Apay a Nadadael Dayta Nagkauna a Lubong?
TI SANGALUBONGAN a Delubio ket panangukom ti Dios, saan a natural a didigra. Adda naipaay a ballaag idi, ngem di pulos naikankano. Apay? Inlawlawag ni Jesus: ‘Kadagidi nga aldaw kasakbayan ti layus, [dagiti tattao] mangmangan ken umin-inumda, mangas-asawa dagiti lallaki ken mayas-asawa dagiti babbai, agingga iti aldaw a simrek ni Noe iti daong; ket saanda a nangikankano agingga nga immay ti layus ket inyanudna amin ida.’—Mateo 24:38, 39.
Maysa a Narang-ay a Sibilisasion
Sakbay ti Layus, adda dagiti tinagiragsak daydi a sibilisasion nga awan kadatayo ita. Kas pagarigan, maymaysa idi ti lenguahe dagiti amin a tattao. (Genesis 11:1) Nakatulong daytoy a nangparang-ay kadagiti paglaingan ken siensia nga agkasapulan iti panagbibinnadang dagiti tattao a nagduduma ti kinasigoda. Kasta met, ti napaut a panagbiag dagiti tattao idi kaipapananna a mabalinda nga itultuloy nga usaren dagiti naadalda iti sinigsiglo.
Kunaen ti dadduma nga awan kinapudnona a naunday ti biag idi. Dagiti tawtawen a nadakamat iti salaysay ti Biblia ket kunaenda a bulbulan laeng. Pudno kadi dayta? Bueno, usigenyo ti kaso ni Mahalalel. Kuna ti Biblia: “Ni Mahalalel nagtultuloy a nagbiag iti innem a pulo ket lima a tawen. Kalpasanna isu ti ama ni Jared. . . . Amin dagiti aldaw ni Mahalalel nagdagup iti walo gasut siam a pulo ket lima a tawen ket isu natay.” (Genesis 5:15-17) No maysa a tawen ti kaipapananna iti maysa a bulan, naaddaan ni Mahalalel iti anak idi isu ket agtawen laeng iti lima! Ngem saan a kasta. Asideg pay la idi dagiti tattao iti perpekto a pigsa ti umuna a tao a ni Adan. Talaga a nagbiagda iti sinigsiglo. Ania ti nagapuananda?
Adu a siglo sakbay ti Layus, dimmakkel ti populasion ti daga a ti anak ni Adan a ni Cain nabaelanna ti nangbangon iti siudad, nga inawaganna iti Enoc. (Genesis 4:17) Iti panawen sakbay ti Layus, timmanor dagiti nagduduma nga industria. Adda dagiti pagpandayan iti “tunggal kita ti rimienta a gambang ken landok.” (Genesis 4:22) Di pagduaduaan a dagitoy a rimienta ket nausar iti panagibangon, panagallawagi, panagdait, ken agrikultura. Amin dagitoy a trabaho ket nadakamat iti salaysay maipapan iti kaunaan a komunidad ditoy daga.
Gapu iti rimmang-ay a pannakaammo, nabalinan koma dagiti nagsasaruno a kaputotan a patanoren dagiti paglaingan a kas iti panagusar iti metal, panagmula, panagtaraken kadagiti karnero ken baka, estilo ti panagsurat, ken arte. Kas pagarigan, ni Jubal ti “namunganay kadagidiay amin nga agar-aramat iti arpa ken pito.” (Genesis 4:21) Nasaknap ti panagrang-ay ti sibilisasion. Ngem kellaat a nagpatingga amin dagita. Ania ti napasamak?
Ania ti Makagapu?
Iti laksid dagiti bentaha ti kagimongan sakbay ti Layus, dakes ti nangrugian daytoy. Ti namunganay iti dayta, ni Adan, ket immalsa iti Dios. Ni Cain, ti nangibangon iti umuna a nairekord a siudad, pinapatayna ti bukodna a kabsat. Di pagsiddaawan a napartak ti panagsaknap ti kinadakes! Kimmaro dagiti imbunga ti depekto nga impatawid ni Adan iti kaputotanna.—Roma 5:12.
Nalawag a dimmakes ti kasasaad idi impalubos ni Jehova nga agtultuloy dayta a kasasaad iti 120 a tawen pay. (Genesis 6:3) Kunaen ti Biblia: “Ti kinadakes ti tao naruay iti daga ken tunggal pagannayasan ti pampanunot ti pusona dakes laeng iti amin a tiempo. . . . Ti daga napno iti kinaranggas.”—Genesis 6:5, 11.
Idi agangay, espesipiko a naipakaammo ken ni Noe a dadaelen ti Dios ti amin a lasag babaen ti layus. (Genesis 6:13, 17) Nupay nagbalin ni Noe a “manangaskasaba iti kinalinteg,” nalawag a saan a patien dagiti tattao nga agpatingga ti amin a banag nga adda iti aglikmutda. (2 Pedro 2:5) Walo laeng a tattao ti nangipangag iti ballaag ket naisalakanda. (1 Pedro 3:20) Apay a napateg dayta kadatayo ita?
Ania ti Pategna Kadatayo?
Agbibiagtayo iti tiempo a kas idi kaaldawan ni Noe. Kanayon a makangngegtayo iti terorismo, panangikisap iti adu a biag, panangpapatay iti adu a tattao babaen ti paltog nga awan ti nalawag a motibo, ken nakaro a kinaranggas iti pagtaengan. Napno manen ti daga iti kinaranggas, ken kas idi, ti lubong ita ket napakaammuanen maipapan iti um-umay a panangukom. Kinuna a mismo ni Jesus nga isu ket umay kas dinutokan ti Dios nga Ukom ket paglalasinenna dagiti tattao, no kasano a ti maysa a pastor paglalasinenna dagiti karnero ken kalding. Dagiti masarakan a di maikari, kinuna ni Jesus nga ‘agturongda iti agnanayon a pannakagessat.’ (Mateo 25:31-33, 46) Ngem kunaen ti Biblia nga iti daytoy a pannakadadael, addanto minilion a makalasat—dakkel a bunggoy nga agdaydayaw iti maymaysa a pudno a Dios. Iti sumungsungad a baro a lubong, tagiragsaken dagitoy ti awan kaaspingna a biag iti permanente a talna ken talged.—Mikias 4:3, 4; Apocalipsis 7:9-17.
Adu ti manguyaw kadagita nga ibagbaga ti Biblia ken kadagiti ballaag maipapan kadagiti panangukom a mangipakita kadakuada a pudno dagita. Ngem inlawlawag ni apostol Pedro a dagiti pudno a pasamak ket iyaleng-aleng dagiti managduadua. Insuratna: “Kadagiti maudi nga aldaw umayto dagiti managuy-uyaw . . . ket kunkunada: ‘Sadino ti ayan daytoy naikari a kaaddana?’ . . . Ta, maitunos iti kayatda, malibasan ida daytoy a kinapudno, nga adda idi langlangit nanipud idi ugma ken maysa a daga nga agtaktakder a sititibker manipud iti danum ken iti tengnga ti danum babaen ti sao ti Dios; ket babaen kadagidiay a pamay-an nagpasar iti pannakadadael ti lubong iti daydi a tiempo idi nalayus iti danum. Ngem babaen iti isu met laeng a sao naidulin ti langlangit ken ti daga nga adda ita maipaay iti apuy ket maisagsaganada iti aldaw ti panangukom ken ti pannakadadael dagiti di nadiosan a tattao.”—2 Pedro 3:3-7.
Kas panagtulnog iti naimpadtuan a bilin ni Jesus, sireregta a maikaskasaba ita ti sangalubongan a pammakdaar maipapan iti um-umay nga aldaw ti panangukom ken ti mensahe a naimbag a damag maipapan iti talna a matagiragsakto kalpasanna. (Mateo 24:14) Saan koma a tagilag-anen daytoy a ballaag. Ti mannakabalin-amin a Dios tungpalenna dagiti karina.
Ti Mapasungad a Lubong
Ania ti masakbayan ti sangatauan, mainaig iti um-umay a dakkel a panagbalbaliw? Iti rugi ti nalatak a Sermonna iti Bantay, inkari ni Jesus: “Naragsak dagiti naalumamay ti kababalinda, yantangay tawidendanto ti daga.” Sana insuro kadagiti adalanna nga ikararagda iti Dios: “Maaramid koma ti pagayatam, kas sadi langit, kasta met iti daga.” (Mateo 5:5; 6:10) Wen, insuro a mismo ni Jesus nga agur-uray ti naragsak a masanguanan para iti matalek a sangatauan ditoy daga. Tinukoyna daytoy kas ti “pannakaparsua manen.”—Mateo 19:28.
Tapno napaypayso kadatayo ti masanguanan, diyo palubosan dagiti managuyaw a mangimpluensia kadakayo a pagduaduaan ti ballaag ti Dios. Pudno, kasla natalged ti aglawlawtayo ken napaut ti agdama a lubong. Kaskasdi, ditayo koma agtalek iti dayta. Naukomen ti lubong ti sangatauan. Maparegtatayo koma ngarud iti maudi a sasao ni apostol Pedro iti suratna:
“Yantangay marunawto a kasta dagitoy amin a banag, anian a kita ti tattao ti rebbeng a pagbalinanyo kadagiti nasantuan a panagbibiag ken ar-aramid ti nadiosan a debosion, nga ur-urayenyo ken agtaltalinaedkayo a silalagip unay iti kaadda ti aldaw ni Jehova . . . Yantangay ur-urayenyo dagitoy a banag, aramidenyo ti amin a kabaelanyo tapno iti kamaudiananna masarakannakayo a di namulitan ken awan pakapilawanna ken sitatalna. . . . Itultuloyyo ti rumang-ay iti di kaikarian a kinamanangngaasi ken pannakaammo iti Apo ken Manangisalakantayo a ni Jesu-Kristo.” (2 Pedro 3:11, 12, 14, 18) Gapuna, makasursurotayo koma iti napasamak idi kaaldawan ni Noe. Umadanikayo iti Dios. Rumang-aykayo iti pannakaammo maipapan ken Jesu-Kristo. Sukayenyo ti nadiosan a debosion, ket maibilangkayo kadagiti minilion a pinilida ti maispal iti panungpalan daytoy a lubong ken sumrekto iti um-umay a natalna a lubong.
[Ladawan iti panid 5]
Addan ti panaglatero sakbay daydi Layus
[Ladawan iti panid 7]
Agur-uray ti nagsayaat a masakbayan