Liwliwa Kadagidiay Agpatpatulong

TI Biblia ket saan a libro ti sikolohia. Ngem ipaayannatayo iti liwliwa ken tulongannatayo a mangapresiar iti biag iti laksid dagiti pakarigatantayo. Umiso ti kunaen ti Kasuratan: “Ti tao, a nayanak manipud babai, ababa ti biagna ken namelmelan iti pannakariribuk.” (Job 14:1) Ti kinaimperpektotayo ti pakaigapuan ti dadduma kadagiti pakasuotantayo. Ngem asino ti kangrunaan a pakaigapuan ti panagsagaba ti tao?

Ti Biblia impabigbigna dayta kas maysa a dakes nga espiritu a naawagan Diablo ken Satanas. Isu ti ‘nangyaw-awan iti intero a mapagnaedan a daga’ ken pakaigapuan ti adu a pakarigatan ti sangatauan. Kaskasdi, ibaga met ti Biblia nga asidegen ti pannakatalipuposna. (Apocalipsis 12:9, 12) Iti din agbayag, agpatingganto amin dagiti pakarigatan nga inyeg ni Satanas kadagiti agnaed iti daga inton bumallaet ti Dios. Sigun iti Biblia, ti inkari ti Dios a baro a lubong ti kinalinteg ti mamagpatingga iti kinaawan namnama.​—2 Pedro 3:13.

Anian a makaliwliwa a maammuan a temporario ti panagsagaba ti tao! Iti sidong ti turay ti nailangitan a Pagarian ti Dios babaen ken Jesu-Kristo kas ari, agpatingganto ti kinaawan hustisia ken panagsagaba. No maipapan iti dinutokan ti Dios nga Ari, kuna ti Kasuratan: “Ispalennanto daydiay napanglaw nga agpatpatulong, kasta met daydiay naparigatan ken siasinoman nga awanan katulongan. Isu maasianto iti daydiay nanumo ken iti daydiay napanglaw, ket dagiti kararua dagidiay napanglaw isalakannanto. Iti pannakairurumen ken iti kinaranggas subbotennanto ti kararuada, ket ti darada napategto kadagiti matana.”​—Salmo 72:12-14.

Nakaas-asidegen ti tiempo a matungpal dagitoy naimpadtuan a sasao. Mabalintayto a tagiragsaken ti biag nga agnanayon iti paraiso a daga iti sidong dagiti nakaskasdaaw a kasasaad. (Lucas 23:43; Juan 17:3) Ti pannakaammo kadagitoy makaliwliwa a Nainkasuratan a kari mangted iti namnama ken liwliwa kadagidiay agpatpatulong.

[Picture Credit Line iti panid 32]

Malmaldaangan a balasitang: Ladawan ILO/J. Maillard