“Ti Dios Ayatenna ti Naragsak a Manangited”

NI Jehova ti pagulidanan iti kinaparabur. Kinapudnona, kuna ti Biblia nga isu ti Nangted iti “tunggal naimbag a sagut ken tunggal naan-anay a rangkap.” (Santiago 1:17) Amirisenyo, kas pagarigan, dagiti banag a pinarsua ti Dios. Inaramidna ti taraon a naimas, saan nga awan ramramanna; sabsabong a nagpipintas ti marisda, saan a nakusiaw; dagiti ilelennek ti init a nakarangranga, saan a pusasaw. Wen, amin a paset ti panamarsua ni Jehova paneknekanda ti ayat ken kinaparaburna. (Salmo 19:1, 2; 139:14) Maysa pay, naragsak a Manangited ni Jehova. Pagragsakanna nga aramiden ti naimbag para kadagiti adipenna.​—Salmo 84:11; 149:4.

Nabilin dagiti Israelita nga iparangarangda ti kinaparabur ti Dios no iti pannakilangenda iti maysa ken maysa. “Dikanto patangkenen ta pusom, wenno petpetan ta imam iti napanglaw a kabsatmo,” kuna ni Moises kadakuada. “Sika mangtedkanto kenkuana a di agkurang, ket ta pusom saanto a mapaldaangan [“naimut,” NW].” (Deuteronomio 15:7, 10) Tangay ti panangted aggubuay koma iti puso, masapul a pagragsakan dagiti Israelita ti kinamanagparaburda.

Kasta met laeng ti naibalakad kadagiti Kristiano. Wen, kinuna ni Jesus nga adda “kinaragsak iti panangted.” (Aramid 20:35) Mapagwadan dagiti adalan ni Jesus no iti naragsak a panangted. Kas pagarigan, kuna ti Biblia a sadiay Jerusalem dagidiay nagbalin a manamati “napanda inlako dagiti sanikua ken dagiti kukuada ket imbunongda dagiti naglakuanda kadagiti isuamin, kas iti pakasapulan ti asinoman.”​—Aramid 2:44, 45.

Ngem idi agangay pimmanglaw dagitoy naparabur a taga Judea. Saan nga inlawlawag nga eksakto ti Biblia no apay a kastat’ nagbanagan ti kasasaadda. Kuna dagiti dadduma nga eskolar a ti bisin a nadakamat iti Aramid 11:28, 29 ti nalabit makagapu. Aniaman ti makagapu, nakurapay unay ti situasion dagiti Kristiano sadi Judea, ket kayat idi ni Pablo a siguraduen a maasikaso ti panagkasapulanda. Kasanona nga aramiden dayta?

Panagur-or Para Kadagiti Agkasapulan

Dimmawat ni Pablo iti tulong dagiti kongregasion agingga idiay Macedonia, ket inyurnosna ti panagur-or para kadagiti nakurapay a Kristiano sadi Judea. Kadagiti taga Corinto, insurat ni Pablo: “Kas kadagiti imbilinko kadagiti kongregasion ti Galacia, aramidenyo met a mismo dayta a pamay-an. Tunggal umuna nga aldaw ti lawas tunggal maysa kadakayo iti bukodna a balay mangilasin koma a mangidulin iti aniaman a kas iti irarang-ayna.”a​—1 Corinto 16:1, 2.

Pinanggep ni Pablo a dagdagus a maipatulod dagitoy a pundo kadagiti kakabsat idiay Jerusalem, ngem nabannayat ti panagresponde dagiti taga Corinto kadagiti instruksion ni Pablo. Apay? Dida kadi makipagrikna iti sagsagabaen dagiti kakabsatda idiay Judea? Saan, ta ammo ni Pablo a dagiti taga Corinto “aglaplapusanan[da] iti amin a banag, iti pammati ken sao ken pannakaammo ken isuamin a kinapasnek.” (2 Corinto 8:7) Nalabit, okupadoda a mangtamtaming kadagiti dadduma a nasken a banag a dinakamat ni Pablo iti immuna a suratna kadakuada. Ngem ita naganetget ti situasion idiay Jerusalem. Isu a nadakamat ni Pablo ti problema iti maikadua a suratna kadagiti taga Corinto.

Kiddaw iti Kinaparabur

Umuna, nadakamat ni Pablo dagiti taga Macedonia kadagiti taga Corinto, a mapagwadan ti panagrespondeda no iti itutulong. “Kabayatan ti dakkel a subok iti sidong ti pannakaparigatda,” insurat ni Pablo, “ti kinaruay ti rag-oda ken ti nakaro a kinakurapayda pinaglaplapusananna dagiti kinabaknang ti kinamanagparaburda.” Saan a kasapulan dagidi taga Macedonia ti panangdagdag. Maisupadi, kinuna ni Pablo nga iti “kabukbukodanda a nakem intultuloyda ti agpakpakaasi kadakami buyogen ti kasta unay a panagdawdawat iti pribilehio a siaasi a panangted.” Ti naragsak a kinaparabur dagiti taga Macedonia ad-adda pay a nagpaiduma no panunotentayo “ti nakaro a kinakurapayda.”​—2 Corinto 8:2-4.

Idi pinadayawanna dagiti taga Macedonia, rubrubroban kadi ni Pablo ti rikna dagiti taga Corinto a makikompetensia? Saan a pulos, ta ammona a saan a kasta ti umiso a wagas a pananggutugot. (Galacia 6:4) Maysa pay, ammona a saan a kasapulan a pabainanna dagiti taga Corinto tapno aramidenda ti mayanatup. Imbes ketdi, nagtalek a dagiti taga Corinto pudpudno nga ay-ayatenda dagiti kakabsatda idiay Judea ket tarigagayanda ti tumulong. “Yantangay makatawen ti napalabasen,” imbagana kadakuada, “inrugiyo saan laeng a ti panagaramid no di ket kasta met ti panagayat nga agaramid.” (2 Corinto 8:10) Kinapudnona, kadagiti dadduma nga aspeto ti itutulong, mapagwadan met dagiti taga Corinto. “Ammok ti kinamanagsaganayo iti panunot nga ipaspasindayagko kadagiti taga Macedonia maipapan kadakayo,” kinuna ni Pablo kadakuada, sa innayonna: “Ti regtayo ginutugotna ti kaaduan kadakuada.” (2 Corinto 9:2) Ngem ita, masapul a tignayenen dagiti taga Corinto ti regtada ken ti kinamasindadaanda nga agtignay.

Gapuna, imbaga kadakuada ni Pablo: “Tunggal maysa aramidenna koma kas iti inkeddengna iti pusona, saan nga iti dakes a nakem wenno iti sidong ti pannakapilit, ta ti Dios ayatenna ti naragsak a manangited.” (2 Corinto 9:7) Ti ngarud ranta ni Pablo, saan a tapno piliten dagiti taga Corinto, ta di naragsak ti manangited no mapilpilit. Nabatad nga impapan ni Pablo nga addan ti maitutop a motibo, a tunggal maysa inkeddengnan ti mangted. Kanayonanna, imbaga kadakuada ni Pablo: “Ta no ti kinamanagsagana umun-una nga adda, nangnangruna a maawat dayta sigun iti adda iti maysa a tao, saan a sigun iti awan iti maysa a tao.” (2 Corinto 8:12) Wen, no addan ti kinamanagsagana​—no ti tao nagutugoten iti ayat​—ti itukonna awaten ti Dios, uray pay kasanot’ kabassit ti itedna.​—Idiligyo iti Lucas 21:1-4.

Nararagsak a Manangited Itatta

Ti tulong a para kadagiti Kristiano idiay Judea ket nagsayaat nga ehemplo iti kaaldawantayo. Inyussuat dagiti Saksi ni Jehova ti sangalubongan a kampania ti panangasaba, nga idandanonda ti taraon kadagiti minilion a mabisbisin iti naespirituan. (Isaias 65:13, 14) Ar-aramidenda daytoy kas panagtulnogda iti bilin ni Jesus: “Inkayo ngarud ket mangaramidkayo kadagiti adalan a tattao iti isuamin a nasnasion, a bautisaranyo ida . . . nga isuroyo kadakuada a tungpalenda dagiti isuamin a bambanag nga imbilinko kadakayo.”​—Mateo 28:19, 20.

Saan a nalaka a trabaho ti panangtungpal iti daytoy. Saklawenna ti pannakamantener dagiti pagtaengan dagiti misionero ken dagiti pasilidad ti nasurok a sangagasut a sanga nga opisina iti intero a lubong. Ramanenna pay ti pannakabangon dagiti Kingdom Hall ken Assembly Hall tapno adda maikanatad a paggigimongan dagiti agdaydayaw ken Jehova ket maparegtada ti maysa ken maysa. (Hebreo 10:24, 25) No dadduma, ipaay met dagiti Saksi ni Jehova ti tulong kadagiti lugar a dinadael dagiti natural a didigra.

Panunotenyo met ti nagdakkel a gastos iti panagimprenta. Tunggal lawas, iti promedio, nasurok a 22,000,000 a kopia Ti Pagwanawanan wenno agarup 20,000,000 a kopia ti Agriingkayo! ti mayimprenta. Mainayon pay kadagitoy regular nga abasto ti naespirituan a taraon dagiti minilion a libro, broshur, audiocassette, ken videocassette a maparpartuat iti tinawen.

Kasanot’ pannakasuportar amin dagitoy a trabaho? Babaen kadagiti boluntario a donasion. Maar-aramid dagitoy, saan a tapno pagpasindayag wenno gaput’ inaagum a motibo, no di ket tapno dumur-as ti pudno a panagdayaw. Gapuna, ti kasta a panangted paragsakenna daydiay nangted, ken mangyeg iti bendision ti Dios. (Malakias 3:10; Mateo 6:1-4) Uray dagiti ubbing a Saksi ni Jehova ipakpakitada a naparabur, naragsakda a manangted. Kas pagarigan, idi nadamagna ti dadael a gapuanan ti bagyo iti maysa a paset ti Estados Unidos, nagkontribusion ni 4-anyos nga Allison iti $2. “Daytoy la ti karga ti alkansiak,” insuratna: “Ammok a dagiti ubbing napukawda amin dagiti ay-ayam ken libro ken muniekada. Siguro mausaryo daytoy a kuarta a paggatang iti libro para iti ubing a babai a kaedadko.” Ni Maclean, a walo ti tawenna, nagsurat a maragsakan ta awan natay kadagiti kakabsat iti dayta a bagyo. Innayonna: “Nakaganansiaak iti $17 a naglako kadagiti hubcap (pagtakkab kadagiti turnilio ti lugan) a kaduak ni tatangko. Adda koma pangigatangak iti kuartak, ngem nalagipko dagiti kakabsat.”​—Kitaenyo met ti kahon iti ngato.

Wen, agrag-o ti puso ni Jehova no makitana a dagiti agtutubo ken nataengan iyun-unada ti intereses ti Pagarianna babaen ti ‘panangdayaw kenkuana buyogen dagiti napateg a sanikuada.’ (Proverbio 3:9, 10, NW) Siempre, awan makabael a mangpabaknang ken Jehova, tangay kukuana amin a banag. (1 Cronicas 29:14-17) Ngem ti panangsuportar iti trabaho ket maysa a pribilehio a mabalin a pangipakitaan ti managdaydayaw iti ayatna ken Jehova. Agyamankami kadagiti isuamin a ti pusoda nagutugot iti kasta a pamay-an.

[Footnote]

[Kahon iti panid 26, 27]

Dagiti Pamay-an a Pilien Dagiti Dadduma a Mangted Kontribusion iti Sangalubongan a Trabaho

Adu ti mangilasin, wenno mangibadyet, iti kantidad nga itinnagda kadagiti kahon ti kontribusion a nasuratan iti: “Kontribusion Para iti Sangalubongan a Trabaho ti Sosiedad​—Mateo 24:14.” Kada bulan ipatulod dagiti kongregasion dagitoy a kantidad iti sangalubongan a hedkuarter sadi Brooklyn, New York, wenno iti lokal a sanga nga opisina.

Mabalin met nga ipatulod a direkta dagiti boluntario a donasion a kuarta iti Watch Tower Bible and Tract Society of the Philippines, P.O. Box 2044, 1060 Manila, wenno iti opisina ti Sosiedad iti pagilianyo. Mabalin met nga idonar dagiti alahas wenno dadduma pay a napapateg a banag. Masapul a mapakuyogan dagitoy a kontribusion iti ababa a surat a mangibaga a dayta ket direkta a sagut.

Kondisional a Donasion nga Urnos

Mabalin nga italek ti kuarta iti Watch Tower Society babaen ti naisangsangayan nga urnos a, no dumteng ti personal a pakasapulan ti nangidonar, maisubli ti donasion kenkuana. Para iti kanayonan nga impormasion, pangngaasiyo ta agsuratkayo iti Treasurer’s Office iti nadakamat a direksion.

Naiplano a Panangted

Malaksid pay kadagiti direkta a sagut a kuarta ken dagiti kondisional a donasion a kuarta, addada pay sabali a pamay-an ti panangted nga agpaay iti serbisio ti Pagarian iti intero a lubong. Mairaman kadagitoy ti:

Seguro: Mabalin a ti Watch Tower Society ti maipanagan kas benepisario ti life insurance policy wenno ti retirement/pension plan.

Deposito iti Banko: Mabalin nga italek wenno payable on death iti Watch Tower Society dagiti deposito iti banko, certificate of deposit, wenno individual retirement account, maitunos kadagiti alagaden ti lokal a banko.

Stock ken Bond: Mabalin nga idonar dagiti stock ken bond iti Watch Tower Society kas maysa a direkta a sagut wenno babaen ti maysa nga urnos a ti masapulan ket agtultuloy a maited iti nangidonar.

Real Estate: Mabalin nga idonar iti Watch Tower Society ti mailako a real estate babaen ti panangaramid iti direkta a sagut wenno babaen ti panangireserba iti life estate iti nangidonar, a makapagtultuloy nga agnaed sadiay bayat a sibibiag. Masapul a makiuman ti maysa iti Sosiedad sakbay ti legal a panangyallatiw kadagiti papeles ti aniaman a real estate iti Sosiedad.

Testamento ken Talek: Mabalin nga ipatawid ti sanikua wenno kuarta iti Watch Tower Society babaen ti legal ti pannakapatalgedna a testamento, wenno ti Sosiedad ti mabalin a maipanagan kas benepisario iti maysa a trust agreement. Mabalin nga addada bentahana iti buis no maysa a relihioso nga organisasion ti benepisario ti talek.

Kas ipasimudaag ti termino a “naiplano a panangted,” dagitoy a kita ti donasion kasapulanda ti panagplano daydiay mangidonar. Tapno matulongan dagiti indibidual nga agtarigagay a mangbenepisio iti Sosiedad baeten ti nagduduma a kita ti naiplano a panangted, insagana ti Sosiedad ti Ingles a broshur a napauluan Planned Giving to Benefit Kingdom Service Worldwide. Naisurat daytoy a broshur a pangsungbat kadagiti adu a saludsod a naawat ti Sosiedad maipapan kadagiti sagut, testamento, ken talek. Naglaon pay kadagiti kanayonan a makatulong nga impormasion kadagiti panagplano iti estate, pinansial, ken buis. Ket nadisenio daytoy a tumulong kadagiti indibidual idiay Estados Unidos nga agpalplano a mangipaay iti espesial a sagut iti Sosiedad itan wenno mangibatida iti ipatawid inton pumusayda tapno mapilida ti kasayaatan ken kaalistuan a metodo sigun kadagiti sirkumstansiada a mismo ken ti pamiliada.

Kalpasan a nabasada ti broshur ken nakiumanda iti Planned Giving Desk, adu dagidiay nakatulong iti Sosiedad ket maigiddato iti dayta, naaprobetsarda dagiti benepisio no iti panagbuis. Pakaammuanyo ti Planned Giving Desk ken ikkanyo ti kopia ti aniaman a nesesita a dokumento maipapan iti uray ania kadagitoy nga urnos. Asinoman nga interesado iti daytoy a broshur wenno uray ania kadagitoy a naiplano a panangted makiumanda koma iti Planned Giving Desk, babaen iti surat wenno telepono iti direksion a nailista ditoy baba wenno iti opisina ti Sosiedad nga agserserbi iti pagilianyo.

Planned Giving Desk

Watch Tower Bible and Tract Society of Pennsylvania

100 Watchtower Drive,

Patterson, New York 12563-9204

Telephone: (914) 878-7000

[Kahon iti panid 28]

Naragsak met a Manangited Dagiti Ubbing!

Kayatko nga ited kadakayo daytoy tapno makaaramidkayo iti ad-adu pay a librotayo. Naurnongko daytoy a kuarta babaen ti panangtulongko ken tatangko. Pagyamanan unay iti naanep a panagtrabahoyo.​—Pamela, agtawen iti pito.

Patulodankayo iti $6.85 a tumulong iti pannakaibangon ti ad-adu pay a Kingdom Hall. Naglakuak daytoy iti lemonada iti lansangan idi kalgaw.​—Selena, agtawen iti innem.

Nagtarakenak iti upa a nagtaudan ti kawitan ken maysa pay nga upa. Indatonko ken Jehova ti upa. Kamaudiananna, nakapataud iti tallo pay nga upa ket inlakok dagitoy. Iragpinko daytoy a gatad para iti trabaho ni Jehova.​—Thierry, agtawen iti walo.

Daytoy laeng ti kakaisuna a kuartak! Pangngaasiyo ta usarenyo a nainsiriban. Nagrigatko nga inurnong daytoy. Adtoy ti $21.​—Sarah, agtawen iti sangapulo.

Nangabakak iti umuna a premio iti ‘assignment’ idiay eskuelaan, isu a nakisalisalak iti pasalip ti ili. Inabakko manen ti umuna a premio ket kalpasanna ti maikadua a premio iti maudi a pasalip iti distrito. Kadagitoy amin, kuarta ti premiok. Kayatko nga iranud ti paset dayta a kuarta iti Sosiedad. Ammok a nabaelak nga inabak dagitoy a premio gapu iti pannakasanayko iti Teokratiko nga Eskuelaan ti Panagministro. Awan danagko iti panagreportko iti sanguanan dagiti hurado.​—Amber, adda iti maikanem a tukad.

Kayatko nga ited kadakayo daytoy a para ken Jehova. Imtuodenyo kenkuana ti pakausaran daytoy. Ammona ti isuamin.​—Karen, agtawen iti innem.

[Dagiti Ladawan iti panid 25]

Boluntario a donasion ti mangsupsuportar iti aktibidad dagiti Saksi ni Jehova