Naraem ti Kalintegan Dagiti Pasiente

‘Imposible a maaramidko daytoy nga operasion nga awan ti dara. No kayatmo ti maopera, masapul nga umannugotka iti pamay-an a panangagasko. Ta no saan, sumarakka laengen ti sabali a doktor.’

TI SASAO ti doktor saanna a pinakapuy ti pammati ni Cheng Sae Joo, maysa kadagiti Saksi ni Jehova nga agnanaed idiay Thailand. Nasukimat nga addaan iti meningioma, maysa a kita ti tumor iti utek, kasapulan unay a maoperaan ni Cheng. Ngem determinado nga agtulnog iti bilin ti Biblia: “Itultuloyyo ti umadayo . . . iti dara.”​—Aramid 15:28, 29.

Simmarungkar ni Cheng iti sabali pay a dua nga ospital, ta kaykayatna ti maagasan iti bukodna a pagilian no mabalbalin. Napaay gapu ta nagkedked met dagiti doktor sadiay nga agopera nga awan ti dara. Kamaudiananna, naipan ni Cheng iti Neurological Institute of the Tokyo Women’s Medical College babaen ti Hospital Information Services (HIS) idiay Thailand. Nasurok a 200 a pasiente nga addaan iti tumor ti utek ti inagasanen dayta nga ospital nga inaramatda ti gamma knife, maysa kadagiti kabaruan a nagrang-ayan iti radiation therapy.

Nayurnos ti pannakidagus ni Cheng kadagiti Saksi a Hapones nga agnanaed iti asideg ti ospital. Maysa a bunggoy ti simmabet kenkuana iti eropuerto, a pakairamanan ti dua a Saksi ni Jehova a makapagsao iti Thai ken maysa a pannakabagi ti HIS. Kalpasan ti agarup makalawas nga eksaminasion, nayospital ni Cheng a sadiay ti nakaagasanna babaen ti gamma knife. Agarup maysa nga oras laeng ti operasion. Nairuar iti ospital iti sumuno nga aldaw, nagawiden ni Cheng idiay Thailand kabigatanna.

“Pulos a diak nautob a dakkel unay a tulong ti maipaay daytoy nga urnos,” kinuna ni Cheng. “Pudno a nasdaawak iti ayat a naipakita kasta met ti panagtutunos ti adu a partido a nairaman.”

Iti panangireport iti daytoy a padamag, kinuna ti warnakan a Hapones a Mainichi Shimbun: “Agingga ita, naitampok dagiti narelihiosuan a makagapu iti panagkedked iti pannakayalison ti dara. Nupay kasta, adda dagiti dakes nga epekto dagiti panangyalison ti dara a kas iti AIDS, ti peggad dagiti viral infection a kas iti hepatitis C, ken dagiti allergy. Gapu iti daytoy, adda dagiti pasiente a dida kayat ti agpayalison iti dara uray aniaman ti relihionda.”

Kinuna pay ti warnakan: “Adu a pasiente a nagkedked nga agpayalison iti dara ti napilitan nga umakar kadagiti ospital, ngem kasapulan ti panagbalbaliw iti biang dagiti medikal nga institusion maipanggep iti panangraem kadagiti kayat ti pasiente. Makalikaguman ti naisurat a pammalubos (ti panangawat ti pasiente iti naan-anay a panangilawlawag no aniat’ nairaman sa umanamong iti panangagas), ket saan a mailaksid ti panangyalison iti dara. Rumbeng a maipabigbig a saan nga isyu daytoy a manginaig laeng iti maysa a relihion.”

Kas ken Cheng Sae Joo, adu kadagiti mayat iti panangagas nga awanan iti panangyalison iti dara ti kasapulan nga umakar kadagiti sabali nga ospital. Nupay kasta, apresiarenda ti panagregget dagiti doktor a situtulok a mangraem kadagiti kalintegan dagiti pasienteda.

Impasdek dagiti Saksi ni Jehova ti Hospital Information Services kadagiti sanga ti Watch Tower Society a mangikalikagum iti pannakitunos dagiti mangngagas a mangraem iti patpatienda. Iti intero a lubong, ibangbangon ti HIS ti mannakitunos a relasion kadagiti ospital, mangngagas, trabahador a mangaywan iti salun-at, abogado, ken hues.