Nayadayo Ngem Saan a Nabaybay-an

IMBALAKAD ni apostol Pablo kadagiti padana a Kristiano: “Aramidentayo koma ti naimbag kadagiti amin, ngem nangnangruna kadagidiay nainaig kadatayo iti pammati.” (Gal. 6:10) Uray ita, tungtungpalentayo dayta a naipaltiing a balakad, nga agsapultayo kadagiti pamay-an a maipakitatayo ti naimbag kadagiti kapammatiantayo. Karaman kadagiti agkasapulan ken maikari iti naayat a panangasikaso ti kongregasion Kristiano ket dagiti patpatgentayo a kakabsat nga agnanaed kadagiti pasilidad a pakaay-aywanan dagiti lallakay ken babbaket.

Agpayso nga iti dadduma a pagilian, dagiti nataenganen a nagannak ket kadawyanna nga aywanan dagiti kapamiliada. Ngem iti dadduma a pagilian, adu a natataengan ti masansan nga agpannuray iti panangaywan a mabalin nga ipaay dagiti institusion. Kasano ngay dagiti kapammatiantayo nga adda kadagiti kasta a pasilidad? Ania dagiti mapaspasaranda a rigat? Kasanoda a madaeran ti kasasaadda no saan ida a matulongan dagiti kapamiliada? Kasano a matulongan ida ti kongregasion Kristiano? Ken kadagiti ania a pamay-an a magunggonaantayo no regular a sarungkarantayo ida?

Dagiti Karit a Sangsanguenda Kadagiti Pasilidad a Pakaay-aywananda

No dagiti lallakay ken babbaket a Kristiano ket agpaaywandan iti institusion, mabalin a mayakarda iti teritoria ti sabali a kongregasion a di makaam-ammo kadakuada. Kas resultana, dagiti Saksi iti dayta a lugar mabalin a saanda a mapanunot a sarungkaran ida. Kanayonanna, iti pasilidad a pakaaywananda, maitimpuyogda la ketdi kadagiti tattao a naiduma ti patpatienda. Gapu iti dayta, mabalin a marigatan dagita a kapammatiantayo.

Kas pagarigan, iti dadduma a lugar, dagiti institusion nga agay-aywan ket mabalin a mangyurnos kadagiti narelihiosuan a programa iti uneg ti pasilidad. Kinuna ti maysa nga agay-aywan: “Dadduma a Saksi a din makasao a nalawag ti nailugan kadagiti wheelchair sada naipan iti pakaangayan ti misa a di man la nayimtuod kadakuada no umannugotda.” Malaksid iti dayta, dagiti agtartrabaho kadagita a pasilidad masansan a rambakanda ti kasangay, Krismas, wenno Easter tapno maliwliwa dagiti maay-aywanan. Dadduma a Saksi kadagita a pasilidad ket naipaayan met kadagiti taraon a saan nga ipalubos ti konsiensiada a kanen. (Ara. 15:29) No regular a sarungkarantayo dagita a kakabsattayo, matulongantay ida a mangsango kadagiti kasta a karit.

Tulong ti Kongregasion

Alisto dagiti nagkauna a Kristiano a mangitungpal iti annongenda kadagiti natataengan no awan ti tumultulong kadakuada a kapamiliada. (1 Tim. 5:9) Umasping iti dayta, alerto ita dagiti manangaywan a mangsigurado a saan a mabaybay-an dagiti natataengan a maay-aywanan kadagiti pasilidad a masarakan iti teritoriada.a Kinuna ti maysa a panglakayen a ni Robert: “Nasayaat no dagiti Kristiano a manangaywan personal a sarungkaranda dagiti natataengan tapno ammuenda ti kasasaad dagitoy ken tapno ikararaganda ida. Nagdakkel ti maaramidan ti kongregasion tapno maipaay dagiti kasapulan dagita a kakabsat.” No iwayaantayo a sarungkaran dagiti natataengan, ipakpakitatayo a maawatantayo a nakapatpateg ken Jehova ti panangaywan kadagiti agkasapulan.​—Sant. 1:27.

No kasapulan, sidadaan nga iyurnos dagiti panglakayen ti praktikal a panangtulong kadagiti kakabsat a maay-aywanan iti pasilidad. Dinakamat ni Robert ti maysa a napateg a maitulong: “Rumbeng a paregtaentayo dagiti natataengan a kakabsattayo a tumabuno kadagiti Nakristianuan a gimong no kabaelanda nga aramiden dayta.” Ngem para kadagiti saanen a makapan iti Kingdom Hall, mabalin a mangaramid dagiti panglakayen kadagiti dadduma nga urnos. Ni Jacqueline, nga agtawenen iti 85 ken agsagsagaba iti osteoarthritis, im-imdenganna dagiti gimong babaen ti telepono. Kunana: “Dakkel ti maitultulongna kaniak ti panagimdengko kadagiti gimong bayat a maang-angay dagita. Diak pulos isukat dagita iti aniaman a banag ditoy lubong!”

No nakapuy unayen ti maysa a Kristiano ket dinan kabaelan ti umimdeng kadagiti gimong babaen iti telepono, mabalin nga iyurnos dagiti panglakayen ti pannakairekord dagiti gimong. Daydiay mangitulod iti nairekord a paspaset iti gimong mabalinna nga usaren dayta a gundaway tapno maparegtana ti nataengan a kabsat. “Marikna dagiti natataengan a kakabsat a pasetda pay latta ti naespirituan a pamiliatayo no mairanud kadakuada dagiti damag maipapan kadagiti kakongregasionda,” kinuna ti maysa a manangaywan.

Itultuloyyo ti Makikomunikar Kadakuada

Siempre, adu a natataengan ti marigatan unay ken saan a pamiliar iti aglawlawda no umakarda iti pasilidad a mangaywan kadakuada. Kas resultana, mabalin nga adda dagiti didan kayat ti makilangen. Ngem no sarungkarantayo dagiti natataengan a kakabsattayo kalpasan unay ti iyaakarda ken iyebkastayo nga agtultuloy a suportarantayo ida, dakkel ti maitulongtayo tapno maiwaksida ti danag ken tapno saanda a naan-anay a mapukaw ti rag-oda.​—Prov. 17:22.

No nakapuyen ti panagpanunot dagiti natataengan a kakabsattayo wenno didan makangngeg wenno addaanda iti dadduma pay a parikut a manglapped iti pannakikomunikar kadakuada, mabalin a mapanunot ti dadduma nga awan mamaaynan ti isasarungkar kadakuada. Ngem ti agtultuloy a panagreggettayo a sumarungkar kadakuada, kasanoman karigat ti makikomunikar kadakuada, ipakitana nga agtultuloy nga ‘idadaulotayo ti mangipakita iti pammadayaw’ kadagiti kapammatiantayo. (Roma 12:10) No nagbalinen a mananglilipat ti maysa a kabsat, paregtaentayo a mangisalaysay kadagiti kapadasanna​—uray idi isu ket ubing pay​—​wenno mangestoria no kasano a naammuanna ti kinapudno iti Biblia. Ania ti maaramidtayo no marigatan a manglagip kadagiti umiso a sasao? Agimdengtayo a siaanus, ken no kasapulan, mangdakamattayo iti dua wenno tallo a sasao a kasla pampanunotenna, wenno naan-anay a sawentayo dagiti kapanunotanna ket paregtaentayo a mangitultuloy iti ibagbagana. No mariro wenno adda depekto ti panagsaona ket narigat a maawatan dayta, mabalintay a tarusan ti kayatna nga ibaga babaen ti panagimdengtayo a naimbag iti tono ti timekna.

No saanen a posible ti pannakisarita kenkuana, mabalintay ti makikomunikar babaen ti dadduma a pamay-an. Ni Laurence, a maysa a payunir, regular a sarsarungkaranna ti kapammatianna a ni Madeleine, nga agtawenen iti 80 ken din makasao. Inlawlawag ni Laurence no kasano ti pannakikomunikarna kenkuana: “Iggamak ti ima ni Madeleine bayat ti panagkararagmi. Bayat ti kararag, medio petpetanna ti imak ken agkirem tapno ipakitana ti panagyamanna iti ayat a maipakpakita kenkuana.” Maliwliwa dagiti natataengan a gagayyemtayo no iggamantayo ti imada wenno no naimpusuan nga arakupentayo ida.

Napateg ti Kaaddayo

Mabalin a sumayaat ti kalidad ti pannakaaywan dagiti nataengan no regular a sarungkaranyo ida. Kastoy ti kuna ni Danièle, a 20 a tawenen a sumarsarungkar kadagiti kapammatianna a maay-aywanan iti pasilidad: “No makita dagiti agay-aywan a kanayon a masarungkaran ti maysa a nataengan, nasaysayaat ti panangtaripatoda kenkuana.” Kinuna ni Robert a nadakamat itay: “Dagiti agay-aywan ad-adda nga imdenganda ti maysa a bisita a regular a sumarungkar iti maysa a maay-aywanan. Saanda nga ipakita ti kasta a panagraem kadagiti manmano a sumarungkar.” Yantangay masansan a marigatan dagiti nars wenno agay-aywan gapu kadagiti naturay a pamilia, apresiarenda unay dagiti ebkas ti panagyaman dagiti sumarsarungkar. Kasta met, no makigayyemtayo kadagiti agay-aywan, ad-adda a raemenda dagiti prinsipio ken patpatien ti maysa a nataengan a Saksi nga ay-aywananda.

Magayyemtayo met dagiti agay-aywan babaen ti panangtulongtayo kadakuada iti dadduma a simple a trabaho. Iti dadduma a lugar, ti bumasbassit a bilang dagiti kualipikado a trabahador pakapuyenna ti kalidad ti pannakaaywan dagiti nataengan. Kastoy ti inrekomenda ti nars a ni Rébecca: “Kasta unay ti kinaokupado no oras ti pannangan. Isu a praktikal dagita a kanito tapno sarungkaran ken pakanen ti maysa a maay-aywanan.” Imtuodentay koma kadagiti agay-aywan no ania dagiti mabalintay a maitulong.

No regular a sumarungkartayo iti kasta a pasilidad, maammuantayo no ania dagiti kasapulan dagiti natataengan a kakabsattayo, ken no ipalubos dagiti agay-aywan, makaaramidtayo kadagiti pamuspusan tapno maipaay dagita a kasapulanda. Kas pagarigan, mabalintay nga arkosan dagiti kuartoda kadagiti retrato dagiti ay-ayatenda wenno kadagiti drowing dagiti ubbing. Para iti pagimbaganda, mabalintay a sagutan ida iti naimeng a kawes wenno losion, sabon, ken dadduma pay. No adda minuyongan ti pasilidad, mabalintay kadi nga ipasiar ida iti ruar tapno makalang-abda iti presko nga angin? Kastoy ti kinuna ti nadakamat itay a ni Laurence: “Padpadaanan ni Madeleine ti linawas nga isasarungkarko. No makitana nga adda kaduak nga ubbing, dagus nga umisem ken madlaw ti ragsakna kadagiti matana!” Dagiti isasarungkar a kas kadagita ket dakkel ti maitulongda kadagidiay maay-aywanan iti maysa a pasilidad.​—Prov. 3:27.

Magunggonaan Met Dagiti Sumarsarungkar

Ti regular nga isasarungkar iti maysa a nataengan mabalin a subokenna ‘ti kinapudno ti ayattayo.’ (2 Cor. 8:8) Iti ania a pamay-an? Makapaladingit no makitatayo ti in-inut nga ikakapuy ti maysa a gayyem. Inamin ni Laurence: “Idi damo, maladingitanak unay iti ikakapuy ni Madeleine, isu nga agsangitak kalpasan ti tunggal isasarungkarko kenkuana. Ngem nabigbigko a makatulong kadatayo ti napasnek a kararag tapno ditay agdanag ket ad-adda a maparegtatayo dagiti sarsarungkarantayo.” Adun a tawen a sumarsarungkar ni Robert iti maysa a Kristiano a kabsat nga agnagan iti Larry, nga agsagsagaba iti Parkinson’s disease. Kuna ni Robert: “Nakaro ti sakit ni Larry ta diak pulos maawatanen ti aniaman nga ibagana. Ngem no agkararagkami, mariknak pay laeng ti pammatina.”

No sarungkarantayo dagiti natataengan a kapammatiantayo, saantayo laeng a matulongan ida no di ket magunggonaantayo met. Masursurotayo a paneknekan ti pammatitayo ken agbalin a natured no makitatayo ti determinasionda nga agtalinaed a nasinged ken Jehova bayat nga agnanaedda kadagiti pasilidad a kaduada dagiti dida kapammatian. Ti gagarda nga umawat iti naespirituan a taraon iti laksid ti nakapuyen a panagdengngeg ken panagkitada paneknekanda a “ti tao agbiag, saan nga iti tinapay laeng, no di ket iti tunggal sao a rumrummuar iti ngiwat ni Jehova.” (Mat. 4:4) Maragsakan dagiti natataengan uray kadagiti simple laeng a banag a kas iti isem ti ubing wenno panangkaduatayo kadakuada iti pannangan, isu a masursurotayo kadakuada ti agbalin a kontento kadagiti adda kadatayo. Ti panangipategda iti nasayaat a relasionda iti Dios ti mangparegta kadatayo a mangipasdek met kadagiti umiso a prioridadtayo.

Pudno unay a pakagunggonaan ti intero a kongregasion no tulongantayo dagiti natataengan. Apay? Yantangay dagiti nakapkapuyen iti pisikal ket agpannuray iti nainkabsatan a panagayat, mangipaay dayta iti gundaway iti kongregasion tapno rumang-ayda iti panangipakita iti asi. Gapuna, ti panangaywan kadagiti natataengan, uray iti napaut a tiempo, ket rumbeng nga ibilangtay amin kas paset ti panagserbitayo iti maysa ken maysa. (1 Ped. 4:10, 11) No idauluan dagiti panglakayen dayta nga aktibidad, maipaamirisda kadagiti kameng ti kongregasion a saan a rumbeng a mabaybay-an dayta nga aspeto ti aktibidadtayo kas Kristiano. (Ezeq. 34:15, 16) Babaen ti sidadaan ken naayat a suportatayo, mapaneknekantayo kadagiti natataengan a kapammatiantayo nga ipatpategtayo ida!

[Footnote]

[Blurb iti panid 28]

“No makita dagiti agay-aywan a kanayon a masarungkaran ti maysa a nataengan, nasaysayaat ti panangtaripatoda kenkuana”

[Ladawan iti panid 26]

Dagiti naimpusuan a kararagtayo ket mabalin a makatulong iti nataengan a kapammatiantayo tapno maiwaksina ti danag

[Ladawan iti panid 26]

Mapabileg dagiti nataengan a kapammatiantayo no iyebkas ken ipakitatayo ti nadungngo a pannakaseknantayo kadakuada