Naimbag a Damag Kadagiti Napanglaw

IPASIGURADO kadatayo ti Sao ti Dios: “Saanto a kanayon a malipatan daydiay napanglaw.” (Salmo 9:18) Kunaen met ti Biblia maipapan iti Namarsua kadatayo: “Uk-ukradem ta imam ken pempennekem ti tarigagay ti tunggal sibibiag a banag.” (Salmo 145:16) Saan laeng nga arapaap daytoy a namnama a nailanad iti Sao ti Dios. Maipaay ti Mannakabalin-amin a Dios no ania ti kasapulan tapno agpatingga ti kinapanglaw. Ania ti kasapulan dagiti napanglaw?

Kuna ti maysa nga Africano nga ekonomista a kasapulan dagiti napanglaw a pagilian ti “naparabur nga agturay.” Kayatna a sawen, tapno agpatingga ti kinapanglaw, masapul nga adda naasi ken mannakabalin nga agturay a mangaywan ken mangituray iti intero a lubong. Nasken dayta ta ti di patas a kasasaad dagiti pagilian ti kaaduanna a makagapu iti nakaro a kinapanglaw. Masapul a marisutna met ti makagapu iti kinapanglaw​—ti kinamanagimbubukodan ti tao. Adda kadi kasta nga agturay?

Imbaon ti Dios ni Jesus nga addaan iti naimbag a damag kadagiti napanglaw. Idi nagtakder ni Jesus tapno ibasana ti annongenna nga inted ti Dios, kinunana: “Ti espiritu ni Jehova adda kaniak, agsipud ta pinulotannak a mangideklara ti naimbag a damag kadagiti napanglaw.”​—Lucas 4:16-18.

Ania ti Naimbag a Damag?

Ti Dios dinutokanna ni Jesus kas Ari. Talaga a naimbag a damag daytoy. Isu ti maitutop nga Agturay a makapagpatingga iti kinapanglaw agsipud ta (1) adda pannakabalinna ken maiturayanna ti intero a sangatauan; (2) maasian kadagiti napanglaw ken isursurona dagiti pasurotna a maseknanda kadagitoy; ken (3) kabaelanna a pukawen ti makagapu iti kinapanglaw, ti natawidtayo a kinamanagimbubukodan. Usigentayo dagitoy a tallo nga aspeto ti naimbag a damag.

1. Maiturayan ni Jesus ti amin a nasion Kuna ti Sao ti Dios maipapan ken Jesus: “Kenkuana adda naited a panagturay . . . tapno dagiti ili, nasional a bungbunggoy ken pagsasao agserbida koma amin kenkuana a mismo.” (Daniel 7:14) Mailadawam kadi ti kasasaad no maymaysa laeng ti gobierno iti intero a lubong? Saanton a pagiinnagawan ti tattao dagiti gameng ti daga. Magunggonaanto ti amin. Impanamnama ni Jesus nga iturayannanto ti intero a lubong. Kinunana: “Isuamin nga autoridad naiteden kaniak idiay langit ken ditoy daga.”​—Mateo 28:18.

2. Maasian ni Jesus kadagiti napanglaw Iti intero a ministerio ni Jesus, naasian kadagiti napanglaw. Kas pagarigan, maysa a babai a nakabusbos iti amin a sanikuana iti panagpaagasna ti nangsagid iti kawes ni Jesus ta ninamnamana a maimbagan. Sangapulo ket dua a tawenen nga agsagsagaba iti panagbulos ti dara ken awan duadua nga agbebessagen. Sigun iti Linteg, agbalin a narugit ti asinoman a sagidenna. Ngem naasi kenkuana ni Jesus. Kinunana: “Anak, ti pammatim pinaimbagnaka. Mapanka a sitatalna, ket sumalun-atka koma iti nadagsen a sakitmo.”​—Marcos 5:25-34.

Nabileg ti pannursuro ni Jesus ta mabalbaliwanna ti kababalin dagiti tattao tapno agbalinda met a naasi. Kas pagarigan, usigem ti sungbat ni Jesus iti lalaki a nagsaludsod no kasano a maay-ayona ti Dios. Ammo dayta a lalaki a kayat ti Dios nga ayatentayo ti padatayo a tao, ngem insaludsodna ken Jesus: “Asino a pudpudno ti padak a tao?”

Kas sungbat, insalaysay ni Jesus ti nalatak nga ilustrasionna maipapan iti lalaki manipud Jerusalem a natakawan iti dalan nga agturong idiay Jerico sa nabaybay-an a ngannganin matay. Liniklikan ti padi a simmalog iti dayta a dalan, kasta met ti maysa a Levita. “Ngem ti maysa a Samaritano nga agdaldaliasat iti dalan dimteng kenkuana ket, idi makitana, simnek ti asina.” Dinalusanna dagiti sugat ti lalaki, impanna iti pagdagusan, ken binayadanna ti agay-aywan iti pagdagusan tapno taripatuenna ti nakabkabil a lalaki. Inyimtuod ni Jesus no asino ti kaarruba daydiay natakawan. “Daydiay nagtignay a siaasi kenkuana” insungbat ti napagsaludsodan. Ket kinuna ni Jesus: “Kasta met laeng ti aramidem.”​—Lucas 10:25-37.

Dagiti agbalin a Saksi ni Jehova ad-adalenda ti pannursuro ni Jesus ken balbaliwanda ti panangmatmatda iti itutulong kadagiti agkasapulan. Kas pagarigan, ti taga-Latvia nga autor ti libro a Women in Soviet Prisons inlanadna ti kapadasanna idi nagtrabaho iti pagbaludan idiay Potma idi katengngaan ti dekada 1960. “Bayat ti panagsakitko, tinaripatodak a nalaing [dagiti Saksi ni Jehova]. Nagsisingpetda.” Innayonna: “Ibilang dagiti Saksi ni Jehova a rebbengenda a tulongan ti amin, aniaman ti relihion wenno nasionalidadda.”

Idi naawanan iti trabaho ti sumagmamano a Saksi ni Jehova idiay Ancón, Ecuador gapu iti krisis iti ekonomia, inkeddengda ti agtitinnulong. Nagisaganada iti taraon nga ilakoda kadagiti agkalap iti rabii (ladawan iti kannawan). Timmulong ti amin a kameng ti kongregasion, agraman dagiti ubbing. Aglutoda iti ala una ti parbangon tapno nakasaganan ti taraon inton sumangpet dagiti bangka iti alas kuatro. Nagbibingayan dagiti Saksi ti naurnongda a kuarta sigun iti kasapulan ti tunggal maysa.

Ipakita dagitoy a kapadasan a ti ulidan ken pannursuro ni Jesus talaga a mabalbaliwanna ti panangmatmat dagiti tattao iti panangtulong kadagiti agkasapulan.

3. Kabaelan ni Jesus a balbaliwan ti kababalin ti tao Bigbigen ti kaaduan nga agannayas ti tao nga agbalin a naagum. Ti Biblia awaganna dayta iti “basol.” Insurat met ni apostol Pablo: “Masarakak, ngarud, daytoy a linteg iti kasasaadko: a no kayatko nga aramiden ti umiso, ti dakes ti adda kaniak.” Sana innayon: “Siasinonto ti mangalaw kaniak iti bagi nga agpaspasar itoy nga ipapatay? Pagyamanan iti Dios baeten ken Jesu-Kristo.” (Roma 7:21-25) Tuktukoyen ditoy ni Pablo no kasano a ti Dios, babaen ken Jesus, isalakanna dagiti pudno nga adipenna manipud natawidda a kinamanagbasol, a maysa kadagita ti panagimbubukodan, ti ramut ti kinapanglaw. Kasano a maaramidanna dayta?

Idi a ni Juan a Manangbautisar inyam-ammona ni Jesus, kinuna: “Kitaenyo, ti Kordero ti Dios a mangikkat iti basol ti lubong!” (Juan 1:29) Iti asidegen a masanguanan, mapnonto ti daga iti tattao a nawayawayaan iti natawid a basol, a pakairamanan ti panagimbubukodan. (Isaias 11:9) Iti dayta a tiempo, naikkatton ni Jesus ti pakaigapuan ti kinapanglaw.

Makaparagsak a panunoten nga addanton ti amin a kasapulantayo! Kuna ti Sao ti Dios: “Pudno nga agtugawdanto, tunggal maysa iti sirok ti puon ti ubasna ken iti sirok ti kayona a higos, ket awanto ti asinoman a mamagpigerger kadakuada.” (Mikias 4:4) Dagitoy a naindaniwan a sasao iladawanda ti tiempo inton addaanen ti amin a tao iti makapnek a trabaho, natalged a kasasaad, ken naragsak a biag iti lubong nga awanan iti kinapanglaw, agpaay a pakaidayawan ni Jehova.