Aramid a “Sigurado a Makatukay iti Panagraem”
PINATIGMAANAN ni apostol Pedro dagiti padana a Kristiano: “Taginayonenyo a nasayaat ti kababalinyo iti tengnga dagiti nasion, tapno, iti banag a pangsawanda iti maibusor kadakayo a kasla managaramid iti dakes, dayawenda koma ti Dios . . . kas bunga ti nasayaat nga ar-aramidyo a masaksianda.” (1 Pedro 2:12) Iti adu a tawenen, iparparangarang dagiti Saksi ni Jehova idiay Italia ti kasta a nasayaat a kababalin iti publiko. Kas panangtungpal iti bilin ni Jesus a ‘mangasaba manipud kadagiti tuktok dagiti balay,’ sipapanayag nga an-annurotenda amin a Nakristianuan nga aktibidadda, iti imatang ti publiko. (Mateo 10:27; Juan 18:20) Gapuna, idi inwarnak ti maysa nga abogado nga Italiano ken maysa a padi dagiti akusasion a dagiti Saksi ni Jehova “sinsinan relihioso a sekta” ken imbilangda ida kadagiti “mailimlimed a bunggoy a mangkemmeg kadagiti tattao,” inkeddeng dagiti Saksi ti agdarum gapu kadagiti pammardayada.
Iti umuna a bista, inkeddeng ti korte nga awan linteg a nasalungasing ti abogado ken ti padi. Nupay kasta, idi Hulio 17, 1997, winaswas ti Korte a Pagapelaran ti Venice ti desision ti immuna a korte, a nasarakan nga agpada a nakabasol dagiti naidarum. Kuna ti Korte a Pagapelaran: “Agpada a dagiti kuestionable a naipablaak nga artikulo naglaonda kadagiti ebkas ken sasao a talaga a mangperdi iti reputasion dagiti pasurot ti relihion dagiti ‘Saksi ni Jehova.’ Agparang a panggep dagiti artikulo nga ibutaktak dagiti pasurot daytoy a relihion tapno guraen ida ti publiko.” Kinuna ti korte a dagiti artikulo “dida maipasdek ti lehitimo a panangaramat iti karbengan nga agpadamag ken mangkritikar.” Pinagmulta ti korte dagiti dua a mamarpardaya ken pinagbayadna pay ida iti amin a nagastos ti husgado, agraman amin a nabusbos dagiti Saksi iti panagdemandada para iti dua a kaso.
Iti naisurat a pangngeddengna, kinuna ti Korte a Pagapelaran ti Venice: “Babaen laeng ti panangbalanse ken panangsalaknib iti amin a karbengan a ginarantiaan ti Konstitusion [ti Italia] a posible a lapdan dagiti kita ti panangidumduma ken narelihiosuan a kinapanatiko.” Bigbigen ti pangngeddeng a ti aktibidad dagiti Saksi ni Jehova ket saan a mailimlimed wenno sinsinan. Kinuna ti korte a “ti panangidasig kadagiti Saksi kadagiti nalimed a kagimongan dina man la raemen ti pagrukodan ti historikal a kinapudno, tangay ti naikuna a relihion adda iti adu a siudad ken ti nasaknap a trabaho a panangasaba dagiti miembrona, nangnangruna iti Domingo ken dadduma pay a piesta opisial, ket nalatak ken sigurado a makatukay iti panagraem gapu iti kinareggetda, aniaman ti ipapan ti maysa iti doktrina a maikaskasaba.” Gapuna, ti rekord iti naregta a panangasaba ken mapagwadan a kababalin dagiti Saksi ni Jehova idiay Italia nakatulong tapno maparmek ti panangidumduma kadakuada.—Mateo 5:14-16: 1 Pedro 2:15.