Apay nga Ipalpalubos ti Dios ti Panagsagaba?

Michelle: Komusta Sophia?

Sophia: Nasayaat met.

Michelle: Maragsakanak ta nadanonka. Napagsaritaanta idi napalabas no maseknan ti Dios iti panagsagabatayo.a Naibagam idi a nabayagen a pampanunotem dayta, nangruna idi naaksidente ni nanangmo iti lugan. Ay wen gayam, komusta itan?

Sophia: Adda panawen a saan a nasayaat ti riknana, ngem okey met ita.

Michelle: Kasta kadi? Talaga a nagrigat ti agtalinaed a positibo iti agdama a kasasaadmo.

Sophia: Wen ngarud. No dadduma pampanunotek, ‘Kaanonto ngata nga agpatingga ti panagsagabana?’

Michelle: Normal laeng ti kasta a riknam. Malagipmo pay kadi idi naudi a bimmisitaak nga insaludsodko no apay nga ipalpalubos ti Dios ti panagsagaba ket kabaelanna met a pagpatinggaen dayta?

Sophia: Wen malagipko pay.

Michelle: Ngem sakbay a kitaenta ti sungbat ti Biblia, repasuenta pay ti sumagmamano a punto a napagsaritaanta idi.

Sophia: Sige.

Michelle: Umuna, naammuanta nga uray ti matalek a tao idi panawen ti Biblia, insaludsodna met no apay nga ipalpalubos ti Dios ti panagsagaba. Ngem saan a binabalaw wenno imbaga ti Dios kenkuana a kasapulanna ti nabilbileg a pammati.

Sophia: Wen, naibagam dayta idin.

Michelle: Napagsaritaanta met a saan a kayat ti Dios nga agsagabatayo. Kas pagarigan, kuna ti Biblia nga idi marigrigatan ti ilina, “isu naparigatan.”b Saan kadi a makaliwliwa a maammuan a makipagrikna ti Dios iti panagsagabatayo?

Sophia: Siempre, makaliwliwa.

Michelle: Kamaudiananna, nagtungtonganta a gapu ta Mannakabalin-amin ti Namarsua kadatayo, kabaelanna a pagpatinggaen ti panagsagaba iti aniaman a kanito.

Sophia: Dayta ngarud ti diak maawatan. Apay nga ipalpalubos ti Dios a mapasamak dagiti dakes a banag idinto ta kabaelanna met a pasardengen dagita?

Michelle: Tapno maammuanta ti sungbat, kitaenta ti Genesis nga umuna a libro ti Biblia. Pamiliarka kadi iti salaysay maipapan kada Adan ken Eva ken ti maiparit a bunga?

Sophia: Wen a. Naadalmi idi dayta iti Sunday school. Imbaga ti Dios a dida mangan iti bunga ti maysa a kayo, ngem nanganda latta.

Michelle: Hustoka. Ita, kitaenta no ania ti makagapu a nagbasol da Adan ken Eva. Adda dakkel a pakainaigan dayta no apay nga agsagsagabatayo. Pakibasam man ti Genesis kapitulo 3, bersikulo 1 agingga iti 5?

Sophia: Sige. “Ita ti serpiente isu idi ti kaannadan kadagiti amin nga atap nga animal iti tay-ak nga inaramid ni Jehova a Dios. Gapuna rinugianna a kunaen iti babai: ‘Pudno kadi a kinuna ti Dios a dikay mangan manipud iti tunggal kayo iti minuyongan?’ Gapu itoy kinuna ti babai iti serpiente: ‘Iti bunga dagiti kayo iti minuyongan mabalinmi ti mangan. Ngem no maipapan ti pannangan iti bunga ti kayo nga adda iti tengnga ti minuyongan, kinuna ti Dios, “Dikay mangan manipud iti dayta, saan, dikay sagiden dayta tapno saankayo a matay.”’ Gapu itoy kinuna ti serpiente iti babai: ‘Sigurado a saankayto a matay. Ta ammo ti Dios nga iti mismo nga aldaw a pannanganyo manipud iti dayta sigurado a maluktan dagiti matayo ket sigurado nga agbalinkayo a kas iti Dios, a makaammo iti naimbag ken dakes.’”

Michelle: Pagyamanan. Usigenta biit dagitoy a bersikulo. Umuna, mabalin a nadlawmo a nakisarita ti uleg ken ni Eva. Kuna ti sabali a teksto ti Biblia a ni Satanas a talaga ti nakisarita ken Eva.c Dinamagna ken Eva ti bilin ti Dios maipapan iti maysa a kayo. Ammom kadi no ania ti imbaga ti Dios a dusa da Adan ken Eva no manganda iti bunga dayta?

Sophia: Matayda.

Michelle: Umiso. Ngem paliiwem ti simmaruno nga imbaga ni Satanas: “Sigurado a saankayto a matay.” Nadlawmo kadi nga ak-akusaranna ti Dios, nga ibagbagana nga ulbod!

Sophia: Wen nga agpayso aya?

Michelle: Ket idi imbaga ni Satanas nga ulbod ti Dios, imbangonna ti isyu nga agkasapulan iti panawen tapno marisut dayta. Ammom kadi no apay?

Sophia: Hmm. Saan.

Michelle: Tapno nalawlawag kenka, panunotem daytoy. No ngay ibagak a napigpigsaak ngem sika, ania ti aramidem tapno mapaneknekam nga umiso ti ibagbagak?

Sophia: Agsinnubokta a.

Michelle: Wen hustoka. Mabalin a sumapulta iti nadagsen a banag sa kitaenta no asino kadata ti makabagkat. Kinapudnona, alisto laeng a mapaneknekan no asino ti napigpigsa.

Sophia: Matarusakon ti puntom.

Michelle: Ngem no ngay ibagak nga ad-adda a mapagpiaranak ngem sika imbes nga ibagak a napigpigsaak? Saan kadi a narigrigat a paneknekan dayta?

Sophia: Wen a.

Michelle: Saan ngamin a basta mapaneknekan ti kinamapagpiaran kas iti panangsubok iti kinapigsa.

Sophia: Saan a talaga.

Michelle: Ngarud, ti kakaisuna a pamay-an tapno mapaliiw ti sabsabali no asino kadata ti ad-adda a mapagpiaran ket babaen iti panangpalabas ti umdas a panawen.

Sophia: Matarusakon ti kayatmo a sawen.

Michelle: Ita, kitaem manen ti salaysay ti Genesis. Imbaga kadi ni Satanas a napigpigsa ngem iti Dios?

Sophia: Saan.

Michelle: Nalaka laeng koma a paneknekan ti Dios a di umiso ni Satanas. Ngem ibagbaga ni Satanas nga ad-adda a mapagpiaran ngem iti Dios. Arigna kinunana ken Eva, ‘Agul-ulbod kenka ti Dios, ngem pudno ti ibagbagak kenka.’

Sophia: Naawatakon.

Michelle: Ngarud, gapu ta masirib ti Dios, ammona a ti kasayaatan a solusion tapno marisut ti isyu ket palabsenna ti umdas a panawen. Iti kasta, makitanton no asino ti agibagbaga iti pudno ken no asino ti agul-ulbod.

Sophia: Ngem idi natay ni Eva, saan kadi a paneknekan dayta a pudno ti ibagbaga ti Dios?

Michelle: Wen, ngem ad-adu pay ti ramanen ti karit ni Satanas. Basaem manen ti bersikulo 5. Nasiputam kadi no ania pay ti imbaga ni Satanas ken Eva?

Sophia: Imbagana a no mangan ni Eva iti bunga, maluktanto dagiti matana.

Michelle: Wen, ken kinunana pay nga ‘agbalinto a kas iti Dios, a makaammo iti naimbag ken dakes.’ Isu a pagparparangen ni Satanas nga adda ipapaidam ti Dios iti tao.

Sophia: Kasdiay gayam.

Michelle: Ket dakkel met nga isyu dayta.

Sophia: Ania ti kayatmo a sawen?

Michelle: Ibagbaga ni Satanas a nasaysayaat ti kasasaad ni Eva, agraman ti amin a tao no awan ti panangituray ti Dios. Kasta met, ammo ni Jehova a ti kasayaatan a pamay-an tapno marisut dayta a parikut ket palubosanna ni Satanas a mangpaneknek no pudno ti imbagana. Gapuna, inikkanna ni Satanas iti gundaway a mangituray iti sangatauan. Dayta ti makagapu a nakaro ita ti panagsagaba​—gapu ta ni Satanas ti agturturay iti lubong, saan a ti Dios.d Ngem adda naimbag a damag.

Sophia: Ania ngay dayta?

Michelle: Isursuro ti Biblia ti dua a nagsayaat a kinapudno maipapan iti Dios. Umuna, maseknan ni Jehova no agsagabatayo. Kas pagarigan, kitaem ti sasao ni Ari David a nairekord ditoy Salmo 31:7. Iti intero a panagbiagna, adu a rigat ti napasaran ni David, ngem siputam ti inkararagna iti Dios. Pakibasam man?

Sophia: Kunana: “Agrag-oakto ken agragsakak iti naayat a kinamanangngaasim, ta nakitam ti pannakaparigatko; naammuam ti maipapan kadagiti tuok ti kararuak.”

Michelle: No kasta, uray no nagsagaba ni David, naliwliwa ta ammo ni Jehova amin a mapaspasaranna. Maliwliwaka met kadi gapu ta ammo ni Jehova amin a mapaspasamak, uray dagiti pakadanagantayo a di maawatan ti padatayo a tao?

Sophia: Siempre a.

Michelle: Maikadua, saan nga ipalubos ti Dios nga agtultuloy nga agsagabatayo. Isursuro ti Biblia nga asidegen a pagpatinggaenna ti dakes a turay ni Satanas. Naan-anay nga ikkatenna amin a panagsagaba, agraman ti mapaspasaranyo ken nanangmo. Mabalin kadi nga agsubliakto inton umay a lawas tapno ipakitak no apay a masiguradotayo nga asidegen a pagpatinggaen ti Dios amin a panagsagabatayo?e

Sophia: Sige, agsublikanto.