Namnama iti Tengnga ti Pakarigatan—Maysa nga Asamblea iti Kampo Dagiti Nagbakuit
TI Kakuma a kampo dagiti nagbakuit ket masarakan iti amianan a paset ti Kenya, iti asideg ti beddeng ti Sudan. Agnanaed dita ti nasurok a 86,000 a tattao. Natikag ti lugar, nga addaan iti 50 degrees Celcius a temperatura kabayatan ti aldaw. Gagangay ti naranggas a panagsusubang dagiti nagbakuit. Para iti adu, ti kampo ket lugar ti kinaawan namnama. Ngem dadduma nga adda sadiay ti addaan iti namnama.
Karaman kadagiti nagbakuit ti adu a Saksi ni Jehova, a sireregta a mangiwarwaragawag iti naimbag a damag ti Pagarian. Kamengda ti bassit a kongregasion idiay Lodwar, 120 a kilometro iti abagatan. Ti sumaruno a kongregasion ket walo nga oras ti kaadayona no agluganka.
Gapu ta saan a posible a makapagbiahe dagiti nagbakuit iti ruar ti kampo, adu ti saan a makatabuno kadagiti asamblea ken kombension dagiti Saksi ni Jehova. Gapu iti dayta, nayurnos ti pannakaangay ti espesial nga asamblea iti uneg ti kampo.
Panagbiahe iti Amianan
Tapno masuportaran ti asamblea, 15 a Saksi iti ili ti Eldoret, nga 480 a kilometro iti abagatan ti kampo, ti nagboluntario nga agbiahe nga agpaamianan iti daytoy a natikag a lugar, agraman ti maysa nga agad-adal iti Biblia a nangipausar iti minibus ken drayberna. Naimpusuan a tarigagayanda a paregtaen ken pabilgen dagiti kakabsat.
Nagrubbuatda bayat ti nalam-ek a parbangon iti makinlaud a kabambantayan ti Kenya. Sumang-at ti likka-likkaong a kalsada nga agturong iti kataltalonan ken kabakiran sakbay a sumalog iti nabara a kakaykaywan a desierto. Adu a pangen dagiti kalding ken kamelio ti agar-arab iti daytoy a langalang a daga. Nakabado dagiti umili kadagiti tradisional a kawesda, nga adu kadakuada ti nakaawit iti pang-or, bai, ken pana. Kalpasan iti panagbiaheda iti 11 nga oras, nakagteng dagiti Saksi idiay Lodwar, maysa a nabara ken natapuk a komunidad ti dandani 20,000 nga umili. Sibabara nga inabrasa ida dagiti Saksi a mangpadagus kadakuada, ket naginanada tapno maisaganaanda ti intero a makalawas nga aktibidad.
Kabigatanna, nagpasiar dagiti bisita kadagiti dadduma a napipintas a lugar. Siniguradoda a makitada ti Danaw Turkana, ti kadakkelan a danaw iti Kenya. Napalikmutan dayta iti adu a kilometro a kaykayo ti desierto, ken pagnaedan ti kadakkelan a populasion dagiti buaya. Ti danumna nga alkaline ti gubuayan ti inumen ti sumagmamano nga umili nga agnanaed iti pantarna. Tinagiragsakda ti rabii babaen ti itatabuno iti Teokratiko nga Eskuelaan ti Panagministro ken iti Gimong ti Serbisio iti kongregasion iti dayta a lugar. Napintas ti Kingdom Hall-da, a nabangon idi 2003 babaen ti panagbangon a programa dagiti Saksi agpaay kadagiti pagilian nga addaan iti limitado a pinansial a kabaelan.
Ti Aldaw ti Espesial nga Asamblea
Ti Domingo ti nayeskediul nga aldaw ti espesial nga asamblea. Ti Kongregasion ti Lodwar ken dagiti bimmisita a kakabsat ket naikkan iti permiso a sumrek iti kampo iti 8:00 ti bigat, isu a magagaran dagiti Saksi a mangrugi a nasapa. Nalikaw ti dalan a lumasat iti langalang a lugar nga agturong iti beddeng ti Sudan. Adda dagiti narangkis a bambantay a malabasan. Namarangmang ti buya iti ili ti Kakuma. Agtudtudo idi, ket napitak ti dalan nga umuneg iti kampo. Kaaduan kadagiti pagtaengan ket naaramid iti damili a ladrilio ken dagiti atepda iti sim. Adda bukod a lugar ti tunggal grupo dagiti Etiope, Somali, Sudanese, ken dadduma pay. Dagiti nagbakuit sibabara nga inabrasada dagiti bimmisita.
Naangay ti asamblea iti maysa a pagensaywan. Dagiti naipinta kadagiti pader ipalgakna dagiti nakaal-alinggaget a biag dagiti nagbakuit, ngem iti dayta a pagasambleaan, nagari ti rikna nga adda namnama. Ingles ken Swahili ti naaramat kadagiti palawag. Dadduma pay ketdi nga ispiker a nalaing iti dayta a dua a pagsasao ti nagpalawag babaen ti panangusarda kadagita a dua a lenguahe. Maysa a nagbakuit a kabsat a taga-Sudan ti nangipaay iti panglukat a palawag a, “Panangsukimat iti Piguratibo a Pusotayo.” Dagiti bimmisita a panglakayen ti nangiparang kadagiti dadduma a paset.
Ti bautismo ti maysa a kangrunaan a tampok ti tunggal asamblea. Iti ngudo ti palawag ti bautismo, sikikita ti amin idi timmakder ni Gilbert, ti kakaisuna a kandidato. Nagtalaw ni Gilbert a kadua ni tatangna manipud iti lugarda kabayatan ti panangikisap iti puli idi 1994. Idi damo, impagarupda a natalgedda idiay Burundi, ngem di nagbayag nabigbigda nga agpegpeggadda latta. Nagtalaw ni Gilbert idiay Zaire, sa idiay Tanzania—a no dadduma naglemmeng iti kabakiran—ken kamaudiananna idiay Kenya. Adu ti nakalua idi isu ket inabrasa ti ispiker kas maysan a kabsat iti kongregasion. Bayat a sitatakder iti imatang ti bassit a bilang dagiti nagtataripnong a 95 a katao, nalawag ken addaan kompiansa a simmungbat ni Gilbert iti “Ndiyo!”—ti Swahili ti “Wen!”—idi naiturong kenkuana ti dua a saludsod ti ispiker. Kaduana a nagkali ti dadduma a kakabsat para iti maysa a pagitaneban nga inap-apanda iti tabing a dati nga us-usarenda a paglinonganda iti kampo. Kas panangipakita iti gagarna nga agpabautisar, iti dayta a bigat pinunnona a bukbukod ti pagitaneban, a timba laeng ti inusarna!
Ti maysa a tampok ti sesion iti malem ket ti panangisalaysay kadagiti kapadasan maipapan iti naidumduma a kasasaad dagiti nagbakuit a Saksi. Insalaysay ti maysa a kabsat no kasanona a kinasarita ti maysa nga agin-inana iti sirok ti kayo.
“Iti panagkunam, kanayon kadi a natalged ti aginana iti sirok ti maysa a kayo?”
“Wen,” insungbat ti lalaki. Sana innayon, “Ngem saan a natalged no iti rabii.”
Imbasa ti kabsat ti Mikias 4:3, 4: “Pudno nga agtugawdanto, tunggal maysa iti sirok ti puon ti ubasna ken iti sirok ti kayona a higos, ket awanto ti asinoman a mamagpigerger kadakuada.” “Makitam,” kinunana, “iti baro a lubong ti Dios, natalgedto uray ania a tiempo.” Inawat ti lalaki ti maysa a katulongan iti panagadal iti Biblia.
Maysa a kabsat a babai a napan idiay Kakuma ket nabiit pay a natayan iti tallo nga asideg a kabagian. Iti komentona maipapan kadagiti kakabsat iti kampo, kinuna: “Nagrigat ti agbiag iti kastoy a lugar; kaskasdi, sinalimetmetanda ti natibker a pammatida. Agnanaedda iti maysa a nakaay-ay-ay a lugar, ngem siraragsak nga agserserbida ken ni Jehova. Natalna ti relasionda iti Dios. Napabilegak a mangsalimetmet iti talna ken agserbi ken ni Jehova. Awan ti panggapuak nga agreklamo iti kasasaadko!”
Napartak a nagngudo ti aldaw ti asamblea. Iti pangserra a palawag, imbaga ti ispiker a naggapu iti walo a pagilian dagiti timmabuno. Sigun iti maysa kadagiti nagbakuit a Saksi, dayta nga asamblea ket pammaneknek ti panagkaykaysa ken panagiinnayat dagiti Saksi ni Jehova iti tengnga ti nasinasina a lubong. Tagtagiragsakenda ti pudno a Nakristianuan a panagkakabsat.—Juan 13:35.
[Kahon/Ladawan iti panid 25]
DAGITI MAPUKPUKAW NGA UBBING ITI SUDAN
Sipud idi rugi ti gerra sibil idiay Sudan idi 1983, lima a milion a tattao ti napagtalaw kadagiti pagtaenganda. Karaman kadagita ti 26,000 nga ubbing, a naisina kadagiti pamiliada. Rinibu kadakuada ti nagtalaw kadagiti kampo dagiti nagbakuit idiay Ethiopia, a nagindeganda iti agarup tallo a tawen. Gapu ta kapilitan nga umakarda manen, makatawen a nagnagnada a nagsubli idiay Sudan nga agturong iti amianan a Kenya. Narigat ti kasasaadda gapu iti napasaranda kadagiti soldado, bandido, saksakit, ken atap nga animal. Kagudua laeng kadagiti ubbing ti nakalasat iti dayta a nakarigrigat a panagdaliasat ket idi kamaudiananna, dagitoy ti nagbalin a kangrunaan a paset ti kampo idiay Kakuma. Para kadagiti ahensia a mangipapaay iti saranay, isuda ti naawagan kas dagiti mapukpukaw nga ubbing iti Sudan.
Ti kampo dagiti nagbakuit idiay Kakuma ket pagnaedan ita ti nadumaduma a puli dagiti nagbakuit manipud Sudan, Somalia, Ethiopia, ken dadduma a pagilian. No adda nagbakuit a sumangpet iti kampo, isu ket maipaayan kadagiti kangrunaan a kasapulanna a material a pagbangon iti balay ken maysa a tabing a pagatep. Mamindua iti kada bulan, tunggal nagbakuit ket maikkan iti 6 a kilo nga arina, 1 kilo a bukbukel, ken sumagmamano a manteka ken asin. Adu a nagbakuit ti mangisukat kadagiti abastoda tapno magun-odda ti dadduma a kasapulanda.
Dadduma kadagita a mapukpukaw nga ubbing ti naitipon met laeng kadagiti pamiliada wenno nagindeg kadagiti sabali a pagilian. Ngem sigun iti Office of Refugee Resettlement, “rinibu ti agnanaed pay laeng iti natapuk, mangilngilaw a kampo dagiti nagbakuit idiay Kakuma, a marigrigatan nga agsapul iti taraon ken gumun-od iti edukasion.”
[Credit Line]
Impaay ti Refugees International
[Mapa iti panid 23]
(Para iti aktual a pannakaurnosna, kitaem ti publikasion)
KENYA
Kampo ti Kakuma
Danaw Turkana
Lodwar
Eldoret
Nairobi
[Ladawan iti panid 23]
Narigat dagiti kasasaad ti panagbiag iti kampo
[Ladawan iti panid 23]
Mairasrasion ti danum iti uneg ti kampo idiay Kakuma
[Ladawan iti panid 23]
Dagiti Saksi a taga-Kenya dinaliasatda ti narigat a ruta nga agpaamianan tapno paregtaenda dagiti kakabsatda
[Ladawan iti panid 24]
Maysa a misionero a mangipatpatarus iti palawag ti maysa a lumugar nga special pioneer
[Ladawan iti panid 24]
Pagitaneban
[Picture Credit Line iti panid 23]
Panagrasion iti danum ken Kakuma Refugee Camp: Impaay ti Refugees International