Agannadkayo Kadagiti Managuyaw!

Ita, umad-adu dagiti maipadpadles, ket pumigpigsa a negosio ti futurology. “Bayat nga umad-adani ti tawen 2000,” kuna ti The Daily Telegraph ti London, “adda naisangsangayan nupay gagangay a mapaspasamak. Adda karkarna ken masansan a makapakullayaw a masirsirmata ti rinibu a tattao iti intero a lubong maipapan iti masakbayan.” Kadagiti adu a managpaliiw, daytoy a panaginteres unay iti masakbayan ket panangulit laeng iti napalabas a di pimmayso a pananginanama iti panagbalbaliw.

BAYAT nga immadu ti kalesa idi maika-19 a siglo, impadles ti maysa a lalaki a mapno iti ibleng ti kabalio dagiti siudad iti Europa. Siempre, saan a pimmayso ti impadlesna. Gapuna, iti panangipaganetgetna iti masansan a di pannakatungpal dagiti padles, kuna ti The Times ti London: “Ti masakbayan ket napnuan laeng iti adu nga ibleng ti kabalio.”

Uyawen dagiti dadduma dagidiay makasaripatpat iti sumungsungad a peggad. Kas pagarigan, kinarit ti maysa a propesor iti business iti maysa nga unibersidad iti E.U. dagidiay mangpakpakdaar iti pannakadadael ti aglawlaw no kumaro nga agpayso ti agdama a kasasaad. Kas naipadamag iti magasin a New Scientist, kunana a “sumaysayaat ti kalidad ti panagbiagtayo ken agtultuloy a kasta iti agnanayon.”

Iti laksid ti makariribuk a panagipadles ken panangsupiat kadagiti padles, adut’ mamati a dinto latta agbalbaliw dagiti amin a banag. Iti pananguyawda iti ideya a makiballaetto ti Dios iti ar-aramid dagiti tattao, tultuladenda ti kababalin dagiti managuyaw idi umuna a siglo K.P.

Agtultuloy Kadi a Kasta met Laeng Amin a Bambanag

Namakdaar ti maikadua a naipaltiing a surat ti Kristiano nga apostol a ni Pedro, a naisurat idi agarup 64 K.P.: “Kadagiti maudi nga al-aldaw umaydanto dagiti managuy-uyaw agraman ti panguy-uyawda, nga agtultuloyda maitunos iti bukodda a tarigagay.”​—2 Pedro 3:3.

Pagparangen dagiti managuyaw a nakakatkatawa ti uy-uyawenda. Ti tao a mamati iti panaguyaw mabalin a matnag iti agimbubukod a palab-og agsipud ta ti managuyaw masansan a kayatna a patien dagiti dumngeg ti ibagbagana. Nalabit dadduma kadagidiay impakdaar ni Pedro a managuyaw ket kaasping dagidiay “agtultuloyda maitunos iti bukodda a tarigagay.” Tapno agalibtak dagiti agbasa iti insuratna, nagusar ti apostol iti mangipaganetget a kita ti sao. Namakdaar maipapan iti iyaay ‘dagiti managuyaw agraman ti panaguyawda.’

Kinuestion dagidiay a managuyaw idi immuna a siglo ti kinapudno ti ‘naikari a kaadda’ ni Kristo, a kunkunada: “Sadino ti yan daytoy naikari a kaaddana? Ay ket, nanipud iti aldaw a dagiti ammami naturogda ken patay, amin a bambanag nagtultuloyda a kasta met laeng nanipud idi panangrugi ti sangaparsuaan.” (2 Pedro 3:4) Kastat’ panangmatmatda. Ngem, idi tawen 33 K.P., impadto ni Jesus ti pannakadadael ti siudad ti Jerusalem. Kinunana: “Dagiti aldaw umaydanto kenka inton dagiti kabusormo mangbangondanto iti aglikmutmo iti sarikedked nga addaan natitirad a kaykayo ket lakubendakanto ken parigatendakanto iti tunggal sikigan, ket agingga iti daga rebbekendakanto ken dagiti annakmo iti unegmo, ket didanto mangibati kenka iti bato iti rabaw ti bato.” Anian a pannakailaw-an dagidiay a nanguyaw iti dayta a pakdaar! Idi 70 K.P., linakub dagiti buyot ti Roma ti Jerusalem ket dinadaelda ti siudad, a nakatayan ti adu kadagiti umilina. Apay a saan a nakasagana ti kaaduan kadagiti umili ti siudad iti daytoy a didigra? Agsipud ta dida naawatan a sinukimat ida ti Dios babaen ti Anakna, ni Jesus.​—Lucas 19:43, 44.

Dinakamat ni apostol Pedro ti masakbayan nga ibaballaet ti Mannakabalin-Amin a Dios. “Ti aldaw ni Jehova umayto a kasla mannanakaw,” impakdaar ni Pedro. (2 Pedro 3:10) Iti dayta a tiempo, ikisapto ti Dios dagiti nakillo iti intero a globo ken ispalenna dagidiay naukom a nalinteg. Kas iti namin-adun nga inlawlawag daytoy a magasin, nangrugi ti “kaadda” ni Kristo Jesus idi 1914. Ngem mapasamakto pay laeng iti masakbayan ti panagtignayna kas Manangikisap ti Dios a mangpukaw iti kinadakes. Ngarud, nagan-ganat ita ti pakdaar ti apostol nga agannadtayo kadagiti managuyaw.

Mabalin a nabayagen nga ur-urayenyo ti ibaballaet ti Dios iti aramid ti tao. Ania ti makatulong kadakayo nga agtultuloy nga aguray a siaanus a dikay agbalin a biktima dagiti managuyaw? Pangngaasiyo ta itultuloyyo a basaen.

[Blurb iti panid 4]

“Dagiti aldaw umaydanto kenka inton dagiti kabusormo . . . lakubendakanto ken parigatendakanto iti tunggal sikigan, . . . ket didanto mangibati kenka iti bato iti rabaw ti bato.” Saan a rumbeng a mauyaw dayta a pakdaar. Dinadael dagiti buyot ti Roma ti Jerusalem a nakatayan ti adu.