Nainsiriban a Pananggundaway iti Panagbalbaliw Dagiti Kasasaad
Adu ti nagpapadaan dagiti uppat a Kristiano a panglakayen a taga Netherlands a da Pum, Jan, Dries, ken Otto. Naasawaanda amin ken addaan annak. Maysa pay, sumagmamano a tawenen ti napalabas, agpapadada nga addaan iti amin-tiempo a sekular a panggedan ken komportable dagiti pagtaenganda. Nupay kasta, nagsardengda amin iti sekular a panggedanda ken inrugida nga usaren ti amin a tiempo ken pigsada iti panagserbi iti Pagarian. Apay a naaramidda daytoy a panagbalbaliw? Nainsiriban a ginundawayanda ti panagbalbaliw dagiti kasasaad.
MAAPEKTARAN ti kaaduan kadatayo iti panagbalbaliw dagiti kasasaad. Adu a panagbalbaliw ti mangnayon kadagiti annongentayo kas iti pannakiasawa, pannakaadda iti annak, wenno panangaywan kadagiti baket ken lakayen a nagannak. Nupay kasta, mangpalawa iti Nakristianuan a ministeriotayo dagiti dadduma a panagbalbaliw. (Mateo 9:37, 38) Kas pagarigan, mabalin a panawandatayo dagiti nataenganen nga annaktayo, wenno mabalin nga agretirotayo iti trabaho.
Maysa pay, nupay ditay maliklikan ti panagbalbaliw dagiti kasasaadtayo, nagballigi dagiti dadduma a Kristiano a nangaramid kadagiti panagbalbaliw a nangted kadakuada iti gundaway a mangpalawa iti ministerioda. Kasta ti inaramid da Pum, Jan, Dries, ken Otto. Kasano?
No Pumanawen Dagiti Annak
Bookkeeper ni Pum iti maysa a parmasia. Masansan nga ag-auxiliary pioneer-da ken ni Anny nga asawana agraman dagiti dua a babbai nga annakda. Addaan met da Pum ken Anny iti gundaway nga aglinglingay a kadua dagiti dadduma a payunir. Kunada: “Maysa a proteksion daytoy kadagiti parikut a mabalin nga iyeg dagiti sabali a kita ti pannakikadua.” Natignay dagiti dua nga annakda nga ag-regular pioneer apaman a nagturposda iti haiskul gapu iti nasayaat nga ulidan nga impakita dagiti dadakkelda.
Idi awanen iti dennada dagiti annakda, napanunot da Pum ken Anny a daytoy a panagbalbaliw ti kasasaad ti mangipaay kadakuada iti kanayonan a wayawaya ken gastos. Mabalindan a gundawayan ti bimmassit a paggastuanda tapno mapan kadagiti napipintas a lugar wenno tagiragsakenda ti dadduma pay a klase ti paglinglingayan. Nupay kasta, napagnumuanda nga usarenda laengen a mangpalawa iti Nakristianuan a ministerioda ti panagbalbaliw ti kasasaadda. Kiniddaw ngarud ni Pum iti amona a maksayan koma iti maysa nga aldaw ti panagtrabahona iti makalawas. Idi agangay, nangaramid iti urnos ni Pum tapno makapagtrabaho manipud alas siete ti bigat agingga iti alas dos ti malem. Siempre, no basbassit ti tiempom nga agtrabaho, nababbaba met ti sueldom. Ngem nagballigida latta, ket idi 1991, nag-regular pioneer ni Pum a kas ken baketna.
Idi agangay, nakiddaw ni Pum nga agbalin a katulongan ti mangay-aywan iti Assembly Hall dagiti Saksi ni Jehova. Kaipapananna a panawanda ti balay a paggigiananda iti 30 a tawenen ken umakarda iti maysa nga apartment nga asideg iti Assembly Hall. Kasta ti inaramidda. Narigat kadi dayta? Kuna ni Anny a no mailiw, saludsodanna ti bagina, ‘Kaslaak kadi iti asawa ni Lot?’ Nagkedked a ‘timmaliaw.’—Genesis 19:26; Lucas 17:32.
Narikna da Pum ken Anny a nangyeg iti adu a bendision ti pangngeddengda. Malaksid kadagiti adu pay a bambanag, tagtagiragsakenda ti trabahoda iti Assembly Hall, panagsagana para kadagiti kombension distrito, ken pannakilangen kadagiti manangaywan iti sirkito (agdaldaliasat a ministro) nga agpalawag iti Assembly Hall. Addaanda met iti gundaway a bumisita kadagiti nadumaduma a kongregasion no agserbi ni Pum kas suno ti manangaywan iti sirkito.
Ania ti namagballigi kadagitoy nga agassawa a mangpalawa iti serbisioda? Kuna ni Pum: “No agbalbaliw a mamimpinsan ti biagmo, masapul a determinadoka a mangusar iti baro a kasasaad iti kasayaatan a pamay-an.”
Panangpasimple iti Panagbiag
Tallo ti annak dagiti agassawa a Jan ken Woth, dua a lalaki ken maysa a babai. Kas ken Pum ken ti pamiliana, nainsiriban a ginundawayan ni Jan ti panagbalbaliw dagiti kasasaad. Adu a tawen a nagtrabaho ni Jan nga addaan iti nangato a saad ken sueldo iti maysa a banko, isut’ gapuna a nanam-ay ti panagbiag ti pamiliana. Nupay kasta, napigsa ti tarigagayna a mangpalawa iti ministeriona. Kunana: “Iti unos ti panagbiagko, immuneg ti panangapresiarko iti kinapudno, kasta met a dimmakkel ti panagayatko ken Jehova.” Isu nga idi 1986, binalbaliwan ni Jan ti kasasaadna. Kunana: “Ginundawayak ti naaramid a reorganisasion iti opisinami ket nangrugiak a nagtrabaho iti sumagmamano la nga oras. Bimmaba iti 40 porsiento ti sueldok. Inlakok ti balaymi ken gimmatangak iti houseboat wenno lantsa a mabalin a pagtaengan tapno makapagserbikami kadagiti lugar a dakdakkel ti panagkasapulan kadagiti agibumbunannag iti Pagarian. Kalpasanna, ginundawayak ti nasapa a panagretiro; bimmaba pay iti 20 porsiento ti sapulko, ngem idi 1993, nakapagserbiak kas regular pioneer.”
Miembro itan ti Hospital Liaison Committee ni Jan ken kanayon nga agserserbi kas convention overseer. Masansan nga ag-auxiliary pioneer ni Woth iti laksid ti nakapuy a salun-atna. Naasawaanen ti tallo nga annakda ken naregtada a ministro ti Pagarian a kadua dagiti assawada.
Kasano a nairuam da Jan ken Woth iti bimmaba a kasasaad ti panagbiagda? Kuna ni Jan: “Idi adu pay ti birokmi, siniguradomi ti saan a maigamer iti adu a material a banag. Ita, mabalin a narigaten ti agurnong tapno makagatang iti aniaman, ngem adu dagiti naespirituan a bendision ken pribilehio a magunggun-odanmi a mangpumpunno kadagita.”
Kas kada Jan ken Woth, inkeddeng met da Dries ken ni Jenny nga asawana a pagbalinen a simple ti panagbiagda tapno ad-adu ti panawen a mausarda kadagiti banag a mainaig iti Pagarian. Nagpayunir da Dries ken Jenny agingga a naaddaanda iti anak. Nagtrabaho ni Dries kas administrador iti dakkel a kompania tapno maipaayna ti kasapulan ti pamiliana. Inapresiar dagiti amona ti trabahona ken indiayaanda iti nangatngato pay a saad. Ngem pinagkedkedan ni Dries dayta agsipud ta no awatenna ti nangato a saad, bumassit ti panawenna para kadagiti Nakristianuan nga aktibidad.
Mangbusbos iti adu a tiempo ken pigsa ti panangaywan iti pamilia ken panangasikaso iti masakit nga ina ni Jenny. Nupay kasta, tinaginayonda latta ti espiritu ti kinapayunir. Ania ti nakatulong kadakuada a mangaramid iti daytoy? Kuna ni Jenny: “Adda dagiti kabbalaymi a payunir. Agawiskami kadagiti payunir nga umay mangan ditoy balaymi, ken padagusenmi dagiti manangaywan iti sirkito.” Innayon ni Dries: “Pinagtalinaedmi a simple ti panagbiagmi ken liniklikanmi ti umutang. Inkeddengmi ti saan nga agnegosio iti dakkel wenno gumatang iti balay tapno iti masanguanan saandakami a maigawid dagiti kasta a bambanag.”
Nagsayaat ti resulta ti pangngeddeng da Dries ken Jenny a mangbalbaliw iti kasasaadda tapno ad-adu ti panawen a mausarda kadagiti banag a mainaig iti Pagarian. Panglakayenen dagiti dua nga annakda. Payunir ti maysa kadakuada a kaduana ni baketna. Nagserbi kas special pioneer da Dries ken Jenny, ket idi agangay, kimmuykuyog ni Jenny ken ni Dries a nagserbi kas manangaywan iti sirkito. Ita, agbolboluntariodan iti Bethel a pagserserbian ni Dries kas miembro ti Branch Committee.
Nasapa a Panagretiro
Kas kada Dries ken Jenny, nagpayunir da Otto ken ni Judy nga asawana sakbay a naaddaanda iti dua nga annak a babbai. Nakastrek kas maestro ni Otto idi iyin-inaw ni Judy ti inauna nga anakda.
Bayat a dumakdakkel dagiti annakda, masansan nga agawis da Otto ken Judy kadagiti payunir iti pagtaenganda tapno makita dagiti annakda ti ragsak dagiti Kristiano nga adda iti amin-tiempo a ministerio. Nagpayunir idi agangay ti inauna nga anakda. Kalpasanna, nagadalda ken ni lakayna iti Gilead School. Agserserbida itan kas misionero idiay Africa. Nangrugi met a nagpayunir da Judy ken ti inaudi nga anakda idi 1987.
Nagpayunir ni Otto idi ipalubos ti kasasaad a maksayan ti oras ti panagtrabahona idiay eskuelaan. Kalpasanna, nagikkaten a namimpinsan iti trabahona. Ita, us-usarenen ni Otto ti abilidadna kas mannursuro iti trabaho a panagdaliasat a mangpabileg kadagiti kongregasion iti naespirituan.
Ania ti balakad ni Otto kadagiti nasapa nga agretiro iti trabaho? “No agretirokayo, saankayo nga aginana iti makatawen wenno napapaut pay. Nalaka ti maruam nga ‘agin-inana.’ Kalpasanna, malipatanyon ti agpayunir. Imbes ketdi, irugiyo a dagus a palawaen ti ministerioyo.”
Nainsiriban a Panangusar iti Kapadasan
Pudno, saanen a napigsa ken nakired da kabsat Pum, Jan, Dries, ken Otto a kas idi kabambannuaganda pay laeng. Ngem ad-adda a natataengan, mas eksperiensiado, ken nasirsiribdan. (Proverbio 20:29) Ammoda no kasano ti agbalin nga amma, ken babaen ti panagtrabahoda a kadua ti assawada, maawatanda no kasano ti agbalin nga ina. Kaduada ti assawada a mangrisut kadagiti parikut iti pamiliada ken mangitukit kadagiti nateokratikuan a kalat kadagiti annakda. Kuna ni Otto: “Kas manangaywan iti sirkito, nakatulong kaniak ti panangaywanko iti pamiliak no mangbalakadak maipapan kadagiti banag a mainaig iti pamilia.” Kasta met laeng ni Dries. Ti kapadasanna kas ama ti namagbalin kenkuana a maipatpateg a kameng ti pamilia ti Bethel, nga addaan iti adu nga agtutubo pay a trabahador.
Wen, ti personal a pannakaammo ti nakatulong kadagitoy a kakabsat tapno maipaayda dagiti nadumaduma a kasapulan dagiti kongregasion. Naasada babaen kadagiti kapadasanda ket us-usarenda ti pigsada iti kasayaatan a pamay-an. (Eclesiastes 10:10) Kinapudnona, adda dagiti tiempo a mabalin nga ad-adu ti magapuananda ngem kadagiti agkabannuag a basbassit ti kapadasanda.
Nasayaat a pagwadan dagitoy a kakabsat, agraman dagiti assawada, kadagiti agtutubo nga adipen ni Jehova. Napaliiw dagiti agtutubo a dagiti kasta a pagassawaan ket personal a napasaranda dagiti karit ken bendision a naisalaysay kadagiti Nakristianuan a publikasiontayo. Makapabileg a makita dagiti lallaki ken babbai a mangiparparangarang iti espiritu a kas ken Caleb, a nupay lakayen, nagkiddaw iti makapakarit nga annongen.—Josue 14:10-12.
Tuladenyo ti Pammatida
Matuladyo kadi ti pammati ken ti inaramid dagiti pagassawaan a nadakamat iti daytoy nga artikulo? Laglagipenyo a pinagbalinda ti kinapudno a sentro ti panagbiagda. Intukitda kadagiti annakda ti panagtarigagay nga agpayunir. Kas kinuna ni Jan, inaramidda daytoy “babaen ti panagbalin a pagwadan iti panagayat ken ni Jehova ken iti organisasionna, panangyurnos kadagiti nasayaat a panagkakadua, ken panangisuro kadagiti annak a mangsuportar iti bagbagida.” Nagtrabaho ken nagaayamda met a sangapamilia. “Tunggal bakasion,” kuna ni Pum, “sangapamiliaankami a mapan mangasaba iti agsapa, sa kamalemanna, agpalpaliwakami.”
Kanayonanna, nagplano a nasaksakbay dagitoy a Kristiano, tapno inton agbaliw dagiti kasasaadda, sisasaganada a manggundaway iti dayta. Addaanda kadagiti kalat ken nangaramidda kadagiti pangngeddeng a nangpabiit iti panangragpatda kadagita a kalat. Impamuspusanda ti maaddaan iti basbassit a tiempo para iti sekular a panggedanda ken sisasaganada a mangyan-anay iti bassit a sueldo. (Filipos 1:10) Dagiti assawa a babbai sinuportaranda a naan-anay dagiti assawada. Agpapadada nga addaan iti napigsa a tarigagay a sumrek iti “dakkel a ruangan a mangiturong iti panagaramid” ket kas resultana, tagtagiragsakenda ti nawadwad a bendision ni Jehova.—1 Corinto 16:9; Proverbio 10:22.
Addaanka kadi met iti tarigagay a mangpalawa iti ministeriom? No kasta, mabalin a maaramidmo dayta no nainsiriban a gundawayam ti panagbalbaliw dagiti kasasaad.
[Ladawan iti panid 20]
Da Pum ken Anny a mangay-aywan iti Assembly Hall
[Ladawan iti panid 20]
Da Jan ken Woth a makiramraman iti trabaho a panangasaba
[Ladawan iti panid 21]
Da Dries ken Jenny nga agserserbi iti Bethel
[Ladawan iti panid 21]
Da Otto ken Judy nga agsagsagana para iti sumaganad nga ibibisita iti kongregasion