“Agsaganaka, Nasakit Daytoy”

NANGNGEGYO kadin dagitoy a sasao? Nalabit imbaga daytoy ti maysa a doktor wenno nars idi agasandakayo.

Saanyo la ketdi a pinagkedkedan ti pannakaagas tapno laeng maliklikanyo ti manamnama nga ut-ot. Inibturanyo ketdi ti ut-ot tapno matagiragsakyonto dagiti pagimbagan ti nasalun-at. Kadagiti delikado a kasasaad, mabalin a kaipapananna ti ipapatay no pagkedkedan ti naut-ot a pannakaagas.

Nupay mabalin a saantayo a kanayon a masapul dagiti doktor, kas imperpekto a tattao, masapultayo amin ti disiplina, wenno panangatur, uray no nasakit dayta no dadduma. (Jeremias 10:23) Masapul daytoy dagiti ubbing. Ipaganetget ti Biblia: “Ti kinamaag naisinggalut iti puso ti maysa nga ubing; ti pagbaut ti disiplina isunto ti mangikkat a mangyadayo iti dayta manipud kenkuana.”​—Proverbio 22:15.

Iti daytoy a kaso, ti pagbaut ket simbolo ti autoridad dagiti nagannak. Pudno a manmano dagiti ubbing a mayat iti disiplina. Mabalin a karurodda no pannusa dayta. Ngem nupay nasakit kadagiti ubbing, ti pagimbaganda ti napateg kadagiti masirib ken naayat a nagannak. Ammo dagiti Kristiano a nagannak a pudno ti kuna ti Sao ti Dios: “Awan disiplina a kasla makaparag-o iti agdama, no di ket makapaladingit; ngem kalpasanna kadagidiay a nasanayen iti dayta mangpataud iti natalna a bunga, awan sabali, ti kinalinteg.”​—Hebreo 12:11; Proverbio 13:24.

Siempre, saan laeng a dagiti ubbing ti agkasapulan iti disiplina. Masapul met daytoy dagiti nataengan. Makisasao ti Biblia kadagiti nataengan idi kunana: “Petpetam ti disiplina; saanmo a palusposan. Saluadam dayta, ta dayta ti biagmo.” (Proverbio 4:13) Wen, dagiti masirib a tattao​—ubbing ken nataengan​—ipategda ti disiplina a naibatay iti Sao ti Dios, ti Biblia, agsipud ta mataginayonto ti biagda no aramidenda dayta.