“Umaykayo Kaniak, . . . ket Pagin-awaenkayto”
Dagiti Gimong a Mangiparegta iti Ayat ken Nasayaat nga Ar-aramid
MANIPUD Toronto agingga idiay Tokyo, manipud Moscow agingga idiay Montevideo—sumagmamano a daras iti kada lawas, minilion a Saksi ni Jehova ken dagiti gagayyemda ti agturong kadagiti lugar a pagdayawanda. Karaman kadagitoy dagiti nagaget a pamiliado a lallaki, a napaksuyan kalpasan ti agmalmalem a panagtrabaho; naanep nga assawa a babbai ken inna a kadua dagiti babassit nga ubbing; nasaranta nga agtutubo a nagmalmalem iti eskuelaan; dagiti nakakapsut a nataengan a masapul nga agin-inayad a magna gapu iti an-anayen ken ut-ot; dagiti napigsa ti pakinakemda a balo ken ulila; ken dagiti malmaldaangan nga agkasapulan iti liwliwa.
Agusar dagitoy a Saksi ni Jehova iti adu a kita ti pagluganan—dagiti nakaparpartak a tren wenno asno, luglugan iti napusek a subway wenno kadagiti trak. Adda dagiti masapul a bumallasiw kadagiti karayan nga adda buayana, bayat nga an-anusan dagiti dadduma ti makapasikor a trapiko kadagiti dadakkel a siudad. Apay a kasta unay ti panangikagumaan dagitoy a tattao?
Kangrunaan iti amin, ti itatabuno ken pannakipaset kadagiti Nakristianuan a gimong ket napateg a wagas iti panagdayaw ken Jehova a Dios. (Hebreo 13:15) Tinukoy ni apostol Pablo ti sabali pay a rason idi insuratna: “Agpipinnanunottayo koma iti maysa ken maysa tapno mangparegta iti ayat ken nasayaat nga ar-aramid, a saantay a baybay-an ti panagtataripnongtayo a sangsangkamaysa, . . . no di ket agpipinnaregtatayo, ket nangnangruna a kasta bayat a makitkitayo nga umas-asidegen ti aldaw.” (Hebreo 10:24, 25) Inyanninaw ditoy ni Pablo ti rikna ni salmista a David, a nangikanta: “Nagrag-oak idi kinunada kaniak: ‘Mapantayo idiay balay ni Jehova.’”—Salmo 122:1.
Apay a pagrag-oan dagiti Kristiano ti kaaddada kadagiti gimong? Agsipud ta saan laeng nga agpaliiw ti aramiden dagiti tumabuno. Imbes ketdi, mangipaay dagiti gimong iti gundaway tapno agiinnammo. Kangrunaanna, mangipaay dagitoy a taripnong kadagiti gundaway tapno mangted, saan laeng nga umawat, ken tapno makapagpipinnaregta iti panangipakita iti ayat ken pannakiraman kadagiti naimbag nga aramid. Makatulong daytoy tapno agbalin dagiti gimong a makapabileg nga okasion. Kanayonanna, dagiti Nakristianuan a gimong ket maysa kadagiti pamay-an a tungpalen ni Jesus ti karina: “Umaykayo kaniak, . . . ket pagin-awaenkayto.”—Mateo 11:28.
Gubuayan ti Liwliwa ken Pannakaseknan
Addaan dagiti Saksi ni Jehova iti nasayaat a rason no apay a matmatanda a makapabang-ar dagiti gimong. Maysa a rason, maidiaya ngamin kadagiti gimong dagiti naespirituan a taraon iti umiso a tiempo babaen “ti matalek ken masirib nga adipen.” (Mateo 24:45) Nagpateg met ti paset dagiti gimong iti panagbalin dagiti adipen ni Jehova a nasigo ken naregta a mannursuro iti Sao ti Dios. Kanayonanna, makasarak ti maysa idiay Kingdom Hall kadagiti naayat, maseknan, ken manangasikaso a gagayyem a nakasagana ken situtulok a tumulong ken mangliwliwa kadagiti sabsabali iti tiempo ti pakarigatan.—2 Corinto 7:5-7.
Napaneknekan dayta ni Phillis, maysa a balo a babai a natay ti asawana idi agtawen dagiti balasitangna iti lima ken walo. Ti epekto dagiti Nakristianuan a gimong ket makapabang-ar kenkuana ken kadagiti annakna. Iti panangdeskribirna, kinunana: “Makaliwliwa ti mapan iti Kingdom Hall agsipud ta kanayon nga ipakita dagiti kapammatian ti ayat ken pannakaseknan babaen ti arakup, Nainkasuratan nga ebkas, wenno panangpisel iti ima. Dayta ti lugar a kayatko a kanayon a papanan.”—1 Tesalonica 5:14.
Kalpasan a naoperaan ni Marie, kinuna ti doktorna a masapulna ti innem a lawas a panagpaimbag. Bayat dagiti umuna a lawas ti panagpaimbagna, saan a nakatabuno ni Marie kadagiti gimong. Nadlaw ti doktorna a saanen a kas iti sigud ti ragsakna. Idi naammuanna a saan a makigimgimong, imparegtana a tumabuno. Inlawlawag ni Marie a sabali ti relihion ti asawana, ket saanna a palubosan a makigimong gapu ta maseknan iti salun-atna. Nangaramid ngarud ti doktor iti opisial a preskripsion a “mangbilbilin” ken ni Marie a mapan iti Kingdom Hall a pakasarakanna iti makaparegta ken makapabileg a timpuyog. Kinuna ni Marie: “Kalpasan ti maysa nga itatabunok, simmayaat ti riknak. Nangrugiak a mangan, nakaturogak iti agpatnag, saanen a kanayon ti panagtomarko iti agas, ken mabalinko manen ti umisem!”—Proverbio 16:24.
Mapaliiw dagiti bisita ti naayat a timpuyog kadagiti Nakristianuan a gimong. Inkeddeng ti maysa nga estudiante iti kolehio a paliiwenna dagiti Saksi ni Jehova para iti aramidenna a report iti klasena nga ethnology. No maipapan iti kasasaad dagiti gimong, kastoy ti inlanadna iti reportna: “Ti nabara a panangabrasada kaniak . . . [ket] nakasaysayaat. . . . Mannakigayyem dagiti Saksi ni Jehova ket matmatak dayta a galad kas ti kapatgan a paset ti eksena.”—1 Corinto 14:25.
Iti daytoy nariribuk a lubong, ti Nakristianuan a kongregasion ket maysa a naespirituan a pagkamangan. Daytoy ket pagkamangan nga adda ti talna ken ayat. Babaen ti itatabuno kadagiti gimong, mariknayo a mismo ti kinapudno ti sasao ti salmista: “Adtoy! Anian a nagimbag ken anian a makaay-ayo a dagiti agkakabsat agnaedda a sangsangkamaysa buyogen ti panagtutunos!”—Salmo 133:1.
Kahon/Ladawan iti panid 25]
PANANGPENNEK ITI NAISANGSANGAYAN A PAKASAPULAN
Kasano a magunggonaan dagiti tuleng kadagiti Nakristianuan a gimong? Iti sangalubongan, mangbubuangay dagiti Saksi ni Jehova kadagiti sign-language a kongregasion. Iti naglabas a 13 a tawen, 27 a sign-language a kongregasion ken 43 a sign-language a grupo ti nabuangay idiay Estados Unidos. Iti di kumurang nga 40 a sabali pay a pagilian, adda itan ti agarup 140 a sign-language a kongregasion. Dagiti Nakristianuan a publikasion ket naisagana iti video kadagiti 13 a sign language.
Ti kongregasion Kristiano ket mangipapaay kadagiti tuleng iti gundaway a mangidayaw ken Jehova. Ni Odile, maysa a dati a Katoliko idiay Francia a nagsagaba iti nakaro a leddaang ken mapampanunotna idi ti agpakamatay, ti agyamyaman unay gapu ta nasursuruan iti Biblia babaen dagiti Nakristianuan a gimong. “Simmarantaak manen ken nasagrapko ti rag-o iti biag,” kunana. “Ngem nangruna iti amin, nasarakak ti kinapudno. Adda panggep itan ti biagko.”