“Ikasaba ti Pannakaluk-at Kadagiti Kautibo”

ITI rugrugi ti ministeriona, impakaammo ni Jesus nga annongenna met nga “ikasaba ti pannakaluk-at kadagiti kautibo.” (Lucas 4:18) Kas panangsurot iti ulidan ti Apoda, dagiti pudno a Kristiano ikasabada ti naimbag a damag ti Pagarian kadagiti “amin a kita ti tattao,” a luk-atanda ida manipud iti naespirituan a pannakakautibo ken tulonganda ida a mangparang-ay iti biagda.​—1 Timoteo 2:4.

Ita, daytoy a trabaho iramanna ti panangasaba kadagiti literal a kautibo​—dagiti tattao a naibalud gapu iti nagduduma a krimen ngem agtarigagay a maruk-atan iti naespirituan. Imutektekanyo daytoy a makaparegta a report maipapan iti aktibidad dagiti Saksi ni Jehova a mangaskasaba kadagiti pagbaludan idiay Ukraine ken iti dadduma pay a lugar idiay Europa.

Dagiti Adikto iti Droga a Nagbalin a Kristiano

Agtawen iti 38 ni Serhii,a ngem 20 a tawen ti binusbosna iti pagbaludan. Nalpasna pay ti panageskuelana iti pagbaludan. Kunana: “Sumagmamano a tawen ti napalabasen, naibaludak gapu ta nakapatayak, ket adda pay tawtawen a nabati nga ikarok. Iti uneg ti pagbaludan, nagbalinak a manangikuspil, ket mabuteng kaniak dagiti padak a balud.” Nakarikna kadi iti wayawaya gapu iti dayta? Saan. Iti adu a tawen, ni Serhii ket inadipen ti droga, arak, ken sigarilio.

Idi agangay, maysa a balud ti nangiranud kenkuana iti kinapudno a linaon ti Biblia. Dayta ket kasla silnag ti lawag iti kasipngetan. Kalpasan ti sumagmamano a bulan, isu ket nakalapsut kadagiti pakaadiktuanna, nagbalin a manangikasaba iti naimbag a damag, ket nabautisaran. Okupado ita ni Serhii iti uneg ti pagbaludan, nga agserserbi ken ni Jehova kas amin-tiempo a ministro. Pito a kriminal ti natulonganna nga agbalbaliw ken agbalin a kakabsatna iti naespirituan. Innem kadagitoy ti nawayawayaanen, ngem nakabalud pay ni Serhii agingga ita. Saan a nadismaya iti dayta agsipud ta maragsakan a makatulong a mangwayawaya kadagiti sabsabali manipud iti naespirituan a pannakakautibo.​—Aramid 20:35.

Ti maysa kadagiti inyadalan ni Serhii iti pagbaludan isu ni Victor, maysa nga adikto ken aglaklako iti droga. Kalpasan a mawayawayaan manipud iti pagbaludan, nagtultuloy ti naespirituan a panagrang-ay ni Victor agingga a nagturpos iti Ministerial Training School idiay Ukraine. Agserserbi itan kas special pioneer idiay Moldova. Kuna ni Victor: “Nangrugiak nga agsigarilio idi agtawenak iti 8, agbartek idi agtawenak iti 12, ken agdroga idi agtawenak iti 14. Tinarigagayak ti agbalbaliw, ngem napaay dagiti panangikagumaak. Kalpasanna idi 1995, idi pinanggepmi ken baketko ti umadayon manipud kadagiti dakes a kakaduak, maysa a manangpapatay ti nangbagkong kenkuana ket natay. Nagbalin a nakaay-ay-ay ti biagko. ‘Ayannan ni baketko? Ania ti mapasamak no matay ti maysa a tao?’ Adu ti saludsodko ngem awan ti masarakak a sungbat. Intultuloyko ti nagdroga tapno mapunnuan ti marikriknak a kinakawaw. Naarestarak gapu iti panaglako iti droga ket nasentensiaanak iti lima a tawen a pannakaibalud. Sadiay, tinulongannak ni Serhii tapno masungbatan dagiti saludsodko. Adu a daras nga inkagumaak nga isardeng ti panagdrogak, ngem ita laeng a nagballigiak babaen ti tulong ti Biblia. Nakabilbileg ti Sao ti Dios!”​—Hebreo 4:12.

Nagbalbaliw Dagiti Napeklan a Kriminal

Saan pulos a nagusar ni Vasyl iti droga, ngem napadasanna met ti naibalud. “Adiktoak iti kickboxing,” inlawlawagna. “Sinanayko ti bagik no kasano ti mangkabil iti tao iti pamay-an a saan a madunor.” Siraranggas a takawanna dagiti tattao. “Namitlo a naibaludak, ket dayta ti makagapu nga indiborsionak ni baketko. Bayat ti naudi a lima a tawen a pannakaibaludko, nakabasaak iti literatura dagiti Saksi ni Jehova. Daytoy ti nangtignay kaniak a mangbasa iti Biblia, ngem makiramramanak pay latta iti talaga a pagesmak​—ti awan paglinteganna a pannakilaban.

“Ngem kalpasan ti innem a bulan a panangbasak iti Biblia, nariknak nga adda nagbalbaliwak. Saankon a pakaragsakan ti mangabak iti ranget. Gapuna, inrugik nga inusig ti biagko maibatay iti kunaen ti Isaias 2:4 ket naamirisko a diakton pulos makaruar iti pagbaludan no diak balbaliwan ti panagpampanunotko. Gapuna, imbellengko amin a pakiranget nga arwatek ket rinugiak a parang-ayen ti personalidadko. Saan a nalaka dayta, ngem ti panagmennamenna ken panagkararag in-inut a tinulongannak a mangiwaksi kadagiti dakes nga ugalik. No dadduma, aglulua nga agpakaasiak ken ni Jehova nga ipaayannak iti bileg a lumapsut manipud iti pannakaadiktok. Nagballigiak kamaudiananna.

“Kalpasan ti pannakaruk-atko iti pagbaludan, naikaykaysaak manen iti pamiliak. Agtartrabahoak ita iti pagminasan ti karbon. Daytoy ti nangted kaniak iti umdas a tiempo a makiraman iti trabaho a panangasaba a kaduak ni baketko ken mangitungpal kadagiti annongek iti kongregasion.”

Ni Mykola ken dagiti gagayyemna tinakawanda dagiti nagduduma a bangko idiay Ukraine. Nagresulta dayta iti pannakasentensiana a mabalud iti sangapulo a tawen. Sakbay a naibalud, naminsan laeng a napadasanna ti simrek iti simbaan―idi implanona a takawan dayta a simbaan. Napaay iti panggepna, ngem gapu iti dayta a pannakimisana namati ni Mykola a ti Biblia ket napno kadagiti makauma nga estoria maipapan kadagiti Orthodox a padi, kandela, ken narelihiosuan a piesta. Kunana: “Diak ammo no apay, ngem inrugik a binasa ti Biblia. Nasdaawak idi maammuak a naiduma dayta ngem iti impagarupko!” Kiniddawna a mayadalan iti Biblia ket nabautisaran idi 1999. No makitam daytoy a tao ita, narigatmo a patien a daytoy a napakumbaba a ministerial nga adipen ket maysa idi nga armado nga agtaktakaw iti bangko!

Nasentensiaan ni Vladimir iti ipapatay. Sakbay ti naituding a pannakapapatayna, nagkararag ket inkarina a pagserbiannanto ti Dios no saan a mapapatay. Kabayatanna, nabaliwan ti linteg ket naipababa ti sentensiana iti tungpal-biag a pannakaibalud. Tapno masalimetmetanna ti karina, sinapul ni Vladimir ti pudno a relihion. Nagparehistro iti correspondence school ket nakaawat iti diploma manipud iti simbaan a Sabatista, ngem saan a napnek.

Nupay kasta, kalpasan a nabasana dagiti magasin a Pagwanawanan ken Agriingkayo! iti libraria ti pagbaludan, sinuratan ni Vladimir ti sanga nga opisina dagiti Saksi ni Jehova idiay Ukraine, a kidkiddawenna a masarungkaran. Idi bimmisita kenkuana dagiti lumugar a kakabsat, imbilangnan ti bagina kas maysa a Saksi ken mangaskasaban iti pagbaludan. Isu ket natulongan a makualipikar kas agibumbunannag iti Pagarian. Bayat ti pannakaisurat daytoy nga artikulo, agur-urayen a mabautisaran ni Vladimir ken ti pito pay a sabali iti dayta a pagbaludan. Ngem adda parikutda. Yantangay mapagkakadua dagiti agkakarelihion a nasentensiaan iti tungpal-biag a pannakaibalud, ni Vladimir ken dagiti laeng kapammatianna ti adda iti maysa a selda. Siasino ngarud ti kasabaanda? Iranudda ti naimbag a damag kadagiti guardia ti pagbaludan ken babaen ti surat.

Manipud Ukraine, immakar ni Nazar idiay Czech Republic, ket nakibarkada kadagiti mannanakaw. Nagresulta dayta iti pannakaibaludna iti tallo ket kagudua a tawen. Bayat ti kaaddana iti pagbaludan, nakisarita kadagiti simmarungkar kenkuana a Saksi ni Jehova manipud iti siudad ti Karlovy Vary, naadalna ti kinapudno, ket naan-anay a nagbalbaliw. Idi mapaliiw daytoy ti maysa kadagiti guardia, imbagana kadagiti kakadua ni Nazar iti selda: “No agbalinkayo amin a kas iti dayta a taga-Ukraine, mabalinto metten a baliwak ti trabahok.” Kinuna pay ti sabali: “Eksperto a talaga dagitoy a Saksi ni Jehova. Kriminal ti maysa a tao no sumrek iti pagbaludan, ngem inton rummuar desenten a tao.” Nawayawayaan itan ni Nazar. Nagsursuro nga agkarpintero sa nakiasawa, ken agserserbida a dua kas amin-tiempo a ministro. Kasta unay ti yamanna gapu ta sinarungkaran dagiti Saksi ni Jehova idi nakabalud pay!

Opisial a Pannakabigbig

Saan laeng a dagiti balud ti agyamyaman iti serbisio nga ipapaay dagiti Saksi ni Jehova. Ni Miroslaw Kowalski, pannakangiwat ti maysa a pagbaludan idiay Poland, kinunana: “Apresiarenmi unay dagiti panagsarungkarda. Nakalkaldaang ti pakasaritaan ti dadduma a balud. Mabalin a saanda pulos idi a natrato kas tattao. . . . Nakapatpateg ti tulong [dagiti Saksi] gapu ta kurangkami iti tattao ken edukador.”

Ti warden ti sabali a pagbaludan idiay Poland nagsurat iti sanga nga opisina, a kidkiddawenna kadagiti Saksi a naynayonanda ti aktibidadda iti pagbaludan. Apay? Inlawlawagna: “Ti ad-adu a daras a panagbisita dagiti pannakabagi ti Watchtower mabalin a tulonganna dagiti balud a mangpatanor kadagiti galad a matarigagayan iti kagimongan, tapno mapukaw ti panangidumduma kadakuada.”

Maysa a pagiwarnak ti Ukraine ti nangipadamag iti malmaldaangan a balud a nagpanggep nga agpakamatay ngem natulongan dagiti Saksi ni Jehova. “Sumaysayaaten ti rikna daytoy a lalaki,” kuna ti report.” Makituntunos iti urnos ti pagbaludan ken maysa nga ulidan kadagiti padana a balud.”

Agtultuloy Dagiti Gunggona Kalpasan ti Pannakaibalud

Saan laeng a bayat ti pannakaibalud a makagunggona kadagiti tattao ti trabaho dagiti Saksi ni Jehova. Makagunggona dayta uray kalpasan ti pannakawayawaya dagiti balud. Iti kasta a pamay-an a tumultulong ti dua a Kristiano a da Brigitte ken Renate. No maipapan kadakuada, kastoy ti impadamag ti maysa nga Aleman a pagiwarnak, ti Main-Echo Aschaffenburg: “Tulonganda dagiti balud iti uneg ti tallo agingga lima a bulan kalpasan ti pannakawayawaya dagitoy, a paregtaenda ida a mangsapul iti panggep ti biag. . . . Opisial a naibilangda kas boluntario a probation officer. . . . Makaisuro ken positibo ti pannakilangenda kadagiti guardia iti pagbaludan.” Adu a tattao ti nangidedikar iti biagda ken ni Jehova kas resulta daytoy a naasi a tulong.

Uray dagiti opisial iti pagbaludan ket nagunggonaan met iti trabaho dagiti Saksi ni Jehova a panangedukar babaen ti Biblia. Kas pagarigan, ni Roman ket major ti militar ken sikologo iti maysa a pagbaludan idiay Ukraine. Idi simmarungkar dagiti Saksi ni Jehova iti pagtaenganna, immanamong a mayadalan iti Biblia. Idi agangay, naammuanna a naparitan dagiti Saksi a makisarita kadagiti balud iti pagtartrabahuanna a pagbaludan. Gapuna, kiniddawna iti warden a mapalubosan a mangusar iti Biblia iti trabahona kadagiti balud. Napatgan ti kiddawna, ket agarup sangapulo a balud ti nangipakita iti interes. Ti rumangrang-ay a pannakaammo ni Roman iti Biblia ket regular nga iranranudna kadagitoy a balud, a nangyeg kadagiti nagsayaat a resulta. Kalpasan ti pannakawayawayada, dadduma ti nagtultuloy a rimmang-ay ket nagbalinda a bautisado a Kristiano. Gapu iti napaneknekanna a bileg ti Sao ti Dios, ad-adda a sinerioso ni Roman ti panagadalna. Immikkat iti militar ket nagtultuloy a nagadal iti Biblia. Ita, makipaspaseten iti trabaho a panangasaba a kaduana ti maysa a dati a balud.

“Ti Biblia, dagiti publikasion a naibatay iti Biblia, ken ti panagadal iti Biblia ti mangsussustiner kadakami ditoy,” insurat ti maysa a balud. Dagitoy a sasao maitutop a deskribirenna ti panagkasapulan dagiti pagbaludan kadagiti literatura a naibatay iti Biblia. Ipadamag ti maysa a kongregasion idiay Ukraine ti maipapan iti trabaho a panangisuro iti Biblia iti maysa a lokal a pagbaludan: “Agyamyaman ti administrasion gapu iti ipapaaymi a literatura. Ipapaayanmi ida iti 60 a kopia ti tunggal ruar Ti Pagwanawanan ken Agriingkayo!” Insurat ti maysa pay a kongregasion: “Tumultulongkami iti maysa a koreksional a pagbaludan nga addaan iti 20 a babassit a libraria. Impaayanmi ti tunggal libraria kadagiti kangrunaan a publikasiontayo. Agdagup dayta iti 20 a kahon ti literatura.” Dagiti guardia iti maysa a pagbaludan mangur-urnongda met kadagiti magasin iti libraria tapno mabasa dagiti balud ti tunggal isyu.

Idi 2002, ti sanga nga opisina idiay Ukraine ket nangipasdek iti Prison Desk. Daytoy nga opisina nakikomunikar iti agarup 120 a koreksional a pagbaludan ken adda dagiti kongregasion a nadutokan a mangaywan iti kasapulanda. Tunggal bulan, agarup 50 a surat ti maaw-awat manipud kadagiti balud, a kaaduan kadagitoy ti agkidkiddaw a maipaayanda iti literatura wenno mayadalanda iti Biblia. Patulodan ida ti sanga nga opisina kadagiti libro, magasin, ken broshur agingga a masarungkaran ida dagiti lumugar a kakabsat.

“Sipapanunotkayo koma kadagidiay sipaparaut iti pagbaludan,” insurat ni apostol Pablo kadagiti padana a Kristiano. (Hebreo 13:3) Tuktukoyenna dagidiay naibalud gapu iti pammatida. Ita, dagiti Saksi ni Jehova sipapanunotda kadagidiay naibalud, agsarungkarda kadagiti pagbaludan, ket ‘ikasabada ti pannakaluk-at kadagiti kautibo.’​—Lucas 4:18.

[Footnote]

[Ladawan iti panid 9]

Pader ti pagbaludan idiay L’viv, Ukraine

[Ladawan iti panid 10]

Mykola

[Ladawan iti panid 10]

Ni Vasyl ken ni Iryna a baketna

[Ladawan iti panid 10]

Victor