“Asino ti Nangputot Kadagiti Tedted ti Linnaaw?”

DINESKRIBIR ti maysa a 19-siglo nga agiwarwarnak dagiti tedted ti linnaaw kas “likido a saniata ti daga, a binukel ti angin.” Insaludsod ti Namarsua kadatayo iti patriarka idi ugma a ni Job: “Asino ti nangputot kadagiti tedted ti linnaaw?” (Job 38:28) Ipalpalagip ti Dios ken Job ti nadiosan a namunganayan ti linnaaw.

Malaksid iti nasilap, marasaniata a pintasna, iti Biblia nainaig ti linnaaw iti bendision, kinabunga, kinawadwad, ken pannakataginayon ti biag. (Genesis 27:28; Deuteronomio 33:13, 28; Zacarias 8:12) Kabayatan iti napudot, awan tudo a panawen idiay Israel, “ti linnaaw sadi Hermon” ti mangbibiag kadagiti mula iti daga, ken uray dagiti umilina. Ti kabakiran ken naarpawan iti niebe a Bantay Hermon kaskasdi nga agpataud iti alibungubong iti rabii nga agbalin a nawadwad a linnaaw. Impada ni salmista David ti gin-awa nga iyeg daytoy a linnaaw iti makaay-ayo a panagtitimpuyog a sangsangkamaysa dagiti agdaydayaw ken Jehova.​—Salmo 133:3.

Dagiti sursuro ni mammadto a Moises iti Israel ket nadungngo ken makapagin-awa, kas dagiti tedted ti linnaaw. Kinunana: “Ti pannursurok agtedtedto kas tudo, ti palawagko agtinnagto kas ti linnaaw: kas arimukamok iti rabaw ti ruot a nalasbang, ken kas ti arbis iti rabaw ti nateng.” (Deuteronomio 32:2) Ibumbunannag itatta dagiti Saksi ni Jehova ti mangted-biag a naimbag a damag maipapan iti Pagarian ti Dios inggana iti ungto ti daga. (Mateo 24:14) Iyaw-awis ti Dios: “‘Umayka!’ Ket ti asinoman a mawaw umay koma; ti asinoman a mayat awatenna koma ti danum ti biag nga awan bayadna.’” (Apocalipsis 22:17) Riniwriw a tattao kadagiti amin a nasion ti umaw-awat iti daytoy nga awis iti naespirituan a pannakapabang-ar nga agtaud iti Dios, a makataginayon iti biag iti awan inggana.