Ti Maika-108 a Klase ti Gilead Naparegta a Mangipaay iti Sagrado a Panagserbi

ITI Biblia, masansan a madakamat ti panagdayaw iti Dios babaen ti balikas a “sagrado a panagserbi.” Naadaw dayta iti Griego a sao a kaipapananna ti panagserbi iti Dios. (Roma 9:4) Dagiti 5,562 a timmabuno iti programa ti panaggraduar ti maika-108 a klase ti Watchtower Bible School of Gilead nangngeganda dagiti praktikal a balakad dagiti nagpalawag a makatulong kadagiti naggraduar a mangipaay iti sagrado a panagserbi a makaay-ayo ken ni Jehova a Dios.a

Nagserbi a tserman ni Theodore Jaracz, maysa a miembro ti Bagi a Manarawidwid dagiti Saksi ni Jehova. Naluktan ti programa babaen ti kanta numero 52, “Ti Nagan ti Amatayo.” Ti maikadua a linia dayta a kanta kunana: “Ikagumaananmi met a dayawen naganmo.” Pudno nga inyanninawna ti naimpusuan a tarigagay dagiti naggraduar nga estudiante (a naggapu iti 10 a pagilian) a mangipakat iti naadalda iti 17 a nagduduma a pagilian a pakaibaonanda kas misionero.

Iti panglukat a sasaona, inturong ni Kabsat Jaracz ti atension iti lima a bulan a naganetget a panagadal dagiti estudiante iti Biblia a nangisagana kadakuada nga agserbi iti sabsabali a pagilian. Timmulong daytoy kadakuada a ‘mangsigurado kadagiti isuamin a bambanag,’ kayatna a sawen, mangsukimat kadagiti naadalda iti napalabas babaen ti lawag ti Sao ti Dios, ken ‘kumpet a siiirut iti nasayaat.’ (1 Tesalonica 5:21) Pinaregta ida ni Kabsat Jaracz a kumpet a simamatalek ken Jehova, iti Saona, ken kadagiti annongen a nakasanayanda. Ania ti makatulong kadakuada a mangaramid kadagitoy?

Praktikal a Balakad iti Panangipaay iti Sagrado a Panagserbi

Ni Lon Schilling, a kameng ti Bethel Operations Committee, impalawagna ti tema a “Mapagballigianyonto Aya ti Karit ti Kinanainkalintegan?” Intampokna ti pateg ti panagbalin a nainkalintegan, a mangyanninaw iti nadiosan a sirib. (Santiago 3:17) Ti kinanainkalintegan ramanenna ti panagpabus-oy, di panangidumduma, kinatimbeng, konsiderasion, ken panagitured. Kinuna ni Kabsat Schilling a “dagiti nainkalintegan a tattao natimbengda a makilangen iti dadduma. Saanda a nakaing-inget.” Ania ti makatulong iti maysa a misionero nga agbalin a nainkalintegan? Kinaemma, panangiwaya a dumngeg ken agsursuro kadagiti dadduma, ken sidadaan a panangikonsiderar iti kapanunotan dagiti sabsabali no la ket ta awan maikompromiso a nadiosan a prinsipio.​—1 Corinto 9:19-23.

“Dikay Liplipatan ti Mangan!” ti makaallukoy a tema ti simmaruno a paset ti programa nga insango ni Samuel Herd, sabali pay a kameng ti Bagi a Manarawidwid. Pinagminarna ti pateg ti nasayaat a pannangan iti naespirituan tapno kanayon a maikari a mangipaay iti sagrado a panagserbi. “Dumakkelton iti mabiit ti naespirituan a trabahoyo apaman a tumapogkayo iti annongenyo a panangasaba ken panangisuro. Masapul ngarud a mangankayo iti ad-adu a naespirituan a taraon tapno masupusopan ken mataginayon ti pigsayo,” kinuna ni Kabsat Herd. Ti agtultuloy a pannangan iti naespirituan a taraon matulonganna ti maysa a misionero a mangparmek iti naespirituan a panagladingit ken iliw. Matulonganna nga agkontento ken determinado nga agtalinaed iti sagrado a panagserbi a nakaibaonanna.​—Filipos 4:13.

Ni Lawrence Bowen, a maysa nga instruktor ti Gilead, pinaregtana dagiti naggraduar nga “Agsubli iti Pangrugian.” Ania ti kayatna a sawen? Inturongna ti amin nga agdengdengngeg iti Proverbio 1:7, a kunana: “Ti panagbuteng ken ni Jehova isu ti punganay ti pannakaammo.” Inlawlawag ti ispiker: “Aniaman a mangilibak iti pamunganayan a kinapudno iti kaadda ni Jehova ket dinto pulos pudpudno a maibilang kas napaypayso a pannakaammo wenno dinto pulos agresulta iti umiso a pannakaawat.” Inyarig ni Kabsat Bowen dagiti detalye ti Biblia a Sao ti Dios kadagiti paset ti jigsaw puzzle. No maurnos dagiti pasetna, mabukel ti ladawan. No ad-adu dagiti pasetna, dakdakkel ken nalawlawag ti ladawan ket ad-adda nga apresiaren dayta ti maysa a tao. Makatulong daytoy iti isuamin a mangipaay iti sagrado a panagserbi iti Dios.

Ni Wallace Liverance a registrar ti Gilead School impaayna ti maudi a palawag a natemaan, “Ipaayyo ti Panagyaman kas Datonyo iti Dios.” Insitarna ti salaysay maipapan iti panangpaimbag ni Jesus kadagiti sangapulo nga agkukutel. (Lucas 17:11-19) Maymaysa laeng ti nagsubli a nangidayaw iti Dios ken nagyaman ken ni Jesus. “Sigurado a naragsakan dagiti dadduma ta naimbaganda. Nasayaaten ti panagriknada iti bagbagida, ngem agparang a ti laeng kayatda isu ti panangikeddeng ti padi a nadalusdan,” kinuna ni Kabsat Liverance. Ti naespirituan a pannakadalus gapu iti pannakaammo iti kinapudno, a buyogen ti panangapresiar, ti rumbeng a manggutugot iti maysa nga agyaman iti Dios gapu iti kinaimbagna. Naparegta dagiti estudiante ti maika-108 a klase ti Gilead a mangutob kadagiti amin nga aramid ken kinaimbag ti Dios tapno agminar iti panagserbi ken panagsakripisioda ti kinamanagyaman iti Dios.​—Salmo 50:14, 23; 116:12, 17.

Dagiti Kapadasan ken Interbiu No Kasano nga Aramiden Dayta

Ti sabali pay nga instruktor ti Gilead a ni Mark Noumair indaulona ti simmaganad a paset ti programa a mainaig kadagiti kapadasan dagiti estudiante iti tay-ak ti serbisio bayat ti panageskuelada. Iti promedio, agarup 12 a tawenen ti tunggal estudiante iti amin-tiempo a ministerio sakbay a naayabanda iti Gilead. Kabayatan ti panageskuelada, nakairugida iti adu a panangyadal iti Biblia iti nadumaduma a klase ti tattao. Ipamatmat daytoy a kabaelan dagiti estudiante ti ‘agbalin nga isuamin a bambanag iti amin a kita ti tattao.’​—1 Corinto 9:22.

Kalpasan dayta a paset, ininterbiu da Charles Molohan ken ni William Samuelson ti sumagmamano a miembro ti pamilia ti Bethel ken agdaldaliasat a manangaywan a nagturpos iti Gilead. Ni Robert Pevy, a maysa kadagiti nainterbiu, ket nagserbi iti Pilipinas kalpasan ti panagturposna iti maika-51 a klase ti Gilead. Pinalagipanna dagiti naggraduar: “No rumsua ti parikut, mangisingasing ti tunggal maysa iti solusion ti problema. Kanayon nga adda ti nasarsaririt ngem sika, maysa nga addaan iti nasaysayaat nga ideya. Ngem no sukimatem ti Biblia ket ammuem ti kapanunotan ti Dios iti bambanag, awan ti asinoman a makaartap iti dayta. Kanayon a dayta ti umiso a sungbat.”

Tapno makompleto ti nasayaat a naespirituan a programa, impalawag ni John Barr, kameng ti Bagi a Manarawidwid, ti tema nga “Ipaayyo ti Makaay-ayo a Sagrado a Panagserbi ken Jehova.” Inlawlawagna no kasano a mayanninaw ti sagrado a panagserbi iti tay-ak ti ministerio tapno matulongan dagiti nasingpet a tattao nga agdayaw iti Dios iti makaay-ayo a pamay-an. Kalpasan nga inadawna ti sasao ni Jesus iti Mateo 4:10, kinuna ni Kabsat Barr, “Tapno maipaay laeng ken Jehova ti panagdayawtayo, masapul nga idiantayo ti amin a nasikap a kita ti idolatria, kas iti kinaagum, panagtarigagay iti kinabaknang, ken kinapalangguad. Anian a makaparagsak a panunoten a dagiti misionerotayo manipud pay idi rugrugi ti 1940 ket nakaaramiddan iti ekselente a rekord mainaig iti daytoy a banag! Ket masiguradomi a dakayo a naggraduar iti maika-108 a klase ti Gilead ket surotenyo ti naimbag nga ulidanda. Ipaayyo ti sagrado a panagserbi ken Jehova, ket isu laeng ti maikari nga umawat iti dayta.”

Dayta ti positibo a tampok ti makapabileg a programa. Simmaruno dagiti kablaaw manipud kadagiti gagayyem iti nadumaduma a pagilian, ti pannakaited dagiti diploma, ken ti pannakaibasa ti surat ti panagyaman dagiti estudiante gapu iti pannakasanayda. Nabalakadan dagiti naggraduar a mangiparangarang iti kinamatalek iti annongenda ken iti panagserbida ken Jehova. Amin a timmabuno, a pakairamanan dagiti sangaili manipud iti 25 a pagilian, nagkaykaysada a nagkanta ken nagkararag kas pagnguduan ti programa.

[Footnote]

[Kahon iti panid 23]

ESTADISTIKA TI KLASE

Bilang dagiti pagilian a nairepresentar: 10

Bilang dagiti pagilian a pakaibaonanda: 17

Bilang dagiti estudiante: 46

Promedio nga edad: 34

Promedio a tawen iti kinapudno: 16

Promedio a tawen iti amin-tiempo a ministerio: 12

[Ladawan iti panid 24]

Ti Maika-108 a Nagturpos a Klase ti Watchtower Bible School of Gilead

Iti listaan ditoy baba, nanumeruan dagiti intar manipud sango nga agpalikud, ken nailista dagiti nagan manipud kannigid nga agpakannawan iti kada intar.

(1) Amadori, E.; Cook, O.; Byrne, M.; Lee, A. (2) Newsome, D.; Pederzolli, A.; Bigras, H.; Kato, T.; Gatewood, D. (3) Eade, D.; Eade, J.; Wells, S.; Jamison, J.; Gonzales, M.; Gonzales, J. (4) Kato, T.; Lohn, D.; Niklaus, Y.; Preiss, S.; Foster, P.; Ibarra, J. (5) Amadori, M.; Manning, M.; James, M.; Boström, A.; Gatewood, B.; Newsome, D. (6) Foster, B.; Jamison, R.; Hifinger, A.; Koffel, C.; Koffel, T.; Byrne, G. (7) Hifinger, K.; Manning, C.; Cook, J.; Boström, J.; Lohn, E.; Pederzolli, A. (8) James, A.; Wells, L.; Preiss, D.; Niklaus, E.; Lee, M.; Ibarra, P.; Bigras, Y.