadani ken Jesus ipasimudaagna ti panangipasakup ti pagayatan ti maysa iti pagayatan ti Dios ken ni Kristo, panangawat iti responsabilidad ken agtultuloy a panangaramid iti dayta.​—8/15, panid 17.

◻ Apay a “bassit” laeng ti makasarak iti ‘nailet a dalan nga agturong iti biag’ a dinakamat ni Jesus iti Mateo 7:13, 14?

Addaan ti akikid a dalan kadagiti mangipawil a paglintegan ken pagalagadan ti Dios. Gapuna, makaguyugoy laeng dayta iti asinoman a sipapasnek nga agtarigagay a mangitunos iti biagna kadagiti pagalagadan ti Dios. Nupay agparang a manangipawil, ti ‘nailet a dalan’ wayawayaanna ti tao iti tunggal napateg a banag. Dagiti pagbeddenganna ket impasdek ti “perpekto a linteg a kukua ti wayawaya.” (Santiago 1:25)​—9/1, panid 5.

◻ Kasano a masukay ti pannakaawat?

Ti pannakaawat saan a dumteng a silalaka wenno kadawyan. Ngem buyogen ti kinaanus, panagkararag, napasnek a panagregget, nainsiriban a pannakitimpuyog, panagadal ken panangmennamenna iti Biblia, ken panagpannuray iti nasantuan nga espiritu ni Jehova, mabalin a masukay ti pannakaawat.​—9/1, panid 21.

◻ Kasano a ti panagimun ti tao ket puersa nga agpaay a pagimbagan?

Mabalinna a tignayen ti maysa a tao a mangsalaknib iti maysa nga ipatpateg manipud kadagiti dakes nga impluensia. Maysa pay, siuumiso a maipakita dagiti tattao ti panagimun maipaay ken Jehova ken iti panagdaydayaw kenkuana. (1 Ar-ari 19:10)​—9/15, pinanid 8, 9.

◻ Aniat’ kaipapanan ti sasao iti Genesis 50:23 maipanggep kadagiti appoko ni Jose: “Nayanakda kadagiti tumtumeng ni Jose”?

Mabalin nga ipamatmat laeng daytoy a binigbig ni Jose dagiti ubbing kas kaputotanna. Mabalin nga ipamatmatna met a siaayat a nakilangen kadagiti ubbing, a linillilina ida kadagiti tumengna. Nasayaat met itatta nga ipakita dagiti amma ti umasping a panagayat kadagiti annakda.​—9/15, pinanid 20, 21.

◻ Aniat’ nangnangruna a nasken iti naballigi a panagasawa ken biag ti pamilia?

Tapno magun-od ti kasta a matarigagayan a resulta, kanayon koma nga iyun-una dagiti agassawa ti pagayatan ti Dios. Iti panangaramid iti kasta, ikagumaan dagiti agassawa ti agtalinaed a sangsangkamaysa ken risutenda dagiti parikutda babaen ti panangyaplikar iti balakad ti Sao ti Dios. Iti kasta, maliklikanda amin a kita ti parikut a tumaud no di maikaskaso ti pagayatan ti Dios. (Salmo 19:7-11)​—10/1, panid 11.

◻ Kasanot’ kinapateg itatta ti nadiosan a pannakarikna iti kinaganat?

Ti nadiosan a pannakarikna iti kinaganat ket napateg a paset ti amin-kararua a panagserbi ken Jehova. Mangsaluad ken tumulong daytoy a mangkeltay kadagiti panaggandat ti Diablo a mamagbalin kadagiti adipen ti Dios a ‘mabannog ket agkapuy dagiti kararuada.’ (Hebreo 12:3) Salaknibanna ida iti di umiso a pannakairaman iti lubong ken iti materialismona, a kanayonda a pampanunoten dagiti bambanag iti ngato​—“ti pudpudno a biag.” (1 Timoteo 6:19)​—10/1, panid 28.

◻ Iti pangngarig maipapan kadagiti karnero ken kalding, kaano nga agtugaw ni Jesus iti tronona ken apay? (Mateo 25:31-33)

Ti pangngarig saanna nga ipakita nga isu ket agtugaw iti anag nga agbalin nga Ari. Imbes ketdi, isut’ agtugaw kas Ukom. Ti panangukom ket saan a banag nga agtultuloy iti unos ti adu a tawen. Imbes ketdi, tuktukoyen ti pangngarig ti masanguanan inton ipataw ken ibanag ni Jesus iti limitado a tiempo a panangukom kadagiti nasion.​—10/15, pinanid 22, 23.

◻ Ania ti “kaputotan” a masansan a dinakamat ni Jesus?

Inyaplikar ni Jesus ti termino a “daytoy a kaputotan” kadagiti tattao idi kaaldawanna agraman dagiti “bulsek a mangidaldalan” kadakuada a mangbukel iti nasion a Judio. (Mateo 11:16; 15:14; 24:34)​—11/1, panid 14.

◻ Iti maudi a kaitungpalan ti padto ni Jesus iti Mateo 24:34-39, ania ti tuktukoyen ti sasao a “daytoy a kaputotan”?

Agparang a tuktukoyen ni Jesus dagiti tattao ditoy daga a makakita iti pagilasinan ti kaadda ni Kristo ngem napaayda a mangpalinteg kadagiti dalanda.​—11/1, pinanid 19, 31.

◻ Kasano a ti urnos maipanggep kadagiti siudad a pagkamangan ken dagiti panangipawilda ginunggonaanna dagiti tattao iti nagkauna nga Israel?

Impabigbigna kadagiti Israelita a saanda koma a naliway wenno aleng-aleng maipapan iti biag ti tao. Impaganetgetna met ti panagkasapulan a mangipakita iti asi no nainkalintegan ti panangaramid iti kasta. (Santiago 2:13)​—11/15, panid 14.

◻ Ania ti antitipiko a siudad a pagkamangan?

Daytoy ti probision ti Dios a mangsalaknib kadatayo iti ipapatay gapu iti panangsalungasing iti bilinna maipapan iti kinasagrado ti dara. (Genesis 9:6)​—11/15, panid 17.

◻ Kasano a ti Nakristianuan a panagkakabsat tulongannatayo a ‘mangpabaro iti pigsa’? (Isaias 40:31)

Kadagiti Kristiano a kakabsattayo a lallaki ken babbai, adda sumagmamano a mabalin a naipasango kadagiti umasping a pakariribukan ken pakasuotan ken mabalin nga agsagsagaba kadagiti rikrikna a kas iti mapaspasarantayo. (1 Pedro 5:9) Makaparegta ken makapabileg iti pammati a maammuan a gagangay ti mapaspasarantayo ken saan a karkarna ti rikriknatayo.​—12/1, pinanid 15, 16.