Napatalgedan ti Abasto a Taraon iti Lubong—Kasano?
“TI KASAYAATAN a maaramidantayo mabalin a saan nga umdas a mamagtalinaed iti kinatalged ti abasto a taraon nga ammotayon iti kadakkelan a paset daytoy a siglo,” kuna ni Lester Brown, presidente ti Worldwatch Institute iti Washington, D.C. Sigun iti magasin a New Scientist, idi rugrugi ti 1995, ti reserba ti lubong a bukbukel ket bimmaba iti damo unay a gundaway iti 255 milion a tonelada—umdas a mangpakan iti lubong iti 48 laeng nga aldaw. Kadagiti napalabas a tawen, idi a bimmaba ti reserba iti aginggat’ 60 nga aldaw, nabalinan a naabrut ti [bimmassit nga] abasto. Ngem ita saan a makasiguro ti Worldwatch iti kabaelan ti daga nga agabrut.
Kalpasan ti tallo a tawen a di nasayaat nga apit ken ti iyaadu dagiti napanglaw a pagilian nga agar-aramat iti bukbukel tapno ipakan kadagiti dinguen, bimmassit ti maala a bukbukel para kadagiti napanglaw nga agkasapulan iti dayta kas kangrunaan a taraonda. Mamakdaar ti New Scientist a no ti situasion saan a dagus a maipaayan iti atension, ti maysa a bilion a tattao a mangbusbusbos iti aginggat’ 70 porsiento iti masapulanda iti taraon mabalin a mangrugida nga agbisin.
Impadto ti Biblia a dagiti agnanaed iti daga iti kaaldawantayo agsagabada iti “kinakirang ti taraon.” (Lucas 21:11) Ngem ti Dios maseknan iti parikut. Kinapudnona, ti pannakaseknanna iti kasasaad ti tao ket makitanto kamaudiananna inton iturayanen ti Pagarianna ti ar-aramid ditoy daga. Iti dayta a tiempo “ti daga pinaaduna ti apit.” “Addanto kinaruay ti bukel iti daga iti tapaw dagiti bambantay; ti bungada margaayandanto.” (Salmo 67:6 72:16) Iti kasta matungpalto dagitoy a naimpadtuan a sasao maipanggep iti Namarsua: “Sika sarungkaram ti daga, ket bisibisam, pabaknangem unay . . . Dagiti tanap nakumutanda met iti anien.”—Salmo 65:9, 13.
Makapainteres kadi kadakayo dayta a nakaskasdaaw a kari? Kayatyo kadi a maammuan no kasanokayo a mairaman iti dayta? Ngarud kiddawenyo kadagiti Saksi ni Jehova nga ibagada kadakayo ti ad-adu pay maipapan iti daytoy naikari a Paraiso iti sumaganad nga isasarungkarda iti pagtaenganyo. No kayatyo nga adda maysa a sumarungkar kadakayo iti pagtaenganyo tapno libre nga iyadalannakayo iti Biblia, pangngaasiyo ta agsuratkayo iti Watch Tower, P.O. Box 2044, 1060 Manila, wenno iti maitutop a direksion a nailista idiay panid 2.
[Picture Credit Line iti panid 32]
Naipasukot: Pictorial Archive (Near Eastern History) Est.