Naisalakan iti Panawen ti Didigra — Watchtower ONLINE A LIBRARIA

Naisalakan iti Panawen ti Didigra

KELLAAT a nargaay ti lima-kadsaaranna a department store idiay Seoul, Korea, ket napupok ti ginasut a tattao! Nagbannog iti aldaw ken rabii dagiti managalaw tapno maisalakan ti adu a biag aginggat’ mabalin. Iti panaglabas dagiti aldaw, agparang nga awanen ti masarakan a sibibiag a nagaburan iti ginabsuon a semento ken landok.

Idi kasla awanen a talaga ti namnama, adda nakaskasdaaw a napasamak. Adda umas-asug iti nakapsut iti uneg ti rebbek. Nataranta a nagkali dagiti managalaw babaen laeng iti imada tapno mayaonda ti babai nga agtawen iti 19 a nagaburan a sibibiag iti 16 a napaut nga aldaw. Ti narba a kaha ti elebeytor ti nangsalaknib ken nangsalukob kenkuana iti tinonelada a nargaay a semento. Nupay nakarot’ pannakamagmagna ken nasugatan, nalasatanna ni patay!

Kadagitoy a tiempo, gistay binulan nga adda damag maipapan iti didigra, ginggined man, napigsa a bagyo, panagbettak ti bulkan, aksidente, wenno bisin. Ket pagaayat ti minilion a mangpadpadaan kadagiti damag dagiti nakaskasdaaw a salaysay maipapan iti panagalaw ken pannakaispal. Nupay kasta, adda pakdaar maipapan iti um-umay a didigra—a nakarkaro ngem iti aniaman a sabsabali iti pakasaritaan ti tao—nga iyaleng-aleng ti kaaduan. (Mateo 24:21) Deskribiren ti Biblia daytoy um-umay a pasamak kadagitoy a sasao: “Adtoy! Ti dakes rummuar manipud iti nasion agingga iti nasion ket maysa a dakkel a bagyo maibangonto manipud kaadaywan a pungto ti daga. Ket dagiti napapatay gapu ken ni Jehova iti dayta nga aldaw addadanto manipud iti maysa a pungto ti daga agingga met laeng iti sabali a pungto ti daga, saandanto a masangitan, ket dida met maurnong, uray maitanem; isudanto ti rugit iti rabaw ti daga.”—Jeremias 25:32, 33.

Makapakellaat a sasao! Ngem saan a kas kadagiti natural a didigra ken aksidente, daytoy a didigra saanto a sapasap a panagpapatay. Kinapudnona, ti pannakaisalakan—ti pannakaisalakanyo—ket posible!

Panawen ti Kinaganat

Tapno naan-anay a matarusan daytoy a banag, masapul a matarusan ti maysa no apay a mapasamak daytoy sangalubongan a didigra. Kinapudnona, daytoy laeng ti pudpudno a solusion dagiti parikut ti sangatauan. Manmano laeng a tattao ita ti natalged ken natalingenngen. Iti laksid ti kasayaatan a panangikagumaan ti siensia, agtultuloy a mangdiddidigra kadagiti agnaed iti daga dagiti makaakar a sakit. Rinibribu a biag ti mapukpukaw kadagiti gubat gapu iti relihion, tribu, ken napolitikaan a pagdudumaan. Degdegan pay ti bisin ti ladingit ken panagsagaba dagiti inosente a lallaki, babbai, ken ubbing. Ti panagrakaya ti moral ti mangdaddadael iti mismo a pamuon ti kagimongan; dumakdakes uray dagiti ubbing.

Siuumiso la unay ti panangdeskribir ti maysa a padto iti Biblia a naisurat nasurok a 1,900 a tawenen ti napalabas iti kasasaadtayo. Kunana: “Masapul a mabigbigmo a kadagiti maudi nga al-aldaw ti panawen mapnonto iti peggad.”—2 Timoteo 3:1, The New Testament in Modern English, ni J. B. Phillips; idiligyo ti Mateo 24:3-22.

Iti panagkunayo, nainkalintegan kadi nga iyaleng-aleng ti maysa a managayat a Dios ti kasasaadtayo? Kuna ti Biblia: “Ti Dios a nangbukel ken nangaramid iti daga, . . . pinarsuana a saan nga ungaong, a binukelna tapno isu ti pagyanan.” (Isaias 45:18) Wen, imbes a baybay-anna a madadael daytoy napintas a planeta ken maikisap amin nga agnanaed kenkuana, bumallaetto ti Dios. Ti saludsod ket, Kasanona nga aramiden daytoy?

Pilienyo ti Biag!

Sumungbat ti Biblia iti Salmo 92:7: “Inton tumarubo dagiti nadangkes a kas iti ruot, ken no lumapsak dagiti amin nga agar-aramid iti kinadakes; isu daytan ti pannakadadaeldanto nga agnanayon.” Ti solusion ti Dios kadagiti parikut ditoy daga isu ti panangikkat iti kinadakes a mismo. Makaparagsak, daytoy dina kaipapanan nga amin a tattao kasapulan a maikisap. Ipasigurado kadatayo ti Salmo 37:34: “Paturaymo ni Jehova, ket salimetmetam ti dalanna, ket itan-oknakanto nga agtawid iti daga; intono magessat ti nadangkes, makitamto.”

Ipakita dagitoy a sasao nga adda gundaway a maisalakan iti kadakkelan a didigra a mapasamakto pay laeng iti sangatauan. Inikkannatayo ti Dios iti pagpilian. Ti sasao ni Moises kas balakad kadagiti Israelita idi agsagsaganada a sumrek iti Naikari a Daga agaplikar met kadatayo ita: “Inkabilko iti sangom ti biag ken ti patay, ti bendision ken ti lunod; isu ti gapuna a piliem ti biag tapno agbiagka, sika ken ti putotmo.” (Deuteronomio 30:19) Ngem kasano a ti maysa ‘pilienna ti biag’ ket maisalakan? Ania a talaga ti kayat a sawen ti pudno a pannakaisalakan?

[Picture Credit Line iti panid 2]

[Picture Credit Line iti panid 3]

Yunhap News Agency/Sipa Press