Ti Iyuuli ni Kristo Sadi Langit ken Dagiti Pagimbaganna Kadatayo

NAPASAMAK ti pannakaipalangit ni Jesus iti Bantay dagiti Olibo (Aramid 1:9, 12), iti asideg ti ili ti Betania (Lucas 24:50), maysa nga ili iti makindaya a paset ti Bantay dagiti Olibo. Dagiti laeng matalek nga apostolna ti nakaimatang iti iyuulina sadi langit. (Aramid 1:2, 11-13) Kuna ti rekord a “bayat a kitkitaenda, isu naipangato ket maysa nga ulep ti nangala kenkuana manipud iti panagkitada.” Tumangtangadda pay laeng a kumitkita kenkuana agingga a binagaan ida dagiti anghel a saandan a tumangtangad. Kinuna kadakuada dagiti anghel: “Daytoy Jesus a naipangato iti tangatang manipud kadakayo umayto a kasta iti isu met laeng a pamay-an kas iti pannakakitayo kenkuana nga ipapanna iti tangatang.”​—Aramid 1:9-11.

Paliiwenyo ta saan a ti porma (iti Griego, mor·pheʹ) no di ket ti “pamay-an” (iti Griego, troʹpos) ti ipapanaw ni Jesus ti dinakamat dagiti anghel. Idi nalingdan iti ulep, saanen a makita dagiti mata ti tao. Ipakita ti salaysay ti Aramid a saan a naranga wenno naariwawa ti pannakaipalangitna. Sumagmamano laeng a matalek a pasurotna ti nakaimatang ken ti umuna laeng a paset ti panagpangatona ti nakitada. Naipalangit ni Jesus iti wagas a mapaneknekan dagiti apostol, kas iti panangpaneknekda iti panagungarna. (Aramid 1:3) No kasta, saan laeng a basta “nagpukaw” manipud kadakuada, kas iti inaramidna idi a nagparang iti dua nga adalan idiay Emmaus, wenno kas iti anghel a nagparang ken Gideon a “nagpukaw iti imatangna.” (Lucas 24:31; Oc-ocom 6:21, 22) Ti panagpangatona ket kas iti panagpangato daydi anghel a nagparang kada Manoa ken ti asawana. Nagpaisagana kadakuada iti daton, ket “idi a ti darang agpangato a tumurong iti langit manipud iti altar, ti anghel ni Jehova immuli iti darang ti altar, ket ni Manoa ken ni asawana nakitada.”​—Oc-ocom 13:20.

Tangay ipakita ti Aramid 1:3-9 nga immuli ni Jesus sadi langit kalpasan ti 40 nga aldaw manipud panagungarna, adda sumagmamano nga aldaw a baet dagiti pasamak iti aldaw a panagungar ni Jesus a nailanad iti Lucas 24:1-49 ken ti iyuulina sadi langit kas nadeskribir iti bersikulo 51 iti dayta a kapitulo. Imutektekanyo met nga awan kadagiti dadduma a nagkauna a manuskrito ti sasao a “ket nangrugi a maiyuli sadi langit,” isut’ gapuna nga awan dagitoy iti dadduma a moderno a patarus (NE, AT). Ngem agparang dagita iti Bodmer Papyrus (P⁷⁵), Alexandrine Manuscript, Vatican Manuscript No. 1209, ken dadduma pay a nagkauna a manuskrito.

Ti Epektona Kadagiti Adalan

Agingga iti aldaw a pannakaipalangit ni Jesus, agparang nga ipagarup pay laeng idi dagiti adalan nga agturay ni Jesus iti maysa a naindagaan a pagarian, kas ipamatmat ti sasaoda iti Aramid 1:6. Babaen ti pannakaimatang dagiti adalanna iti panangrugi ti panagpangatona ken panangpalubosna a masaksianda ti umuna a paset ti iyuulina, imbatad ni Jesus kadakuada a nailangitan ti Pagarianna ket manipud iti daydi nga aldaw maisaad ni Jesus iti “makannawan ti Dios,” saan a kas ken David a “saan nga immuli iti langlangit,” kas situtured nga impalawag ni Pedro iti aldaw ti Pentecostes.​—Aramid 2:32-36.

Ti kasta a pasamak impalagipna met kadakuada dagiti dinakdakamat idi ni Jesus maipapan iti kasta a nailangitan a saad ken nakatulong kadagiti adalanna a mangtarus kadagidi a sinaona. Naklaat dagiti dadduma idi kinunana: “Ania, ngaruden, no makitayo ti Anak ti tao nga umul-uli sadiay yanna idi?” (Juan 6:62); ken kinunana kadagiti Judio: “Naggapukayo iti disso a pagturayan iti baba; naggapuak iti disso a pagturayan iti ngato.” (Juan 8:23) Iti daydi maudi a rabii a pannakitaripnongna kadagiti apostolna, imbagana kadakuada a ‘mapan iti Ama tapno mangisagana iti maysa a lugar a maipaay kadakuada’ (Juan 14:2, 28); bayat a kaduana ida iti maudi a rabii ti biagna kas tao, kinunana iti Amana a ‘naturposnan ti trabaho [a naited kenkuana] ditoy daga’ ken nagkararag, a kunkunana: “Padayagennak iti sibaymo iti dayag nga adda kaniak idi iti sibaymo sakbay a naadda ti lubong,” sa kinunana pay, “Um-umayakon kenka.” (Juan 17:4, 5, 11) Idi natiliw, kasta met laeng ti imbagana iti saklang ti Sanhedrin. (Mateo 26:64) Kalpasan ti panagungarna, kinunana ken Maria Magdalena: “Isardengmo ti kumkumpet kaniak. Ta diak pay immuli iti Ama. Ngem mapanka kadagiti kakabsatko ket kunaem kadakuada, ‘Umuliak ken Amak ken Amayo ken iti Diosko ken Diosyo.’” (Juan 20:17) Ngem uray no imbagana amin dagitoy, nabatad a sa la naawatan dagiti adalan ti kaipapanan dagitoy a sasao iti daydi aldaw nga iyuulina sadi langit. Idi agangay, iti maysa a sirmata, nakita ni Esteban ni Jesus nga adda iti makannawan ti Dios (Aramid 7:55, 56), ken napasaran ni Pablo ti epekto ti nailangitan a dayag ni Jesus.​—Aramid 9:3-5.

Ti Pannakailukat ti ‘Baro ken Nabiag a Dalan’

Nupay sibabagi a nagpangato ni Jesus, iti kasta nakita dagiti agbuybuya nga adalanna, awan ti pangibatayan iti panangikuna a nagtalinaed ti pisikal a kasasaadna idi liningdan ti ulep. Kuna ni apostol Pedro a natay ni Jesus iti lasag ngem napagungar “iti espiritu.” (1 Pedro 3:18) Inlawlawag ni Pablo a “ti lasag ken dara dida mabalin a tawiden ti pagarian ti Dios.” (1 Corinto 15:50); idiligyo met ti kinuna ni Jesus idiay Juan 12:23, 24 iti 1 Corinto 15:35-45.) Inyarig ni Pablo ti iyuuli ni Jesus sadi langit iti saklang ti Dios iti iseserrek ti nangato a padi iti Kasasantuan a benneg ti tabernakulo iti Aldaw ti Panangabbong ket dinakamatna nga iti kasta nga okasion, ti laeng dara (saan a ti lasag) dagiti daton ti itugot ti nangato a padi. (Hebreo 9:7, 11, 12, 24-26) Kalpasanna, inyasping ni Pablo ti lasag ni Kristo iti kortina a namagsina iti umuna a benneg ken ti Kasasantuan a benneg. No sumrek ti nangato a padi iti Kasasantuan a benneg tapno dumatag iti Dios, saanna nga itugot ti kortina no di ket lumabas agingga iti labes dayta a bengbeng. Gapuna, kinuna ni Pablo nga “addaantayo iti kinatured a sumrek iti nasantuan a disso babaen ti dara ni Jesus, nga inyussuatna maipaay kadatayo kas maysa a baro ken nabiag a dalan babaen ti kurtina, kayatna a sawen, ti lasagna.”​—Hebreo 9:3, 24; 10:10, 19, 20; idiligyo ti Juan 6:51; Hebreo 6:19, 20.

Idi immuli ni Jesus sadi langit tapno idatagna ken Jehova ti mangsubbot a pateg ti darana, naluktan ti “baro ken nabiag a dalan” iti iyaadani iti Dios babaen ti kararag. Linuktan met dayta ti dalan iti nailangitan a biag, kas paneknekan ti kinuna a mismo ni Jesus nga “awan ti tao nga immuli sadi langit no di ti bimmaba manipud langit, ti Anak ti tao.” (Juan 3:13) No kasta, saan nga inlukat ni Enoc man wenno da Elias ken David daytoy a dalan. (Genesis 5:24; 2 Ar-ari 2:11; Aramid 2:34) Kas kuna ni Pablo: “Ti nasantuan nga espiritu pagbalinenna a nalawag a ti dalan nga agturong iti nasantuan a disso saan pay a naiparangarang bayat a sitatakder idi ti umuna a tolda.”​—Hebreo 9:8.

No Apay a Nasken

Adda sumagmamano a makagapu wenno panggep no apay a nasken ti iyuuli ni Jesus sadi langit. Kinunana idi a masapul a ‘pumanaw’ tapno maibaonna ti nasantuan nga espiritu ti Dios kas katulongan dagiti adalanna. (Juan 16:7-14) Idi imparukpok ni Jesus dayta nga espiritu iti aldaw ti Pentecostes, nabatad kadagiti adalan a maysa dayta a pammaneknek nga adda idin ni Jesus iti saklang ti Dios ket naidatagnan Kenkuana ti pateg ti daton a pangsubbotna. (Aramid 2:33, 38) Maysa pay, tangay saan a ditoy daga, iti Kasasantuan a benneg ti templo sadi Jerusalem, no di ket idiay laeng “langit a mismo . . . iti sanguanan ti persona ti Dios” ti pakaidatagan ti pateg ti darana, nasken ngarud nga umuli [ni Jesus] sadi langit. (Hebreo 9:24) Masapul met a maaramid dayta gapu iti pannakadutok ken pannakaipadayag ni Jesus kas “naindaklan a nangato a padi a limmasat iti langlangit.” (Hebreo 4:14; 5:1-6) Inlawlawag ni Pablo a “no, ita, isu adda iti rabaw ti daga, saan koma a maysa a padi,” ngem tangay “nagtugaw iti makannawan ti trono ti Natan-ok idiay langlangit,” ‘nagun-oden [ni Jesus] ti ad-adda a nakasaysayaat a publiko a panagserbi, iti kasta isu met ti manangibabaet iti maitupag a nasaysayaat a tulag.’ (Hebreo 8:1-6) Gapu iti daytoy, dagiti Kristiano nga adda iti babaen ti natawid a basol maliwliwada a makaammo nga “addaan[da] ti katulongan iti Ama, ni Jesu-Kristo, daydiay nalinteg.”​—1 Juan 2:1; Roma 8:34; Hebreo 7:25.

Kamaudiananna, nasken ti iyuuli ni Jesus sadi langit tapno makapagturay iti Pagarian a naipatawid kenkuana, ket “dagiti anghel ken dagiti agturay ken dagiti pannakabalin naipasakopda kenkuana.” (1 Pedro 3:22; Filipos 2:6-11; 1 Corinto 15:25; Hebreo 10:12,13; idiligyo ti Daniel 7:14.) Tangay ‘naparmekna ti lubong’ (Juan 16:33), tinungpal ni Jesus ti padto iti Salmo 68:18, nga ‘immuli iti nangato ket impanawna dagiti nakayawan,’ a ti kaipapananna ket inlawlawag ni Pablo idiay Efeso 4:8-12.