No Kasanoyo nga Ipasagepsep iti Puso ti Anakyo ti Panagayat iti Dios

ITI kaaldawantayo, saan a kaskarina ti maaddaan iti nasinged a relasion kenni Jehova a Dios. (Salmo 16:8) Kas iti naipadto, agbibiagtayo iti “tiempo a narigat a pakilangenan.” Kaaduan a tattao ket “managayat iti ragragsak imbes a managayat iti Dios.” (2 Timoteo 3:1-5) Kinaagpaysuanna, iti kaaldawantayo, manmanon dagidiay addaan iti pudno a panagayat iti Dios.

Saan nga automatiko a maipasagepsep iti puso ti annaktayo ti panagayatda ken Jehova a Dios. Nasken a pagreggetantayo a tulongan ida a mangaramid iti dayta. Kasano?

Naimpusuan a Komunikasion

Maipasagepseptayo iti puso ti annaktayo ti panagayatda iti Dios no ti pusotayo a mismo ket aglaplapusanan iti panagayat ken Jehova. (Lucas 6:40) Kuna ti Biblia: “Masapul nga ayatem ni Jehova a Diosmo buyogen ti isuamin a pusom ken isuamin a kararuam ken isuamin a bikasmo. Ket dagitoy a sasao nga ibilbilinko kenka ita nga aldaw addadanto ita pusom; ket masapul nga iyukuokmo ida iti anakmo.”​—Deuteronomio 6:4-7.

Kasanotayo a maipasagepsep ti panagayat iti Dios iti puso ti anaktayo? Umuna, masapul nga ammuentayo ti linaon ti pusona. Maikadua, masapul nga ipalgaktayo ti mismo a linaon ti pusotayo.

Bayat a magmagna ni Jesu-Kristo a kadua ti dua kadagiti adalanna iti dalan nga agpa-Emmaus, pinaregtana ida nga umuna a mangyebkas kadagiti inanamaen ken pagam-amkanda. Nagimdeng kadakuada sakbay a kinorehirna ti panagpampanunotda babaen ti panangilawlawagna iti Kasuratan. Idi agangay kinunada: “Saan kadi a rumayrayray ti pusota bayat nga agsasao idi kadata?” Dayta a saritaan ket maysa a pagarigan ti naimpusuan a komunikasion. (Lucas 24:15-32) Kasanotay a maammuan ti rikrikna ti anaktayo?

No maipapan iti naimpusuan a komunikasion, nabiit pay a napagsaludsodan ti dadduma a nagannak a dagiti annakda nga adulton wenno dandanin agbalin nga adulto ket mapagwadan iti kongregasion. Kas pagarigan, idiay Mexico, kastoy ti kinuna ni Glen nga ama ti uppat nga adulton nga annak:a “Saan a kaskarina ti mangipasdek iti naimpusuan a panagtutungtong iti nagbaetan ti nagannak ken annak. Kinissayanmi ken ni baketko ti tiempo a busbusbosenmi kadagiti di unay napateg a banag tapno ad-adu ti tiempomi kadagiti annakmi. Idi tin-edyerda pay, agingga tengnga ti rabii no dadduma nga agpapatangkami maipapan iti aniaman a banag a mapanunotda. Uray kabayatan ti pannangan, denggenmi no ania ti pagtutungtonganda isu a madlawmi no ania ti problemada. Kalpasanna, siaalumamay a korehirenmi ida, ket masansan a dida mapupuotan dayta.”

Ti naimpusuan a komunikasion ramanenna met ti panangipalgak iti linaon ti mismo a pusotayo. Kinuna ni Jesus: “Ti naimbag a tao mangiruar iti naimbag manipud iti naimbag a gameng ti pusona, . . . ta manipud iti naruay iti puso agsao ti ngiwatna.” (Lucas 6:45) Kastoy ti kinuna ni Toshiki nga addaan iti tallo nga annak nga agserserbi kas amin-tiempo a ministro idiay Japan: “Namin-adu nga imbagak kadakuada no kasano a timmanor ti pammatik ken Jehova​—no apay a sititibker a patiek ti kaaddana ken no kasano a babaen kadagiti mismo a kapadasak, nakombinsirak a husto ti Biblia ken dayta ti kasayaatan a mangibagnos iti biag.” Idiay Mexico, kinuna ni Cindy: “Kanayon nga agkararagkami a sangapamiliaan. No mangngeg ti annakmi ti naimpusuan a panagkararag ni lakayko, mabigbigda a ni Jehova ket maysa a pudno a persona.”

Ti Dakkel a Maaramidan ti Ulidantayo

Ti wagas ti panagbiagtayo ket dakdakkel ti maaramidanna ngem iti ibagbagatayo. Ngamin, dayta ti mangisuro kadagiti annaktayo no kasano kauneg ti panagayattayo iti Dios. Idi nakitada ti kinatulnog ni Jesu-Kristo kenni Jehova, naawatan dagiti tattao ti kinauneg ti panagayatna iti Dios. Kinuna ni Jesus: “Tapno maammuan ti lubong nga ay-ayatek ti Ama, no kasano a ti Ama inikkannak iti bilin nga aramiden, kasta ti ar-aramidek.”​—Juan 14:31.

Kinuna ni Gareth, a maysa kadagiti Saksi ni Jehova idiay Wales: “Nakita dagiti annakmi nga ay-ayatenmi ni Jehova ken ikagkagumaanmi nga aramiden ti pagayatanna. Kas pagarigan, kas panagtulnogko iti ibagbaga ti Dios kadakami, aminek dagiti kamalik iti imatang dagiti annakmi. Ita, ar-aramidenda metten ti kasta.”

Kastoy met ti imbaga ni Greg a taga-Australia: “Kayatmi a makita dagiti annakmi a ti kinapudno ti kapatgan iti biagmi. No agdesisionkami maipapan iti trabaho wenno panaglinglingay, usigenmi nga umuna no maapektaran dagiti rebbengenmi kas Kristiano. Maragsakankami ta kasta met ti ar-aramiden itan ti 19-anyos a balasangmi iti panagserbina kas maysa nga auxiliary pioneer.”

Tulongantayo ti Annaktayo Tapno Maawatanda ti Maipapan iti Dios

Ditay mabalin nga ayaten wenno pagtalkan ti maysa a ditay am-ammo. Tarigagayan ni apostol Pablo a dagiti Kristiano idiay Filipos ket rumayray ti panagayatda kenni Jehova. Gapuna, insuratna: “Daytoy ti agtultuloy nga ikarkararagko, a ti ayatyo umadu koma nga ad-adda pay buyogen ti umiso a pannakaammo ken naan-anay a panangilasin.” (Filipos 1:9) Kastoy ti kinuna ti taga-Peru a ni Falconerio, a mangpadpadakkel iti uppat nga annak: “Ti regular a panagbasa ken panagadalmi iti Biblia ti mangpabpabileg iti pammati ti annakmi. No dadduma, maliwayak ida nga iyadalan ket madlawko a kumapuy ti panagayatda iti Dios.” Kastoy met ti nasao ni Gary a taga-Australia: “Masansan a dakamatek kadagiti annakko ti pammaneknek a matungtungpalen dagiti padto iti Biblia. Ipagpaganetgetko met kadakuada dagiti pagimbagan ti panangyaplikar kadagiti prinsipio ti Biblia. Dakkel ti maar-aramidan ti regular a sangapamiliaan a panagadalmi iti Biblia iti pannakapabileg ti pammatida.”

Ti kasayaatan a pamay-an tapno maipapuso ti ubing ti ad-adalenna ket babaen ti nainggayyeman ken nadayaw a panangisuro. Dayta a pamay-an pagbalinenna nga ad-adda a makaparagsak ti panagadalna. (Santiago 3:18) “Bayat ti sangapamiliaan a panagadalmi iti Biblia, liklikanmi nga ungtan dagiti annakmi, uray no medio naariwawada,” kinuna ti taga-Britania a da Shawn ken Pauline, nga addaan iti uppat nga annak. “Baliwbaliwanmi ti pamay-an a panangyadalmi kadakuada. No dadduma, isuda ti pagpilienmi no ania ti kayatda nga adalenmi. Nagusarkami kadagiti video nga insagana ti organisasion ni Jehova. Addada met gundaway nga ulitenmi a buyaen ti maysa a paset ti video wenno pasardengenmi biit tapno pagsasaritaanmi dayta.” Kastoy met ti kinuna ti maysa nga ina nga agnagan iti Kim a taga-Britania: “Agsaganaak a naimbag para iti sangapamiliaan a panagadalmi tapno makapagimtuodak kadagiti saludsod a mamagpanunot kadagiti annakko. Kaay-ayomi ti agadal. Masansan nga agkakatawakami.”

Panagpili Kadagiti Gagayyem

No kanayon a makikadua dagiti annaktayo kadagidiay mangay-ayat iti Dios, nalaklaka a rumayray ti panagayatda kenni Jehova ken ti panangipategda iti pudno a panagdayaw. Kasapulan ti panagregget no iyurnostayo no siasino ti makagunggona a pakikaduaan dagiti annaktayo iti panagsasarita ken panaglinglingay. Ngem saan a sayang dayta a panagregget! Kanayonanna, makagunggona kadagiti annaktayo no mangyurnostayo kadagiti gundaway a maam-ammoda dagiti kapammatiantayo a pinagbalinda a karera iti biagda ti amin-tiempo a ministerio. Adu ti nangikeddeng a mangragpat iti dayta agsipud ta nakikaduada kadagiti naregta nga adipen ti Dios. Kinuna ti maysa a kabsat a nagbalin a misionera: “Masansan nga agawis dagiti dadakkelko kadagiti payunir a makipangan kadakami. Nakaragragsakda iti ministerioda isu a kayatko met ida a tuladen iti panagserbida iti Dios.”

Siempre, ti kababalin ti annaktayo ket mabalin a maimpluensiaan agpadpada iti naimbag ken dakes. No kasta, dagiti peggad ti dakes a pannakitimpuyog subokenda ti abilidadtayo kas nagannak. (1 Corinto 15:33) Kasapulan ti kinasigo iti panangisuro kadagiti agtutubo no kasanoda a maliklikan ti pannakibarkada kadagidiay di mangay-ayat ken Jehova wenno kadagidiay agkedked a mangam-ammo iti kinadiosna. (Proverbio 13:20) Kinuna ti nadakamat itay a ni Shawn: “Sinuruanmi dagiti annakmi nga agbalin a mannakigayyem kadagiti kaeskuelaanda ngem adda limitasionna dayta. Naawatan dagiti annakmi no apay a dida makipaset kadagiti ekstrakurikular nga aktibidad wenno kadagiti paay-ayam idiay eskuelaan.”

Ti Kinapateg ti Panangsanay

No sanayentayo ti annaktayo a mangilawlawag iti pammatida, nalaklakada nga ipakita ti ayatda iti Dios. Kinuna ni Mark a taga-Estados Unidos: “Kayatmi a marikna ti babbaritomi a mabalinda nga iranud ti pammatida kadagiti sabsabali iti aniaman a gundaway, saan laeng a no kaduami ida iti pormal a panangasaba. Isu a no mapankami agpalpaliwa, kas iti panagpasiar iti parke, igid ti baybay, wenno kakaykaywan, mangitugotkami iti Biblia ken literatura a naibasar iti Biblia. Iti kasta, mairanudmi kadagiti tattao sadiay ti maipapan kadagiti patpatienmi. Talaga a kaay-ayo dagiti annakmi ti kumuyog kadakami a mangasaba iti di pormal a pamay-an. Makiramanda kadagiti saritaan ket ilawlawagda ti maipapan iti pammatida.”

Adu ti natulongan ni lakayen nga apostol Juan a mangparayray iti panagayatda iti Dios. Maipapan kadakuada, insuratna: “Awanen ti adda kaniak a dakdakkel pay a pakaigapuan ti kinamanagyaman ngem kadagitoy a banag, a mangngegko koma a ti annakko [iti naespirituan] agtultuloyda a magna iti kinapudno.” (3 Juan 4) Sigurado a masagraptayo ti kasta met laeng a rag-o no ipasagepseptayo ti panagayat iti Dios iti puso dagiti annaktayo.

[Footnote]

[Dagiti Ladawan iti panid 9]

Kasapulan ti panagregget tapno mayugali ti naimpusuan a panagsasarita maipapan iti naespirituan a bambanag

[Ladawan iti panid 10]

Sanayenyo ti annakyo a mangipakita iti panagayatda iti Dios

[Credit Line]

Impaay ti Green Chimneys Farm