Maysa a Pasamak​—a Rumbeng a Diyo Liwayan

“Tunggal naimbag a sagut ken tunggal naan-anay a rangkap” aggapuda iti Dios, ti nailangitan nga Amatayo. (Santiago 1:17) Ti kadaklan a sagut nga inted ti Dios iti managbasol a sangatauan isu ti probision a pannakasubbotda babaen ti bugbugtong nga Anakna, ni Jesu-Kristo. Ti ipapatay ni Jesus kas Mannubbot kadatayo pagbalinenna a posible ti biag nga agnanayon iti paraiso a daga. Iti Lucas 22:19, naibilin a laglagipentayo ti ipapatayna.

Sibabara nga awisendakayo dagiti Saksi ni Jehova a makiraman a kaduada iti panangipangag iti bilin ni Jesus. Maaramidto daytoy a tinawen a rambak kalpasan ti ilelennek ti init iti petsa a katupag ti Nisan 14 iti lunar a kalendario ti Biblia, a maangay inton Martes, Abril 2, 1996. Ilistayo daytoy a petsa tapno diyo malipatan. Dagiti Saksi ni Jehova iti pagnanaedanyo ti mangibaga kadakayo iti apag-isu a lugar ken oras ti taripnong.