Panagtrabaho Kadagiti Isla ti Pacifico!
NAPNO iti naidumduma a gagar ti pagurayan dagiti pasahero iti internasional nga eropuerto idiay Brisbane ken Sydney, Australia. Uppat a pulo ket innem a katao ti nakasagana nga agbiahe agturong idiay nabara a Samoa tapno makikadua iti 39 a sabali pay manipud New Zealand, Hawaii, ken ti Estados Unidos. Naisabsabali dagiti bagaheda—naglaon kadagiti rimienta kas iti martilio, ragadi, ken barrena—saan a kas kadagiti gagangay nga awit dagiti mapan iti makaay-ayo nga isla ti Pacifico. Ngem saan ngamin a gagangay ti gagarada.
Bukodda a gastos ti panagbiaheda. Boluntarioda nga agtrabaho iti dua a lawas nga awan bayadna iti maysa a konstruksion nga imatonan ti Regional Engineering Office ti sanga nga opisina dagiti Saksi ni Jehova idiay Australia. Daytoy a programa a masupsuportaran babaen dagiti boluntario a kontribusion iramanna ti panangbangon kadagiti Kingdom Hall, Assembly Hall, pagtaengan dagiti misionero, ken pasilidad ti sanga wenno dagiti agipatpatarus agpaay iti napartak nga umad-adu a kongregasion dagiti Saksi ni Jehova kadagiti isla ti Pacifico. Am-ammuentayo ti sumagmamano kadagiti trabahador, a kameng dagiti grupo a nangbangon kadagiti Kingdom Hall kadagiti pagilian a naggapuanda.
Ni Max, a para plastar iti atep, ket naggapu idiay Cowra sadi New South Wales, Australia. Kasado ken lima ti putotna. Naggapu idiay Hawaii ni Arnold, maysa a payunir wenno amin-tiempo a ministro. Dua ti annakda ken baketna. Kas ken Max, agserserbi ni Arnold kas panglakayen iti kongregasion a naggapuanna. Nalawag a saan a gapu ta nawayada isu a nagboluntario dagitoy a lallaki—a kas iti kaaduan kadagiti trabahador iti dayta a programa. Imbes ketdi, nakitada ken ti pamiliada nga adda panagkasapulan, ket kayatda ti tumulong.
Napateg ti Akmen Dagiti Trabahador a Naggapu iti Nadumaduma a Pagilian
Maysa a lugar nga agkasapulan kadagiti paglaingan ken serbisioda isu ti Tuvalu, maysa a pagilian iti Pacifico nga addaan iti agarup 10,500 nga umili. Masarakan daytoy kadagiti naiputputong a siam nga agaasideg a nabato a puro iti asideg ti equator ken iti umamianan a laud ti Samoa. Tunggal isla, wenno puro, ket addaan promedio a kalawa nga agarup 2.5 a kilometro kuadrado. Idi 1994, kasapulan unayen idi ti 61 a Saksi sadiay ti baro a Kingdom Hall ken maysa a dakdakkel nga opisina dagiti agipatpatarus.
Iti daytoy a paset ti tropikal a Pacifico, masapul a natibker dagiti mabangon a patakder a makadaer kadagiti masansan a napigsa a bagyo ken allawig. Ngem manmano dagiti magun-od kadagiti isla a de kalidad a materiales para iti patakder. Ti solusion? Amin a materiales—manipud pagatep ken bayakan agingga kadagiti muebles ken kurtina, inidoro ken shower nozzle, uray kadagiti tornilio ken lansa—ket naipatulod iti barko manipud Australia.
Sakbay a dimteng dagiti materiales, adda ti immun-una a bassit a grupo dagiti trabahador a nangisagana ken nangipasdek iti pundasion. Simmaruno a simmangpet dagiti trabahador a naggapu iti nadumaduma a pagilian tapno mangbangon, mangpinta, ken mangikabil kadagiti muebles kadagiti patakder.
Nupay kasta, nakapungtot ti maysa a klero iti dayta a lugar gapu kadagita a panangbangon idiay Tuvalu, ket inyanunsiona iti radio a mangibangbangon dagiti Saksi iti “Torre ti Babel”! Ngem ania ti agpayso? “Idi saanen nga agkikinnaawatan dagiti mangibangbangon iti Torre ti Babel a nadakamat iti Biblia gapu ta riniribuk ti Dios ti pagsasaoda, pinanawanda ti proyektoda ket dida lineppas ti torre,” kuna ti boluntario a trabahador a ni Graeme. (Genesis 11:1-9) “Naiduma unay iti dayta no agpaay ken Jehova a Dios ti panagtrabaho. Iti laksid ti panagduduma ti pagsasao ken kultura, mairingpas a kanayon dagiti proyekto.” Pudno dayta iti daytoy a proyekto—dua la a lawas a nairingpas. Kinapudnona, ti pannakaidedikarna ket tinabunuan ti 163 a katao, agraman ti asawa ti primero ministro.
Bayat nga ut-utobenna dayta a kapadasan, kuna ti nangimaton iti dayta a proyekto a ni Doug: “Naragsak ti makipagtrabaho kadagiti boluntario manipud kadagiti sabali a pagilian. Nadumaduma ti pamay-anmi a mangaramid kadagiti bambanag, sabasabali ti termino, ken uray pay ti sistema ti panangrukodmi, ngem awan kadagitoy ti nagbalin a parikut.” Gapu ta adun ti kasta a proyekto a naglabasanna, innayonna: “Daytoy ti nangimula iti panunotko a makaibangon ti ili ti Dios kadagiti patakder iti sadinoman ditoy daga, nasulinek man wenno narigat a lugar, babaen ti tulong ni Jehova. Pudno, adu dagiti nasigo a kakaduatayo, ngem ti espiritu ni Jehova ti mamagballigi iti dayta.”
Dagiti Saksi a pamilia kadagiti isla ti tinignay met ti espiritu ti Dios a mangipaay iti taraon ken pagdagusan, ket dakkel a sakripisio dayta iti dadduma. Apresiaren unay dagiti sangaili ti kasta a kinamanagpadagus. Ni Ken a taga Melbourne, Australia, ket nakapagtrabaho iti kasta met la a proyekto idiay French Polynesia. Kunana: “Immaykami tapno agserbi, ngem natratokami kas ar-ari.” No ipalubos ti kasasaad, tumulong met dagiti Saksi iti dayta a lugar iti konstruksion. Idiay Solomon Islands, nagkiwar iti semento dagiti babbai. Nasurok nga 40 a tonelada ti natarikayo dagiti sangagasut a lallaki ken babbai kadagiti nangangato a naslep-tudo a bambantay. Timmulong met dagiti agtutubo. Kuna ti maysa a trabahador a taga New Zealand: “Malagipko ti maysa a taga isla nga agtutubo a kabsat a lalaki. Bagkatenna nga aggigiddan ti dua wenno tallo a supot ti semento. Sa agmalmalem nga agpala iti graba iti laksid ti pudot ken tudo.”
Adda sabali a pagimbagan ti pannakipagtrabaho dagiti Saksi nga agnanaed iti dayta a lugar. Inreport ti sanga nga opisina ti Watch Tower Society idiay Samoa: “Naadal dagiti kakabsat a taga isla dagiti paglaingan a mausarda nga agipatakder kadagiti Kingdom Hall ken mangtarimaan wenno mangbangon manen kadagiti dinadael ti bagyo. Iti kagimongan a narigat ti trabaho, mausarda met dayta nga agsapul iti pagbiagda.”
Nasayaat a Pammaneknek ti Programa a Panagbangon
Idi adda ni Colin idiay Honiara, nakitana a maipatpatakder ti Assembly Hall ti Solomon Islands. Gapu ta natukay ti riknana, nagsurat iti lokal a sanga nga opisina ti Watch Tower Society iti pagsasao a Pidgin English, a kastoy ti kunana no maipatarus iti Iloko: “Agkaykaysada amin ken awan ti arogante. Kasda la maysa a pamilia.” Di nagbayag kalpasanna, isu ken ti pamiliana ti nangbangon iti bukodda a Kingdom Hall idi isut’ nakasubli iti purokda idiay Aruligo, 40 a kilometro ti kaadayona. Sa nagsuratda manen iti opisina: “Nakasaganan ti Kingdom Hall-mi, agraman ti platapormana. Mabalinmi kadin ti aggigimong ditoy?” Nayurnos a dagus dagiti gimong, ket nasurok nga 60 a tattao ti regular a tumabtabuno.
Ti proyekto idiay Tuvalu ket naimatangan ti maysa a mammalakad iti European Union. Kinunana iti maysa a trabahador: “Ammok a kastoy met laeng ti ibagbaga ti amin kadakayo, ngem no para kaniak, maysa laeng daytoy a milagro!” Maysa a babai nga operator ti telepono ti nagsaludsod iti maysa pay a trabahador: “Apay a nakaragragsakkayo amin? Nakabarbara ditoy!” Dayta pay la ti nakitada a kapraktikalan ken nasakripisio a panagtrabaho dagiti Kristiano.
Di Pagbabawyan a Panagsakripisio
Kuna ti Biblia iti 2 Corinto 9:6: “Ti agmula a siwawadwad aganinto met a siwawadwad.” Agtultuloy ti naparabur a panangtulong dagiti trabahador, dagiti pamiliada, ken dagiti kongregasionda kadagiti padada a Saksi idiay Pacifico. Kuna ni Ross, panglakayen iti Kincumber iti asideg ti Sydney: “Imbaklay dagiti kakongregasionko ti nasurok a kakatlo ti pletek iti eroplano, sa nangted iti kanayonan a $500 ti kayongko, a kimmuyog met a nagboluntario.” Maysa a trabahador ti nangilako iti kotsena tapno adda pagpletena. Adda met nangilako iti dagana. Masapul ni Kevin ti kanayonan a $900, isu nga inkeddengna nga ilako dagiti 16 a kalapatina nga agtawen iti dua. Babaen ti am-ammona, adda nasarakanna a nanggatang kadagita iti eksakto a $900!
Nayimtuod kada Danny ken Cheryl: “Adda kadi nagbanagan ti plete ken arig napukaw a sueldo, nga agdagup iti $6,000?” Simmungbatda: “Wen! Uray pay no doble ti magastos, ad-adda a makagunggona ti panagboluntario.” Innayon ni Alan, a taga Nelson, New Zealand: “No ti nagastosko a napan idiay Tuvalu ket inusarko a nagpasiar idiay Europa, adda pay nabati a kuartak. Ngem saanko koma a nasagrap dagiti bendision, wenno nagayyem ti adu a tattao a naggapu iti nadumaduma a nalikudan, wenno nakaaramid iti maysa a banag agpaay iti sabali imbes nga iti bagik! Ket no aniaman ti intedko kadagiti kakabsat a taga isla, dakdakkel ti insubadda.”
Maysa pay a namagballigi iti programa isu ti suporta ti pamilia. Kimmuyog ti dadduma a babbai iti assawada, ket timmulongda pay iti panagbangon. Ngem dadduma ti masapul a mangasikaso kadagiti annakda nga ages-eskuela wenno iti negosio ti pamiliada. Kuna ni Clay: “Dakdakkel a sakripisio ngem iti inaramidko ti situtulok a panangaywan ni baketko kadagiti ubbing ken iti pagtaengan bayat nga awanak.” Kinapudnona, naimpusuan nga umanamong iti dayta ti amin a lallaki a di nakabael a mangitugot iti assawada!
Sipud idi nalpas ti proyekto idiay Tuvalu, nakaipatakderen dagiti boluntario a trabahador kadagiti Kingdom Hall, Assembly Hall, pagtaengan dagiti misionero, ken opisina dagiti agipatpatarus idiay Fiji, Tonga, Papua New Guinea, New Caledonia, ken dadduma pay a lugar. Nakaplanon ti adu pay a proyekto, agraman kadagiti lugar iti Abagatan a daya nga Asia. Addanto kadi umdas a trabahador?
Agparang a di parikut dayta. “Amin dagiti adda ditoy a nakiraman iti programa a panagbangon kadagiti sabali a pagilian ti nagkiddaw a mairamanda manen koma no addanto ti sabali a plano,” insurat ti sanga nga opisina idiay Hawaii. “Apaman a makaawidda, rugianda manen ti agurnong agpaay iti dayta.” Kasano koma a di agballigi ti programa no adda ti nabaknang a bendision ni Jehova, malaksid iti kasta a di managimbubukodan a dedikasion?
[Ladawan iti panid 9]
Dagiti materiales para iti proyekto
[Dagiti Ladawan iti panid 9]
Dagiti trabahador iti pagipatpatakderan
[Dagiti Ladawan iti panid 10]
Idi nalpas ti proyekto, naragsakantayo iti naaramidan ti espiritu ti Dios