Panagserbi iti Naiduma ti Lenguahena a Grupo Idiay Korea
MAYSA a magagaran unay ngem naulimek a grupo ti naguummong iti maysa a kombension distrito dagiti Saksi ni Jehova idi kalgaw ti 1997. Daytoy ti kaunaan a naiduma a kombension idiay Korea para kadagiti tuleng ken adda depekto ti panagdengngegda. Dimmanon iti 1,174 ti bilang dagiti timmabuno. Ti intero a programa—agraman dagiti palawag, interbiu, ken drama—ket naiparang babaen ti Sign Language ti Korea ken naiparang dayta iti dakkel nga iskrin a makita iti intero nga Assembly Hall. Dayta ti tampok ti adu a tawen a kinaanep dagiti adu a boluntario.
Dumtengto ti tiempo iti paraiso a daga inton “maluktanto ti mismo a laplapayag dagidiay tuleng.” (Isaias 35:5) Tapno agbiag iti dayta a Paraiso, amin a tattao, agraman dagiti tuleng, masapul a sumrekda nga umuna iti naespirituan a paraiso, ti narang-ay a naespirituan a kasasaad ti naragsak nga ili ti Dios. Masapul nga agbalinda a dedikado, bautisado a Saksi ni Jehova, a sinursuruanna.—Mikias 4:1-4.
Bassit a Nangrugian
Nupay adda panangasaba kadagiti tuleng idi dekada 1960, sa la timmabuno ti sumagmamano kadakuada kadagiti gimong dagiti Saksi ni Jehova idi dekada 1970 idiay Seoul, ti kabesera a siudad ti Korea. Maysa a Kristiano a kabsat a lalaki, a napartak nga agsurat, ti nagusar iti pisara a pangisuratan kadagiti kangrunaan a punto dagiti palawag, agraman dagiti nausar a teksto ti Biblia.
Idi 1971, iti siudad ti Taejon, maysa a Saksi ti nangisuro iti mensahe ti Pagarian iti tuleng nga anakna a lalaki ken kadagiti tuleng a gagayyemna. Manipud iti daytoy a grupo, addada naregta nga indibidual nga agserserbi ita kas kangrunaan a sadiri iti tay-ak ti sign-language.—Zacarias 4:10.
Dagiti Agtutubo Situtulok nga Idatonda ti Bagbagida
Tapno makagun-od dagiti tuleng iti pannakaammo maipapan ken Jehova ken ni Jesus ket iti kasta magnada iti dalan ti biag, kasapulan ti napinget a panagregget ti dadduma a boluntario. (Juan 17:3) Tapno maaramid dayta, nagadal iti sign language ti sumagmamano a Saksi ni Jehova ket nabendisionanda iti adu a makapabileg a kapadasan.
Ni Park In-sun, agtawen iti 15, inaramidna a kalat ti agadal iti sign language. Gapuna, nagsursuro a mangged iti maysa a paktoria a pagtartrabahuan ti 20 a tuleng. Walo a bulan a sisisinged a nakipagtrabaho kadakuada tapno maadalna ti lenguahe ken panagpampanunot dagiti tuleng. Iti simmaganad a tawen, nagbalin a regular pioneer, wenno amin-tiempo a manangiwaragawag iti Pagarian, ken nakipagtrabaho iti maysa a grupo dagiti tuleng nga interesado iti kinapudno iti Biblia. Napartak a dimmakkel ti grupo, ket di nagbayag, nasurok a 35 ti tumabtabuno kadagiti gimong iti Domingo.—Salmo 110:3.
Kalpasanna, iti kaunaan a gundaway idiay Seoul, nayurnos dagiti Nakristianuan a gimong a sign language laeng ti mausar. Nagserbi ni Kabsat Park In-sun kas maysa nga special pioneer iti daytoy rumangrang-ay a grupo. Isu ket nalaing idin iti sign language. Adda dagiti bulan a nakaikondukta iti 28 a panagadal iti Biblia kadagiti tuleng. Adu kadagitoy ti rimmang-ay ket nabautisaran kas Saksi ni Jehova.
Kas resulta daytoy aktibo unay a panagboluntario, nabukel idi Oktubre 1976 ti kaunaan a sign-language a kongregasion idiay Seoul, nga addaan iti 40 nga agibumbunannag ken 2 a regular pioneer. Daytoy ti nangparayray iti aktibidad kadagiti dadduma a siudad ti Korea. Adu a tuleng ti mabisbisinan iti naimbag a damag ken agur-uray idi a masarungkaran.
Pannakipagtrabaho Kadagiti Tuleng
Nalabit iyimtuodyo no kasano idi a nasarakan dagiti tuleng. Adu kadakuada ti nadanon babaen ti panangyam-ammo. Napagdamagan met dagiti akinkukua kadagiti lokal a tiendaan ti bagas, ket impaayda dagiti nagan ken address dagiti tuleng. Adda dagiti opisina ti gobierno a timmulong a mangipaay kadagita nga impormasion. Naballigi unay ti naanep a panangwanas kadagiti teritoria a pagnanaedan dagiti tuleng isu nga, idi agangay, nabukel ti uppat a sign-language a kongregasion. Adu a Kristiano nga agtutubo ti naparegta nga agadal iti sign language.
Dagiti special pioneer a ministro a nakaadal iti sign language ket imbaon ti sanga nga opisina dagiti Saksi ni Jehova tapno tumulongda kadagiti kongregasion. Itay laeng nabiit, dagiti nagturpos iti Ministerial Training School naibaonda kadagita a kongregasion ket nangipaayda iti naespirituan a pammabileg.
Adda dagiti pakarigatan a kasapulan a mapagballigian. Iti panagserbi iti daytoy a teritoria, kasapulan ti panangikagumaan a mangtarus iti kultura dagiti tuleng. Prangka unay dagitoy no iti pampanunot ken tigtignayda. No dadduma, daytoy ti makagapu a maklaat dagiti tattao ket mabalin a mangpataud kadagiti di panagkikinnaawatan. Kanayonanna, no mangyadal dagiti Saksi iti Biblia kadagiti tuleng, kasapulan a matulonganda a lumaing iti mismo a lenguaheda ken maparegtada a mangpalawa iti bukodda a programa iti panagbasa ken panagadal.
Iti inaldaw nga aktibidadda, maipasango dagiti tuleng kadagiti pakarigatan a kaaduanna a saan nga ammo ti sabsabali. Masansan nga agbalin a dakkel a parikutda ti komunikasion kadagiti opisina ti gobierno ken pasilidad a pakaaywanan ti salun-at, kasta met iti simple a transaksion iti negosio. Gapu ta siaayat a timmulong dagiti Saksi manipud kadagiti kabangibang a kongregasion, dagiti tuleng iti kongregasion Kristiano nariknada ti pudno a panagkakabsat.—Juan 13:34, 35.
Nagbunga ti Di Pormal a Panangasaba
Idiay Pusan, ti kangrunaan a makin-abagatan a puerto a siudad ti Korea, nasabet ti maysa a Saksi ti dua a tuleng a nangisurat iti papel: “Kayatmi ti Paraiso. Kayatmi a maammuan dagiti kasuratan a nangdakamat iti biag nga agnanayon.” Inlista ti kabsat ti address-da ket inyurnosna a sarungkaran ida. Idi simmarungkar, nadanonanna ti maysa a kuarto a napno iti tuleng nga agur-uray a dumngeg iti mensahe ti Pagarian. Daytoy ti nangtignay kenkuana nga agadal iti sign language. Di nagbayag, nabuangay ti maysa a sign-language a kongregasion idiay Pusan.
Maysa a kabsat iti dayta a kongregasion ti nakakita iti dua a tuleng nga agsenseninnias ket inasitganna ida. Idi maammuanna a kagapgapuda iti narelihiosuan a gimong, inawisna ida nga umay iti Kingdom Hall iti alas dos ti malem iti isu met la nga aldaw. Timmabunoda, ket nairugi ti panagadal iti Biblia. Di nagbayag, timmabuno ti 2 iti kombension distrito a kaduada ti 20 a tuleng a gagayyemda. Manipud iti dayta a grupo, adda dagiti nangidedikar iti biagda ken ni Jehova. Dua ti nagbalin a panglakayen ken maysa a ministerial nga adipen kadagiti sign-language a kongregasion.
Nagunggonaan Gapu iti Determinasionda
Yantangay adda dagiti tuleng nga adayo ti pagnanaedanda manipud iti aniaman a sign-language a kongregasion, masansan a kasapulan ti napinget a panangikagumaan ken determinasion tapno maipaayanda iti regular a naespirituan a taraon manipud iti Biblia. Kas pagarigan, maysa a lalaki nga agtawen iti 31 ti agbibiag babaen ti panagkalap iti kosta ti maysa nga isla. Nangngegna ti mensahe ti Biblia manipud iti agtutubo nga adingna a lalaki, a naam-ammo dagiti Saksi ni Jehova. Iti panangikagumaanna a mangpennek iti naespirituan a pannakawawna, naglayag ti tuleng a mangngalap iti 16 a kilometro a nagturong idiay Tongyoung City, iti makin-abagatan a kosta ti Korea. Inaramidna dayta tapno maam-ammona ti maysa nga special pioneer iti sign-language a kongregasion idiay Masan City. Kada Lunes, aglayag daytoy nga special pioneer iti 65 a kilometro tapno iyadalanna iti Biblia ti tuleng a mangngalap.
Tapno matabunuanna ti gimong iti Domingo idiay Masan City, daytoy a tuleng nga agad-adal iti Biblia kasapulan nga aglayag iti 16 a kilometro ken aglugan iti bus para iti sabali pay nga 65 a kilometro. Saan a nasayang ti panagreggetna. Iti uneg ti sumagmamano a bulan, rimmang-ay ti pannakaammona iti sign language, nasursurona ti ad-adu pay nga alpabeto ti Korea, ken—kapatgan iti amin—naammuanna ti kakaisuna a dalan tapno maaddaan iti relasion ken ni Jehova. Gapu ta nabigbigna ti kinapateg dagiti gimong ken regular a panangasaba, immakar iti teritoria ti sign-language a kongregasion. Nalaka kadi dayta? Saan. Masapul a panawanna ti trabahona a panagkalap a makagunggona iti [U.S.] 3,800 a doliar kada bulan. Ngem nagunggonaan ti determinasionna. Idi rimmang-ay iti kinapudno, nabautisaran ken siraragsak ita nga agserserbi ken ni Jehova a kaduana ti pamiliana.
Panagipatarus Para Kadagiti Tuleng
Ti naimbag a damag ti Pagarian ket masansan a berbal a mayallatiw. Ngem tapno ad-adda nga umiso ti pannakayallatiw ti mensahe ti Sao ti Dios, napateg a maiparang ti pannursuro ti Biblia iti mas permanente a porma. Gapuna, idi umuna a siglo, naimaldit dagiti libro ken surat babaen dagiti aduan kapadasan a lallakay. (Aramid 15:22-31; Efeso 3:4; Colosas 1:2; 4:16) Iti tiempotayo, naipaay ti nawadwad a naespirituan a taraon babaen kadagiti libro ken dadduma pay a Nakristianuan a publikasion. Naipatarusda iti ginasgasut a lenguahe, agraman iti nagduduma a sign language. Tapno maaramid daytoy iti Sign Language ti Korea, naaddaan ti sanga nga opisina iti departamento iti panagipatarus iti sign-language. Maysa a departamento ti mangpatpataud kadagiti video a sign language. Mangipapaay daytoy iti naespirituan a taraon para kadagiti tuleng a mangiwarwaragawag iti naimbag a damag ken kadagiti interesado kadagiti kongregasion iti intero a Korea.
Nupay adu dagiti nagbalin a nalaing iti sign language ken timmulong iti panagpataud kadagiti video, kaaduanna a dagiti annak dagiti tuleng ti kasayaatan nga agipatarus. Naadalda ti sign language manipud kinaubingda. Dagitoy saanda laeng nga agsenias a siuumiso no di ket mangipaayda iti naimpusuan a kaipapanan ken panangipaganetget iti mensahe babaen dagiti senias ken ebkas ti rupada, iti kasta, madanonda ti panunot ken puso.
Kas nadakamat, addan ti regular a sign language a kombension ken asamblea idiay Korea. Dakkel a trabaho, gastos, ken panangikagumaan ti kasapulan tapno maitungpal dayta. Ngem daytoy nga urnos ket apresiaren dagiti tumabtabuno. Iti panagngudo dagitoy a panagtitipon, adu dagiti saan a pumanaw a dagus, a tarigagayanda nga itultuloy a tagiragsaken ti nasayaat a timpuyog ken pagsasaritaan ti naipaay a nagsayaat a naespirituan a taraon. Nalawag, adda dagiti karit iti panagserbi iti daytoy naiduma a grupo, ngem awan aniamanna dayta gapu kadagiti naespirituan a bendision.
[Ladawan iti panid 10]
Dagiti sign-language a video a napataud idiay Korea: “Ania ti Kalikaguman ti Dios Kadatayo?,” “Panangipateg iti Naespirituan a Tawidtayo,” “Dagiti Pasamak a Pakaballaagantayo Itatta,” ken “Raemenyo ti Autoridad ni Jehova”
[Dagiti Ladawan iti panid 10]
Agpakannawan manipud baba: Ti sign-language a video a mapatpataud iti sanga nga opisina ti Korea; panangisagana kadagiti senias para kadagiti teokratiko a termino; ti grupo dagiti agipatpatarus iti sign-language; ti tultuladen ti para-senias bayat ti pannakaisagana ti video