Saludsod Dagiti Agbasbasa
Ti Kadi Dios Alaenna Dagiti Ubbing Sana Pagbalinen Ida nga Anghel Idiay Langit?
No matay ti maysa nga ubing, mabalin a mangliwliwa dagiti gagayyem ti naulila a pamilia babaen ti panangibagada iti, “Kasapulan ngamin ti Dios ti maysa manen nga anghel idiay langit.” Para kenka, nainkalintegan ngata dayta?
No bilang agpayso a nakem ti Dios ti ipapatay dagiti ubbing gapu ta kasapulanna ti ad-adu pay nga anghel idiay langit, kaipapanan dayta nga isu ket awanan puso ken naulpit pay ketdi. Ngem saan a kasta ti isursuro ti Biblia. (Job 34:10) Ti maysa a naasi nga ama dina la ketdi agawen ti anak ti sabali a pamilia tapno laeng manayonan ti kameng ti pamiliana. Ngem awan ti tao a nagannak a naas-asi ngem ni Jehova a ti kangrunaan a galadna ket ayat. (1 Juan 4:8) Gapu iti kasta unay a panagayatna, di pulos agtignay a siuulpit.
Isaludsodmo iti bagim, ‘Kasapulan ngata ti Dios ti ad-adu pay nga anghel idiay langit?’ Kuna ti Biblia a nasayaat ken naan-anay ti amin nga aramid ti Dios. (Deuteronomio 32:4) Naan-anay ken saan nga agkurang ti direkta a panangparsuana iti minilion nga anghel. (Daniel 7:10) Nagkamali ngata ti Dios iti panangkarkularna iti bilang dagiti anghel a kasapulanna? Imposible! Sigurado a saan a nagkamali ti Mannakabalin-amin a Dios iti dayta a banag. Agpayso nga adda sumagmamano a tattao a pinili ni Jehova tapno agbalin nga espiritu a parsua kas paset ti nailangitan a Pagarianna, ngem saandan nga ubbing iti kanito a matayda.—Apocalipsis 5:9, 10.
Adtoy ti maysa pay a rason a saan a mangala ti Dios kadagiti ubbing ditoy daga tapno pagbalinenna ida nga anghel idiay langit: Maikontra dayta iti orihinal a panggepna kadagiti ubbing. Idiay minuyongan ti Eden, kinuna ti Dios kada Adan ken Eva: “Agbungakayo ken agadukayo ket punnuenyo ti daga ken parukmaenyo.” (Genesis 1:28) Dagiti ubbing ket sagut ti Dios ken napateg iti pannakatungpal ti orihinal a panggepna a mapno ti daga iti nalinteg a pamilia ti tao. Dina pulos pinanggep a keltayen ti biag dagiti ubbing sana pagbalinen ida nga anghel. Pasingkedan ti Biblia a dagiti ubbing ket “tawid manipud ken Jehova.” (Salmo 127:3) Ti ngata managayat a Dios a ni Jehova babawyenna ti insagutnan kadagiti nagannak? Sigurado a saan!
Napalalo a liday, ladingit, ken saem ti iyeg ti nasapa nga ipapatay ti maysa nga ubing. Ania ngarud ti manamnama dagiti agladladingit a nagannak? Ikari ti Biblia a ti Dios pagungarennanto ti minilion a tattao iti paraiso a daga. Iladawanmo iti panunotmo dagiti napagungar nga ubbing a nakasalsalun-atton ken kadua manen dagiti ay-ayatenda. (Juan 5:28, 29) Pagayatan ti Dios a dagiti ubbing ket dumakkel, tagiragsakenda ti biag, ken maammuanda ti maipapan kenkuana ken iti panggepna iti daga. No kasta, dagiti ubbing a natayen ket saanda a nagbalin nga anghel sadi langit. Dumtengto ti tiempo a mapagungarda iti paraiso a daga ket babaen ti naayat a panangaywan ti Namarsua kadatayo, nakaragragsakton dagiti ubbing ken natataengan a mangidaydayaw ken Jehova iti agnanayon.