No ti Panangasaba ket Nakallalagip Unay

“Nainit unay. Kasla awan patinggana ti desdes iti kabambantayan. Kalpasan ti ilalasat iti adu a tubeng, nakadanonkami kamaudiananna iti papananmi: ti kaadaywan a purok. Nupay nabambannog, naragsakankami ta sibabara a pinaunegdakami iti damo a tinuktokmi a ridaw. Idi agngudo ti aldaw, naipaimami dagiti amin nga awitmi a literatura ken nakairugikami iti sumagmamano a panagadal iti Biblia. Magagaran dagiti tattao a makasursuro. Ita, masapul a pumanawkamin, ngem inkarimi nga agsublikami.”

GAGANGAY dagiti kasta a kapadasan ti maysa a grupo dagiti payunir a ministro idiay Mexico. Determinadoda a makiraman a sireregta iti pannakaitungpal ti bilin ni Jesu-Kristo kadagiti adalanna: “Dakayo dagiti saksik . . . iti kaadaywan a paset ti daga.” (Aramid 1:8) Idiay Mexico, adda dagiti espesial a kampania iti panangasaba​—naawagan dagiti ruta ti payunir​—a nayurnos tapno madanon dagiti teritoria nga awan kongregasion a makinsakup ken, gapuna, saan a regular nga umaw-awat iti naimbag a damag ti Pagarian ti Dios. Kaaduanna nga adayo wenno narigat a danonen dagitoy a teritoria. Maipaay met ti tulong kadagiti naiputputong a kongregasion a nalawa ti teritoriada.

Tapno maammuan no aniada a lugar iti pagilian ti matrabaho babaen dagiti ruta ti payunir, ti sanga nga opisina dagiti Saksi ni Jehova inusigna dagiti kasapulan ti teritoria.a Kalpasanna, adda dagiti grupo dagiti special pioneer a maibaon a mangtrabaho iti teritoria. Maipaayanda kadagiti lugan a maitutop iti lasonglasong, di nasimpa a kalkalsada. Agserbi met dagiti lugan kas pagipempenan iti literatura ken pagturogan no kasapulan.

Nakasagana a Mapan

Sipud idi Oktubre 1996, dadduma a manangikasaba iti naimbag a damag naawisda a makiraman iti daytoy nga aktibidad, a makibinnuligda kadagiti special pioneer. Nakiraman iti kampania dagiti agibumbunannag ti Pagarian agraman dagiti regular pioneer a nakasagana nga agserbi iti lugar a dakdakkel ti panagkasapulan. Adda dagiti naibaon kadagiti kongregasion nga asideg iti ruta tapno maaywananda ti teritoria ken masukayda ti interes a nasarakan. Adu nga agtutubo nga agibumbunannag ken payunir ti nangawat kadagitoy nga imbitasion ket naaddaanda kadagiti makaparegta unay a kapadasan.

Kas pagarigan, ni Abimael, maysa nga agkabannuag a Kristiano a dakkel ti sueldona iti maysa a kompania ti cellphone, inkeddengna ti makiraman iti panangasaba kadagita a nasulinek a rehion. Idi naammuan dagiti amona nga umikkat iti trabahona, nangitukonda iti promosion ken dakdakkel a sueldo. Binabalaw dagiti katrabahona, nga impettengda a naisangsangayan dayta a gundaway ket minamaag ti saanna a panangawat iti dayta. Ngem determinado ni Abimael a mangsuporta iti espesial a kampania a panangasaba iti tallo a bulan. Kalpasan a tinagiragsakna daytoy a panagserbi, inkeddeng ni Abimael ti agtalinaed iti di nakedngan a tiempo iti naiputong a kongregasion a dakdakkel ti panagkasapulan kadagiti agibumbunannag ti Pagarian. Addaan itan iti makapnek a trabaho ken nasursurona ti agbiag a simple.

Iti sabali a kaso, masapul nga agbiahe ni Julissa iti bus iti 22 nga oras tapno makagteng iti teritoriana. Iti maudi a paset ti panagbiahena, saanna a naabutan ti maudi a bus iti aldaw. Ngem adda ti pick-up a pagluganan dagiti trabahador. Pinabileg ni Julissa ti pakinakemna ket kiniddawna a makilugan. Natural laeng a madanagan agsipud ta isuna laeng ti babai kadagiti nagadu a lallaki a nakalugan. Idi kasabaanna ti maysa nga agtutubo a lalaki, naammuanna a maysa daytoy a Saksi ni Jehova! “Malaksid iti dayta,” nalagip ni Julissa, “ti drayber ti lugan ket maysa a panglakayen iti kongregasion a nakaibaonak!”

Makipaset Dagiti Nataengan

Ngem saan laeng a para kadagiti agtutubo daytoy nga aktibidad. Ni Adela, maysa a nataengan a kabsat, tinarigagayanna ti ad-adu a tiempo a mangasaba. Naaddaan iti kasta a gundaway idi naawis a makipaset iti naisangsangayan a panangasaba nga aktibidad. Insalaysayna: “Natagiragsakko unay ti teritoriak isu a kiniddawko kadagiti panglakayen iti kongregasion nga agtalinaedak iti di nakedngan a tiempo. Naragsakak agsipud ta uray no nataenganakon, mabalinko latta ti agpausar ken Jehova.”

Umasping iti dayta, gapu iti apresasionna ken ni Jehova ken ayat kadagiti pada a tattao, ni Martha nga agtawen iti 60 natignay a makipaset iti kampania. Idi maammuanna a saan a madanon ti kagrupona ti amin a tattao gapu iti kinaadayo ken kinarigat ti dalan nga agturong iti teritoria, gimmatang iti lugan nga usaren dagiti payunir. Babaen daytoy a tulong ti kabsat, nagbalin a posible a mawanas ti ad-adu a teritoria ket mairanud ti kinapudno a masarakan iti Biblia iti ad-adu a tattao.

Makaparagsak a Panagtignay

‘Agaramid iti ad-adalan’ ti kalat dagidiay makipaset kadagitoy espesial a kampania a panangasaba. Nakasaysayaat ti resulta gapu iti daytoy. Dagiti naiputputong a tattao naawatda ti mangispal-biag a kinapudno a masarakan iti Biblia. (Mateo 28:19, 20) Naipasdek ti adu a panagadal iti Biblia. Naitultuloy ti panangyadal babaen dagiti agibumbunannag iti dayta a lugar wenno dagiti ebanghelisador a nagindeg iti teritoria. Iti dadduma a lugar, naorganisar dagiti grupo dagiti agibumbunannag, ken iti sabsabali pay a lugar, nabuangay pay ketdi dagiti babassit a kongregasion.

Ni Magdaleno ken dagiti kakaduana agluganda iti pangpasahero a lugan nga agturong iti naiputputong a teritoria a nakaibaonanda. Iti dalan, kinasabaanda ti drayber. “Imbaga kadakami daytoy a lalaki a makalawas sakbayna, adda dagiti Saksi nga immay iti pagtaenganna bayat ti kaawanna. Idi nagsubli, insalaysay kenkuana ti pamiliana ti nangngegda. Kinunami kenkuana a saankami a lumugar no di ket naggapukami iti nadumaduma nga estado ti pagilian tapno suportaranmi ti espesial a kampania a panangasaba ken dakami ti naggasto iti panagbiahemi. Naginteres ti drayber ket kinunana nga irugina ti makipagadal iti Biblia a kaduana ti pamiliana iti dayta met laeng a lawas. Saannakami pay a pinagplete kas panangsuportana iti trabaho.”

Naragsakan met unay ni Magdaleno iti impakita nga interes dagiti katutubo iti kabambantayan ti Chiapas. “Napadasanmi ken ni baketko ti mangiranud iti mensahe ti Pagarian iti maysa a grupo dagiti 26 nga agtutubo a nakimisa iti Iglesia Presbiteriano. Nagimdengda amin a sipapasnek iti uneg ti 30 a minuto. Inruarda ti Bibliada, ket nakasabaanmi ida a naimbag maipapan kadagiti panggep ni Jehova. Adda bukod a Biblia ti kaaduan kadagiti tattao, a naisurat iti lenguahe a Tzeltal.” Nairugi ti adu a narang-ay a panagadal iti Biblia.

Bimmaaw ti Ibubusor

Adda komunidad idiay Chiapas a saan a nakangngeg iti mensahe ti Biblia iti nasurok a dua a tawen gapu iti ibubusor ti dadduma a tattao. Naammuan ni Teresa, maysa nga amin-tiempo nga ebanghelisador, nga adda dagiti Saksi a bumdeng a mangasaba iti dayta a purok. “Ngem nasdaawda amin agsipud ta sidadaan dagiti tattao a dumngeg. Idi malpaskami a mangasaba, bumayakabak ti tudo. Nagsapulkami iti paglinongan, ket nakagtengkami iti pagtaengan ti managpadagus a tao nga agnagan Sebastián, a nangpauneg kadakami tapno aglinong. Idi addakami iti uneg, inyimtuodko no addan ti nangbisita kenkuana. Idi kinunana nga awan, kinasabaak ken inrugik nga inyadalan iti Biblia babaen ti libro a Pannakaammo a Mangiturong iti Biag nga Agnanayon.b Kalpasanna, aglulua nga impakaasi ni Sebastián nga agsublikami a mangyadal kenkuana.”

Ipadamag ti sabali pay a grupo dagiti payunir a nagbisita idiay Chiapas: “Agyamankami ken ni Jehova ta nabunga dagiti naaramidanmi. Iti umuna a lawas, nakairugikami iti 27 a panagadal; iti simmaganad a lawas, inawismi dagiti tattao a mangbuya iti video a The Bible​—Its Power in Your Life. Innem a pulo dagiti timmabuno. Nagustuanda amin dayta. Kamaudiananna, insingasingmi a mairugi ti grupo a panagadal iti Biblia. Nasorpresakami ta dua a grupo ti panagadal ti nairugi iti daytoy a purok.

“Kalpasan a matrabahomi dagiti naituding a teritoria, nagsublikami iti purok tapno pabilgenmi dagiti interesado ken tapno komustaenmi dagiti grupo a naorganisar nga agadal iti Biblia. Inawismi ida iti palawag publiko ken iti Panagadal iti Pagwanawanan. Ngem awan ti nalawa a lugar a makaanay a paggigimongan. Ti tao a nangitukon iti pagtaenganna para iti grupo a panagadal intudona ti arubayan ti pagtaenganna ket kinunana: ‘Mabalin a maangay dagiti gimong iti arubayan.’”

Iti ngudo dayta a lawas, dagiti bumisbisita a payunir ken dagiti interesado a tattao sireregget a timmulongda a mangisagana iti arubayan tapno mausar a paggigimongan. Adda 103 a timmabuno iti umuna a gimong. Ita, 40 ti maar-aramid a panangyadal iti Biblia iti dayta a purok.

“Maysa a Nakaragragsak a Kapadasan”

Malaksid dagiti nagsayaat a resulta ti trabaho a panangasaba, nagunggonaan iti kasta unay dagiti mismo a nakipaset iti panagibanghelio. Kastoy ti narikna ni María, maysa nga agtutubo a payunir a nakipaset iti maysa kadagitoy a kampania: “Dayta ket maysa a nakaragragsak a kapadasan gapu iti dua a rason. Naragragsakak ita iti trabaho a panangasaba, ken simminged ti relasionko ken ni Jehova. Naminsan, napaksuyankami idi sumangsang-atkami iti bantay. Kalpasan ti panagkiddawmi iti tulong ni Jehova, nariknami ti kuna ti Isaias 40:29-31: ‘Dagidiay mangin-inanama ken Jehova mapasublidanto ti bilegda.’ Isu a nakagtengkami sadiay ken nangyadalkami kadagiti tattao a siaayat a nangawat kadakami.”

Ti sabali pay nga agtutubo a payunir, ni Claudia nga agtawen iti 17, ibagana kadatayo: “Dakkel ti nagunggonak. Nasursurok ti agbalin nga ad-adda nga epektibo iti ministerio, nangipaay iti adu a panggapuak nga agrag-o, ken daytoy ti nangiturong kaniak a mangikeddeng kadagiti naespirituan a kalat. Nagmataenganak met iti naespirituan. No addaak iti pagtaengan, ar-aramiden ni Nanang ti amin para kaniak. Ita, gapu iti ad-adu a kapadasan, ad-adda a nagbalinak a responsable. Kas pagarigan, dati a napiliak iti taraon. Ngem ita ta nairuamakon iti agduduma a kasasaad, saanakon a nareklamo mainaig iti taraon. Daytoy a kita ti panagserbi tinulongannak a mangsukay iti nagsayaat a pannakigayyem. Iranudmi ti tunggal adda kadakami ken agtitinnulongkami.”

Naragsak a Panagapit

Ania dagiti resulta daytoy naisangsangayan a panagregget? Idi laeng rugrugi ti 2002, agarup 28,300 a payunir ti nakipagtrabaho kadagitoy a ruta ti payunir. Nakaikonduktada iti nasurok a 140,000 a panagadal iti Biblia, a binusbosda ti nasurok a dua a milion nga oras iti trabaho a panangasaba. Tapno matulongan dagiti tattao a mangadal iti kinapudno iti Biblia, nangipaimada iti nganngani 121,000 a libro ken nganngani 730,000 a magasin. Gagangay iti dadduma a payunir ti mangikondukta iti 20 wenno nasursurok pay a panagadal iti Biblia.

Dagiti napakitaan iti kinaimbag agyamyamanda iti kasta unay gapu iti naisangsangayan a panagregget a naaramid tapno maidanon kadakuada ti mensahe ti Biblia. Iti laksid ti kinapanglawda, adu ti nangipilit nga awaten dagiti agibumbunannag dagiti donasion. Adda nakurapay a baket nga agtawen iti 70 a kanayon nga adda ti itedna kadagiti payunir a bumisita kenkuana. Agsangit no mapagkedkedan. Maysa a nakurapay a pamilia ti nangidagadag kadagiti amin-tiempo nga ebanghelisador nga alaenda dagiti itlog ti upada, a nairanta nga agpaay kadakuada.

Ti napatpateg, dagitoy a napasnek a tattao impakitada ti pudno nga apresasion kadagiti naespirituan a banag. Kas pagarigan, tallo ket kagudua nga oras nga agmaymaysa a magmagna ti maysa nga agtutubo a babai tapno tumabuno kadagiti Nakristianuan a gimong, nga awan ti liniwayanna. Nupay nakapuy ti tumengna, dua nga oras a nagdaliasat ti maysa nga interesado a baket tapno agdengngeg iti pannursuro ti Biblia bayat ti bisita ti agdaldaliasat a manangaywan. Adda dagiti di nakapageskuela nga agtarigagay a makasursuro nga agbasa ken agsurat tapno ad-adda a magunggonaanda iti pannursuro ti Biblia. Nagunggonaanda iti kasta unay gapu iti panagreggetda.

Iti libro dagiti Aramid, inladawan ni Lucas ti nasirmata ni apostol Pablo: “Maysa a lalaki a taga Macedonia agtaktakder ken agpakpakaasi kenkuana ket kunkunana: ‘Umallatiwka iti Macedonia ket tulongannakami.’” Situtulok nga immannugot ni Pablo. Ita, kadagiti adayo a luglugar idiay Mexico, adu dagiti mangiparparangarang iti kasta nga espiritu, a makipaspasetda a mangipakaammo iti naimbag a damag “iti kaadaywan a paset ti daga.”​—Aramid 1:8; 16:9, 10.

[Footnotes]

[Ladawan iti panid 9]

Adu a Mexicano a Saksi ti nakipaset iti espesial a kampania a panangasaba