Di Malipatan a Pasamak Idiay Francia

“SAANMI A KAYAT TI SIUDAD NI JEHOVA!” kuna dagiti poster a nakapaskil iti intero nga ili. “Agkaykaysatayo a Maibusor iti Proyekto ni Jehova” indagadag ti maysa a bumusbusor a grupo. Literal a ginasut nga artikulo iti warnakan ti mangiturturong iti daytoy nga isyu iti imatang ti publiko. Napirmaan dagiti petision, ken nasurok a kagudua milion a pampleta a mangdakamat iti proyekto ti nanglippias kadagiti kahon ti surat iti dayta nga ili. Ania daytoy a proyekto a nangsinga iti talna ti natalinaay koma nga ili ti Louviers, makin-amianan a laud a Francia? Ti plano a panangbangon iti baro a sanga nga opisina ken pagtaengan dagiti Saksi ni Jehova.

Ni Jehova ti Mangpadakkel

Nangrugi ti aktibidad dagiti Saksi ni Jehova idiay Francia idi arinunos ti maika-19 a siglo. Nalukatan ti umuna a bodega ti literatura ti Biblia idi 1905 idiay Beauvène, makin-abagatan a Francia, ket idi 1919, addan agan-andar a bassit nga opisina idiay Paris. Opisial a naluktan ti sanga nga opisina iti siudad idi 1930, ket iti sumaganad a tawen, nagtaeng dagiti agop-opisina iti Bethel nga adda idiay Enghien-les-Bains, amianan ti Paris. Kalpasan ti Gubat Sangalubongan II, nagsubli ti pamilia ti Bethel idiay Paris, ket idi 1959, nayalis ti sanga iti lima ti kadsaaranna a patakder idiay Boulogne-Billancourt, makinlaud a nasulinek a paset ti kabisera.

Gapu iti irarang-ay ti trabaho a panangikaskasaba iti Pagarian, nayakar idi 1973 sadi Louviers, 100 a kilometro iti laud ti Paris, ti pagimprentaan ken pasilidad ti shipping, bayat a nagtalinaed dagiti agop-opisina idiay Boulogne-Billancourt. Nupay kasta, gapu iti panagadu dagiti agibumbunannag idiay Francia, saanen a makaanay dagiti pasilidad idiay Louviers, nupay nanayonan idi 1978 ken 1985. Gapuna, naikeddeng ti panangpadakkel kadagiti pasilidad ket pagkaykaysaen ti intero a pamilia ti Bethel iti maymaysa a disso. Saan a nagustuan ti amin daytoy a proyekto, kas nadakamat iti pangrugian. Iti baet ti kasta nga ibubusor, adda disso a nasarakan maysa ket kagudua a kilometro ti kaadayona iti pagimprentaan. Simmaruno ti innem a tawen a nasaet a panagtrabaho, ket kamaudiananna, kalpasan ti 23 a tawen nga agsina ti lokasionda, napagtipon ti intero a pamilia ti Bethel idiay Louviers idi Agosto 1996.

Buyogen ti dakkel a rag-o a nagtataripnong ti naragsak a tallaong a 1,187, a pakairamanan ti 300 a miembro ti pamilia ti Bethel idiay Francia, ken 329 a delegado manipud 42 a sabali a sanga, idi Sabado, Nobiembre 15, 1997, tapno dumngeg iti palawag ti dedikasion ni Kabsat Lloyd Barry, kameng ti Bagi a Manarawidwid. Nupay kasta, gapu ta daytoy a dedikasion ket naangay iti sango ti ibubusor ken nabayagen a panangpardaya a kampania ti warnakan maibusor kadagiti Saksi ni Jehova iti intero a Francia, mariknada nga amin koma a Saksi idiay Francia ket makipagrambak iti daytoy a panagbiktoria. Kas resultana, iti Domingo, Nobiembre 16, maysa a naisangsangayan a panagtataripnong a natemaan “Agtalinaed iti Ayat ni Kristo” ti nayurnos iti Villepinte Exhibition Center, iti amianan laeng ti Paris. Naawis amin a Saksi ni Jehova idiay Francia, agraman dagiti agsasao iti Pranses a Saksi idiay Belgium ken Switzerland, kasta met kadagiti kongregasion idiay Alemania, Britania, Luxembourg, ken iti Netherlands.

Nakallalagip a Taripnong

Nangrugi ti panagsagana para iti panagtaripnong innem a bulan a nasaksakbay. Sa, iti dua la a lawas sakbay ti dedikasion, nagwelga dagiti agmammaneho iti trak a Pranses, a binarikadaanda dagiti kangrunaan a kalsada ken dagiti paggasolinaan. Maitulod ngata iti umiso a tiempo dagiti tugaw ken dadduma pay nga alikamen a mausar iti taripnong? Dagiti ngata bangen iti kalsada ti makalapped kadagiti kakabsat nga umay? Nakagin-awa ti amin idi a nalpas ti welga iti uneg ti makalawas, ket naluktan manen dagiti kalsada. Iti rabii ti Biernes sakbay ti dedikasion iti ngudo ti lawas, 38 a trak ti nangitulod iti 84,000 a tugaw iti dua a nalawa a lugar a naabangan para iti okasion. Nasurok a 800 a kakabsat ti nagtrabaho iti nagpatnag agingga iti alas 9:30 ti agsapa ti Sabado tapno iplastarda dagiti tugaw, ti plataporma, alikamen iti sound, ken siam a nagdadakkel a video screen.

Iti alas 6:00 ti agsapa ti Domingo, naluktan dagiti ridaw, ket nangrugi a sumrek dagiti adu a tattao. Agdagup iti 17 a naarkila a tren ti nangyeg kadagiti nasurok a 13,000 a Saksi iti kabisera. Nasurok a dua gasut a lokal a kakabsat ti adda kadagiti estasion ti tren a mangkablaaw kadagiti nagbiahe ken mangkuyog kadakuada a nagrupon-grupo iti lugar a pagkombensionan. Kinuna ti maysa a kabsat a babai a daytoy naayat nga urnos ti nangyeg kadakuada “iti kinatalged ken kinaragsak.”

Dadduma ti immay idiay Paris babaen ti eroplano wenno kotse. Nupay kasta, kaaduan ti dimteng babaen ti 953 a bus, idinto ta dagiti Saksi idiay Paris nagluganda kadagiti publiko a pagluganan a napan iti Exhibition Center. Adu ti nagpatnag a nagbiahe wenno nagparbangon a pimmanaw kadagiti pagtaenganda, ngem madlaw la unay ti gagarda a dumar-ay iti daytoy a panagtataripnong. Sigagagar a nagkikinnablaaw ken sibabara a nagririnnakep dagiti aggagayyem a no mano a tawen a di nagkikita. Dagiti namaris a kawes iti pagilianda ti nangipaay iti internasional a rikna iti naragsak a tallaong. Awan duadua, maysa a naisangsangayan a banag ti mapaspasamak.

Idi mangrugin ti programa iti alas 10:00 t.b., okupadon amin a pagtugawan, ngem ginasut a tattao pay ti sumangsangpet iti tunggal minuto. Sadinoman a tumaliaw ti maysa, naisem a ruprupa ti makitana. Rinibu ti nakatakder wenno nakatugaw iti sementado a suelo. Kas panangiparangarang iti espiritu ti tema ti taripnong, adu kadagiti ub-ubbing ti siaayat a nagtakder tapno makatugaw dagiti natataengan. “Siraragsakkami a nangted kadagiti tugawmi kadagiti ay-ayatenmi a kakabsat nupay saanmi ida nga am-ammo!” insurat ti maysa a pagassawaan. Adu ti nangipakita iti nasayaat nga espiritu ti panagsakripisio: “Nakatakderkami iti agmalmalem iti abay dagiti tugaw a nagtitinnulonganmi nga inyurnos iti rabii ti Biernes. Ngem uray laeng ti kaaddami, linapunosnakami iti panagyaman ken Jehova.”

Uray pay no nabannog wenno naktanganda, impamaysa dagiti delegado ti nagdengngeg kadagiti report manipud sabsabali a pagilian ken kadagiti palawag da Lloyd Barry ken Daniel Sydlik, miembro met ti Bagi a Manarawidwid. Ni Kabsat Barry ti nangibuksil iti suheto a “Ni Jehova Pawadwadenna ti Pigsa,” ket intampokna no kasano a pinaraburan ni Jehova ti ilina iti irarang-ay iti baet dagiti nadumaduma a pakasuotan. Napauluan ti palawag ni Kabsat Sydlik iti “Naragsak ti Umili a ni Jehova ti Diosna!” Agpada a naintiempuan dagiti palawag gapu iti agdama nga ibubusor a sarsarangten dagiti Saksi ni Jehova idiay Francia. Inlawlawag ni Kabsat Sydlik a saan nga agdepende ti pudpudno a kinaragsak kadagiti makinruar a banag no di ket iti relasiontayo ken Jehova ken iti kapanunotantayo maipapan iti biag. Ti saludsodna iti tallaong a, “Naragsakkayo kadi?” ket nasungbatan iti gumgumluong a palakpak.

Maysa a kabsat a babai a “napukaw ti rag-ona” ti nagsurat kalpasanna: “Kellaat a naamirisko a maragpatko ti kinaragsak. Saan nga umiso ti pangiturturongak iti panagreggetko, ket babaen iti daytoy a palawag, impatuldo ni Jehova kaniak a kasapulak unay ti agbalbaliw.” Kuna ti maysa pay a kabsat a lalaki: “Ita, kayatko ti makidangadang tapno maparagsakko ti puso ni Jehova. Diak ipalubos nga adda aniaman a mangikkat iti rag-o a nangrugi a mariknak iti kaunggak.”

Iti panagleppas ti taripnong, kasta unay ti gagar ti tserman a nangyanunsio iti bilang ti timmabuno: 95,888​—ti kadakkelan pay laeng a panagtataripnong dagiti Saksi ni Jehova idiay Francia!

Kalpasan ti pangserra a kanta a kinanta dagiti adu buyogen iti lua ti kinaragsak, ken ti maudi a kararag, nagrubbuat dagiti kakabsat nga agawid a siraragsak nupay nalidayda. Nakadidillaw ti kinabara ken kinamannakigayyem dagiti nakitaripnong. Adu dagiti nasayaat a komento dagiti agmammaneho iti bus maipapan iti kababalin dagiti delegado. Nasdaawda met iti pannakaorganisar dagiti bambanag ta nakapanaw iti Exhibition Center amin dagiti 953 a bus iti las-ud ti dua nga oras nga awan a pulos panaglilinnetlet ti trapiko! Inapresiar met unay dagiti empleado ti tren ken publiko a pagluganan ti kondukta dagiti delegado. Simmaruno dagiti adu a nasayaat a panagsasarita, ken naipaay ti nasayaat a pammaneknek.

“Maysa nga Ubbog iti Disierto”

Indagadag ni apostol Pablo kadagiti padana a Kristiano: “Agpipinnanunottayo koma iti maysa ken maysa tapno mangparegta iti ayat ken nasayaat nga ar-aramid, . . . agpipinnaregtatayo iti maysa ken maysa, ket nangnangruna a kasta bayat a makitkitatayo a ti aldaw umas-asidegen.” (Hebreo 10:24, 25) Sigurado a daytoy naisangsangayan a panagtataripnong ket gubuayan ti dakkel a pammabileg iti amin, “maysa nga ubbog iti disierto” kas panangiladawan ti maysa a kabsat a babai. “Pimmanawkami a napabileg, naparegta, napakired, ken ad-adda a determinado ngem iti kaanoman nga agrag-o iti panagserbi ken Jehova,” insurat dagiti kakabsat nga agpapaay iti sanga ti Togo. “Nagawid a naragsak dagiti malidlidayan,” kinuna ti maysa a manangaywan iti sirkito. “Napaganaygay ken napatibker dagiti kakabsat,” kinuna ti sabali. “Pulos a dimi pay narikna idi ti kastoy a kinasinged iti organisasion ni Jehova,” natignay nga insurat ti maysa a pagassawaan.

“Ti sakak agtakder iti nasimpa a disso: kadagiti gimgimong idaydayawkonto ni Jehova,” kinuna ti salmista. (Salmo 26:12) Dagiti kakasta a panagtataripnong dagiti Kristiano ti mangtulong iti amin a mapasubli ti natibker a naespirituan a kasasaad iti sango dagiti tubeng. “Aniaman dagiti pakasuotan,” pinasingkedan ti maysa a kabsat a babai, “naitukit iti kaunggan dagiti pusomi dagitoy a naisangsangayan a kanito ket addanto latta a kankanayon a mangliwliwa kadakami.” Umasping iti daytoy, insurat ti maysa nga agdaldaliasat a manangaywan: “No tumaud dagiti narigat a panawen, ti lagip daytoy paraman ti Paraiso ti tumulongto kadakami a mangdaer kadagitoy.”

“Ipadayawyo ni Jehova, dakayo a sangsangkakabagian dagiti il-ili, ipadayawyo ni Jehova ti dayag ken kinapigsa,” imbalakad ti Salmo 96:7. Awan duadua, ti pannakaidedikar ti baro a pasilidad ti sanga idiay Francia ket agallangugang a panagbiktoria ni Jehova. Isu laeng ti makaipatungpal iti proyekto iti sango ti kasta a nainget ken nasaknap nga ibubusor. Ad-adda a determinado itatta dagiti Saksi ni Jehova idiay Francia nga ‘agtalinaed iti ayat ni Kristo’ ken ‘mangisilnag ti silawda.’ (Juan 15:9; Mateo 5:16) Dagiti amin a timmabuno iti programa ti dedikasion ti awanan panagkitakit a makiraman iti rikna ti salmista: “Naggapu daytoy ken Jehova a mismo; nakaskasdaaw dayta kadagiti matatayo.”​—Salmo 118:23, NW.

[Ladawan iti panid 26]

Lloyd Barry

[Ladawan iti panid 26]

Daniel Sydlik

[Ladawan iti panid 26]

95,888 ti timmabuno iti naisangsangayan a programa iti Villepinte Exhibition Center

[Dagiti Ladawan iti panid 28]

Rinibu kadagiti dimmar-ay ti nagtaktakder wenno nagtugaw iti suelo a nagdengngeg