Mapukpukaw Kadin ti Kaipapanan ti Sao a “Kristiano”?
ANIA ti kayat a sawen ti panagbalin a Kristiano? Ania ti sungbatyo? Kasta ti naisaludsod kadagiti tattao iti nagduduma a pagilian, ket dagitoy ti dadduma kadagiti sungbatda:
“Panangsurot ken ni Jesus ken panangtulad kenkuana.”
“Panagbalin a nasingpet a tao ken panangtulong kadagiti sabsabali.”
“Panangawat ken Kristo kas Apo ken Manangisalakan.”
“Pannakimisa, panagrosario, ken panagkomulgar.”
“Iti panagkunak, saan a kasapulan a makimisaka tapno agbalinka a Kristiano.”
Nagduduma ti makariro a panangdepinar uray dagiti diksionario. Kinapudnona, naglaon ti maysa a reperensia iti sangapulo a depinasion ti sao a “Kristiano,” manipud “panamati wenno panangannurot iti relihion ni Jesu-Kristo” agingga iti “natakneng wenno nadayaw a tao.” Di pakasdaawan nga adu ti marigatan a mangilawlawag iti kaipapanan ti panagbalin a Kristiano.
Nalukay a Kasasaad
Kadagiti agkunkuna a Kristiano ita—uray kadagidiay agkakapammatian—nagduduma ti kapanunotanda maipapan kadagiti topiko a kas iti nadibinuan a pannakaipaltiing ti Biblia, teoria ti ebolusion, pannakinamin ti simbaan iti politika, ken ti panangiranud iti pammati kadagiti sabsabali. Masansan a mapagsusupiatan dagiti moral nga isyu, kas iti aborsion, homoseksualidad, ken ti panagdenna dagiti di nagkasar. Nalawag a nalukayen ti kasasaad.
Kas pagarigan, impadamag ti pagiwarnak a Christian Century nga iti di pay nabayag, ti tribunal ti maysa nga iglesia a Protestante intandudona ti kalintegan ti iglesia a “mangpili iti bakla a panglakayen nga agbalin a miembro ti kamara daytoy.” Adda pay ketdi dagiti teologo a nagkuna a saan a nasken ti panamati ken Jesus tapno maisalakan. Kuna ti maysa a report iti The New York Times a patienda a dagiti Judio, Muslim, ken dadduma pay “makastrekda met idiay langit [a kas kadagiti Kristiano].”
Panunotenyo ti maysa a Marxist a mangitantandudo iti kapitalismo wenno ti maysa a demokrata a pabor iti diktadura wenno ti maysa nga environmentalist (tao a maseknan iti aglawlaw) nga umayon iti pannakapugipog dagiti kabakiran. “Saan a pudno a Marxist wenno demokrata wenno environmentalist dayta a tao,” kunayo—ket hustokayo. Ngem no utobenyo ti nagduduma a kapanunotan dagiti agkunkuna a Kristiano ita, makakitakayo kadagiti sursuro nga agsisimparat ken masansan a maisupadi iti insuro ti Nangbangon iti Kristianidad, ni Jesu-Kristo. Ania ti ipamatmat dayta maipapan iti no aniada a kita dagiti Kristiano?—1 Corinto 1:10.
Kas makitatayto, nabayagen nga adda dagidiay agduyos a mangbalbaliw kadagiti Nakristianuan a pannursuro tapno mayataday iti kapanunotan ti kaaduan iti agdama a panawen. Kasano ti panangmatmat ti Dios ken ni Jesu-Kristo kadagiti kasta a panangbalbaliw? Maitutop kadi a maawagan a Kristiano dagiti iglesia a mangitantandudo kadagiti sursuro a saan a nairamut ken Kristo? Mausig dagitoy a saludsod iti sumaganad nga artikulo.