Sangalubongan a Timpuyog a Mangipatpateg iti Tunggal Maysa
SADINOMAN a kitaenyo, addada tattao. Adu dagiti nataenganen, a dadduma kadagitoy ket baldado a marigatan a magna. Adda dagiti masikog ken dagiti agkabannuag nga agassawa a kaduada dagiti babassit pay nga annakda. Nagbakuit amin dagitoy—lallaki, babbai, ken ubbing—a napilitan a mangpanaw kadagiti pagtaenganda ken agkamang iti kabangibang a pagilian gapu iti gerra sibil, natural a didigra, wenno dadduma pay a kasasaad. Dadduma ti namin-ano a napilitan a pumanaw iti pagtaenganda. Apaman a makitada ti umuna a pagilasinan ti sibil a riribuk wenno ti maysa a natural a didigra, mangalada iti sumagmamano nga aruaten iti pagtaengan, ayabanda dagiti annakda, ket agturongda iti nataltalged a pagyanan. Inton tumalna ti kasasaad, adu a nagbakuit ti agsubli tapno bangonenda manen dagiti pagtaenganda ket mangabaruananda.
Kadagiti naglabas a tawen, ti Central African Republic linuktanda ti pagilianda kadagiti nagbakuit manipud iti adu a pagilian. Itay nabiit, naobligar ti rinibu a tattao, agraman adu a Saksi ni Jehova, nga agkamang iti nataltalged a Central African Republic manipud iti Democratic Republic of Congo a madama a pakapaspasamakan ti gubat.
Dagiti Kakabsat Tinulonganda Dagiti Agkasapulan
Nagragsakan ken minatmatan dagiti Saksi iti Central African Republic a pribilehio ti panangorganisar iti tulong para kadagiti agkasapulan. Naisagana dagiti pagdagusan para kadagiti agsangpet a Kristiano a kakabsat. Idi damo, pribado a pagtaengan ti pagdagusan, ngem masapul ti nasaysayaat pay nga urnos bayat nga umad-adu dagiti nagbakuit. Naaramid a dormitorio ti dadduma a Kingdom Hall. Situtulok a nakipagtrabaho dagiti lumugar a Saksi iti panangikabit iti kanayonan a silaw, panangisilpo kadagiti tubo ti padanum, ken panangsemento kadagiti suelo tapno komportable dagidiay agdagus. Dagus a nakitinnulong dagiti nagbakuit iti pannakaipasdek dagitoy a temporario a dormitorio. Nayurnos ti naan-anay a programa ti Nakristianuan a gimgimong iti pagsasao a Lingala tapno maabastuan dagiti simmangbay iti mangsustiner-biag a naespirituan a taraon. Ti nasinged a panagtinnulong dagiti lumugar a Saksi ken dagiti bisitada ipakitana a pudno ti sangalubongan a panagkakabsat.
Saan a kanayon nga aggigiddan a sumangbay dagiti kameng dagiti pamilia a nagbakuit. No dadduma, sa la agkikita dagiti nasinasina a miembro ti pamilia inton makadanonda aminen iti papananda. Iti tunggal Kingdom Hall, adda ti listaan iti nagnagan dagidiay sitatalged a simmangpet. Nayurnos ti panangbirok kadagidiay mapukpukaw. Ti sanga nga opisina a mangiturturong iti trabaho dagiti Saksi ni Jehova iti dayta a pagilian ti nangipatulod iti tallo a lugan kada aldaw tapno tumulong kadagiti Saksi nga adda pay laeng iti dalanda ken tapno masarakan ti siasinoman a mabalin a napukaw. Ti pagilasinan kadagitoy a lugan ket babaen ti dakkel a marka a “WATCH TOWER—Jehovah’s Witnesses.”
Panunotenyo ti ragsak ti pito a nagbakuit nga ubbing a naisina kadagiti nagannakda idi makitada ti lugan a kukua dagiti Saksi ni Jehova. Dagus nga inasitganda ti lugan ket inyam-ammoda ti bagida kas Saksi. Inlugan ida dagiti kakabsat ket naikaykaysada manen iti pamiliada iti maysa a Kingdom Hall a nakaipananda.
Ania ti timmulong kadagitoy napasnek a Kristiano tapno maibturanda dagiti kasta a sirkumstansia, a saan laeng a naminsan no di ket naulit-ulit? Naan-anay a kombinsidoda nga agbibiagtayon iti maudi nga al-aldaw kas impadto ti Nasantuan a Kasuratan.—2 Timoteo 3:1-5; Apocalipsis 6:3-8.
Gapuna, ammoda nga iti mabiit pagpatinggaento ni Jehova a Dios ti gubgubat, gura, kinaranggas, ken susik. Ti parikut iti panagbakuit ket maysanto laengen a pasamak iti napalabas. Kabayatanna, maitunos iti pammagbaga ni apostol Pablo iti 1 Corinto 12:14-26, ikagumaan dagiti Saksi ni Jehova nga ipateg ti tunggal maysa. Nupay sininasina ida ti karkarayan, beddeng, lenguahe, ken distansia, maseknanda iti tunggal maysa, isu nga alistoda nga agtignay no adda agkasapulan.—Santiago 1:22-27.
[Mapa iti panid 30]
(Para iti aktual a pannakaurnosna, kitaem ti publikasion)
AFRICA
Central African Republic
Democratic Republic of Congo
[Credit Line]
Mountain High Maps® Copyright © 1997 Digital Wisdom, Inc.
[Dagiti Ladawan iti panid 30]
Tallo a Kingdom Hall ti nausar kas sentro a pangpasangbayan
[Ladawan iti panid 31]
Dagus a naibangon dagiti kosina
[Ladawan iti panid 31]
Umad-adu dagiti simmangpet a nagbakuit
[Dagiti Ladawan iti panid 31]
Kayan-anak pay laeng ngem agbakbakuiten