Nadidigra ti Solomon Islands

Idi Lunes, Abril 2, 2007, adda napasamak a 8.1 ti kapigsana a ginggined idiay Solomon Islands, maysa a tropikal a grupo dagiti isla iti amianan a daya ti Australia. Iti sumagmamano a minuto, adda dadakkel a dalluyon, a dadduma ket 10 a metro ti kangatoda nga immablat kadagiti isla ti Western Province. Agdagup iti 52 a tattao ti natay ken 6,000 ti napukawan iti pagtaengan.

Ti maysa kadagiti lugar a kakaruan a nadidigra ket ti kosta nga ili ti Gizo a pagnanaedan ti 7,000 a tattao. Masarakan dayta nga ili iti Ghizo Island, nga 45 a kilometro laeng ti kaadayona manipud iti sentro ti ginggined. Adda bassit a kongregasion dagiti Saksi ni Jehova idiay Gizo a mangsegsegga a mangangay iti tinawen a Pananglaglagip iti ipapatay ni Jesus iti dayta a rabii. (1 Corinto 11:23–26) Ti aldaw ket gagangay a nangrugi babaen ti nagngayed nga isisingising ti init ken nalinak ti kasasaad ti baybay. Pagammuan ta iti alas 7:39 ti agsapa, nagginggined.

Nagginggined!

Ni Ron Parkinson, a maysa a panglakayen ti kongregasion, ken ni baketna a Dorothy, ket mangisagsagana iti pammigat idi nagginggined. “Nagyugayog ti daan a balaymi a kas iti puon ti niog, ngem saan a narba,” kinuna ni Ron. “Nagpigsa ti uni. Natumba ken natnag dagiti banag a kas kadagiti estante ken alikamen iti kosina, muebles, ken ti piano. Kasta unay ti rigatmi a rimmuar. Nasugat ti saka ni Dorothy gapu kadagiti nabuong a sarming.”

Nagdardaras met a rimmuar dagiti misionero a da Tony ken Christine Shaw, nga agnanaed iti kabangibang a lugar. “Natumbaak gapu iti kinapigsa ti ginggined ket saanak a makabangon,” kinuna ni Christine. “Tumtupawen dagiti balbalay. Nabukual dagitoy manipud kadagiti pundasionda gapu iti nagdakkel a dalluyon. Adda dagiti tattao a nakabilog nga ikagkagumaanda ti aggagaud iti nagbabaetan dagiti nadadael a bambanag tapno sapulenda dagiti nakalasat. Kalpasanna, nagginggined manen iti napigsa​—sa naulit manen kalpasanna. Lima nga aldaw a nagtultuloy dagiti medio nakapuy a ginggined. Nakabutbuteng!”

Dimteng ti Tsunami Kalpasanna

Idi nagginggined, adda idi ni Patson Baea iti ilina a Sepo Hite, agarup 6 a kilometro manipud Gizo. Ania ti napasamak ken Patson ken ti pamiliana bayat dayta a didigra?

Nalagip ni Patson ti nasaem a kapadasanna: “Nagtarayak iti igid ti baybay nga agturong ken Naomi a baketko ken kadagiti uppat nga annakmi. Naipalladawda gapu iti ginggined ngem dida naan-ano. Agpigpigerger dagiti annakmi, ken agsangsangit ti dadduma kadakuada. Dagus a pinatibkermi ken Naomi ti pakinakemda.

“Nadlawko a karkarna ti mapaspasamak iti baybay. Nalawag nga adda um-umay a tsunami. Malayus la ketdi ti bassit nga islami. Agpegpeggad met ni nanangko nga Evalyn nga agnanaed iti kabangibang a bassit nga isla. Gapuna, dagus a binilinko ti pamiliak nga aglugan iti de motor a bilog ket naglayagkami tapno ispalenmi ni nanangko.

“Dikami pay nakaad-adayo idi adda limmabas a maysa a dakkel a dalluyon. Nagsublisubli dayta. Idi nadanonmi ni nanangko, napalalot’ kigtot ken pannakatarantana ket mabuteng nga aglangoy. Nupay napegges ti ayus, timpuak da Naomi ken Jeremy, ti 15 anyos nga anakmi, ket tinulonganda ni nanangko a makalugan iti bilogmi. Kalpasanna, pinapartakko iti kasta unay ti taray ti bilogmi, ket nagturongkami iti adalem a paset ti baybay.

“Iti dayta a kanito, napasamak ti kaadaywan pay laeng a panagugot, isu a makitamin dagiti baknad nga ayan dagiti korales iti aglawlaw dagiti isla. Pagammuan ta dimteng ti nagdakkelan a dalluyon a nanglayus iti dua nga isla. Iti igid ti baybay, adda balaymi a nairanta a pagdagusan dagiti sangailimi. Ngem narakrak dayta kalpasan a nabukual manipud kadagiti pundasionna. Ti pagnanaedanmi a balay ket nadanon ti dalluyon isu a nadadael ti adu a sanikuami. Idi normalen ti tukad ti baybay, innalami dagiti Biblia ken pagkantaanmi manipud iti nadadael a balaymi ket napankami idiay Gizo.”

Kadagiti kosta, agkaiwara ti nagadu a natay ken nadadael. Ti makinlaud a deppaar ti Ghizo Island ti kakaruan a nadidigra. Di kumurang a 13 a bario ti inkisap ti kasla pader a danum a lima a metro ti naipadamag a kangatona!

Iti dayta a rabii, 22 a tattao ti nagtataripnong iti Kingdom Hall dagiti Saksi ni Jehova iti Gizo tapno angayenda ti Pananglaglagip iti ipapatay ni Jesus. Makaparagsak ta awan kadakuada ti nakaro a nasugatan iti didigra. Kinuna ti nadakamat itayen a ni Ron: “Awan koriente, ken nadadael dagiti lamparami. Isu a nagpalawag ni Kabsat Shaw babaen iti lente. Nupay nasipnget, sipipigsa a nagkantakami tapno agyamankami ken Jehova, nga uray la a nagminar ti agduduma ngem agbabansag a tono ti bosesmi.”

Dagiti Pannaranay

Idi a ti didigra ket naipadamag idiay Honiara a kabesera ti pagilian, alisto a simmaranay ti sanga nga opisina dagiti Saksi ni Jehova. Idi nagtelepono ti sanga nga opisina, dagus a nakompirma a natalged ti kaaduan kadagiti Saksi iti apektado a luglugar. Adda dagiti mapagpannurayan nga indibidual a naibaon a mangsapul iti maysa a naiputputong a Saksi idiay Choiseul Island. Kamaudiananna, isu ket nasarakanda a di naan-ano. Adda met pondo a naipatulod idiay Gizo a paggatang kadagiti pangsaranay a suplay.

Babaen ti umuna a biahe ti eroplano iti aldaw ti Huebes, nakasangpet idiay Gizo dagiti pannakabagi ti sanga nga opisina. “Nangitugotkami kadagiti kinarton a pangsaranay,” kinuna ni Craig Tucker, maysa a kameng ti Branch Committee. “Adda karga ti dadduma a pasahero a naibati gapu ta nadagsen unayen ti mailugan iti eroplano ngem agyamankami ta nakadanon amin a karton a kargami iti destinasionmi. Dagita ti kaunaan a pangsaranay a kargamento a nakadanon iti nadidigra a lugar. Dua nga aldaw kalpasanna, adda dagiti kanayonan nga alikamen a simmangpet babaen ti bapor.”

Kabayatanna, dua nga oras a nagbilog da Tony Shaw ken Patson Baea, agraman ti dadduma pay a Saksi manipud Gizo, tapno tulonganda dagiti naiputputong a Saksi iti isla ti Ranongga. Gapu iti ginggined, dayta nga isla nga agatiddog iti 32 a kilometro ken agakaba iti 8 a kilometro ket ngimmato iti 2 a metro manipud iti patar ti baybay! Ti kellaat a panagugot iti aglikmut dayta nga isla ket nangpataud iti tsunami a nangdidigra kadagiti kabangibang nga isla.

“Nakaragragsak dagiti kameng ti kongregasion idi makitadakami,” kinuna ni Tony. “Natalged ken nakaradkadda nupay addada iti ruar dagiti pasdek gapu iti amakda kadagiti mapasamak a medio nakapuyen a ginggined. Ti bilogmi ti damo kadagiti nangyeg iti pangsaranay a suplay. Sakbay a pimmanawkami, nagyamankami ken Jehova babaen ti sangsangkamaysa ken naimpusuan a panagkararagmi.”

Kinuna ni Patson: “Sumagmamano nga aldaw kalpasanna, nagsublikami idiay Ranongga tapno mangyeg iti kanayonan a suplay ken tapno sapulenmi ti maysa a pamilia a Saksi nga agnanaed iti naiputputong a pungto ti isla. Nasarakanmi met laeng ni Matthew Itu a kaduana ti pamiliana a nagkampo iti adayo a kakaykaywan. Uray la a nagsangitda gapu iti rag-o agsipud ta dimi ida nalipatan! Nadadael ti kaaduan a balbalay iti barioda, agraman ti balayda. Ngem ti kangrunaan a pakaseknanda ket masukatan koma dagiti Bibliada a napukaw gapu iti didigra.”

Pammadayaw Dagiti Nakapaliiw

Nadlaw ti sabsabali ti kasta a Nakristianuan nga ayat. “Adda periodista a mangbabbabalaw kadagiti nakapuy a panangsaranay a maar-aramid. Ngem nasdaaw idi naammuanna a dagiti Saksi ni Jehova ket impaayanda dagiti kapammatianda kadagiti taraon, pagabbong a lona, ken dadduma pay a kasapulan bayat dagiti aldaw ti ginggined,” kuna ni Craig Tucker. “Dagiti bumario idiay Ranongga pinadayawanda ti naalibtak a pannaranaymi ken inyebkasda ti ladingitda gapu iti kurang a suporta ti mismo a relihionda,” innayon ni Patson. Kinuna ti maysa a babai: “Nagpartak ti panagtignay ti organisasionyo!”

Nagtignay met dagiti Saksi tapno tulonganda dagiti kaarrubada. “Bayat a sarsarungkaranmi ti temporario nga ospital idiay Gizo, nakitami ti maysa nga agassawa a nabiit pay a nakasabaanmi,” insalaysay ni Christine Shaw. “Agpadada a nasugatan ken napakigtotanda unay gapu iti napasamak. Ti apoko ti babai ket nalmes kalpasan a naisina kenkuana gapu iti tsunami. Dagus a nagawidkami tapno mangala iti taraon ken kawes a maited kadakuada. Kasta unay ti panagyamanda.”

Kinapudnona, saan laeng a material a pannaranay ti kasapulan dagiti biktima dagiti natural a didigra. Ti kangrunaanna a kasapulanda ket ti liwliwa a ti laeng Biblia a Sao ti Dios ti makaipaay. “Ibagbaga ti dadduma a ministro ti relihion a ti Dios dusdusaenna kano dagiti tattao gapu kadagiti basolda,” kinuna ni Ron. “Ngem impakitami kadakuada iti Biblia a nikaanoman, saan a ti Dios ti makinnakem iti kinadakes. Adu ti nagyaman gapu iti inranudmi kadakuada a liwliwa manipud Biblia.”​—2 Corinto 1:3, 4; Santiago 1:13.a

[Footnote]

[Diagram/Dagiti Mapa iti panid 13]

(Para iti aktual a pannakaurnosna, kitaem ti publikasion)

Choiseul

Ghizo

Gizo

Ranongga

HONIARA

AUSTRALIA

[Ladawan iti panid 15]

Ti pamilia Baea iti de motor a bilogda

[Ladawan iti panid 15]

Ti dinadael ti tsunami idiay Gizo

[Ladawan iti panid 15]

Daytoy a Kingdom Hall ti kakaisuna a saan a nadadael a pasdek idiay Lale iti Ranongga Island