No Ania ti Aramiden ti Pagarian ti Dios

 1. Anianto ti kaipapanan ti iyaay ti Pagarian ti Dios?

IDI insuro ni Jesus dagiti pasurotna nga ikararagda ti Pagarian ti Dios, ammona nga inton umay dayta agpatingganton ti rinibu a tawen a panagturay dagiti tattao a naisina iti Dios. Iti unos dagita a tiempo, saan a sapasap a natungpal ti pagayatan ti Dios ditoy daga. (Salmo 147:19, 20) Ngem kalpasan ti pannakaipasdek ti Pagarian sadi langit, maaramid ti pagayatan ti Dios iti amin a disso. Asideg unayen ti panawen para iti nagsayaat a panagbalbaliw​—ti panangsukat ti nailangitan a Pagarian ti Dios iti natauan a turay.

 2. Anianto ti mapasamak inton sukatan ti turay ti Pagarian ti natauan a turay?

² Mapasamak daytoy a panagbalbaliw inton dumteng ti panawen nga inawagan ni Jesus a “dakkel a rigat a ti kasta di pay napasamak nanipud idi pangrugian ti lubong agingga ita, saan, dinto met mapasamak manen.” (Mateo 24:21) Saan a dakamaten ti Biblia no kasano ti kapaut dayta a panawen, ngem dagiti didigra a mapasamak iti dayta a tiempo ket nakarkaronto ngem iti aniaman a napasamaken iti lubong. Inton mangrugi ti dakkel a rigat, adda mapasamak a pakakigtotanto unay ti kaaduan a tattao ditoy daga: ti pannakadadael ti amin a palso a relihion. Saanto a makapakellaat dayta kadagiti Saksi ni Jehova, ta nabayagen a segseggaanda. (Apocalipsis 17:1, 15-17; 18:1-24) Agngudo ti dakkel a rigat iti Armagedon inton dadaelen ti Pagarian ti Dios ti intero a sistema ni Satanas.​—Daniel 2:44; Apocalipsis 16:14, 16.

 3. Kasano a dineskribir ni Jeremias ti pagtungpalan dagiti nasukir?

³ Anianto ti kaipapanan daytoy kadagiti tattao a “di makaammo iti Dios ken kadagidiay di agtulnog iti naimbag a damag” maipapan iti nailangitan a Pagarianna iti sidong ni Kristo? (2 Tesalonica 1:6-9) Kunaen kadatayo ti padto ti Biblia: “Adtoy, ti dakes rummuarto manipud iti nasion agingga iti nasion ket maysa a dakkel a bagyo maibangonto manipud kaadaywan a pungto ti daga. Ket dagiti napapatay gapu ken ni Jehova iti dayta nga aldaw addadanto manipud iti maysa a pungto ti daga agingga met laeng iti sabali a pungto ti daga, saandanto a masangitan, ket dida met maurnong, uray maitanem; isudanto ti rugit iti rabaw ti daga.”​— Jeremias 25:32, 33.

 4. Apay a nainkalintegan ti panangdadael ni Jehova iti daytoy dakes a sistema?

⁴ Iti las-ud ti rinibu a tawen, pinalubosan ni Jehova a Dios ti kinadakes, naunday a panawen tapno makita dagiti nalinteg ti panagpuspusona a tattao a dakes ti imbunga ti turay ti tao. Kas pagarigan, sigun iti maysa a reperensia, iti maika-20 a siglo laeng, nasurok a 150 a milion a tattao ti napapatay kadagiti gubat, rebolusion, ken dadduma pay a riribuk iti kagimongan. Nagminar a nangnangruna ti kinadangkok ti tao idi Gubat Sangalubongan II, idi agarup 50 a milion ti napapatay, nga adu kadakuada ti naglak-am iti nakaam-ames nga ipapatay kadagiti kampo konsentrasion dagiti Nazi. Kas impakpakauna ti Biblia, iti tiempotayo ‘dagiti nadangkes a tattao ken dagiti agpampammarang rimmang-ayda manipud dakes nga agturong iti dakdakes pay.’ (2 Timoteo 3:1-5, 13) Agraraira ita ti imoralidad, krimen, kinaranggas, panagkunniber, ken panangumsi kadagiti pagalagadan ti Dios. Gapuna, naan-anay a nainkalintegan ti panangdadael ni Jehova iti daytoy dakes a sistema ti bambanag.

5, 6. Deskribirenyo ti kinadakes a nagraira iti nagkauna a Canaan.

⁵ Umasping ti kasasaad ita iti kasasaad sadi Canaan agarup 3,500 a tawenen ti napalabas. Kuna ti Biblia: “Amin a makarimon ken Jehova dagidiay kagurana, isu ti inaramidda kadagiti didiosda; ta uray pay dagiti annakda a lallaki, ken dagiti annakda a babbai puoranda iti apuy a maipaay kadagiti didiosda.” (Deuteronomio 12:31) Kinuna ni Jehova iti nasion ti Israel: “Gapu iti kinadakes dagitoy a tattao, ni Jehova a Diosmo pagtalawenna ida iti sangom.” (Deuteronomio 9:5) Kastoy ti kuna ti historiador iti Biblia a ni Henry H. Halley: “Ti panagdayaw ken Baal, Astarot, ken dadduma pay a didiosen ti Canaan ket buklen dagiti aglablabes a panagraragsak; sentro ti kinadakes dagiti temploda.”

⁶ Impakita ni Halley no kasano kadakes ti nagbalinanda, ta iti maysa kadagita a lugar, “nakatakuat [dagiti arkeologo] iti adu a burnay a naglaon iti adu a tulang dagiti ubbing a naidaton ken Baal.” Kinunana: “Nagbalin ti intero a disso a sementerio para kadagiti kappasngay a maladaga. . . . Nagdaydayaw dagiti Canaanita, babaen ti imoral a panagraragsak, kas narelihiosuan a ritual, iti saklang dagiti didiosenda; ket kalpasanna, babaen ti panangpapatayda kadagiti inauna nga annakda, kas daton kadagitoy met laeng a didiosen. Agparang a nagbalin ti sapasap a daga ti Canaan a kas iti Sodoma ken Gomorra. . . . Rumbeng kadi nga agtalinaed pay ti sibilisasion a nakaam-amak ti kinarugit ken kinaulpitna? . . . Dagiti arkeologo a nagkabakab iti adu a rebbek dagiti siudad ti Canaan nasdaawda ta saan a nasaksakbay ti panangdadael ti Dios kadakuada.”

7, 8. Kasanonto a dalusan ti Dios ti daga?

⁷ No kasano a dinalusan idi ti Dios ti Canaan, iti saanen a mabayag dalusannanto ti intero a daga ket itednanto dayta kadagidiay mangar-aramid iti pagayatanna. “Ti nalinteg agtalinaedto ditoy daga, ket ti napnuan-imbag agtaengto kenkuana. Ngem dagiti nadangkes magudasdanto ditoy daga.” (Proverbio 2:21, 22) Sa kuna ti salmista: “Ta bassit pay a darikmat, ket ti nadangkes maawanton . . . Ngem dagiti naemma tawidendanto ti daga, ket maay-ayatandanto iti kinaruay ti talna.” (Salmo 37:10, 11) Mapukawto met ni Satanas, tapno “saannan a mayaw-awan dagiti nasion iti uray kaanoman agingga a maturpos ti sangaribu a tawen.” (Apocalipsis 20:1-3) Wen, “ti lubong aglabas ken kasta met ti tarigagayna, ngem ti mangaramid iti pagayatan ti Dios agtalinaed iti agnanayon.”​—1 Juan 2:17.

⁸ Iti pananggupgopna iti naindaklan a namnama para kadagidiay mayat nga agbiag nga agnanayon ditoy daga, kinuna ni Jesus: “Naragsak dagiti naalumamay ti kaririknada, yantangay tawidendanto ti daga.” (Mateo 5:5) Mabalin a tuktukoyenna idi ti Salmo 37:29, a nangipakpakauna iti kastoy: “Ti sililinteg tawidennanto ti daga, ket agtaengto kenkuana nga agnanayon.” Ammo ni Jesus a panggep ni Jehova nga agbiag nga agnanayon iti paraiso a daga dagiti nalinteg ti panagpuspusona a tattao. Kuna ni Jehova: “Inaramidko ti lubong, dagiti tattao ken dagiti an-animal nga adda iti rabaw ti daga, babaen ti dakkel a pannakabalinko . . . , ket isu itedkonto iti daydiay ipagarupko a maiparbeng.”​—Jeremias 27:5.

 9. Ania a kita ti lubong ti ipasdekto ti Pagarian ti Dios?

⁹ Kalpasan ti Armagedon, ipasdekto ti Pagarian ti Dios ti nakaay-ayat a “baro a daga” a ‘pagtaengan ti kinalinteg.’ (2 Pedro 3:13) Anian a pannakabang-arto dagiti makalasat iti Armagedon ta awanton daytoy naulpit a dakes a sistema ti bambanag! Anian a ragsakdanto a sumrek iti nalinteg a baro a lubong iti sidong ti turay ti nailangitan a Pagarian, a pangsagrapanda kadagiti nakaay-ayat a bendision ken iti namnama a panagbiag nga agnanayon!​—Apocalipsis 7:9-17.

10. Aniada a dakes a kasasaad ti awanton iti sidong ti turay ti Pagarian?

¹⁰ Saanton nga agpeggad dagiti tattao gapu iti gubat, krimen, bisin, wenno uray kadagiti narungsot nga animal. “Mangaramidakto [iti ilik] iti maysa a tulag ti kappia, ket pasardengekto dagiti dakes nga an-animal iti daga . . . Ket ti kayo iti away mangtedto iti bungana, ket ti daga mangtedto ti rang-ayna, ket sitatalgeddanto iti dagada.” “Pitpitendanto dagiti kampilanda a tadtadem ti arado, ken dagiti gayangda a kumkumpay a pagpukan; ti nasion saannanto nga ilayat ti kampilan a maibusor iti sabali a nasion, ket didanto met sursuruenen ti gubat. Ngem agtugawdanto tunggal maysa a tao iti sirok ti kayona nga ubas ken iti sirok ti kayona a higos; ket awanto ti mangpabuteng kadakuada.”​— Ezequiel 34:25-28; Mikias 4:3, 4.

11. Apay a manamnamatayo nga awanton dagiti pisikal nga an-annayen?

¹¹ Awanton ti sakit, ladingit, ken uray ipapatay. “Ti agtaeng dinanto kunaen, Masakitak: dagiti umili nga agtaeng sadiay mapakawanto ti kinadangkesda.” (Isaias 33:24) “[Ti Dios] punasennanto ti amin a lua kadagiti matada, ket awanton ni patay, awanto metten ti panagleddaang wenno panagsangit wenno ut-ot. Dagiti immuna a bambanag naglabasdan. . . . ‘Adtoy! Pagbalbalinek a baro ti isuamin a bambanag.’” (Apocalipsis 21:4, 5) Idi adda ni Jesus ditoy daga, impakitana a kabaelanna nga aramiden dagita babaen ti pannakabalin nga inted ti Dios kenkuana. Iti tulong ti nasantuan nga espiritu, sinursor ni Jesus ti daga, a pinaimbagna dagiti pilay ken masakit.​—Mateo 15:30, 31.

12. Ania a namnama ti agur-uray kadagiti natay?

¹² Adu pay ti inaramid ni Jesus. Pinagungarna dagiti natay. Ania ti reaksion dagiti napakumbaba a tattao? Idi pinagungarna ti maysa a balasitang nga agtawen iti 12, dagiti dadakkelna “nagragsakda iti napalalo buyogen ti dakkel a panagsiddaaw.” (Marcos 5:42) Maysa pay daytoy a pagarigan no anianto ti aramiden ni Jesus iti intero a daga iti sidong ti turay ti Pagarian, ta iti dayta a tiempo “addanto panagungar agpadpada dagiti nalinteg ken dagiti nakillo.” (Aramid 24:15) Panunotenyo ti napalaus a rag-o nga itden ti pannakapagungar dagiti natay ken ti kaaddada manen iti denna dagiti patpatgenda! Awan duadua nga addanto dakkel a trabaho a panangisuro iti panangimaton ti Pagarian tapno “ti daga mapnonto iti pannakaammo ken ni Jehova, a kasla dagiti dandanum saknapanda ti baybay.”​—Isaias 11:9.

13. Kasanonto a mapaneknekan ti kinaumiso ti turay ti Dios?

¹³ Iti ngudo ti sangaribu a tawen a turay ti Pagarian, nagbalinton a perpekto ti panunot ken bagi ti amin a tattao. Maysanton ti daga a sangalubongan a minuyongan ti Eden, maysa a paraiso. Naipasdekton ti talna, ragsak, talged, ken naayat a kagimongan dagiti tattao. Awan pay a pulos ti kasta a napasamak iti pakasaritaan ti tao sakbay ti panagturay ti Pagarian. Anian a nagdakkelto ti nagdumaan ti napalabas a rinibu a tawen a nakaay-ay-ay a turay dagiti tattao ken ti nagsayaat a turay ti nailangitan a Pagarian ti Dios iti sangaribu a tawen! Mapaneknekanto a naan-anay a nasaysayaat iti amin a pamay-an ti turay ti Dios babaen ti Pagarianna. Naan-anayton a maalangon ti kalintegan ti Dios nga agturay, ti kinasoberanona.

14. Anianto ti mapasamak kadagiti rebelde inton agngudo ti sangaribu a tawen?

¹⁴ Iti ngudo ti sangaribu a tawen, palubosanto ni Jehova dagiti perpekto a tattao a mangusar iti wayawayada nga agpili no siasino ti kayatda a pagserbian. Ipakita ti Biblia a “maluk-atanto ni Satanas manipud iti nakaibaludanna.” Padasennanto manen nga allilawen dagiti tattao, ket piliento ti dadduma kadakuada ti di agpasakup iti Dios. Tapno ‘ti rigat saanto a bumangon iti maikadua a daras,’ pukawento ni Jehova ni Satanas, dagiti demoniona, ken amin nga umalsa iti kinasoberano ni Jehova. Awanto ti makapagreklamo a dagiti tattao a madadael nga agnanayon iti dayta a tiempo ket saan a naikkan iti gundaway wenno nagbasolda gapu iti kinaimperpekto. Saan, kasladanto kada Adan ken Eva, a sipapakinakem nga immalsa iti nalinteg a turay ni Jehova.​—Apocalipsis 20:7-10 ; Nahum 1:9, NW.

15. Anianto ti relasion dagiti nasungdo a tattao ken Jehova?

¹⁵ Iti sabali a bangir, mabalin a piliento ti kaaduan a tattao nga itandudo ti kinasoberano ni Jehova. No natalipuposen ti amin a rebelde, dumatagto dagiti nalinteg iti saklang ni Jehova, ta nakapasada iti maudi a pannubok ti kinasungdo. Awatento ni Jehova dagitoy a nasungdo a tattao kas annakna. Tagiragsakendanto ngarud ti relasion iti Dios a sinagrap idi da Adan ken Eva sakbay nga immalsada. Gapuna, matungpalto ti Roma 8:21: “Ti sangaparsuaan a mismo [sangatauan] mawayawayaanto met manipud iti pannakaadipen iti panagrupsa ket maaddaan iti nadayag a wayawaya dagiti annak ti Dios.” Impadto ni propeta Isaias: “[Ti Dios] inalimonna nga agnanayon ni patay; ket ni Jehova nga Apo punasennanto dagiti lulua kadagiti isuamin a ruprupa.”​—Isaias 25:8.

16. Apay a maitutop ti mangnamnama iti gunggona a biag nga agnanayon?

¹⁶ Anian a nagsayaat a namnama ti agur-uray kadagiti matalek, nga ammoda nga agnanayon nga iburayto ti Dios kadakuada ti aglaplapusanan a naespirituan ken material a bendision! Maitutop a kinuna ti salmista: “Ukradem ta imam, ket pennekem ti [umiso a] tarigagay ti isuamin a nabiag.” (Salmo 145:16) Iparparegta ni Jehova kadagiti kameng ti naindagaan a klase nga iramanda kas paset ti pammatida kenkuana daytoy namnama a panagbiag iti Paraiso. Nupay napatpateg ti isyu maipapan iti kinasoberano ni Jehova, dina kalikaguman nga agserbi kenkuana dagiti tattao nga awan man la ti gunggonada. Iti Biblia, kanayon nga agkuykuyog ti kinasungdo iti Dios ken ti namnama a biag nga agnanayon kas napateg a paset ti pammati ti maysa a Kristiano iti Dios. “Ti umadani iti Dios masapul a patienna nga isu adda ken isu agbalin a mananggunggona kadagidiay sipapasnek a mangsapsapul kenkuana.”​—Hebreo 11:6.

17. Kasano nga impakita ni Jesus a maitutop ti mangnamnama tapno makapagibturtayo?

¹⁷ Kinuna ni Jesus: “Daytoy kaipapananna ti agnanayon a biag, ti pananggun-odda iti pannakaammo maipapan kenka, ti maymaysa a pudno a Dios, ken iti daydiay imbaonmo, ni Jesu-Kristo.” (Juan 17:3) Innaigna ditoy ti panangammo iti Dios ken kadagiti panggepna iti gunggona nga iyeg daytoy. Kas pagarigan, idi indawat ti maysa a managdakdakes a laglagipen koma ni Jesus inton umay iti Pagarianna, kinuna ni Jesus: “Makikaduakanto kaniak idiay Paraiso.” (Lucas 23:43) Dina imbaga iti lalaki a mamati daytoy uray no saan a magunggonaan. Ammona a kayat ni Jehova a mangnamnama dagiti adipenna iti biag nga agnanayon iti paraiso a daga tapno madaeranda ti nadumaduma a suot iti daytoy a lubong. Gapuna, ti panangnamnama iti gunggona ket nasken a tulong iti maysa a Kristiano nga agibtur.

18, 19. Anianto ti mapasamak iti Ari ken iti Pagarian inton agngudo ti Sangaribu a Tawen a Turay?

¹⁸ Yantangay ti Pagarian ket maysa a kanayonan a gobierno nga usaren ni Jehova a mamagbalin a perpekto iti daga ken kadagiti tattao nga agnanaed iti dayta ken tapno maikappiada kenkuana, ania nga akem ti agur-uray iti Ari a ni Jesu-Kristo ken kadagiti 144,000 nga ari ken papadi kalpasan ti Milenio? “Sumaganad, ti panungpalan, inton iyawatna ti pagarian iti Dios ken Amana, inton mayegnan iti pannakapukaw ti isuamin a gobierno ken isuamin a kinaturay ken pannakabalin. Ta isu masapul nga agturay kas ari agingga a ti Dios maikabilna amin dagiti kabusorna iti babaen dagiti sakana.”​—1 Corinto 15:24, 25.

¹⁹ Inton iyawat ni Kristo ti Pagarian iti Dios, ania ti kayat a sawen dagiti teksto nga agkuna nga agtalinaed dayta iti agnanayon? Agtalinaedto nga agnanayon dagiti gapuanan ti Pagarian. Maidaydayawto nga agnanayon ni Kristo gapu iti akemna iti pannakaalangon ti kinasoberano ti Dios. Ngem tangay naan-anay nga awanton ti basol ken ipapatay, ken nasubboten ti sangatauan, agpatingganton ti akemna kas Mannubbot. Naibanagto metten a naan-anay ti Sangaribu a Tawen a Turay ti Pagarian; isu a saanton a nasken nga agusar ni Jehova iti kanayonan a gobierno a mangituray iti natulnog a sangatauan. Iti kasta, “ti Dios agbalinto nga isuamin a bambanag iti tunggal maysa.”​—1 Corinto 15:28.

20. Kasanotay a maammuan no ania ti agur-uray ken Kristo ken kadagiti 144,000 iti masanguanan?

²⁰ Anianto ti akem ni Kristo ken dagiti makipagturay kenkuana kalpasan a maturpos ti Sangaribu a Tawen a Turay? Saan nga ibaga ti Biblia. Nupay kasta, masiguradotayo nga ikkanto ida ni Jehova iti adu pay a pribilehio nga agserbi iti intero a sangaparsuaan. Sapay koma ta itandudotay amin ita ti kinasoberano ni Jehova ken magun-odtayo ti biag nga agnanayon, tapno iti masanguanan maammuantayto no ania ti panggep ni Jehova para iti Ari ken kadagiti padana nga ari ken papadi, agraman iti intero a nakaskasdaaw nga uniberso a binukelna!