Ti Panangdaer Kadagiti Pakasuotan Pinatibkerna ti Panagtalekmi ken Jehova

Kas insalaysay ni Ada Dello Stritto

Kalkalpasko a kinopia iti kuadernok ti teksto ita nga aldaw. Agtawenak iti 36 ngem dua nga oras nga insuratko dagita a sumagmamano a sasao. Apay a kasta kabayag? Bay-anyo a ni nanangko ti mangilawlawag.​—Joel.

IDI 1968, nabautisarankami ken lakayko kas Saksi ni Jehova. Kalpasan nga impasngayko ti dua a nasalun-at nga annakmi, da David ken Marc, naaddaankami iti maikatlo nga anak, ni Joel. Impasngayko a kurang ti bulanna idi 1973 iti ospital ti ili ti Binche idiay Belgium, agarup 60 a kilometro iti abagatan ti Brussels. Agdagsen laeng iti 1.7 a kilo. Idi rimmuarak iti ospital, masapul a mabati ni Joel agingga a dumagsen pay.

Nupay sumagmamano a lawas ti napalabasen, saan a simmayaat ti kasasaadna isu nga impanmi ken lakayko a Luigi iti maysa a doktor dagiti ubbing. Kalpasan ti panangeksamenna ken Joel, kinuna ti doktor: “Maladingitanak a mangibaga nga adda depekto ni Joel.” Nagari ti ulimek. Iti dayta a kanito, nariknami nga adda serioso a problema iti salun-at ti anakmi. Kalpasanna, impaigidna ni lakayko sa imbagana kenkuana: “Adda trisomy 21 ti anakyo,” a pagaammo met kas Down syndrome.a

Gapu ta naldaangankami iti natakuatan ti doktor, inkeddengmi ti agpakonsulta iti sabali pay nga espesialista. Dandani maysa nga oras a siuulimek nga ineksamenna ni Joel. Para kadakami ken Luigi, kasla awan patinggana dayta. Kamaudiananna, kinuna ti doktor, “Kanayonto a nakadepende kadakayo ti anakyo.” Ken siaalumamay nga innayonna, “Ngem naragsakto ni Joel gapu ta ay-ayaten dagiti nagannakna!” Gapu iti napalalo nga asik ken Joel, siaannad nga inubbak sa nagawidkamin. Walo laeng a lawasna idi.

Napabileg Babaen Kadagiti Gimong ken Ministerio

Ipakita dagiti kanayonan nga eksaminasion nga adda nakaro a sakit ti puso ken tulang ni Joel. Gapu ta naipasngay a dakkel ti pusona, sumagsagid dayta iti barana isu nga alisto a makaptan kadagiti impeksion. Di nagbayag, idi uppat a bulannan, nakaptan iti bronchial pneumonia isu a nayospital manen ket nakuarentinas. Kasla madudog ti pusomi a mangkitkita iti pannakidangadangna iti sakitna. Anian nga ayatmi a mangubba ken mangapros koma kenkuana. Ngem bayat ti sangapulo a makatuok a lawas, dimi mabalin nga iggaman. Awan maaramidanmi ken Luigi no di ti agbuya, aginnarakup, ken agkararag.

Bayat dayta a narigat a kasasaad, intultuloymi ti nakigimong a kadua da David ken Marc, nga agtawen idi iti innem ken tallo. No addakami iti Kingdom Hall, mariknami ti naayat a panangaywan ni Jehova. Bayat dagiti oras a kaaddami sadiay a kadua dagiti Kristiano a kakabsat, mariknami a nayallatiwmi ken Jehova ti dadagsenmi, a nangted kadakami iti talna ti panunot. (Sal. 55:22) Uray dagiti nars a nangasikaso ken Joel imbagada a nadlawda no kasano a nakatulong kadakami ti pannakigimongmi tapno mataginayonmi ti natimbeng a panangmatmat iti bambanag.

Bayat dagita a panawen, impakaasik met ken Jehova a pabilgennak a mapan mangasaba. Imbes nga agpupokak iti balaymi nga agsangsangit, kayatko nga isarita iti sabsabali no apay a nakapabileg kaniak ti panagtalekko iti inkari ti Dios a maysa a lubong nga awanan sakit. Tunggal makipasetak iti ministerio, mariknak a sungsungbatan ni Jehova dagiti kararagko.

“Nakaskasdaaw!”

Anian a ragsakmi idi mayawidmi met laengen ni Joel manipud ospital! Ngem kabigatanna, naldaangankami manen. Kimmaro ti kasasaad ni Joel isu nga intaraymi manen iti ospital. Kalpasan nga ineksamen ti doktor, kinunana kadakami: “Napauten ti innem a bulan a panagbiag ni Joel.” Kalpasan ti dua a bulan, idi agarup walo a bulannan, kasla pumayso ti imbaga ti doktor yantangay kimmaro ti kasasaadna. Kinasaritanakami ti doktor ket kinunana: “Ladingitek. Awanen ti maaramidanmi kenkuana.” Sa innayonna: “Ni laengen Jehova ti makatulong kenkuana.”

Nagsubliak iti siled ni Joel. Nupay napaksuyanakon, diak pulos pinanawan. Agsisinnublat dagiti kakabsat a babbai a mangkadua kaniak nga agbantay bayat nga ay-aywanan ni Luigi ti dua pay nga annakmi. Kalpasan ti makalawas, naatake ti puso ni Joel. Nagdardaras nga immarayat dagiti nars ngem awan ti maaramidanda. Kalpasan ti sumagmamano a minuto, siaalumamay nga imbaga ti maysa kadakuada, “Natayen . . . ” Nupay napaksuyanakon, napalalo ti sangitko ket rimmuarak iti siled. Inkagumaak ti nagkararag ken Jehova ngem diak maarikap dagiti sasao a mangyebkas iti saem a marikriknak. Kalpasan ti agarup 15 a minuto, inayabannak ti maysa kadagiti nars ket kinunana, “Sibibiag ni Joel!” Iniggamanna ti imak ket kinunana, “Umaymo kitaen.” Idi nakitak ni Joel, agpitpitik manen ti pusona! Dagus a nagwaras ti damag. Immay kinita dagiti nars ken doktor ket adu ti nagkuna, “Nakaskasdaaw!”

Di Ninamnama a Nakapagna Idi Agtawen iti Uppat

Bayat ti immuna a tawtawen ni Joel, masansan nga ibaga kadakami ti doktor, “Kasapulan ni Joel ti adu nga atension.” Gapu ta pudno a nariknami ken Luigi ti naayat a panangaywan ni Jehova kalpasan ti pannakayanak ni Joel, kayatmi met nga iparikna kenkuana ti naayat a panangaywanmi. Adu ti gundawaymi a mangaramid iti dayta gapu ta kanayon a kasapulanna ti tulongmi iti aniaman nga aramidenna.

Iti immuna a pito a tawen ni Joel, tinawen a naipasangokami iti isu met laeng a parikut. Iti nagbaetan ti Oktubre ken Marso, agsasaruno ti panagsakitna isu nga agkarasublikami iti ospital. Kabayatanna, inkagumaak met nga impaayan iti atension dagiti annakmi a da David ken Marc. Idi agangay, dakkel ti naitulongda iti panagrang-ay ni Joel​—ken nakaskasdaaw dagiti resultana. Kas pagarigan, sumagmamano a doktor ti nangibaga kadakami a dinto pulos makapagna ni Joel. Ngem maysa nga aldaw, idi agtawen ni Joel iti uppat, kinuna ti anakmi a ni Marc, “Sige man Joel, ipakitam ken Nanang a makapagnaka!” Nasdaawak ta iti umuna a gundaway, nagna ni Joel! Naragsakankami isu a sangapamiliaankami a nagkararag ken Jehova tapno naimpusuan nga agyamankami kenkuana. No adda makitami nga uray bassit laeng a pagrang-ayanna, kanayon a naimpusuan a komendaranmi.

Nagbunga ti Nadiosan a Panangsanaymi Manipud Kinamaladagana

Agingga a posible, ikuyogmi ni Joel a makigimong. Tapno masalakniban kadagiti mikrobio a mamagsakit kenkuana, ikabilmi iti istroler a naabungotan iti plastik. Ngem iti laksid dayta, maragragsakan a makikadua kadagiti kakabsat.

Makapabileg dagiti kakabsat a mangipapaay kadakami iti ayat ken praktikal a tulong. Maysa a kabsat ti masansan a mangipalagip kadakami iti sasao iti Isaias 59:1: “Adtoy! Ti ima ni Jehova saan a nagbalin a nakaab-ababa tapno saan a makaisalakan, wenno ti lapayagna nagbalin a nakadagdagsen tapno saan a makangngeg.” Dagita a makaparegta a sasao ti timmulong kadakami nga agtalek ken Jehova.

Bayat a dumakdakkel ni Joel, inkagumaanmi a pinagbalin a dakkel a paset ti biagna ti panagserbi ken Jehova. Kanayon nga isaritami kenkuana ti maipapan ken Jehova iti pamay-an a mapatanorna ti nasged a panagayat iti nailangitan nga Amana. Impakaasimi ken Jehova a bendisionanna dagiti panagreggetmi tapno agbunga ti nadiosan a pannakasanayna.

Idi agtin-edyeren, naragsakankami a makakita a kaay-ayo ni Joel nga iranud dagiti kinapudno iti Biblia kadagiti makasaritana. Bayat nga agpapaimbag manipud iti narikut nga operasion idi agtawen iti 14, napalalo ti ragsakko idi kinuna ni Joel, “Nanang, mabalinko kadi nga ikkan ti siruhano iti libro nga Agbiag nga Agnanayon?” Kalpasan ti sumagmamano a tawen, masapul a maoperaan manen ni Joel. Ammomi a mabalin a dina malasatan dayta. Sakbay ti operasion, inted ni Joel kadagiti doktorna ti maysa a surat nga inaramidna babaen ti tulongmi. Nailawlawag iti dayta ti takderna mainaig iti dara. Insaludsod ti siruhano ken ni Joel, “Umanamongka kadi iti daytoy?” Determinado nga insungbatna, “Wen Doktor.” Maipagpannakkelmi ti panagtalek ti anakmi iti Namarsua ken ti determinasionna a mangay-ayo Kenkuana. Apresiarenmi unay ti suporta nga impakita dagiti empleado iti ospital.

Ti Naespirituan a Panagrang-ay ni Joel

Idi agtawenen iti 17, insimbolo ni Joel ti dedikasionna iti Dios babaen ti bautismo. Dimi malipatan dayta nga aldaw! Napalalo ti ragsakmi a makakita iti naespirituan a panagrang-ayna. Sipud idin, saan a pulos a bimmaaw ti ayatna ken ni Jehova ken ti regtana iti kinapudno. Masansan a kaay-ayo nga ibaga ni Joel iti tunggal makasaritana, “Ti kinapudno isu ti biagko!”

Iti maud-udi a paset ti kinatin-edyer ni Joel, nasursurona ti agbasa ken agsurat nupay saan a nalaka dayta. Dakkel a balligi ti tunggal ababa a sao a maisuratna. Sipud idin, mangrugi ti aldawna babaen ti panangusig iti inaldaw a teksto manipud iti Panangsukimat Kadagiti Kasuratan iti Inaldaw. Kalpasanna, ikarkarigatanna a kopiaen ti teksto iti kuadernona, ket iti agdama, maysa dagitan a makaay-ayo a koleksion!

Kadagiti aldaw ti gimong, siguraduen ni Joel a masapakami a mapan idiay Kingdom Hall tapno maabrasana ti amin a tumabuno. Bayat dagiti gimong, kaay-ayona ti agkomento ken mangiparang kadagiti demostrasion. Tumultulong met nga agipasa iti mikropono ken iti dadduma pay nga annongen. No ipalubos ti salun-atna, linawas a kumuyog kadakami a mangasaba. Idi 2007, naipakaammo iti kongregasion a nadutokan ni Joel kas ministerial nga adipen. Nakasangitkami gapu iti rag-o. Anian a naayat a bendision manipud ken Jehova!

Nariknami ti Pannaranay ni Jehova

Idi 1999, naipasangokami iti sabali pay a suot. Maysa a kaskasero a drayber ti nangdungpar iti luganmi, ket nakaro ti pannakadangran ni Luigi. Masapul a maputed ti maysa a sakana ken limmasat iti adu a narikut nga operasion ti durina. Babaen ti panagtalek ken Jehova, nariknami manen ti bileg nga ipapaayna kadagiti agkasapulan nga adipenna. (Fil. 4:13) Nupay nagtalinaed a baldado ni Luigi, ikagkagumaanmi a taginayonen ti positibo a panangmatmat. Gapu ta dinan kabaelan ti mangged, ad-adu ti panawenna ken Joel isu nga ad-adu met ti panawenko kadagiti naespirituan nga aktibidad. Ad-adu met ti panawen ni Luigi para kadagiti naespirituan a kasapulan ti pamiliami ken ti kongregasion, nga agtultuloy a pagserserbianna kas koordineytor ti bagi dagiti panglakayen.

Gapu iti saan a gagangay a kasasaadmi, ad-adu ti panawenmi nga aglalangen kas pamilia. Iti panaglabas ti panawen, nasursuromi ti agbalin a nainkalintegan ken saankami a mangnamnama iti nalablabes ngem iti posible laeng. No makariknakami iti pannakaupay, iyebkasmi dayta ken Jehova babaen ti kararag. Nakalkaldaang ta idi adulton da David ken Marc ken pimmanawdan iti podermi, in-inut a simmardengda nga agserbi ken Jehova. Mangnamnamakami nga agsublidanto met laeng ken Jehova.​—Luc. 15:17-24.

Iti panaglabas dagiti tawen, nariknami ti tulong ni Jehova ken nasursuromi ti agpannuray kenkuana iti tunggal karit a nakaipasanguanmi. Nangnangruna a nabagas kadakami dagiti sasao iti Isaias 41:13: “Siak, ni Jehova a Diosmo, ig-iggamak ti makannawan nga imam, Daydiay agkunkuna kenka, ‘Dika agbuteng. Siak tulongankanto.’” Makaliwliwa kadakami ti pannakaammo a siiirut nga ig-iggaman ni Jehova ti imami. Wen, talaga a maikunami a ti panangdaer kadagiti pakasuotan ket nangpabileg iti panagtalekmi iti nailangitan nga Amatayo a ni Jehova.

[Footnote]

[Dagiti Ladawan iti panid 16, 17]

Ni Joel ken ni nanangna nga Ada

[Ladawan iti panid 18]

Da Ada, Joel, ken Luigi

[Ladawan iti panid 19]

Kaay-ayo ni Joel nga abrasaen dagiti kakabsat iti Kingdom Hall