Asamblea iti “Tengnga ti Lubong”

Nangngegyo kadin dagiti sasao a “Te Pito o Te Henua”? Iti Rapa Nui, ti orihinal a pagsasao idiay Easter Island, dayta ket kaipapananna “Tengnga ti Lubong.” Apay a naisangsangayan ti asamblea iti daytoy a lugar?

NAIPUTPUTONG, makapaamanga, naidumduma. Dagita ti dadduma a sasao a nausar a mangdeskribir iti Easter Island, wenno Rapa Nui kas pangawag dagiti agindeg iti dayta. Talaga a naiputputong dayta a lugar, a masarakan iti adayo a paset ti Abagatan a Taaw Pacifico, 3,790 a kilometro manipud Santiago, Chile. Nagbalin dayta a probinsia ti Chile idi Setiembre 9, 1888.

Iti kalawa a 166 a kilometro kuadrado, daytoy a trianggulo nga isla ket kangrunaanna a buklen ti tallo a natay a bulkan. Iti kinapudnona, kas iti adu nga isla iti Pacifico, daytoy nga isla ket buklen dagiti tapaw dagiti dadakkel a bantay iti uneg ti baybay. Naideklara ti intero nga isla kas natural a monumento. Awan duadua a kangrunaan nga agdindinamag daytoy gapu kadagiti makapaamanga nga estatua a bato, a maawagan moai.a

Malaksid kadagiti makaay-ayo a buya ti nakaparsuaan ken historikal a luglugar, masarakan iti Easter Island dagiti nagduduma nga agkakaimas a taraon. Masarakan sadiay dagiti prutas a kas iti pinia, abokado, papaya, ken siam a kita ti saba. Nalikmut daytoy iti baybay a pakasarakan kadagiti nagduduma nga ikan ken dadduma pay a taraon.

Kalalainganna ti paniempo iti Easter Island, a regular ti tudo ken panagparang ti bullalayaw, a mangipaay kadagiti bisita iti nadalus nga angin ken nakaay-ayat a buya. Iti agdama, adda agarup 3,800 nga umilina. Nagtaudda kadagiti damo a nagindeg a taga Polynesia, agraman dagiti taga Europa, Chile, ken dadduma pay. Ginasut a turista manipud Europa ken Asia ti bumisbisita iti isla, a namagbalin iti turismo a napateg a paset ti ekonomia.

Dagiti Bin-i ti Pagarian a Damo a Naimula

Impadamag ti 1982 Yearbook of Jehovah’s Witnesses: “Maymaysa a babai idi ti agibumbunannag iti Easter Island. Isu ket natulongan iti naespirituan babaen ti sursurat ti maysa a misionera a kabsat iti sanga nga opisina [iti Chile]. Nupay nagsublin iti Chile, addaantayo iti rekord dagiti nagsuskriber iti Pagwanawanan manipud iti isla. Nasorpresakami idi Abril 1980 ta, manipud iti adayo a lugar, nagtelepono iti sanga nga opisina ti maysa nga interesado tapno ammuenna no kaano a marambakan ti Memorial. Idi agangay, iti isu met laeng a tawen, immakar sadiay ti maysa nga agassawa manipud Valparaiso, ket nangyadalda iti Biblia kadagiti interesado a tattao. Idi Abril 1981, naangay ti damo a Memorial iti daytoy nga isla, ket adda 13 a timmabuno. Anian a makaparagsak ta maidandanon ti ‘naimbag a damag’ iti daytoy naiputputong a lugar!”

Kalpasanna, idi Enero 30, 1991, ti sanga nga opisina nangibaon iti agassawa nga agserbi iti isla kas special pioneer, da Dario ken Winny Fernandez. Kinuna ni Kabsat Fernandez: “Lima nga oras a nageroplanokami a napan iti kaadaywan a paset ti planeta, iti lugar a makapaamanga ti kultura.” Dagus a naorganisar dagiti gimong ken trabaho a panangasaba iti tulong dagiti lumugar a kakabsat ken maysa a kabsat a babai a nabiit pay nga immakar sadiay a kaduana ti dua nga annakna. Iti laksid ti ibubusor ti pamilia, narelihiosuan a kinainget, ken estilo ti panagbiag a gagangay iti kultura dagiti taga Polynesia, nariknada a bembendisionan ni Jehova ti panagreggetda. Saanen nga special pioneer da Kabsat Fernandez, ngem nagtalinaedda iti isla, a padpadakkelenda ti anakda a lalaki, a naipasngay sadiay. Ita, dayta nga isla ket addaanen iti 32 a naragsak nga agibumbunannag ti Pagarian. Dadduma kadakuada ket tubo ti Rapa Nui, agraman dagiti nagindeg iti isla wenno immakar sadiay tapno agserbi iti lugar a dakdakkel ti pakasapulan kadagiti agibumbunannag iti Pagarian.

Panagsagana Para iti Asamblea Sirkito

Gapu iti kaadayo ti isla manipud iti kontinente, mamitlo kada tawen a makaawat ti kongregasion kadagiti video tape dagiti programa ti aldaw ti espesial nga asamblea, asamblea sirkito, ken kombension distrito. Ngem idi ngudo ti tawen 2000, inkonsiderar ti Branch Committee ti Chile no mabalin a maangay sadiay ti asamblea, iti kaunaan a gundaway. Kamaudiananna, naikeddeng a maangay sadiay ti asamblea sirkito idi Nobiembre 2001, ket naawis a tumabuno iti daytoy a naisangsangayan nga okasion ti limitado a bilang dagiti kakabsat a lallaki ken babbai manipud iti nadumaduma a paset ti Chile. Gapu iti eskediul dagiti agbiahe nga eroplano, naangay ti asamblea iti Domingo ken Lunes.

Dagiti 33  a naawis a delegado ket magagaran iti panagbiaheda nga agturong iti isla tapno makipaset iti damo nga asamblea sirkito iti dayta a nasulinek a lugar. Kalpasan ti napaut a panageroplano iti tangatang ti Taaw Pacifico, makapabang-ar ti panangabrasa dagiti umili a kakabsat a naguray kadakuada iti eropuerto. Nakablaawan dagiti delegado babaen ti napintas nga ukkor (kuentas a naaramid kadagiti petalo ti sabong), maysa a napateg a sagut iti isla. Kalpasanna, naitulodda kadagiti pagdagusanda, ket kalpasan ti apagbiit a panagpasiar iti isla, nagtataripnong iti Kingdom Hall dagiti amin nga addaan paset iti programa ti asamblea.

Di Ninamnama a Panangipablaak

Bayat ti panagluganda nga agturong iti asamblea, nasorpresa ti dadduma a delegado idi mangngegda iti radio ti komento ti maysa a lokal a padi maipapan iti panagbisitada. Dinakamatna dagiti turista manipud iti kontinente nga umay bumisita tapno makipatang kadagiti bumalay maipapan iti um-umay a panungpalan ti lubong. Nupay indagadagna kadagiti miembro ti simbaan a saanda a dumngeg kadagiti bisita, timmulong ti anunsiona tapno maipablaak ti kaadda ti dakkel a grupo dagiti Saksi ni Jehova iti isla. Gapu iti daytoy, sinegseggaan dagiti umili ti panagbisita dagiti Saksi. Bayat dagiti simmaganad nga aldaw, dagiti delegado sitataktika nga inranudda kadakuada dagiti makaparegta a mensahe ti naimbag a damag.

Nangrugi ti Asamblea

Iti agsapa ti Domingo, dagiti lumugar a kakabsat nagurayda iti pagserkan ti Kingdom Hall tapno abrasaenda dagiti delegado para iti umuna nga aldaw ti asamblea. “Iorana Koe! Iorana Koe!” “Maabrasakayo!” Dadduma a kakabsat a babbai ti nagkawes iti tradisional a bado ken inarkosanda ti buokda kadagiti napipintas a sabong sigun iti talaga nga estilo dagiti taga Polynesia.

Kalpasan ti napintas a panglukat a musika, iti kaunaan a gundaway, ginasut a timek ti nangkanta iti “Sititibker, Di Magaraw!” Dagiti lumugar a kakabsat dida nagawidan ti naglua idi inabrasa ti tserman dagiti delegado babaen ti pagsasaoda a Rapa Nui. Idi agmatuon, tallo a kabbaro a Saksi ti nangisimbolo iti dedikasionda iti Dios babaen ti bautismo iti danum. Idi agngudo ti programa iti umuna nga aldaw, narikna ti amin nga ad-adda a simmingedda ken ni Jehova ken iti intero a timpuyog ti kakabsat.​—1 Pedro 5:9.

Panangasaba iti Agsapa

Gapu iti naiduma a kasasaad iti isla, ti programa iti simmaganad nga aldaw ti asamblea sirkito ket nangrugi kalpasan ti pangngaldaw. Gapuna, ginundawayan dagiti delegado ti kasasaad ket nakipasetda iti ministerio iti tay-ak iti agsapa. Ania dagiti kapadasanda?

Maysa a baket nga addaan iti walo nga annak ti nangibaga kadagiti Saksi a saanna a mabalin ti makitungtong kadakuada agsipud ta isu ket maysa a Katoliko. Nupay kasta, dimngeg kalpasan nga imbagada kenkuana a kayatda ti makipatang maipapan kadagiti parikut a sangsanguen ti amin, kas iti panagabuso iti droga ken parparikut ti pamilia.

Maysa a baket nga umili ti saan a nainggayyeman ti pannakisaona iti agassawa a Saksi a simmarungkar kenkuana. Imbagana kadakuada a mapanda iti kontinente ket kasabaanda dagiti naulpit a tattao sadiay. Imbaga ti agassawa nga agpaay iti amin ti mensahe a “naimbag a damag ti pagarian” ken immayda iti isla tapno tumabuno iti asamblea a tumulong iti amin a rumang-ay iti ayatda iti Dios. (Mateo 24:14) Inyimtuodda kenkuana no tarigagayanna ti napaut a biag iti naparaisuan a kasasaad, a kas iti kasasaad iti isla ngem awan ti sakit ken ipapatay. Kalpasan a nakirinnasonda kenkuana maipapan iti kabayag ti wangawangan ti bulkan iti isla, napanunotna ti kinaababa ti biag ket inyimtuodna: “Apay a nagababa ti biagtayo?” Nasorpresa idi mabasana ti Salmo 90:10.

Iti dayta a kanito, adda nagpukkaw a kaarruba a nakakigtotan dagiti Saksi. Nupay dida maawatan ti pukkaw, kinuna kadakuada ti baket nga in-insultuen ida dagiti kaarruba ken kayatda nga ipakita a dida kayat a bumisita kadakuada dagiti Saksi. Nupay kasta, daytoy a baket isu ti nua, wenno ti inauna nga anak iti pamilia. Yantangay pimmusayen ti amana, isu ti rumbeng a mangngeddeng no ania ti pagimbagan ti pamilia. Iti sango dagiti kabagianna, inkanawana dagiti Saksi iti lenguaheda ket nainggayyeman nga inawatna dagiti publikasion a naitukon kenkuana. Kalpasanna, iti dayta a lawas, idi malabsanda dagiti Saksi, binilinna ti adingna a lalaki nga isardengna ti lugan. Nupay marurod ti adingna, nagpakada kadagiti kakabsat ket indawatna nga agballigi koma ti ministerioda.

Nupay adda dagiti umili a kasla laksidenda idi damo ti mensahe nga inkasaba dagiti Saksi manipud iti kontinente, nadlaw dagiti delegado a naasi ken nainggayyeman dagiti tattao iti Rapa Nui. Kaaduan kadakuada ti maragsakan a nagimdeng iti naimbag a damag. Iti kinapudnona, lumugar ti 6 kadagiti 20 a Saksi a nabautisaran iti isla. Maysa kadagitoy ti nakaadal iti kinapudno iti Biblia babaen ti panagdengngegna iti bangir a kuarto bayat a mayad-adalan ti asawana. Isuda nga agassawa ket bautisadodan a Saksi, ken agserserbi kas ministerial nga adipen iti kongregasion.

Agtultuloy ti Naespirituan a Programa

Kalpasan ti pangngaldaw, nangrugi ti programa iti maikadua nga aldaw. Naminsan manen, adu nga interesado a tattao ti timmabuno a kadua dagiti 32 a lumugar a kakabsat ken 33 a delegado. Dandani sangagasut ti dimngeg iti programa, agraman iti palawag publiko a napauluan “No Kasano a ti Ayat ken Pammati Parmekenna ti Lubong.” Iti kinapudnona, dagiti timmabuno makitkitada a mismo ti ayat iti ili ni Jehova, uray iti nagbabaetan dagiti nagduduma ti kulturada.​—Juan 13:35.

Bayat ti asamblea sirkito, ti manangaywan iti sirkito ken distrito nangangayda iti maysa nga espesial a sesion kadagiti payunir a ministro. Dagiti tallo a regular pioneer manipud iti isla ket kinaduaan dagiti delegado a regular wenno special pioneer. Kasta unay ti pannakaparegtada amin.

Iti simmaganad nga aldaw, dadduma kadagiti lumugar a kakabsat ti nangipasiar kadagiti delegado iti aglikmut ti isla. Bimmisitada iti lugar a pagtiktikapan iti bato ken pakaar-aramidan ti kitikit a moai, agraman kadagiti bulkan a nakaangayan dagiti nagkauna a kompetision ken, siempre, iti nangayed a kolor balitok nga aplaya ti Anakena, a simmangladan dagiti damo a nagindeg iti isla.b

Ti kaudian a gundaway a makalangen dagiti lumugar a kakabsat ket bayat ti Panagadal iti Libro ti Kongregasion. Kalpasan dayta a gimong, dagiti lumugar a Saksi sinorpresada dagiti bisitada babaen ti naisangsangayan a lokal a taraon. Nagsayaat ti impabuyada a lokal a sala bayat a nakasuotda iti pakabigbiganda a kawes. Marikna dagiti delegado ken kakabsat iti Rapa Nui a makagunggona unay ti asamblea nga inkagumaanda a maangay.

Narikna dagiti amin a delegado ti kasta unay a kinasinged kadagiti naiputputong a kakabsat, a nakaduada iti maysa a nakaragragsak a lawas. Gapuna, saan a nalaka kadakuada ti pumanaw. Didanto malipatan dagiti naam-ammoda a baro a gagayyem ken dagiti banag a nangparegta kadakuada iti naespirituan. Iti eropuerto, dagiti lumugar a kakabsat inarkosanda dagiti delegado babaen dagiti kuentas a naaramid kadagiti shell iti baybay.

Idi pumanawen dagiti delegado, inkarida: “Iorana! Iau he hoki mai e Rapa Nui ee,” a kayatna a sawen: “Inkamin! Agsublikaminto, Rapa Nui.” Wen, il-iliwenda ti agsubli tapno mabisita dagiti baro a gagayyem ken kapamiliada iti naespirituan iti naidumduma, naiputputong, makapaamanga, ken nakaay-ayat nga Easter Island!

[Footnotes]

[Kahon iti panid 24]

Panangasaba iti Easter Island

Agarup dua a tawen sakbay daytoy nakallalagip nga asamblea, maysa a manangaywan iti sirkito ken ti asawana ti bimmisita iti isla ken tinagiragsakda ti adu a makaparagsak a kapadasan. Kas pagarigan, panunotenyo laengen idi a ti kabsat a babai a nangitulod kadakuada iti pagdagusanda impalagipna ti panangyadalda kenkuana iti Biblia idiay makin-abagatan a Chile idi agtutubo pay, agarup 16 a tawenen ti napalabas. Idi agangay, nagbunga dayta a bin-i idiay Rapa Nui.

Daytoy nga agassawa naaddaanda met iti kastoy a naragsak a kapadasan: Ti akinkukua iti maysa a paglakuan iti rekuerdo inawatna ti Baro a Lubong a Patarus ti Nasantuan a Kasuratan ken ti katulongan iti panagadal iti Biblia a Pannakaammo a Mangiturong iti Biag nga Agnanayon, nga agpada nga impablaak dagiti Saksi ni Jehova. Idi sinublianda, kinunana kadakuada a saanna a mabasa dayta a Biblia. Ngamin, Pranses saan nga Espaniol ti naitedda a Biblia! Dagus a nasuktan ti Biblia, ket naammuanna babaen ti tulong dagiti lumugar a Saksi ken, siempre, babaen ti Biblia iti bukodna a pagsasao, a saan a narigat a tarusan ti ibagbaga ti Biblia.

[Mapa iti panid 22]

(Para iti aktual a pannakaurnosna, kitaem ti publikasion)

EASTER ISLAND

CHILE

[Dagiti Ladawan iti panid 23]

Ti dua kadagiti nabautisaran iti asamblea sirkito

[Dagiti Ladawan iti panid 25]

Bakras ti bulkan a Rano Raraku; naikabassit a ladawan: Masarakan iti isla ti balang a prutas a naawagan guayaba