Kasano a Makalasatkayo iti Panungpalan Daytoy a Lubong?
TI PANUNGPALAN daytoy agdama a sistema ti bambanag ket inladawan ti Biblia kas “aldaw ti rungsot, aldaw ti rigat ken riribuk, aldaw ti bagyo ken panaglangalang, aldaw ti kinasipnget ken kinadaguyemyem, aldaw dagiti ulep ken napuskol a daguyemyem.” (Sofonias 1:15) Saan la ketdi a kasta nga aldaw ti kayatyo a padaanan! Nupay kasta, binagbagaan ni apostol Pedro dagiti padana a Kristiano, a kunkunana: “Ur-urayenyo ken agtaltalinaedkayo a silalagip unay iti kaadda ti aldaw ni Jehova, a babaen iti dayta marunawto ti langlangit yantangay maur-uramda ket malunagto ti el-elemento yantangay nakapudpudotda unay! Ngem adda baro a langlangit ken baro a daga nga ur-urayentayo sigun iti karina, ket kadagitoy agtaeng ti kinalinteg.”—2 Pedro 3:12, 13.
Ti ibagbaga ditoy ni Pedro ket saan a pannakadadael ti literal a langlangit ken daga. Ti “langlangit” ken “daga” a tuktukoyen ni Pedro iti daytoy a konteksto ket mangisimbolo iti agdama a rinuker a natauan a gobierno ken ti nadangkes a natauan a kagimongan. “Ti aldaw ni Jehova” dina dadaelen ti mismo a daga no di ket ‘talipuposenna dagiti managbasol iti daga manipud iti dayta.’ (Isaias 13:9) Para kadagiti “agsensennaay ken umas-asug gapu iti amin a nakarimrimon a bambanag” a mapaspasamak iti agdama a nadangkes a natauan a kagimongan, ti aldaw ni Jehova ket maysa ngarud nga aldaw ti pannakaisalakan.—Ezequiel 9:4.
Kasano ngarud a maisalakan ti maysa a tao iti “naindaklan ken nakaam-amak nga aldaw ni Jehova”? “Ti sao ni Jehova,” nga impalgak ti maysa kadagiti propetana, ti sumungbat iti dayta a saludsod: “Mapasamakto a tunggal maysa nga umawag iti nagan ni Jehova makatalawto a sitatalged.” (Joel 1:1; 2:31, 32) Maragsakan dagiti Saksi ni Jehova a tumulong kadakayo a mangadal no ania ti kaipapanan ti iyaawag iti nagan ni Jehova.