Awan ti Makalapped iti Panangidanonmi iti Naimbag a Damag

ASIDEGKAMIN iti kaduak a makadanon iti maysa a checkpoint a guguardiaan ti agarup 60 nga armado a lallaki, babbai, ken tin-edyer. Adda dagiti nakauniporme ngem adda met dagiti nakasibilian. Adu ti mangipaspasindayag kadagiti automatiko nga igamda. Kasla ur-urayendakami. Madama idi ti panagderraaw.

Uppat nga aldawen nga agbibiahekami, a ti trakmi ket kargado iti 10 a tonelada ti naibasar iti Biblia a literatura. Dimi ammo no palubosandakami a lumabas. Kikilandakami ngata? Kasano ngata kabayag a makombinsirmi ida nga awan ti dakes a misionmi?

Maysa a lalaki nga aggagatel ti imana a pumaltog ti nangpaputok iti riplena tapno ipadlawna nga isu ti mangimatmaton iti dayta a grupo. Nakitana dagiti cell phone-mi ket inmandarna nga itedmi dagita kenkuana. Idi nagkitakitkami, inseniasna a gedgedenna ti tengngedmi, isu a narigaten no dimi tungpalen. Gapuna, intedmi met laeng dagiti cell phone-mi.

Pagammuan ta adda nakauniporme a babai a nanggammat iti paltogna sanakami inasitgan. Isu ti “sekretaria,” ken kayatna nga adda met itedmi kenkuana. Narigat ti biag isu a kayatnakami met a kikilan. Kalpasanna, adda maysa a soldado a nanglukat iti tangke ti krudomi sana kinissayan ti nagyan dayta. Nagpakpakaasikami kenkuana, ngem imbagana a tungtungpalenna laeng ti naibilin kenkuana, isu nga awan ti naaramidanmi. Ninamnamami lattan a saan koma a tuladen dayta ti dadduma.

Kamaudiananna, inikkatda met laengen ti bangen ken pinalasatdakami. Uraykam la nabang-aran. Nupay makapadanag, nairuamkamin kadagitoy a makapanerbios a checkpoint. Iti nagbaetan ti Abril 2002 agingga idi Enero 2004, namin-18 a nagbiahekami manipud sangladan ti Douala, Cameroon, agingga idiay Bangui, ti kabesera ti Central African Republic. Ti 1,600 a kilometro a biahe ket kanayon a napakuyogan kadagiti risgo ken di mapakpakadaan a pasamak.a

Kastoy ti kinuna da Joseph ken Emmanuel, dagiti drayber a masansan nga agbiahe kadagita a lugar: “Adu ti nasursuromi kadagita a biahe. Makatulong unay ti mamin-adu a panagkararag a siuulimek ken ti panagtalinaed a kalmado. Inkagumaanmi a tuladen ti kababalin ti salmista a nagkuna: ‘Iti Dios inkabilko ti panagtalekko. Saanakto nga agbuteng. Ania ti maaramidan kaniak ti naindagaan a tao?’ Siguradokami nga ammo ni Jehova a ti panagdaliasatmi ket tapno idanon ti mensahe ti namnama a kasapulan unay dagiti tattao.”​—Salmo 56:11.

Internasional a Panagregget a Mangipaay iti Naespirituan a Taraon

Adu a tattao iti daytoy a paset ti Africa ti interesado iti naimbag a damag ti Pagarian ti Dios. Ti literatura a kargami ket nairanta a mangpennek iti naespirituan a kasapulanda. (Mateo 5:3; 24:14) Ti sanga nga opisina dagiti Saksi ni Jehova ti Cameroon nga adda idiay Douala ket regular a mangipapaay iti literatura iti nasurok a 30,000 nga agibumbunannag ti Pagarian ken interesado nga umili iti Cameroon ken iti uppat a kabangibangna a pagilian.

Adayo ti naggapuan dagita a literatura. Kaaduan kadagita ket nayimprenta idiay Alemania, England, Espania, Finland, ken Italia. Kalpasanna, naibiahe dagita babaen iti barko manipud Francia. Kadawyanna a tunggal dua a lawas, maysa a container (dakkel a metal a pagkargaan) a napno iti literatura a naibasar iti Biblia ti makadanon iti sangladan ti Douala.

Ti container ket mailugan iti maysa a trak santo maibiahe agingga iti sanga nga opisina. Dagiti agtartrabaho iti Shipping Department ti mangurnos kadagiti literatura sigun iti pakaipanan dagita. Narigat nga ipan dagita a publikasion kadagiti nasulinek a paset ti Cameroon ken iti uppat a kabangibangna a pagilian. Ngem paset dayta ti panangidanon iti naimbag a damag “agingga iti kaadaywan a paset ti daga.” (Aramid 1:8) Ti sanga nga opisina ket agpannuray kadagiti managsakripisio a boluntario a situtulok a mangibiahe kadagita nupay napeggad. Kas resultana, minilion nga umili iti makintengnga a paset ti Africa ti regular a masuplayan kadagiti literatura a naibasar iti Biblia.

Gagangay a Biahe

Dagiti literatura a maipatulod babaen ti trak ket agpaay iti Cameroon, Chad, Equatorial Guinea, Gabon, ken iti Central African Republic. Ipapanmon a kimmuyogtayo iti maysa a trak a kadua dagiti pahinantena a bin-ig a drayber. Nakatugawka iti sibay dagiti drayber ket agsaganaka ta peligroso ti biahe a mabalin nga agpaut iti sangapulo nga aldaw wenno nasursurok pay.

Innem a drayber ti adda iti trak. Masapul a napigsa, makabael, naanus, ken desenteda. Nakakawesda iti bado dagiti Africano wenno kamisadentro ken kurbata. Iti napalabas, kastoy ti kinuna dagiti opisial ti aduana: “Nakadaldalus daytoy a trak ken nakadesdesente pay dagiti drayberna, a kas met laeng iti nailadawan kadagiti publikasionda.” Nupay kasta, ti napatpateg ngem iti panaglanglangada ket ti kinatulokda a mapan iti sadinoman a pakaibaonanda tapno agserbida kadagiti sabsabali.​—Salmo 110:3.

Iti agarup alas sais ti agsapa, kalpasan la unay a sumingising ti init, agrubbuattayon idiay Douala tapno maliklikantayo ti nakaro a trapik iti dayta a nalawa a siudad. Kalpasan a makaballasiwtayo iti rangtay nga asideg iti sanga nga opisina, lumasattayo iti natrapik a siudad satayo agpadaya para iti umuna a destinasiontayo nga isu ti Yaoundé a kabesera ti Cameroon.

Estoriaen kadakayo ti innem a drayber no kasano karigat ti panangibiaheda iti 10 a tonelada (9,080 a kilo) a libro. Awan unay ti parikut iti umuna a tallo nga aldaw yantangay sementado ti dalan, nupay kasapulan ti naan-anay nga atension ken konsentrasionda. Ngem pagammuan ta agtudon. Manipud ditoy ket lasonglasongen ti dalan. Ditay makitan ti masungad, sa nagalis pay ti dalan, isu a rumbeng a nainayad ti panagpataray ti draybertayo. Gapu ta rumabiin, nasken a sumardengtayo pay, mangan biit, ken an-anusantayo ti maturog a situtugaw a nakangato dagiti sakatayo iti pannakapasamano ti trak. Kasta a talaga ti kasasaad kadagita a biahe!

Kabigatanna, ituloytayo manen ti agbiahe. Maysa kadagiti drayber ti para siput iti kasasaad ti kalsada. Pakdaaranna a dagus ti agmanmaneho no dandanin maikanal ti trak. Ammo dagiti drayber a no maikanal ti trak, adu nga aldaw ti kasapulan sakbay a maaon iti dayta. Lasonglasong latta dagiti kalsada bayat nga umas-asidegtayo iti beddeng ti Central African Republic. Iti sumaganad nga 650 a kilometro, lumasattayon kadagiti napintas, naberde, ken naturod nga away. Bayat nga agin-inayad ti traktayo a lumabas kadagiti purok, agpaypayapay amin nga ubbing ken nataengan, uray dagiti inna a nakaabaday kadakuada dagiti annakda. Manmano ti lugan kadagiti kalsada gapu iti gerra sibil isu a tumaliaw amin a tattao kadatayo.

Makaparagsak a Kapkapadasan

Ni Janvier a maysa kadagiti drayber, kinunana a nupay nainget ti eskediul, masansan a sumardengda kadagiti babassit a bario tapno aginana biit ken agiwaras kadagiti literatura a naibasar iti Biblia. Malagipna: “Idiay Baboua, maysa nga agtartrabaho iti ospital ti nangipakita iti nasged nga interes iti mensahe ti Pagarian. Kanayon nga ikagumaanmi a kasarita tapno iyadalanmi iti Biblia uray apagbiit laeng. Naminsan, impabuyami pay ketdi kenkuana ken iti pamiliana ti video maipapan ken Noe. Nagsangpet dagiti gagayyem ken kaarrubana, ket di nagbayag, napnon ti balayna iti nagadu a magagaran nga agbuya. Aminda ket pamiliar ken ni Noe, ken ita mabalindan a buyaen ti pakasaritaanna iti mismo a telebision. Makaparagsak a makita ti gagarda. Kalpasanna, nangyurnosda iti espesial a pannangan kas ebkas ti panagyamanda, sada impapilit nga umyankami. Nupay kasta, nasken a mapankamin ta naunday pay ti biahemi. Maragragsakankami agsipud ta nairanudmi ti naimbag a damag kadagitoy a napakumbaba a tattao.”

Ti maysa pay a drayber nga agnagan iti Israel, malagipna dagiti napasamak iti naminsan a biaheda nga agpa-Bangui, nga isu ita ti papanantayo. Kinunana: “Idi asidegkamin sadiay, ad-adu manen a checkpoint ti simmardenganmi. Naimbag laengen ta mannakigayyem ti adu a soldado ken kabesadodan ti trakmi. Inawisdakami nga aginana biit ket siraragsak nga inawatda dagiti literatura a naibasar iti Biblia. Napateg kadakuada ti maysa a libro isu nga isuratda ti naganda iti dayta agraman ti petsa ken ti nagan ti nangted iti dayta. Saksi ti kakabagian ti dadduma a soldado ket maysa dayta a makagapu no apay a mannakigayyemda.”

Ti kasiguan a drayber a ni Joseph, ibilangna a ti kapatgan a paset ti biaheda ket ti isasangpetda iti destinasionda. Kastoy ti malagipna maipapan iti maysa kadagiti biaheda: “Sumagmamano pay a kilometro manipud iti Bangui, tineleponuanmin dagiti kakabsatmi tapno ipakaammomi a dandanikamin makadanon. Kinaduadakami a sumrek iti siudad tapno nabibiit a maaprobaran dagiti papelesmi. Apagsangpetmi iti sanga nga opisina, sinarabo ken inappungoldakami dagiti amin a kakabsat sadiay. Simmangpet dagiti kakabsat manipud kadagiti kabangibang a kongregasion tapno tumulongda nga agidiskarga. Iti sumagmamano la nga oras, ginasut a karton ti Biblia, libro, bokleta, ken magasin ti naidiskarga ken naipan iti bodega.”

Innayon ni Joseph: “No dadduma, karaman kadagiti kargami dagiti naidonar a bambanag nga agpaay kadagiti ubbing, kawes, ken sapatos a maitulod iti kabangibang a Democratic Republic of Congo. Anian a rag-o a makita ti isem dagiti managyaman a kakabsat!”

Kalpasan ti agmalem a panaginana, isaganami manen ti trak tapno agbiahekami nga agawid. Gagangay nga adda latta dagiti problema iti dalan ngem awan aniamanna dagita gapu kadagiti makaparagsak a kapadasanmi.

Ti naunday a biahe, napigsa a tudo, lasonglasong a kalsada, eppes a pilid ken agpalia a makina ket mabalin a makapaupay. Masansan met a karit kadakami dagiti mananggundaway a soldado. Nupay kasta, awanen ti ad-adda pay a pakaragsakanmi no di ti panangidanonmi iti naimbag a damag ti Pagarian kadagiti nasulinek a paset ti Africa ken makita ti epekto dayta iti biag dagiti tattao nga umawat iti dayta.

Kas pagarigan, gapu kadagita a pannakaibiahe dagiti publikasion, maysa a pumurok iti nasulinek a paset ti Central African Republic, nga asideg iti beddeng ti Sudan, ti agbasbasa itan iti moderno a patarus ti Biblia. Ad-adalen metten ni baketna dagiti nabiit pay a kopia Ti Pagwanawanan, ket mayad-adalan payen dagiti annakda iti libro nga Agsursuroka iti Naindaklan a Mannursuro.b Isuda ken ti adu pay kadagitoy a nasulinek a komunidad ket umaw-awat iti naespirituan a taraon, a kas met laeng kadagiti kapammatianda iti adu a dadakkel a siudad. Talaga a gubuayan dayta ti dakkel a pannakapnek!

[Footnotes]

[Mapa/Ladawan iti panid 9]

(Para iti aktual a pannakaurnosna, kitaem ti publikasion)

CAMEROON

Douala

CENTRAL AFRICAN REPUBLIC

Bangui

[Ladawan iti panid 9]

Ni Joseph

[Ladawan iti panid 9]

Ni Emmanuel

[Ladawan iti panid 10]

Sanga nga opisina ti Central African Republic idiay Bangui

[Ladawan iti panid 10]

Panagdiskarga idiay Bangui