Maysakayo Kadi a “Mayordomo ti Di Kaikarian a Kinamanangngaasi ti Dios”?
“Iti nainkabsatan nga ayat maaddaankayo iti kinalailo iti maysa ken maysa. Iti panangipakita ti pammadayaw iti maysa ken maysa mangidaulokayo.”—ROMA 12:10.
1. Ania ti ipanamnama kadatayo ti Sao ti Dios?
MAULIT-ULIT nga ipanamnama ti Sao ti Dios a saranayennatayo ni Jehova no maupay wenno masnaayan ti pusotayo. Kas pagarigan, imutektekanyo dagitoy a makaliwliwa a sasao: “Ni Jehova mangipaay iti saranay kadagiti amin a mapasag, ket patakderenna ti isuamin a maparukob.” “Paimbagenna dagidiay nasnaayan ti pusona, ket bedbedanna dagiti naut-ot a pasetda.” (Sal. 145:14; 147:3) Kanayonanna, kinuna a mismo ti nailangitan nga Amatayo: “Siak, ni Jehova a Diosmo, ig-iggamak ti makannawan nga imam, Daydiay agkunkuna kenka, ‘Dika agbuteng. Siak tulongankanto.’”—Isa. 41:13.
2. Kasano a saranayen ni Jehova dagiti adipenna?
2 Ngem kasano a ni Jehova, nga agnanaed iti di makita a langlangit, ‘maiggamanna ti imatayo’? Kasano a ‘patakderennatayo no naparukobtayo’ maigapu iti nasnaayan a puso? Ipaay ni Jehova a Dios ti kasta a pannaranay iti nadumaduma a pamay-an. Kas pagarigan, ipaayanna ti ilina iti “pannakabalin a nalablabes ngem ti gagangay” babaen ti nasantuan nga espirituna. (2 Cor. 4:7; Juan 14:16, 17) Mapabileg met dagiti adipen ti Dios babaen ti puersa nga itden ti mensahe a masarakan iti naipaltiing a Saona, ti Biblia. (Heb. 4:12) Adda pay kadi sabali a pamay-an a mapabilegnatayo ni Jehova? Masarakantayo dayta iti libro nga Umuna a Pedro.
“Ti Di Kaikarian a Kinamanangngaasi ti Dios a Nayebkas iti Nadumaduma a Pamay-an”
3. (a) Ania ti kinuna ni apostol Pedro maipapan kadagiti pakasuotan? (b) Ania ti nailawlawag iti maudi a paset ti umuna a surat ni Pedro?
3 Idi nagsurat kadagiti napulotan iti espiritu a manamati, kinuna ni apostol Pedro nga adda naimbag a rason nga agrag-oda gapu iti nabaknang a gunggona nga agur-uray kadakuada. Kinunana pay: “Nupay iti apagbiit a kanito iti agdama, no isu ti masapul, napagleddaangkayo babaen iti nadumaduma a pakasuotan.” (1 Ped. 1:1-6) Imutektekanyo ti sao a “nadumaduma.” Ipamatmatna a nagduduma dagiti pakasuotan. Ngem uray kasta ti imbaga ni Pedro, saanna a binaybay-an dagiti kakabsatna nga agpanunot no kabaelanda met laeng a daeran dagiti nagduduma a pannubok. Imbes ketdi, impanamnamana kadagiti Kristiano a tulongan ida ni Jehova a mangdaer iti tunggal pakasuotan a pakaipasanguanda, aniaman dagita. Mabasatayo dayta a pammasingked iti maudi a paset ti surat ni Pedro, a nangilawlawag kadagiti bambanag mainaig iti “panungpalan ti amin a bambanag.”—1 Ped. 4:7.
4. Apay a makaliwliwa kadatayo ti kuna ti 1 Pedro 4:10?
4 Kuna ni Pedro: “Kas mairukod iti sagut nga inawat ti tunggal maysa, usarenyo dayta iti panagserbi iti maysa ken maysa kas nasasayaat a mayordomo ti di kaikarian a kinamanangngaasi ti Dios a nayebkas iti nadumaduma a pamay-an.” (1 Ped. 4:10) Inusar manen ni Pedro ti sao a “nadumaduma.” Kasla ibagbagana, ‘Umapay dagiti pakasuotan iti nagduduma a pamay-an, ngem ipakpakita met ti Dios ti di kaikarian a kinamanangngaasina iti nagduduma a pamay-an.’ Apay a makaliwliwa dagita a sasao? Gapu ta ipaspasimudaagna nga aniaman a kita ti pakasuotan ti umapay kadatayo, kanayon nga adda ebkas ti di kaikarian a kinamanangngaasi ti Dios a tumulong kadatayo tapno maandurantayo dayta. Ngem nadlawyo kadi kadagiti sasao ni Pedro no kasano nga ipapaay kadatayo ni Jehova ti di kaikarian a kinamanangngaasina? Ipapaayna dayta babaen kadagiti pada a Kristiano.
“Panagserbi iti Maysa ken Maysa”
5. (a) Ania ti rumbeng nga aramiden ti tunggal Kristiano? (b) Ania dagiti tumaud a saludsod?
5 Kinuna ni Pedro kadagiti amin a kameng ti kongregasion Kristiano: “Kangrunaan iti amin, maaddaankayo iti nasged nga ayat iti maysa ken maysa.” Intuloyna: “Kas mairukod iti sagut nga inawat ti tunggal maysa, usarenyo dayta iti panagserbi iti maysa ken maysa.” (1 Ped. 4:8, 10) Gapuna, tunggal kameng ti kongregasion adda pasetna a mangpabileg kadagiti padana a Kristiano. Adda naitalek kadatayo a maysa a napateg a banag a kukua ni Jehova ket obligasiontayo nga iranud dayta kadagiti sabsabali. Ngarud, ania dayta a naitalek kadatayo? Kuna ni Pedro a maysa dayta a “sagut.” Ania dayta a sagut? Kasanotayo nga ‘usaren dayta iti panagserbi iti maysa ken maysa’?
6. Ania ti dadduma kadagiti sagut a naitalek kadagiti Kristiano?
6 Kuna ti Sao ti Dios: “Tunggal naimbag a sagut ken tunggal naan-anay a rangkap aggapu iti ngato.” (Sant. 1:17) Kinapudnona, amin a sagut nga intalek ni Jehova kadagiti adipenna ket ebkas ti di kaikarian a kinamanangngaasina. Ti nasantuan nga espiritu ti maysa a naisangsangayan a sagut nga inted kadatayo ni Jehova. Dayta a sagut ti tumulong kadatayo a mangpatanor kadagiti nadiosan a galad a kas iti ayat, kinaimbag, ken kinaalumamay. Kalpasanna, dagita a galad tignayennatayo a sidadaan a tumulong ken mangipakita iti naimpusuan a panangipateg kadagiti kapammatiantayo. Karaman met ti pudno a sirib ken pannakaammo kadagiti agkakaimbag a sagut a nagun-odtayo babaen ti tulong ti nasantuan nga espiritu. (1 Cor. 2:10-16; Gal. 5:22, 23) Kinapudnona, ti amin a pigsa, abilidad, ken talentotayo ket maibilang a sagut a mausar a mangidayaw ken mangipadayag iti nailangitan nga Amatayo. Inted kadatayo ti Dios ti responsabilidad a mangusar kadagiti abilidad ken galadtayo kas pamay-an a mangyebkas iti di kaikarian a kinamanangngaasi ti Dios kadagiti kapammatiantayo.
“Usarenyo Dayta iti Panagserbi”—Kasano?
7. (a) Ania ti ipasimudaag ti termino a “kas mairukod”? (b) Ania dagiti nasken nga iyimtuodtayo iti bagitayo, ken apay?
7 No maipapan kadagiti sagut a naawattayo, kuna pay ni Pedro: “Kas mairukod iti sagut nga inawat ti tunggal maysa, usarenyo dayta.” Ti termino a “kas mairukod” ipasimudaagna a saan laeng a nagduduma dagiti galad ken abilidadtayo no di ket nagduduma pay ti rukodna. Kaskasdi, maidagadag iti tunggal maysa: “Usarenyo dayta [kayatna a sawen, ti aniaman a partikular a sagut nga inawatyo] iti panagserbi iti maysa ken maysa.” Kanayonanna, ti ebkas nga “usarenyo dayta . . . kas nasasayaat a mayordomo” ket maysa a bilin. Gapuna, nasken nga iyimtuodtayo iti bagitayo: ‘Us-usarek met laeng kadi dagiti sagut a naitalek kaniak a mangpabileg kadagiti kapammatiak?’ (Idilig ti 1 Timoteo 5:9, 10.) ‘Wenno us-usarek ketdi dagiti abilidad nga inawatko ken Jehova nga agpaay laeng iti bukodko a pagimbagan—nalabit tapno agpabaknang wenno agbalin a nalatak iti kagimongan?’ (1 Cor. 4:7) No usarentayo dagiti saguttayo “iti panagserbi iti maysa ken maysa,” maay-ayotayo ni Jehova.—Prov. 19:17; basaen ti Hebreo 13:16.
8, 9. (a) Ania ti sumagmamano a pamay-an a dagiti Kristiano pagserserbianda dagiti kapammatianda iti intero a lubong? (b) Kasano nga agtitinnulong dagiti kakabsat iti kongregasionyo?
8 Dakamaten ti Sao ti Dios ti nadumaduma a pamay-an no kasano a dagiti Kristiano idi umuna a siglo nagserbida iti maysa ken maysa. (Basaen ti Roma 15:25, 26; 2 Timoteo 1:16-18.) Umasping iti dayta, ti bilin nga usaren ti sagut a naitalek iti maysa agpaay iti kapammatianna ket naimpusuan nga itungtungpal ita dagiti pudno a Kristiano. Usigenyo ti dadduma a pamay-an nga itungtungpalda dayta.
9 Adu a kakabsat a lallaki ti mangbusbusbos iti adu nga oras iti kada bulan tapno isaganada dagiti paset ti gimong. Kabayatan dagiti gimong, no iranudda ti dadduma kadagiti makaisuro nga impormasion a nasukimatda iti Biblia, matignay ti intero a kongregasion nga agibtur. (1 Tim. 5:17) Adu met a kakabsat ti pagaammo kas nadungngo ken naasi kadagiti kapammatianda. (Roma 12:15) Dadduma ti regular a bumisita kadagidiay malmaldaangan ken makipagkararag kadakuada. (1 Tes. 5:14) Adda dagidiay mangiwaya nga agaramid iti makapabileg a surat agpaay kadagiti padada a Kristiano a maipaspasango iti suot. Dadduma ti siaasi a tumulong kadagidiay addaan iti an-anayen tapno makatabunoda kadagiti gimong ti kongregasion. Rinibu a Saksi ti makipaspaset iti trabaho a panangsaranay, a tulonganda dagiti kapammatianda a mangibangon manen kadagiti pagtaenganda a dinadael dagiti kalamidad. Ti naayat a pannakaseknan ken praktikal a tulong nga ipapaay dagiti kasta a manangisakit a kakabsat ket pammaneknek iti “di kaikarian a kinamanangngaasi ti Dios a nayebkas iti nadumaduma a pamay-an.”—Basaen ti 1 Pedro 4:11.
Ania ti Napatpateg?
10. (a) Maseknan ni Pablo iti ania a dua nga aspeto ti panagserbina iti Dios? (b) Kasanotayo a matulad ni Pablo?
10 Naikkan dagiti adipen ti Dios saan laeng nga iti sagut nga usarenda agpaay kadagiti kapammatianda no di ket iti maysa a mensahe a masapul nga iranudda kadagiti padada a tao. Nabigbig ni apostol Pablo daytoy a dua nga aspeto ti panagserbina ken Jehova. Insuratna iti kongregasion ti Efeso ti maipapan iti naitalek kenkuana a “kinamayordomo ti di kaikarian a kinamanangngaasi ti Dios” nga agpaay a pagimbaganda. (Efe. 3:2) Ngem kinunana pay: ‘Napaneknekan ti Dios a maikarikami a pakaitalkan ti naimbag a damag.’ (1 Tes. 2:4) Kas ken Pablo, bigbigentayo met a naitalek kadatayo ti annongen a mangikasaba iti Pagarian ti Dios. No sireregtatayo a mangasaba, ikagkagumaantayo a tuladen ti ulidan ni Pablo kas nagaget a manangiwaragawag iti naimbag a damag. (Ara. 20:20, 21; 1 Cor. 11:1) Ammotayo a makaispal iti biag ti panangikasaba iti mensahe ti Pagarian. Ngem masapul nga ikagumaantayo met a tuladen ni Pablo babaen ti panangbirok kadagiti gundaway a ‘mangiburay iti naespirituan a sagut’ kadagiti kapammatiantayo.—Basaen ti Roma 1:11, 12; 10:13-15.
11. Ania ti rumbeng a panangmatmattayo kadagiti annongentayo a mangasaba kadagiti tattao ken mangpabileg kadagiti kakabsattayo?
11 Ania ti napatpateg kadagitoy dua a Nakristianuan nga aktibidad? No kasta ti saludsodtayo, arigna a damdamagentayo, Ania ti napatpateg kadagiti dua a payak ti tumatayab? Nalawag ti sungbat. Kasapulanna dagiti dua a payakna tapno makatayab. Umasping iti dayta, masapul a makiramantayo kadagiti dua nga aspeto ti panagserbitayo iti Dios tapno maannurottayo ti amin a maikalkalikagum kadatayo kas Kristiano. Gapuna, imbes nga ibilangtayo a nagduma dagiti annongentayo a mangikasaba iti naimbag a damag ken mangpabileg kadagiti kapammatiantayo, tuladentayo ti panangmatmat da apostol Pedro ken Pablo—imbilangda dagita kas agkuykuyog a responsabilidad. Iti ania a pamay-an?
12. Kasanotayo nga agpausar ken Jehova?
12 Kas ebanghelisador, usarentayo ti amin nga abilidadtayo a mangisuro tapno matukaytayo ti puso dagiti tattao babaen ti makapagin-awa a mensahe ti Pagarian ti Dios. Kayattayo ngamin a matulongan ida nga agbalin nga adalan ni Kristo. Kaskasdi, usarentayo met ti aniaman nga abilidad ken sagut nga adda kadatayo a mangparegta kadagiti kapammatiantayo babaen kadagiti makapagin-awa a sasao ken tulong—dagiti ebkas ti di kaikarian a kinamanangngaasi ti Dios. (Prov. 3:27; 12:25) Kayattayo ngamin a matulongan ida nga agtalinaed nga adalan ni Kristo. Ti panangasaba iti publiko ken “panagserbi iti maysa ken maysa” ket agpadpada a mangted kadatayo iti nagsayaat a pribilehio nga agpausar ken Jehova.—Gal. 6:10.
“Maaddaankayo iti Kinalailo iti Maysa ken Maysa”
13. Ania ti mapasamak no saantayo a ‘pagserbian ti maysa ken maysa’?
13 Indagadag ni Pablo kadagiti kapammatianna: “Iti nainkabsatan nga ayat maaddaankayo iti kinalailo iti maysa ken maysa. Iti panangipakita ti pammadayaw iti maysa ken maysa mangidaulokayo.” (Roma 12:10) Wen, no ipatpategtayo dagiti kakabsattayo, matignaytayo nga agserbi a naimpusuan kas mayordomo a nakaitalkan ti di kaikarian a kinamanangngaasi ti Dios. Ammotayo a no agballigi ni Satanas a manglapped iti ‘panagserbitayo iti maysa ken maysa,’ kumapuy ti singgalut ti panagkaykaysatayo. (Col. 3:14) Mabalin nga agresulta dayta iti panagbaaw ti regtatayo a mangasaba. Pagaammo unay ni Satanas nga iti piguratibo a pamay-an, saantayo a makatayab no madangranna ti uray maysa laeng kadagiti dua a payaktayo.
14. Siasino ti magunggonaan no ‘pagserbiantayo ti maysa ken maysa’? Mangted iti pagarigan.
14 Ti “panagserbi iti maysa ken maysa” ket agpada a pakagunggonaan daydiay immawat iti di kaikarian a kinamanangngaasi ti Dios ken daydiay nangyallatiw iti dayta. (Prov. 11:25) Alaentayo a pagarigan da Ryan ken Roni, agassawa a taga-Illinois, E.U.A. Idi nadamagda a dinadael ti Bagyo a Katrina ti ginasut a pagtaengan dagiti padada a Saksi, ti panagayat kadagiti kakabsat ti nangtignay kadakuada nga umikkat iti trabahoda, mangpanaw iti apartment-da, gumatang iti segunda mano a trailer tapno pagnaedanda, ken agbiahe iti 1,400 a kilometro nga agturong idiay Louisiana. Nagindegda sadiay iti nasurok a makatawen ket inusarda ti panawen, pigsa, ken ik-ikutanda tapno tumulong kadagiti kakabsatda. “Nasingsingedak iti Dios gapu iti pannakiramanko iti trabaho a panangsaranay,” kuna ni Ryan nga agtawen iti 29. “Nakitak no kasano nga ay-aywanan ni Jehova dagiti adipenna.” Innayon ni Ryan: “Babaen ti pannakipagtrabahok kadagiti natataengan a kakabsat, adu ti nasursurok maipapan iti panangaywan kadagiti kakabsat. Nasursurok met nga iti uneg ti organisasion ni Jehova, adu pay ti maaramidan dagiti ub-ubing a kas kaniak.” Kuna ni Roni nga agtawen iti 25: “Agyamanak ta nakatulongak kadagiti sabsabali. Ita pay laeng a nakariknaak iti kastoy a ragsak. Ammok a kadagiti sumaganad a tawtawen, agtultuloy a masagrapko dagiti gunggona nga itden daytoy a nagsayaat a kapadasan.”
15. Ania dagiti naimbag a rasontayo nga agtultuloy nga agserbi kas mayordomo a nakaitalkan ti di kaikarian a kinamanangngaasi ti Dios?
15 Wen, ti panagtulnog kadagiti bilin ti Dios a mangikasaba iti naimbag a damag ken mangpabileg kadagiti kapammatian ket mangyeg kadagiti bendision iti isuamin. Bumileg ti espiritualidad dagiti tultulongantayo, ken matagiragsaktayo met ti napalaus a rag-o nga itden laeng ti panangted. (Ara. 20:35) Ad-adda a suminged ti kongregasion no adda naayat a pannakaseknan ti tunggal kamengna iti maysa ken maysa. Kanayonanna, ti panagiinnayat ken panagdidinnungngotayo ket nabatad a pammaneknek a datayo dagiti pudno a Kristiano. Kinuna ni Jesus: “Babaen iti daytoy maammuanto ti isuamin a dakayo dagiti adalak, no addaankayo iti ayat iti maysa ken maysa.” (Juan 13:35) Kangrunaan iti amin, maidaydayaw ti naasi nga Amatayo a ni Jehova, bayat a ti tarigagayna a mangpabileg kadagidiay agkasapulan ket iyan-anninaw dagiti adipenna ditoy daga. Adda ngarud dagiti naimbag a rasontayo a mangusar iti naited kadatayo a sagut a “panagserbi iti maysa ken maysa kas nasasayaat a mayordomo ti di kaikarian a kinamanangngaasi ti Dios”! Itultuloyyo kadi nga usaren dayta?—Basaen ti Hebreo 6:10.
Malagipyo Kadi?
• Kadagiti ania a pamay-an a pabpabilgen ni Jehova dagiti adipenna?
• Ania dagiti naitalek kadatayo?
• Ania dagiti sumagmamano a pamay-an a makapagserbitayo kadagiti kapammatiantayo?
• Ania ti mangtignay kadatayo nga agtultuloy a mangusar iti naited kadatayo a sagut a ‘panagserbi iti maysa ken maysa’?
[Dagiti Ladawan iti panid 13]
Us-usarenyo kadi ti “sagut” a naitalek kadakayo agpaay kadagiti sabsabali wenno agpaay iti bukodyo a pagimbagan?
[Dagiti Ladawan iti panid 15]
Ikasabatayo ti naimbag a damag kadagiti sabsabali ken saranayentayo dagiti padatayo a Kristiano
[Ladawan iti panid 16]
Maikari iti komendasion dagidiay makipaspaset iti trabaho a panangsaranay gapu iti kinamanagsakripisioda