Apay a Pampanawanda ti Relihion?
IDI ngalay ti maika-19 a siglo, gistay awan mangngegan a taga Prussia (makin-amianan nga Alemania ita) nga agkuna a saan a kameng ti partikular a relihion. Kinapudnona, uray laeng ti panangpanaw iti nalatak a relihion sa umalis iti relihion a di makitunos iti kaaduan ket mabalin a panggapuan a sipsiputan ti polis. Nagbalbaliwen ti panawen!
Itatta, adu kadagiti Aleman ti agluslusulosen kadagiti simbaan. Maipadpadamag a 1 iti kada 4 ti agkunkuna nga awan relihionda. Kasta met laeng ti mapaspasamak idiay Austria ken Switzerland. Iti kasta, no dagiti miembro ti dara a mangbibiag iti relihion, kas kuna ti Aleman a mannurat a ni Reimer Gronemeyer, “matmatay dagiti simbaan idiay Europa ta maad-adasandan.”
Apay nga Ilaksidda ti Relihion
Apay nga adu ti mangilaksid iti organisado a relihion? Masansan, gapu kadagiti pinansial a rason, nangnangruna kadagiti daga a makalikaguman dagiti miembro nga agbayad iti buis ti simbaan. Adu ti agimtuod, ‘Apay koma a mapan iti simbaan ti kuarta a nagrigrigatak?’ Maabug dagiti dadduma gapu iti dakkel a kinabaknang ken kinaturay ti simbaan. Nalabit umanamongda iti kinuna ni Cardinal Joachim Meisner iti Cologne, Alemania, a mabalin a ti kinabaknang ti simbaan ti nangimpluensia ti dayta a mangipaay iti adu unay nga atension kadagiti material a banag ket “saan unay a naganetget iti panamati ken Kristo.”
Pampanawan dagiti sumagmamano a tattao ti relihionda agsipud ta makauma, saan a makapainteres, saanna a mapnek ti naespirituan a panagbisinda. Agsagsagabada iti bisin nga impadto ni propeta Amos, a “saan a bisin iti tinapay, wenno waw iti danum, no saan ket a panagdengngeg kadagiti sao ni Jehova.” (Amos 8:11) Tangay dandani awan maipaay a taraon ti relihionda, agikkatdan iti dayta.
Umiso kadi nga addang ti panangtallikud iti amin a relihion nupay pudno dagiti maipaspasango a parikut? Iladawanyo ti maysa a mabisin a lalaki a nakakita iti kasla tinapay. Nupay kasta, idi kanennan naduktalanna a nagragadian gayam daytoy. Lipatenna kadin ti mangan tapno maep-ep ti bisinna? Saan, no di ket agbirok iti pudno a taraon. Kasta met, no saan a mapennek ti maysa a relihion ti naespirituan a panagbisin dagiti kamengna, rebbeng kadi a tallikudandan ti relihion? Wenno ad-adda a nainsiriban no agsapulda iti pamay-an tapno mapennek ti naespirituan a bisinda? Kasta ti inaramid dagiti adu, kas ipakita ti sumaganad nga artikulo.