Ti Kinapudno Maipapan iti Impierno
KUNA ti report ti komision para iti doktrina ti Church of England a ti impierno saan met gayam nga umap-apuy nga urno; imbes ketdi, maipagarup dayta a maysa a lugar ti kinaawan. “Adu ti makagapu iti daytoy a panagbalbaliw,” ilawlawag ti report. “Ngem mairaman kadagitoy ti moral a protesta agpadpada iti uneg ken ruar ti Nakristianuan a pammati maibusor iti relihion ti buteng, ken maysa nga agsaksaknap a pannakaawat a ti kapanunotan maipapan iti Dios a nangikeddeng iti agnanayon a pannakatutuok dagiti minilion ket maisupadi iti pannakaipalgak ti ayat ti Dios ken Kristo.”
Daytoy a pannakariribuk iti tradisional a panangmatmat iti impierno saan laeng a mapaspasamak iti Church of England. Dagiti tattao iti nadumaduma a denominasion marigatanda nga agdayaw iti managibales a Dios a mangpupuor kadagiti managbasol. “Tarigagayan dagiti tattao ti maysa a Dios a naasi ken nadungngo,” kuna ni Jackson Carroll, propesor ti relihion ken sosiedad iti Duke University’s Divinity School. “Maisupiat iti agdama a kultura ti agsao maipapan iti basol ken pannakarikna iti basol.”
Nabayagen a mamati dagiti Saksi ni Jehova a ti impierno, kas isursuro ti Biblia, ket gagangay a tanem dagiti tattao a natay—saan a lugar ti umap-apuy a pagtutuokan. Itantandudoda daytoy a kapanunotan, saan a gapu ta nalatak, no di ket gapu iti ibagbaga ti Biblia: “No kadagiti natay, dida ammo ti aniaman . . . Awan ti aramid wenno gakat wenno pannakaammo wenno sirib iti Sheol [“impierno,” Katoliko a Douay Version].”—Eclesiastes 9:5, 10, NW.
Buyogen iti daytoy nalawag a pannakaawat maipanggep iti kasasaad dagiti natay, kastoy ti insurat idi 1896 ni Charles Taze Russell, immuna a presidente ti Watch Tower Society: “Awan masarakanmi [iti Biblia] a kasta a lugar ti agnanayon a pannakatutuok a kas ti biddut nga isursuro dagiti kredo ken libro a pagkantaan, ken ti adu a managebanghelio. Nupay kasta nasarakanmi ti maysa nga ‘impierno,’ ti sheol, hades, a nakakondenaran amin a pulitayo gapu iti basol ni Adan, ken pakasubbotan ti amin babaen iti ipapatay ti Apotayo; ket dayta nga ‘impierno’ isu ti tanem—ti natay a kasasaad.”
Gapuna iti nasurok a maysa a siglo, isursuro dagiti Saksi ni Jehova ti Naimbibliaan a kinapudno maipapan iti impierno.
[Ladawan iti panid 32]
Charles T. Russell