Pammati iti Dios—Kalikagumanna Kadi ti Milagro?
AGTAWEN ni Albert iti nasurok a 20 idi rinugianna a sapulen ti Dios. Pinadasna ti adu a relihion ngem saan a napnek. Iti panangbasbasana kadagiti paset ti Biblia, naammuanna no kasano a nakilangen ti Dios kadagiti tattao a kas kada Noe, Abraham, Sara, ken Moises. Nagbalin nga interesado ni Albert iti Dios ti Biblia. Nupay kasta, masiguradona ngata a talaga nga adda Dios?
Iti maysa a rabii nagmaneho ni Albert a nagturong iti naiputputong a lugar a sadiay nagkararag, “Diosko, ikkannak kadi iti pagilasinan—uray ania a mangpaneknek nga addaka.” Nagur-uray iti nabayag ni Albert. Malagipna nga idi awan ti napasamak, ti pananginanamana “nagresulta iti pannakaupay, kinakawaw, pungtot.”
Kas ken Albert, marikna ti adu nga awan serserbi ti panangbirbirokda iti Dios. Mabalin a mariroda kadagiti sermon dagiti klero wenno maupay iti kinasikap dagiti ebanghelisador iti telebision nga agdildilihensia iti kuarta. Iti pannakakitada iti nabatad a panaginsisingpet dagiti padada a tao, saan a sigurado ti dadduma no ania ti patienda. Kaskasdi, impatalged ni Ari David iti nagkauna nga Israel iti anakna a ni Solomon: “No isu [ti Dios] ti sapulem, isu masarakmonto.”—1 Cronicas 28:9.
Bueno, kasano ngarud nga ipalgak ti Dios ti bagina? Rumbeng kadi a mangnamnamakayo iti pagilasinan—maysa a karkarna a kapadasan a mangipaneknek kadakayo nga adda Dios? Sigun iti nabiit pay a surbey a naipadamag iti magasin a Time, nasurok a dua a kakatlo kadagiti Americano ti mamati kadagiti milagro. Dinakamat met ti artikulo a “ti kapartakan nga umadu nga iglesia idiay America ket dagiti Charismatic ken Pentecostal a kongregasion a ti panagdayawda naisentro ‘kadagiti pagilasinan ken milagro.’”
Kasapulan kadi a talaga “dagiti pagilasinan ken milagro” tapno mamati iti Dios? Nagaramat idi kadagiti milagro. Kas pagarigan: Ni Saulo ti Tarso, a nangidadanes kadagiti pasurot ti Anak ti Dios, ni Jesu-Kristo, naaddaan iti karkarna a kapadasan kabayatan nga adda iti dalan manipud iti Jerusalem nga agturong idiay Damasco. Daytoy namilagruan a pannakiengkuentro ken ni napagungar a Jesus nagresulta iti pannakakomberte ni Saulo. (Aramid 9:1-22) Gapuna ti dati a manangidadanes nagbalin a ni apostol Pablo—maysa kadagiti kangrunaan a manangitandudo iti Kinakristiano!
Ngem kanayon kadi a mangpataud iti kasta a positibo a tignay dagiti milagro? Agpannuray kadi iti pannakaadda iti maysa a namilagruan a kapadasan ti pudno a pammati iti Dios?
[Ladawan iti panid 3]
Nakisarita ti Anak ti Dios ken ni Saulo ti Tarso iti karkarna a pamay-an. Rumbeng kadi a manginanamakayo iti milagro?