Pakasaritaan ti Biag

Panagserbi ken Jehova​—Awan Kaaspingna a Pribilehio

Kas insalaysay ni Zerah Stigers

Natay ni lakayko idi 1938. Isu ti matalek a kaduak iti amin-tiempo a ministerio. Nupay kayatko nga itultuloy ti agpayunir, kasano a makapagtultuloyak ket adda idi tagibik ken aywanko a sangapulo ti tawenna nga anakko? Ngem sakbay nga ilawlawagko, estoriaek pay biit ti kabibiagko idi.

DI NAGBAYAG kalpasan a nayanakak idi Hulio 27, 1907 idiay Alabama, E.U.A., immakarkami ken dagiti dadakkelko idiay Georgia agraman dagiti tallo a kakabsatko. Kalpasan dayta, immakarkami idiay Tennessee sa idiay asideg ti Tampa, Florida. Bayat ti kaaddami sadiay idi 1916, nabuyak ti pelikula a “Photo-Drama of Creation.” Gapu ta barbaro pay la idi ti industria ti pelikula, tinagiragsakmi amin dayta a pabuya!

Managbasa dagiti dadakkelko iti Pagwanawanan ken dadduma a publikasion a naibatay iti Biblia. Kaay-ayo ni Tatang a basaen dagita a literatura, ngem saan nga aktibo a nakitimpuyog kadagiti Estudiante ti Biblia, kas pannakaawag idi kadagiti Saksi ni Jehova. Ngem ikuykuyognakami ni Nanang kadagiti gimong. Kinapudnona, kalpasan unay nga immakarkami idiay Niles, Michigan, regular nga agtrenkami iti sangapulo ket innem a kilometro nga agturong idiay South Bend, Indiana, tapno makigimong.

Idi Hulio 22, 1924, nabautisaranak kas simbolo ti dedikasionko kenni Jehova. Di nagbayag, nagbalin ni Nanang a colpoteur, kas pannakaawag idi kadagiti amin-tiempo a ministro dagiti Saksi ni Jehova. Natignayak nga agpayunir gapu iti ulidan ni Nanang ken ti dadduma a colpoteur.

Pannakiasawa

Idi 1925, naam-ammok ni James Stigers a taga-Chicago idi timmabunoak iti dakkel a kombension idiay Indianapolis, Indiana. Dagus a nadlawko a ni James ket napinget nga adipen ni Jehova. Gapu ta agarup 160 kilometro ti kaadayo ti Chicago, manmanokami nga agkita. Maymaysa laeng idi ti kongregasion iti dayta a dakkel a siudad, ket aggigimongkami iti maab-abangan a kuarto iti maikadua a kadsaaran. Masansan a suratannak ni James tapno paregtaennak iti naespirituan. Nagkallaysakami idi Disiembre 1926, ket kalpasan ti makatawen, impasngayko ni Eddie nga inauna nga anakmi.

Di nagbayag, agkaduakamin a payunir ken James. Nagserbikami iti walo nga estado​—Michigan, Louisiana, Mississippi, South Dakota, Iowa, Nebraska, California, ken Illinois​—ti kararagsakan a tawtawen ti biagmi. Ngem nasinga dagita a naragsak tawtawen ti pamiliami idi nagsakit ni James.

Dakkel ti naggastuanmi gapu iti panagsakit ni James, isu a nagsublikami idiay Chicago idi 1936 tapno makipagnaedkami iti katugangak a babai a maysa met a Saksi. Idi nakaron ti panagsakit ni James, nagtrabahoak iti maysa a restawran uray masikogak iti maikadua nga anakmi ken $1 laeng ti sueldok iti maysa nga aldaw. Sinigurado ni katugangak nga adda umdas a kanenmi ket di pulos nagpabayad. Nakadungdungngo unay kadakami.

Nagsakit ni James iti agarup dua a tawen agingga a natay idi Hulio 1938 gapu iti encephalitis (limteg nga utek). Bayat ti panagsakitna, saan a makamaneho wenno makakasaba iti binalaybalay, ngem inkagumaanna latta ti nangasaba. Nagsardengak a nagpayunir tapno makatulongak iti pinansial a kasapulan ti pamiliami. Nagduduma ti nagtrabahuak ngem apagbiit laeng dagita.

Idi Hulio 30, 1938, naipasngay ti anakmi a ni Bobby, walo nga aldaw laeng kalpasan a pimmusay ni lakayko. Saan idi a kayat ni katugangak nga agpasngayak iti ospital ti probinsia isu nga impannak iti nasaysayaat nga ospital ket ti doktorna a mismo ti nangasikaso kaniak. Binayadanna pay ti amin a gastosmi kas ebkas ti Nakristianuan nga ayat, a nagyamanak unay.

Nagpayunirak Manen

Nakipagnaedkami kenni katugangak agingga a nasurok a 2 ti tawen ni Bobby ken 12 ti tawen ni Eddie. Uray nagbalbaliw ti kasasaadko, magagaranak latta nga agserbi ken Jehova kas payunir. Idi 1940, bayat ti maysa a kombension idiay Detroit, Michigan, adda naam-ammok nga agassawa a payunir a nangparegta kaniak nga agpayunir idiay South Carolina. Gapuna, gimmatangak iti maysa a 1935 Pontiac nga aggatad iti $150 ket nagsaganaak nga umakar sadiay. Idi 1941, ti tawen a nakiraman ti Estados Unidos iti Gubat Sangalubongan II, nagpaabagatankami nga agiina, ket nagpayunirak manen.

Idi immakarkami idiay South Carolina, nagnaedkami nga umuna idiay Camden, kalpasanna idiay Little River, sa idiay Conway, a nanggatangak iti bassit a trailer. Pinalubosannak ti maysa a naasi a makinkukua iti gasolinaan tapno iparadak ti trailer iti asideg ti gasolinaanna, makiusar iti gas, koriente, ken kasilias. Gapu ta kurang ti suplay ti gasolina idi Gubat Sangalubongan II, awan ti magatangkon isu a gimmatangak iti segunda mano a bisikleta. Sa idi 1943, idi kasla imposible a makapagtultuloyak pay a payunir gapu ta naibus ti amin a kuartami, naawisak nga agserbi kas special pioneer. Iti kasta, nakaawatak iti binulan a pangsupusop kadagiti paggastuanmi. Kadagita amin a tawtawen, aglaplapusanan ti panangtulong kaniak ni Jehova!

Kadagidi a panawen, dakami laeng ti Saksi idiay Conway. Gapuna, marigatankami kadagiti annakko a mangasaba. Nagsuratak ngarud tapno agkiddawak iti kaduak nga special pioneer. Idi 1944, nabendisionanak iti nagsayaat a kadua​—ni Edith Walker! Nagkaduakami a nagserbi iti 16 a tawen iti nadumaduma a teritoria. Ngem nakalkaldaang ta nagsubli idiay Ohio gapu ta nagsakit.

Dagiti Nakallalagip a Bendision

Maysa kadagiti kararagsakan a malaglagipko kadagidi a tawtawen isu ti 13 anyos a ni Albertha a taga-Conway, a nangay-aywan iti baldado a lolana ken iti dua nga addina a lallaki. Inapresiarna dagiti kinapudno manipud iti Biblia nga insurok kenkuana ket inranudna kadagiti sabsabali. Inapresiarna met unay ti panagpayunir isu a nagpayunir kalpasan a nagraduar iti haiskul idi 1950. Nasurok a 57 a tawenen nga agpaypayunir!

Idi 1951, naibaonkami ken Edith nga agserbi iti apagbiit idiay Rock Hill, South Carolina, a sadiay ket manmano ti Saksi. Kalpasanna, nagserbikami idiay Elberton, Georgia, iti tallo a tawen. Nagsubliak idiay South Carolina ket nagtalinaedak sadiay manipud idi 1954 agingga iti 1962. Idiay Walhalla, naam-ammok ni Nettie, maysa a baket a nakapuy ti panagdengngegna ken agsolsolo nga agnanaed iti away. No agadalkami, basaenna ti parapo, itudok ti saludsod iti baba ti panid, sana itudo ti sungbatna iti parapo.

No adda dina matarusan, isuratna ti saludsodna, ket isuratko met ti sungbat. Idi agangay, rimmayray ti apresasionna iti kinapudno manipud iti Biblia ket nangrugin a makigimong ken nakiraman iti panagbalaybalay. Nupay mangasaba nga agsolsolo, masansan nga addaak iti ballasiw ti kalsada a mangaskasaba tapno sidadaanak a tumulong no kasapulan.

Bayat ti kaaddak idiay Walhalla, saanen a mabalin ti kotsek. Adda kotse nga agbalor iti $100 ngem awan ti igatangko. Immutangak iti $100 iti maysa a negosiante a Saksi. Di nagbayag, diak ninamnama a nakaawatak iti surat manipud ken adingko. Sigun kenkuana, natakuatanda nga idi natay ni tatangmi, adda kuartana idiay banko. Nagnunumuanda nga ipaw-it kaniak. Aggatad dayta iti $100!

Nagpayunirkami nga Agiina

Kanayon nga ikuyogko a mangasaba da Eddie ken Bobby idi ubbingda pay. Kadagidi nga aldaw, saan pay a problema ti droga ken saan pay a nakaro idi ti imoralidad. Gapu ta simple laeng ti biagmi ken naisentro iti panangasaba, naliklikanmi ti adu a parikut a mapaspasaran dagiti nagannak ita a mangpadpadakkel kadagiti annakda nga agserbi kenni Jehova.

Nageskuela ni Eddie idiay Camden agingga a nagturpos iti maikawalo a grado, ket kalpasanna kinaduanak a nagpayunir. Maragragsakankami a nagpaypayunir iti adu a tawen. Kalpasanna, tinarigagayanna ti agtrabaho iti sangalubongan a hedkuarter dagiti Saksi ni Jehova idiay Brooklyn, New York, a nagserbianna manipud idi 1947 agingga iti 1957. Idi 1958, inkasarna ni Albertha, ti dati nga iyad-adalak iti Biblia, ket kaduana a nagpaypayunir. Anian a ragsakmi idi 2004, idi a nageskuelakami a tallo iti Pioneer Service School!

Malagipko nga adda maysa nga aldaw adu a tawenen ti napalabas idi ubing pay ni Bobby nga inkararagna kenni Jehova a tulongannak tapno adda paggasolinak a regular a mapan mangyadal iti Biblia. Iti unos ti panagbiagna, inayat-ayat ni Bobby ti ministerio ket nagpaypayunir iti adu a tawen. Nakalkaldaang, adda trahedia a napasamak iti pamilia ni Bobby. Idi 1970, kalpasan laeng ti 22 a bulan a panagtaktakunaynayda, natay ni baketna idi nangipasngay iti singin a babbai. Iti unos ti panagbiagmi, saankami a naginnaddayo ken Bobby, ket sigsigud a nasingedkami.

Payunirak Pay Laeng!

Idi 1962, nadutokanak nga agserbi iti agdama a kongregasionmi ditoy Lumberton, North California, ket agserserbiak pay laeng ditoy kalpasan ti 45 a tawen. Siak ti nagmanmaneho iti kotsek agingga a nasurok a 80 ti tawenko. Itan, adda kaarrubak a pamilia a Saksi a mangdagdagas kaniak a makigimong ken mangasaba.

Adda sarukod ken wheelchair-ko, ngem diak us-usaren dagita yantangay kabaelak ti magna. Agyamanak kenni Jehova ta nasalun-atak. Ita laengen a kimmapuy ti panagkitak. Diak pulos aglangan kadagiti gimong malaksid no nakaro ti sakitko, ken agtultuloy nga agserserbiak kas infirm regular pioneer.

Iti nasurok a 70 a tawen a naragsak a panagpayunirko, sipapasnek a maibagak a tinulongannak ni Jehova iti intero a panagbiagko.a Saanak man a nasaririt wenno napartak a trabahador, ammo ni Jehova no ania ti kabaelak ken diak kabaelan. Agyamanak unay ta ammona nga ar-aramidek ti amin a kabaelak ken inusarnak.

Ammok a napateg ti panagserbi kenni Jehova iti amin a kabaelak agsipud ta utangtayo ti isuamin kenkuana. Agingga a kabaelak, awan ti sabali a kayatko nga aramiden no di ti agpayunir. Anian a nagsayaat a pribilehio daytoy! Idawdawatko nga usarennak koma ni Jehova iti agnanayon.

[Footnote]

[Ladawan iti panid 13]

Ti luganmi kenni lakayko idi agserserbikami a colpoteur

[Ladawan iti panid 14]

Dakami kadagiti annakko idi 1941

[Ladawan iti panid 15]

Nabiit pay a panagkakaduami kada Eddie ken Bobby