Dagiti Saludsod Manipud Kadagiti Managbasa

Sigun kadagiti padamag, apaman a maipasngay ti maladaga, ireserba ti sumagmamano nga ospital ti kadkadua ken ti nagipusegan tapno makaalada kadagiti banag manipud iti dara dagitoy. Rumbeng kadi a maseknan ti Kristiano iti daytoy?

Iti gistay amin a lugar, awan kasta a maar-aramid, gapuna di rumbeng a maseknan dagiti Kristiano. No adda umdas a rason a pamatian a maar-aramid ti kasta iti ospital a paganakan ti maysa a Kristiano, maitutop nga ipakaammo iti doktor a masapul a maibelleng ti kadkadua ken ti nagipusegan, a di aramaten iti aniaman a pamay-an.

Maalan ti nadumaduma a medikal a produkto kadagiti biolohikal a gubuayan, iti animal man wenno tao. Kas pagarigan, sumagmamano a hormone ti maalan iti isbo dagiti masikog a kabalio. Agtaud idi iti dara ti kabalio ti tetanus serum, ket ti gamma globulin a panglaban iti sakit ket nabayagen nga al-alaenda iti dara dagiti kadkadua (ti bulluak) ti tao. Dadduma nga ospital idulin ken ikabilda dagiti kadkadua iti freezer kalpasanna kolektaen ti parmasiutikal a laboratorio tapno maproseso ti dara a nabaknang iti antibodies tapno makaalada iti gamma globulin.

Itay laeng nabiit, kuna dagiti managsirarak a nagballigida iti panangusarda iti dara manipud iti kadkadua a pangagas iti maysa a kita ti leukemia, ken napattapatta a mabalin nga aramaten ti kasta a dara iti sumagmamano nga addaan diperensia iti immune-system wenno usaren daytoy imbes nga ag-transplant iti pata ti tulang. Gapuna, addan sumagmamano a publisidad maipapan kadagiti nagannak a paal-alada ti dara manipud iti kadkadua, ikabilda iti freezer, ken idulinda di la ket ta kasapulan iti panangpaagas iti anakda iti masanguanan.

Ti kasta a panagnegosio iti dara manipud iti kadkadua di makaguyugoy kadagiti pudno a Kristiano, a ti panagpampanunotda iwanwanwan ti perpekto a linteg ti Dios. Matmatmatan ti Namarsua kadatayo ti dara kas sagrado, nga irepresentarna ti inted-Dios a biag. Ti kakaisuna a pangaramatan iti dara nga impalubosna ket iti altar, a mainaig kadagiti panagidaton. (Levitico 17:10-12; idiligyo ti Roma 3:25; 5:8; Efeso 1:7.) No saan, ti dara a naikkat iti maysa a parsua masapul a maibukbok iti daga, maibelleng.​—Levitico 17:13; Deuteronomio 12:15, 16.

No aganup dagiti Kristiano iti animal wenno agparti iti manok wenno baboy, padaraen ken ibellengda dayta. Saan a kasapulan a literal nga iparukpokda iti daga, tangay ti punto ket ibellengda ti dara imbes nga usarenda iti aniaman.

Maawatan dagiti Kristiano a mayospital a dagiti biolohikal a produkto a maikkat kadakuada ket maibelleng, basura man ti bagi dagitoy a produkto, adda diperensiana a tissue, wenno dara. Ipapantayon a, nalabit kayat ti doktor ti mangaramid nga umun-una iti panagsukimat, kas ti urinalysis, patolohia a panangsukimat iti tissue a mabalin nga addaan tumor, wenno panangsukimat iti dara. Ngem kalpasan daytoy, maibelleng dagiti produkto sigun iti paglintegan ti lugar. Masansan a din kasapulan a mangaramid ti pasiente iti ospital iti nainkalintegan a kalikagum maipanggep iti daytoy gapu ta agpadpada a nainkalintegan ken panagannad iti medisina ti panangibelleng iti kakasta a biolohikal a produkto. No adda nainkalintegan a rason a pagduaduaan ti pasiente a ti kasta a normal nga aramid ti masurot, mabalinna a dakamaten daytoy iti doktor a maseknan, nga ibagana a maigapu kadagiti narelihiosuan rason a kayatna a maibelleng amin ti kakasta a produkto.

Nupay kasta, kas nadakamaten, manmano daytoy a pakaseknan ti kadawyan a pasiente gapu ta di man la pulos pakaseknan wenno di maar-aramid a gagangay iti adu a lugar ti kasta a panangala ken panangusar manen iti kadkadua wenno dadduma pay a biolohikal a produkto.

Ti Artikulo A “Karurodtayo Ti Nadangkes,” Nga Agparang Iti “Pagwanawanan” Nga Enero 1, 1997, Agparang Nga Ipampamaysana Iti Pedofilia. Kasanot’ Rumbeng A Panangdepinar Iti Daytoy Nga Aramid?

Depinaren ti Webster’s Ninth New Collegiate Dictionary ti “pedophilia” kas “di umiso a seksual nga aramid a dagiti ubbing ti magusgustuanda a seksual a punteria.” Nakondenar dagiti kastoy a kita ti aramid iti Deuteronomio 23:17, 18. Nagsao ti Dios sadiay maibusor iti panagbalangkantis iti templo (“wenno, ‘catamite,’ barito a nairanta maipaay iti di umiso a seksual nga aramid,” NW footnote). Dagitoy a bersikulo paritanda met ti asinoman a mangiserrek “iti balay ni Jehova” iti tangdan ti “maysa nga aso” (“nalabit maysa a pederasta; a mangar-aramid iti panangubet, nangnangruna iti ubing a lalaki,” NW footnote). Dagitoy a Nainkasuratan ken sekular a reperensia pasingkedanda a ti salsalaysayen Ti Pagwanawanan ket ti panagbalin ti maysa nga ubing a punteria ti seksual a panangabuso, a pakairamanan ti panangar-arikap ti maysa nga adulto.