Manipud Kadagiti Nangato nga Apartment iti Siudad Agingga Kadagiti Niebe a Kapanagan iti Let-ang Mapan Kadagiti Tattao

TUDO man wenno niebe wenno uraro wenno lobo wenno leon iti bantay wenno nariribuk a teritoria saanda a mapakapuy ti determinasionda. Nakapegpeggesda a mangdaliasat ti 3,000 a kilometro, a ballasiwenda ti nawayang a kapanagan, dagiti naapres a karayan, ken nauuneg a ginget tapno idanonda dagiti nagpateg a surat idiay West Coast. Siasino dagitoy?

Isuda dagiti maingel nga agkabannuag a kumakabalio iti pony express.a Aniat’ nangtukay iti kasta a napigsa a determinasion dagitoy nga agkabannuag a lallaki? Nalabit maigapu iti kinarigat, kinapeggad, ken pannakapnekda a mangidanon kadagiti surat. Makapainteres, kada kumakabalio adda awitna a Biblia iti sakupitna a nairagpin iti priority mail.

Nasurok a maysa a siglo kalpasanna, nakarkaro pay a determinasion, panagregget, ken debosion ti imparangarang ti nasurok a 113,000 a napasnek a manangiwaragawag iti Pagarian iti intero a Canada. Aniat’ mangtigtignay kadakuada? Ti ayat iti Dios ken kaarruba gutugotenna ida a mangidanon iti kinapudno maipapan iti Pagarian babaen ti pagbasaan ken panagsao. Napatpateg nga amang daytoy makaited-biag a kinapudno ngem iti aniaman a surat nga idanon ti pony express. Wen, dayta ti nagpateg a mensahe ti Pagarian a masarakan iti Nasantuan a Biblia, ti mismo a libro nga adda kadagiti sakupit dagiti kumakabalio iti pony-express.​—Proverbio 2:21, 22; Isaias 2:2-4; 61:2; Mateo 22:37-39; 24:14.

Natignay Gapu iti Ayatda ken Jehova ken Kadagiti Tattao

Pagay-ayat dagiti Saksi ni Jehova ti makisarita kadagiti tattao maipapan iti Pagarian. Makitayo nga ar-aramidenda dayta kadagiti nangato nga apartment iti siudad, kadagiti nasulinek a komunidad iti niebe a kapanagan, kadagiti eropuerto, kadagiti lansangan ken dadduma pay a publiko a lugar, ken iti telepono. Apay nga iti nadumaduma a lugar?

Ti agbaliwbaliw a kita ti panagbiag gapu kadagiti kasasaad ti ekonomia ken demograpia ipasangoda ti dakkel a karit no maipapan iti panangdanon kadagiti tattao iti pagtaengan. Iti adu a kaso, agpadpada nga agtrabaho dagiti agassawa tapno maipaayda dagiti kangrunaan a material a kasapulan ti pamilia, a gapu iti dayta masansan a maliwayan dagiti naespirituan a kasapulan. Gapu kadagita a pakarigatan ken pakasikoran, kasapulanda unay ti makaparagsak a mensahe ti namnama. Maragsakan dagiti Saksi ni Jehova a mangipaay iti dayta. Babaen ti kinaannad ken kinamanangngaasi, mangpataudda kadagiti oportunidad a mangidanon iti naimbag a damag iti amin a kita ti tattao iti makaay-ayo, mamagpanunot a wagas.​—1 Timoteo 2:3, 4.

Kadagiti Sabsabali a Lenguahe: Idi binilin ni Jesus dagiti pasurotna a ‘mapanda ket agaramidda kadagiti adalan,’ binay-anna ida nga agporsegi ken maaddaan iti determinasion a mangidanon iti mensahe ti namnama kadagiti tattao iti amin a lenguahe. (Mateo 28:19) Kas iti adu a dagdaga, ti Canada ket nagpupuniponan ti nagduduma a kultura ken lenguahe, ket nakibagay dagiti adu a manangiwaragawag iti Pagarian babaen ti panangadalda kadagiti baro a lenguahe.

Kas pagarigan, nakita ti maysa a pagassawaan nga amin-tiempo a ministro idiay Edmonton, Alberta, a nasken a kasaritada dagiti tattao nga agsasao iti Mandarin Chinese iti siudadda. Nupay kasta, umuna, dagiti agassawa masapul nga adalenda pay ti pagsasao, gapuna nakisaritada iti maysa nga estudiante iti unibersidad nga agsasao iti Mandarin. Immanamong nga isurona kadakuada ti pagsasao ken maigiddato iti dayta adalenna kadakuada dagiti kinapudno iti Biblia. Anian a nagsayaat dayta! Iti las-ud ti 24 a bulan mabalinen a mangisuro iti Mandarin dagitoy a dua a napasnek a manangiwaragawag iti Pagarian. Maigiddato iti dayta, ti mannursuro ken estudianteda ket nakualipikar a mabautisaran kas Kristiano.

Tagtagiragsakenda dagiti umasping a kapadasan kadagiti sabsabali pay a siudad bayat a dagiti manangiwaragawag iti Pagarian, a natignay iti ayat, adalenda dagiti pagsasao a kas iti Polaco, Ruso, ken Vietnamese.

Iti Dalan: Kas kadagiti kumakabalio iti pony-express iti napalabas a siglo, nga agsakay nga agmaymaysa, dadduma a manangiwaragawag iti Pagarian iti nasulinek a paset ti British Columbia ket agluganda nga agmaymaysa. Adu ti mabusbosda nga oras iti sekular a trabahoda a panagmaneho kadagiti dadakkel a trak a mausar iti panagtroso, nga agbiaheda iti let-ang sada mapan kadagiti sawmill. Kalikaguman daytoy ti kanayon a pannakikomunikarda kadagiti sabsabali nga agmammaneho iti trak babaen ti radio a CB (citizens band), a pagsasaritaanda ti annayas ti trapiko ken dagiti peggad iti dalan.

Nasigo dagitoy a manangiwaragawag iti Pagarian a mangusar kadagiti radioda a CB iti naisangsangayan a wagas. Irugida ti makisarita iti CB babaen ti panangdakamatda kadagiti agdama a pasamak. Kalpasanna sisisigo a dakamatenda ti Biblia. Iti naminsan nagimdeng ti padada nga agmammaneho iti trak iti kuna ti Biblia maipapan iti namnama dagiti natay. (Juan 5:28, 29; Aramid 24:15) Ti ipapatay ti padana nga agmammaneho gapu iti aksidente iti dalan ti nangriribuk unay kenkuana. Siraragsak nga immanamong nga agadal iti Biblia ket itan iwarwaragawagnan ti naimbag a damag kadagiti katrabahuan ken gagayyemna. Kasta met, gapu iti rag-ona, nairugi ti panangyadal iti Biblia iti balo nga asawa ti natayen a gayyemna. Anian a gunggona iti panangikagumaan a mangidanon iti makaited-biag a mensahe ti kinapudno iti kastoy a naisangsangayan a wagas!

Babaen iti Eroplano: No maipapan iti panangidanon iti nagpateg a mensahe ti kinapudno, mapan dagiti naregta a manangiwaragawag iti Pagarian iti sadinoman nga ayan dagiti tattao, a ‘sumrekda kadagiti purok’ babaen kadagiti babassit nga eroplano. (Mateo 10:11, 12) Di pay unay nabayag, gapu iti regtada a mangiwaragawag iti naimbag a damag ken iti bukodda a gastos, adda dua a grupo dagiti eroplano a nangdanon kadagiti naiwaraswaras a tattao iti nakalawlawa a kaniebean iti let-ang. Tunggal maysa a grupo dagiti eroplano nagbiaheda iti agarup 3,000 a kilometro ken nagdissoda iti 14 a nagduduma a komunidad, a nakastrekda iti 250 a kilometro iti Arctic Circle. Dagitoy napinget a manangiwaragawag nagtultuloyda iti pito nga aldaw a nangdanon kadagiti agaaddayo unay a tattao.

Ket adda kadi nagsayaatan dayta? Panunotenyo laengen ti positibo nga epekto ti mensahe ti Biblia kadagitoy a komunidad. Dagiti bimmisita a ministro timmulongda a nangipaay iti nagpateg a naespirituan a kasapulan babaen ti panangilawlawagda iti panggep ni Jehova a paraiso a daga iti asidegen. (Mateo 5:3) Nabayag kalpasan ti ipapanaw dagiti nangawit iti mensahe, dagiti nasingpet panagpuspusona a tattao kadagita a komunidad mabalinda a basaen dagiti 542 a Biblia ken katulongan iti panagadal iti Biblia ken ti 3,000 a magasin a naipaima kadakuada.​—Idiligyo ti Aramid 12:24.

Babaen iti Telepono: Rinibu dagiti adda iti siudad nga agnanaed kadagiti nangangato nga apartment nga addaan iti sopistikado a seguridad. Nupay kasta, mangasaba latta dagiti dedikado a manangiwaragawag iti Pagarian buyogen ti regta ken kinaannad. Kasanoda a makapan iti ayan dagitoy a tattao? Nupay kaykayatda ti makisarita iti sangonsango, masansan a naballigi ti pannakausar ti intercom iti lobby ti apartment. No saan a posible daytoy, bay-andan a dagiti ramayda ti agtrabaho, a teleponuanda dagiti tattao.

Iti maysa nga agsapa, simmungbat ti maysa a nataenganen a babai iti teleponona. Kalpasan ti ababa, nadayaw a kablaaw, napagsaludsodan no addanto pay ngata panawen a makapagna a sitatalged dagiti tattao kadagiti lansangan iti rabii. Naibasa dagiti kasuratan a mangipasigurado kenkuana nga addanto naruay a talna iti masanguanan. (Salmo 37:10, 11; Daniel 2:44; Mateo 6:9, 10) Immanamong a makisarita iti telepono iti sumaganad a lawas iti isu met la nga oras tapno pagtungtonganda no apay a mabalintay a patien dagiti kari ti Dios. Kalpasan ti makabulan a panangyadalna iti Biblia iti telepono, panangibasana kadagiti parapo iti katulongan ti panagadal iti Biblia ken panangyimtuodna kadagiti maitutop a saludsod, ti manangiwaragawag iti Pagarian ket pinadayawan daydiay a babai gapu iti nakaad-adu a nagduduma a sermonna iti kada lawas. Tiempo idin tapno dakamatenna ti libro a pagadalan ken itukonanna iti personal a kopiana. Kalpasanna nayurnos ti panagsarakda a dua iti personal. Pudno nga impakita dagiti Saksi ni Jehova ti ayatda kadagiti tattao, ket natignay dagiti tattao, a bigbigenda a tultulongan ni Jehova dagitoy a Kristiano a manangaskasaba.​—Idiligyo ti 1 Corinto 14:25.

Babaen ti Pagbasaan: Dagiti manangiwaragawag iti Pagarian iti probinsia ti Quebec, a Pranses ti kangrunaan a maar-aramat a pagsasao, mapmapanda met iti sadinoman nga ayan dagiti tattao. Kinuna ti maysa nga agdaldaliasat a ministro: “Iti adu a tawen impagarup dagiti kakabsat a saan a rumangrang-ay ti trabahoda gapu iti nakaro nga ibubusor ti simbaan. Ngem babaen ti kinapinget dagiti kakabsat ken panagsublisublida, ti Biblia, a gistay saan idi a pagaammo ken manmano laeng ti mangbasbasa, masarakan itan iti kaaduan a pagtaengan.”

Nakaay-ayat dagiti resulta a matagiragsak bayat nga adda dagiti baro nga ebanghelisador nga aggapu iti amin a tukad ti kagimongan ti Quebec, a pakairamanan ti medikal a komunidad. Kasta ti napasamak iti maysa a doktor. Ti asawana, a manangiwaragawag a mismo iti Pagarian, masansan a makisarita kenkuana maipapan iti namnama nga adda iti Biblia. Nagporsegi ti alerto a panglakayen iti kongregasion a nangawis iti doktor a makigimong iti kongregasion idi maad-adal ti broshur a Kasano nga Ispalen ti Dara ti Biagyo? Timmabuno ken nakipaset pay. Gapu ta nagustuanna ti kalidad ken kinauneg ti saritaan no maipapan iti naespirituan, immanamong nga agadal a mismo iti Biblia. Maysa met itan a manangiwaragawag iti Pagarian.

Napateg ti naaramidan ti epektibo a panangusar kadagiti magasin no maipapan iti panangguyugoy kadagiti tattao iti Biblia. Awan makasigurado no ania nga artikulo ti mangtignay iti maysa a mangawat iti kinapudno. Adda ruar ti Agriingkayo! nga intukon ti maysa a manangiwaragawag iti Pagarian iti kaarrubana a dati a dina kayat ti agimdeng iti mensahe ngem interesado iti lubong dagiti insekto. Naginteres iti retrato nga adda iti artikulo ti Nobiembre 22, 1992, nga Agriingkayo! a “Sakit a Chagas​—Agek ni Patay.” Gapu ta nagustuanna ti nabasana, nagkiddaw iti ad-adu pay a magasin. Nairugi ti panagadal iti Biblia, ket iti las-ud ti innem a bulan mangaskasaban kadagiti sabsabali.

Kadagiti Publiko a Lugar: Ipalubos ti linteg ti Canada ti wayawaya ti panagsao iti publiko a lugar, kas kadagiti eropuerto. Idiay Halifax International Airport, dagiti manangiwaragawag iti Pagarian umasidegda a sitataktika kadagiti biahero sakbay ken kalpasan ti panagbiahe, a kasaritada ida. Mausar dagiti naintiempuan a makaiwanwan a salsaludsod tapno maiturongda ti saritaan iti Biblia. Tangay addaanda iti maibulsa a Biblia ken literatura, maipaayda dagiti naespirituan a kasapulan. Adda dagiti siruhano, sientipiko, abogado, piloto, klero, polis, agmammaneho iti taxi, inheniero, mannursuro, soldado, ken politiko manipud kadagiti sabsabali a pagilian a nakangngeg iti mensahe ti Pagarian iti kastoy a wagas ket pinatanorda dagiti awitda a bin-i ti kinapudno kadagiti adayo a lugar.​—Colosas 1:6.

Iti maysa nga agsapa idiay eropuerto, nangala ti maysa a lalaki kadagiti magasin a Pagwanawanan ken Agriingkayo! Kalpasanna kinunana iti naanat, naalumamay a timek: “Saan, saan a dagiti Saksi ni Jehova!” Apay a kasta ti reaksionna? Ti lalaki ket napeklan a Muslim a kalkalpasna laeng a nagkararag iti kapilia ti eropuerto. Impakpakaasina iti Dios nga ipakitana kenkuana ti sirib, nauneg a pannakaawat, ken kinapudno. Nasdaaw laeng idi mapanunotna a dagiti Saksi ni Jehova ti giddato a sungbat ti kararagna.

Wen, saan nga ipalubos dagiti natured a manangiwaragawag iti Pagarian idiay Canada nga adda manglapped kadakuada a mangidanon iti nagpateg a mensahe ti Pagarian. Dida itulok a malappedanda gapu kadagiti sabali a pagsasao, lasonglasong ken natapok a dalan, nasusulinek a komunidad, wenno dagiti apartment iti siudad nga addaan iti sopistikado a seguridad. Determinadoda a mangidanon iti makaited-biag a mensahe ti Dios kadagiti nasingpet panagpuspusona nga agbirbirok iti kinapudno. Isuda ken dagiti kakabsatda iti intero a lubong a padada a trabahador, situtulokda nga agtulnog iti bilin ni Jesus a ‘mapanda ket agaramidda kadagiti adalan.’​—Mateo 28:19.

[Footnote]

[Kahon iti panid 27]

Dagiti Naballigi a Manangiwaragawag iti Pagarian Usarenda ti Telepono

Kinuna ti dadduma: “Hello. Siak ni [dakamaten ti nagan]. Makisarsaritaak iti apagbiit kadagiti tattao iti apartmentyo maipapan iti pannakagun-od iti talna. Panagkunayo addanto ngata tiempo a maadda ti talna iti sangalubongan? [Palubosan a sumungbat.] Dikay madanagan ta saanak nga agsursurbey wenno aglaklako iti aniaman. Imbes ketdi, iburburayko ti kapanunotan manipud iti Nasantuan a Kasuratan a pudno nga iyegto ti Dios ti talna.” Kalpasanna mabalin a maituloy ti panagtungtong babaen ti ababa a Nainkasuratan a saritaan.

Kinuna ti dadduma: “Naimbag a rabiiyo. Siak ni [dakamaten ti nagan]. Agbolboluntarioak iti lugaryo. Al-alaek ti opinion dagiti tattao nga agnanaed iti apartmentyo. Adu ti maseknan iti personal a kinatalged no pampanunotenda ti agraraira a kinaranggas ken krimen iti lugartayo. Maseknankay kadi iti daytoy? [Palubosan a sumungbat.] Panagkunayo addanto ngata tiempo a natalgedton ti intero a lubong?” Palubosan a sumungbat, sa ituloy ti Nainkasuratan a mensahe.