Paneknekanyo a Pudno a Pasurotnakayo ni Kristo

“Tunggal naimbag a kayo mangpataud iti nasayaat a bunga, ngem tunggal rinuker a kayo mangpataud iti awan pategna a bunga.”​—MAT. 7:17.

1, 2. Ania ti nagdumaan dagiti pudno ken saan a pudno a pasurot ni Kristo nangnangruna bayat ti tiempo ti panungpalan?

KINUNA ni Jesus a mailasin ti nagdumaan dagiti pudno ken saan a pudno a pasurotna babaen kadagiti bungada​—dagiti pannursuro ken konduktada. (Mat. 7:15-17, 20) Kinapudnona, dakkel ti epektona kadagiti tattao ti ipapaunegda iti isip ken pusoda. (Mat. 15:18, 19) Dagidiay mangipauneg kadagiti kinaulbod mangpataudda iti “awan pategna a bunga,” ngem dagidiay nasursuruan iti naespirituan a kinapudno mangpataudda iti “nasayaat a bunga.”

² Nagbalin a nabatad dagita a dua a kita ti bunga bayat daytoy tiempo ti panungpalan. (Basaen ti Daniel 12:3, 10.) Dagiti saan a pudno a Kristiano ket ballikug ti panangmatmatda iti Dios ken masansan a pammarang ti debosionda kenkuana, ngem dagidiay addaan iti naespirituan a pannakatarus idaydayawda ti Dios “buyogen ti espiritu ken kinapudno.” (Juan 4:24; 2 Tim. 3:1-5) Ikagkagumaanda nga iparangarang dagiti galad ni Kristo. Ngem komustatayo met kas indibidual? Bayat nga usigenyo ti lima a pakabigbigan ti pudno a Kristianidad, isaludsodyo: ‘Maitunos kadi iti Sao ti Dios ti kondukta ken isursurok? Pagbalbalinek kadi nga ad-adda a makaay-ayo ti kinapudno kadagidiay agsapsapul iti dayta?’

Agbiag a Maitunos iti Sao ti Dios

 3. Ania ti makaay-ayo ken Jehova, ken ania ti ramanen dayta para kadagiti pudno a Kristiano?

³ “Saan a tunggal maysa nga agkunkuna kaniak, ‘Apo, Apo,’ makastrekto iti pagarian ti langlangit,” kinuna ni Jesus, “no di ket daydiay mangar-aramid ti pagayatan ni Amak nga adda iti langlangit.” (Mat. 7:21) Wen, ti makaay-ayo ken Jehova ket no an-annuroten ti maysa ti Kinakristiano imbes a basta ibagbagana laeng nga isu ket Kristiano. Para kadagiti pudno a pasurot ni Kristo, karaman iti dayta ti intero a panagbiagda, a pakairamanan ti panangmatmatda iti kuarta, panggedan, paglinglingayan, nailubongan a kostumbre ken selebrasion, ken panagassawa ken dadduma pay a relasion kadagiti padatayo a tattao. Ngem dagiti saan a pudno a Kristiano tuladenda ti panagpampanunot ken daldalan ti lubong, nga ad-adda a dimmakes bayat ti maudi nga al-aldaw.​—Sal. 92:7.

4, 5. Kasano a mayaplikartayo dagiti sasao ni Jehova iti Malakias 3:18?

⁴ Maitunos iti dayta, insurat ni propeta Malakias: “Sigurado a makitayonto manen ti pagdumaan iti nagbaetan daydiay nalinteg ken daydiay nadangkes, iti nagbaetan daydiay agserserbi iti Dios ken daydiay saan a nagserbi kenkuana.” (Mal. 3:18) Bayat nga utobenyo dagita a sasao, isaludsodyo: ‘Tultuladek kadi ti lubong, wenno naidumaak iti dayta? Ikagkagumaak kadi a tuladen ti estilo ti panagbiag dagiti katrabahuan wenno kaeskuelaak tapno kayatdak a kadua, wenno simamatalek nga annurotek dagiti prinsipio ti Biblia, nga ibagak pay ti takderko no kasapulan?’ (Basaen ti 1 Pedro 3:16.) Siempre ditay kayat ti agparang nga aginlilinteg, ngem masapul a nalawag ti nakaidumaantayo kadagiti saan nga agayat ken di agserserbi ken ni Jehova.

⁵ No makitayo nga adda kasapulan pay a parang-ayenyo, apay a diyo ikararag dayta ken pabilgenyo ti espiritualidadyo babaen ti regular a panagadal iti Biblia, panagkararag, ken pannakigimong? Bayat nga ikagkagumaanyo nga iyaplikar ti Sao ti Dios, ad-adda a makapataudkayo kadagiti “nasayaat a bunga,” a pakairamanan ‘ti bunga dagiti bibig a mangideklara iti publiko iti nagan ti Dios.’​—Heb. 13:15.

Ikasaba ti Pagarian ti Dios

6, 7. No maipapan iti panangikasaba iti Pagarian, ania ti nagdumaan ti pudno ken saan a pudno a Kristiano?

⁶ Kinuna ni Jesus: “Iti sabsabali a siudad masapul nga ideklarak ti naimbag a damag ti pagarian ti Dios, agsipud ta naibaonak maigapu iti daytoy.” (Luc. 4:43) Apay a ti Pagarian ti Dios ti kangrunaan nga inkasaba ni Jesus? Ammona a kas Ari iti dayta a Pagarian, agraman dagiti napagungar a napulotan iti espiritu a kakabsatna, pagpatinggaennanto ti ramut ti pakarigatan ti sangatauan​—ti basol ken ti Diablo. (Roma 5:12; Apoc. 20:10) Gapuna, imbilinna kadagiti pasurotna nga ikasabada ti Pagarian agingga iti panungpalan ti agdama a sistema ti bambanag. (Mat. 24:14) Dagidiay saan a pudno a pasurot ni Kristo saanda a makiramraman iti dayta a trabaho, kinapudnona saanda a kabaelan nga aramiden dayta. Apay? Usigentayo ti tallo a rason: Umuna, narigatda nga ikasaba ti maysa a banag a dida maawatan. Maikadua, kaaduan kadakuada ti saan a napakumbaba ken natured a mangsango iti panangumsi ken ibubusor a mabalin nga itden ti panangikasaba iti mensahe ti Pagarian kadagiti kaarruba. (Mat. 24:9; 1 Ped. 2:23) Ken maikatlo, ti espiritu ti Dios ket awan kadagiti saan a pudno a Kristiano.​—Juan 14:16, 17.

⁷ Iti sabali a bangir, dagiti pudno a pasurot ni Kristo matarusanda no ania ti Pagarian ti Dios ken ti ibanagna. Maysa pay, iyun-unada dagiti interes ti Pagarian, nga ipakaammoda dayta iti intero a lubong babaen ti tulong ti espiritu ni Jehova. (Zac. 4:6) Regular kadi a makiramramankayo iti dayta a trabaho? Ikagkagumaanyo kadi ti rumang-ay kas agibumbunannag iti Pagarian, nalabit babaen ti panangbusbos iti ad-adu a tiempo iti ministerio wenno iti panagbalin nga ad-adda nga epektibo iti dayta? Napasayaat ti dadduma ti kalidad ti ministerioda babaen ti nasigsigo a panangusarda iti Biblia. “Ti sao ti Dios nabiag ken adda bilegna,” insurat ni apostol Pablo, daydiay nangyugali a makirinnason manipud iti Kasuratan.​—Heb. 4:12; Ara. 17:2, 3.

8, 9. (a) Ania dagiti kapadasan a mangitampok iti kinapateg ti panangusar iti Biblia iti ministerio? (b) Kasanotayo nga agbalin a nasigsigo a mangusar iti Sao ti Dios?

⁸ Bayat a mangaskasaba ti maysa a kabsat iti binalaybalay, imbasana ti Daniel 2:44 iti maysa a Katoliko ken inlawlawagna no kasano nga iyeg ti Pagarian ti Dios ti pudno a talna ken talged. Kuna ti Katoliko: “Talaga nga apresiarek ti panangukagmo iti Biblia ken panangipakitam kaniak iti teksto imbes nga imbagam lattan.” Adda met kabsat a nangibasa iti teksto iti maysa a babai a Greek Orthodox. Adu ti makapainteres a saludsod ti babai. Babaen ti Biblia, sinungbatan dayta ti kabsat a kaduana ni baketna. Idi agangay, kinuna ti babai: “Ammom kadi no apay a kinayatko ti makisarita kenka? Inusarmo ngamin ti Biblia, ken imbasam dayta kaniak.”

⁹ Siempre, napateg dagiti literaturatayo ken masapul a maitukon dagita iti tay-ak. Ngem ti Biblia ti kangrunaan nga usarentayo iti ministerio. Gapuna, no saanyo a nakairuaman nga usaren a regular ti Biblia iti ministerio, apay a diyo pagbalinen dayta a kalat? Nalabit a mangpilikayo iti sumagmamano a teksto a mangilawlawag no ania ti Pagarian ti Dios ken no kasano a risutenna dagiti espesipiko a pakaseknan dagiti tattao iti teritoriayo. Kalpasanna, nakasaganakayo koma a mangibasa kadagita no mangasabakayo iti binalaybalay.

Naragsak a Mangawit iti Nagan ti Dios

10, 11. No maipapan iti panangusar iti nagan ti Dios, ania ti nakaidumaan ni Jesus iti adu nga agkunkuna a pasurotna?

¹⁰ “‘Dakayo dagiti saksik,’ kuna ni Jehova, ‘ket siak ti Dios.’” (Isa. 43:12) Ni Jesu-Kristo, ti kangrunaan a Saksi ni Jehova, imbilangna a pribilehio ti panangawit iti nagan ti Dios ken ti panangipakaammo iti dayta. (Basaen ti Exodo 3:15; Juan 17:6; Hebreo 2:12.) Kinapudnona, gapu ta impakaammo ni Jesus ti nagan ni Amana, isu ket naawagan kas “ti Matalek a Saksi.”​—Apoc. 1:5; Mat. 6:9.

¹¹ Iti kasumbangirna, adu nga agkunkuna a pannakabagi ida ti Dios ken ti Anakna ti mangiparparangarang iti nakababain a panangmatmat iti nagan ti Dios, nga inikkatda pay ketdi dayta kadagiti patarusda iti Biblia. Kasta a kababalin ti inyanninaw dagiti Katoliko nga obispo idi impaulogda ti bilin a “saan a rumbeng nga usaren wenno ibalikas ti nagan ti Dios iti porma a tetragrammaton a YHWH” bayat ti panagdayaw.a Anian a makarimon ti kasta a kapanunotan!

12. Kasano a dagiti adipen ti Dios ad-adda a nagminar ti pakainaiganda ken Jehova idi 1931?

¹² Kas panangtulad ken ni Kristo ken iti dakkel nga “ulep dagiti saksi” a nagbiag sakbay ni Jesus, maragsakan dagiti pudno a Kristiano a mangusar iti nagan ti Dios. (Heb. 12:1) Kinapudnona idi 1931, dagiti adipen ti Dios ket ad-adda a nagminar ti pakainaiganda ken Jehova idi inawatda ti nagan a Saksi ni Jehova. (Basaen ti Isaias 43:10-12.) Gapuna, iti naisangsangayan nga anag, dagiti pudno a pasurot ni Kristo nagbalinda a kas dagiti ‘tattao a maawagan iti nagan ti Dios.’​—Ara. 15:14, 17.

13. Kasanotayo a makapagbiag maitunos iti inted ti Dios a nagantayo?

¹³ Kas indibidual, kasanotayo a rumbeng nga agbiag maitunos iti naisangsangayan a nagantayo? Ti maysa a pamay-an ket babaen ti simamatalek a panangipakaammo maipapan iti Dios. “Tunggal maysa nga umawag iti nagan ni Jehova maisalakanto,” insurat ni Pablo. “Nupay kasta, kasano ti panangawagdanto iti daydiay a kenkuana saanda a naaddaan iti pammati? Kasta met, kasano a maaddaandanto iti pammati iti daydiay saanda a nangngeg? Kasta met, kasano ti pannakangngegdanto no awan ti mangasaba? Kasta met, kasano ti panangasabadanto malaksid no naibaonda?” (Roma 10:13-15) Kanayonanna, masapul a sitataktika nga ibutaktaktayo dagiti narelihiosuan a kinaulbod a nangpadakes iti Namarsua kadatayo, kas iti doktrina ti umap-apuy nga impierno. Pagparangenna ngamin a ti Dios ti ayat ket naulpit imbes a ti Diablo.​—Jer. 7:31; 1 Juan 4:8; idilig ti Marcos 9:17-27.

14. Ania ti inaramid ti dadduma idi naammuanda ti personal a nagan ti Dios?

¹⁴ Maragsakankayo kadi a mangawit iti nagan ti nailangitan nga Amayo? Tultulonganyo kadi ti sabsabali a mangammo iti dayta a nasantuan a nagan? Nadamag ti maysa a babai nga agnanaed idiay Paris, Francia nga ammo dagiti Saksi ni Jehova ti nagan ti Dios. Gapuna, kiniddawna iti simmaruno a nakasaritana a Saksi nga ipakitana kenkuana dayta a nagan iti Bibliana. Idi nabasana ti Salmo 83:18, dakkel ti epektona kenkuana. Nangrugi nga agadal iti Biblia ket maysa itan a matalek a kabsat nga agserserbi iti sabali a pagilian. Idi a ti maysa a Katoliko a babai nga agnanaed idiay Australia damo a nakitana ti nagan ti Dios iti Biblia, nakasangit gapu iti rag-o. Adu a tawen itan nga agserserbi kas regular pioneer. Iti nabiit pay, nakasangit met gapu iti rag-o ti maysa a babai idi a ti maysa a Saksi a taga-Jamaica impakitana kenkuana ti nagan ti Dios iti Bibliana. Gapuna, pagragsakanyo nga awiten ti nagan ti Dios ken kas panangtulad ken Jesus, ipakaammoyo dayta a nagpateg a nagan iti isuamin.

“Dikay Ayaten ti Lubong”

15, 16. Ania ti panangmatmat dagiti pudno a Kristiano iti lubong, ken ania a salsaludsod ti rumbeng nga iyimtuodtayo?

¹⁵ “Dikay ayaten ti lubong wenno uray ti bambanag nga adda iti lubong. No ti asinoman ayatenna ti lubong, ti ayat ti Ama awan kenkuana.” (1 Juan 2:15) Ti lubong ken ti espirituna ket naan-anay a naisupadida ken ni Jehova ken iti nasantuan nga espirituna. Gapuna, dagiti pudno a pasurot ni Kristo saanda laeng a liklikan ti agbalin a paset ti lubong no di ket saanda pay nga ayaten dayta. Ammoda ngamin a ti “pannakigayyem iti lubong ket pannakibusor iti Dios,” kas insurat ni adalan a Santiago.​—Sant. 4:4.

¹⁶ Mabalin a narigat nga iyaplikar dagita a sasao ni Santiago iti tengnga ti lubong a nasaknap ti sulisog. (2 Tim. 4:10) Gapuna, inkararagan ni Jesus dagiti pasurotna: “Kiddawek kenka, a saanmo nga ikkaten ida iti lubong, no di ket aywanam ida gapu iti daydiay nadangkes. Saanda a paset ti lubong, a kas kaniak a saan a paset ti lubong.” (Juan 17:15, 16) Isaludsodyo: ‘Ikagkagumaak kadi ti saan nga agbalin a paset ti lubong? Ammo kadi ti dadduma ti takderko kadagiti di nainkasuratan a selebrasion ken kostumbre agraman kadagidiay nalabit a saan a nagtaud kadagiti pagano ngem nalawag nga iyanninawda ti espiritu ti lubong?’​—2 Cor. 6:17; 1 Ped. 4:3, 4.

17. Ania ti mabalin a mangtignay kadagiti nasingpet a tattao a dumasig ken Jehova?

¹⁷ Sigurado a saan a maay-ayo ti lubong iti naibatay-Biblia a takdertayo ngem mabalin a mamagpanunot dayta kadagiti nasingpet a tattao. Kinapudnona, no makita dagiti kasta nga indibidual a ti pammatitayo ket sititibker a nairamut iti Kasuratan ken apektaranna ti intero nga estilo ti panagbiagtayo, mabalin nga agtignayda babaen ti arigna panangikunada kadagiti napulotan: “Kumuyogkaminto kadakayo, ta nangngegmi a ti Dios adda kadakayo.”​—Zac. 8:23.

Mangipakpakita iti Pudno a Nakristianuan nga Ayat

18. Ania ti ramanen ti panangipakita iti ayat ken ni Jehova ken iti kaarrubatayo?

¹⁸ Kinuna ni Jesus: “Masapul nga ayatem ni Jehova a Diosmo buyogen ti intero a pusom ken buyogen ti intero a kararuam ken buyogen ti intero a panunotmo” ken “masapul nga ayatem ti padam a tao a kas iti bagim.” (Mat. 22:37, 39) Dayta a kita ti ayat (a·gaʹpe iti Griego) ikabilanganna ti obligasion, prinsipio, ken no ania ti umiso, ken masansan a nabuyogan dayta iti nasged nga emosion, kas iti kinadungngo ken kinabara. (1 Ped. 1:22) Gapu ta dayta nga ayat ipangpangrunana ti dadduma babaen ti sao ken aramid, kasupadina ti kinamanagimbubukodan.​—Basaen ti 1 Corinto 13:4-7.

19, 20. Mangdakamat iti sumagmamano a kapadasan a mangipakita a nabileg ti Nakristianuan nga ayat.

¹⁹ Gapu ta ti ayat ket bunga ti nasantuan nga espiritu ti Dios, tulonganna dagiti pudno a Kristiano a mangaramid kadagiti bambanag a di kabaelan ti dadduma nga aramiden, kas iti panangdaer iti panangidumduma gapu iti puli, kultura, ken politika. (Basaen ti Juan 13:34, 35; Gal. 5:22) Dagiti marakarnero a tattao dida malapdan ti agtignay no makitada ti kasta nga ayat. Kas pagarigan, idi damo a timmabuno iti Nakristianuan a gimong ti maysa nga agtutubo a Judio idiay Israel, nasdaaw a nakakita kadagiti Judio ken Arabo a sangsangkamaysa nga agdaydayaw ken Jehova. Kas resultana, nangrugin a regular a makigimong ken nagpayadal iti Biblia. Mangipakpakitakayo kadi iti kasta a naimpusuan a panagayat kadagiti kakabsat? Ken ikagkagumaanyo kadi a sibabara nga abrasaen dagiti damo a tumabuno iti Kingdom Hall, aniaman ti pagilian, puli, wenno kasasaadda iti biag?

²⁰ Kas pudno a Kristiano, ikagumaantayo nga ipakita ti ayat iti isuamin. Idiay El Salvador, maysa nga agtutubo nga agibumbunannag ti mangyad-adal iti Biblia iti 87 ti tawenna a napeklan a Katoliko a babai. Maysa nga aldaw, nagsakit iti nakaro ti babai ket nayospital. Idi nakaawiden, sinarungkaran dagiti Saksi ken siniguradoda nga adda taraonna. Nagpaut dayta iti agarup makabulan. Ngem awan a pulos ti karelihionanna a bimmisita kenkuana. Ania ti resultana? Imbellengna ti amin a rebultona, nagikkat iti simbaanda, ken intuloyna ti nagadal iti Biblia. Wen, nabileg ti Nakristianuan nga ayat! Tukayenna ti puso iti pamay-an a di kabaelan ti sao.

21. Kasano nga agbalin a natalged ti masakbayantayo?

²¹ Iti din agbayag, ibaga ni Jesus iti amin a saan a pudno a pasurotna: “Saankay a pulos am-ammo! Umadayokayo kaniak, dakayo nga agar-aramid ti kinakillo.” (Mat. 7:23) Gapuna, mangpataudtayo koma iti bunga a pakaidayawan ti Ama ken ti Anak. “Tunggal maysa a dumngeg kadagitoy a sasaok ket aramidenna ida,” kinuna ni Jesus, “mayaspingto iti masirib a lalaki, a binangonna ti balayna iti rabaw ti dakkel a bato.” (Mat. 7:24) Wen, no paneknekantayo a pudno a pasurotnatayo ni Kristo, magun-odantayo ti anamong ti Dios, ken natalged ti masakbayantayo, nga arigna a naipasdek iti bato!

[Footnote]

Malagipyo Kadi?

• Ania ti nagdumaan ti pudno ken saan a pudno a pasurot ni Kristo?

• Mangdakamat iti sumagmamano a “bunga” a pakabigbigan dagiti pudno a Kristiano.

• Ania dagiti kalat a kayatyo nga ipasdek no iti panangpataud iti Nakristianuan a bunga?

[Ladawan iti panid 13]

Nakairuamanyo kadi nga usaren a regular ti Biblia iti ministerioyo?

[Ladawan iti panid 15]

Ammo kadi ti dadduma ti takderyo kadagiti di nainkasuratan a selebrasion?